2 Samụẹl 24 - Kịrịkẹnị Baịbụl

Devid Ḅe Tomoni Ma Kịẹnmẹ

¹ Gbọrị sịkị ḅụ Nyanaḅọ Ḅe ọ̀ pịkị Izrẹl ḅụ ịganị nyanamẹ, se ò Devid ḅe mịẹse ọ̀ ḅụfụka ọkịḅo inia ọgọnọ gbanamẹ. Nyanaḅọ Ḅe nwọse ọ̀ ḅẹmẹ, “Mun Izrẹl mị na Juda mị na ḅie tomonima kịẹn.”

² Anịẹrẹchị Devid ḅe kụrọ se oria ọmụgbin tịḅịnịḅọ Joab ḅe pịrịmẹ: “Ị́ya fịrịnwẹngịapụma na mun Izrẹl sẹ mị ḅie sime sẹ sẹ mamgba ḅie sime a tomonima kịẹn nemi, gbọrị ịkọlị ọkịmun ísí ịkọlị la. À ḅimẹ ini ḅaka laḅara à nwọ nemi.”

³ Ọkụma Joab ḅe nwọse amanyanaḅọ ḅe pẹkẹrẹmẹ, “Amanyanaḅọ, ye Nyanaḅọ ị́ Tamụnọ Ḅe mịẹse Izrẹlapụma kịnị-a sọnọasi se ḅakatẹịn mịọkụ ini la-ọkụ mị nẹngị, ye ị́ ori anị mịẹḅịa ọkụ mị ị́ nwọ ọrị sịkị la. Ọkụma cheye gose ị́rị́ Amanyanaḅọ ḅe mịn mị mịẹ-ao?”

⁴ Ọkụma amanyanaḅọ ḅe ò Joab ḅe na oria fịrịnwẹngịapụma na mịẹmẹ, ini ò ḍukoye mị mịẹ; ini ọ̀ tọrụkuḅu nwẹngị so se mun Izrẹlapụma kịẹn-ẹmunmẹ.

⁵ Ini Jọdan mị saḅakoro se Aroa mị ḅụ chuku daọrụ ḅụ ikowarị pike simemẹ, anị pẹsịkiri mị ḅie ogboku ḅụ sime opuama Gadị mị pẹkẹrẹ ḅụ. Anịju ḅụ ini ọgọnọ ọrụḅụ ḅọrọ mun Jiza mị lamẹ,

⁶ pịkị ọkịmun Giledị na Kedẹsh na lamẹ; Hitaị apụ eke mị ḅụ. Anịsịkị ini so Danị mun mẹ, se Danị ḅụ ini ịrụasọsọ nyọ daọrụ ḅọrọ mun Saịdọn mị lamẹ.

⁷ Anịsịkị ini so chuku daọrụ ḅụ kụrọ owuni ama Taya mị lamẹ, ini pịkị ḅọrọ mun Hivaị opuama mamgba na pịkị Kenan na lamẹ, se kuluma ḅụ ini mun Biashiba mị lamẹ anị Juda ḅụ chuku daọrụ mị.

⁸ Ḅo esenie-a akalụ na si ḍin lasịkị ini pịkịna so Jerusalẹm mun mẹ, ini sẹ mị mgba kelema so sịkị.

⁹ Izrẹl ḅie ọmụgbin lasapụ ḅụ ini se amanyanaḅọ ḅe pịrị kịẹn ḅịpị anị kịnị poku-a sọnọasi anịsịkị Juda mị ḅie kịnị poku-a tesi ma poku fịnjị.

¹⁰ Devid ḅe ọ̀ kịẹn ḅịpị mị ọkị-so-sịkị ò kuḅie sakị ọ̀ ḅụ ḅalaḅalamamẹ, se ọ̀ nwọse Nyanaḅọ Ḅe ḅẹmẹ, “Àrị opu si mịẹsam à mịn mị mịẹye mị ḅụ! Pasisi ḅarasin ị̀ pịrị. À yenemikaye mịẹsam.”

^11-12 Nyanaḅọ Ḅe nwọse Gadị, Devid ịkịankoroḅọ ḅe ḅẹmẹ, “Mun ḍuko Devid ḅe pịrị tẹrẹ aye à nwọse ọ̀ tọrọkọ koromaḅẹ ọ̀ sẹlẹ ọkịḅịaye. Arịa ḅie ọ̀ sẹlẹ ọkịye mị anị à mịẹḅịaye-ẹ.” Jịn ene ḅa dede ḅie, Devid ḅe mọnọ kiri ḅụ sịsẹ-se-so,

¹³ Gadị ḅe ọ̀ dama mun Nyanaḅọ Ḅe ḍukoye mị ḍuko ọ̀ pịrịmẹ, se ò gbelamẹ, “Ndeye ị́ nwọ sẹlẹ? Tẹrẹ-a kụra ḅie ḅuruḅaa ọ́mịna ama ḅie sọ, anịkanịka tẹrẹ akalụ ọ́ nwọse ómine-na-tarakapụma gose ọ́mịna ama ḅie mangị paka so, anịkanịka tẹrẹ-a ḍin ḅụ nweni ḅaaḅaa amanwẹngị obi ọ́mịna ama ḅie sọ na? Mịọkụ anị-se-koroma ḅụ chu, se à pịkịma mun ḍuko Nyanaḅọ Ḅe pịrịḅịa pẹkẹrẹ ḅịpị seni ị̀ pịrị.”

¹⁴ Devid ḅe pẹkẹrẹmẹ, “Opu ḅụḅalaḅala ḅie àrị omi-ẹ mịọkụ! Ọkụma tomoni ḅara fomuye à nwọ ḅikẹ. Ye Nyanaḅọ Ḅe na mịnaḅụ na ḅụfụka mị se wa pịrị anịatịḅị ò ḍikitịḅịfoin nyanamẹ.”

¹⁵ Anịẹrẹchị Nyanaḅọ Ḅe gbọrị amanwẹngị-nweni-ḅaaḅaa obi seni Izrẹl mị fịrịmamẹ. Obi mị anị dede ḅie ḅụ anị sime ọkịmun ọ̀ sẹlẹ ọkị sịkị mị lamẹ. Sẹ mị ḅie ḅụ gbọrị ịkọlị ḅụ ọkịmun ísí ịkọlị la, kịnị-a nine-a poku na jie ẹndẹ Izrẹl ḅie fịmẹ.

¹⁶ Nyanaḅọ Ḅe enjẹlḅọ ḅe Jerusalẹm mị fama-ẹtọn sịkị mị ḅụ, Nyanaḅọ Ḅe, fomuḅara se tomonima pịrị mị ḅụ ori ò kuḅie ḍinma se nwọse tomonima ḅaa àrị enjẹlḅọ ḅe ḅẹmẹ, “Dachịẹma! Iḅisam!” Anịsịkị ḅụ enjẹlḅọ ḅe Jebusḅọ Arona ḅe oria ịpịamgba pịsịrị nyọ ḅụ ori omi-ẹ.

¹⁷ Devid ḅe, ò nweni ma ḅaa àrị enjẹlḅọ ḅe ọrịmẹ, se nwọse Nyanaḅọ Ḅe ḅẹmẹ, “Ị̀rị̀ anị ḅẹrẹḅarasi nyanaḅọ ḅe-ẹ. Ị̀rị̀ anị siye mị mịẹḅọ ḅe-ẹ. Mịna ḅẹrẹnemikapụma ini che mịẹ? Fomuḅara mị se ị̀rị̀ na ị̀ furo mị na pịrị.”

¹⁸ Anị gbọrị ene ḅie Gadị ḅe ò Devid ḅe dama mun se nwọseni ọ̀ ḅẹmẹ, “Iwo Arona ḅe oria ịpịamgba pịsịrị nyọ mị mun se gbọrị agbamịẹ ẹbẹ nama Nyanaḅọ Ḅe pịrị.”

¹⁹ Devid ḅe ọ̀ Nyanaḅọ Ḅe ḅịpị pokimẹ se mun Gadị ḅe ḍuko ọ̀ pịrịye mị mịẹmẹ.

²⁰ Arona ḅe tu-kiri-ḍiki se amanyanaḅọ ḅe na oria fịrị tịḅịnịma na ọ̀ damaḅoarị ọkụ ọrịmẹ. Ori ọ̀ ḅụ se chama kiri gbinmẹ Devid ḅe tọrọkọ

²¹ se gbelamẹ, “Amanyanaḅọ cheye gose ị́ mịanga ḅo?” Devid ḅe pẹkẹrẹmẹ, “Ị́ya ịpịamgba pịsịrị nyọ mị fẹ se anị seni agbamịẹ ẹbẹ nama Nyanaḅọ Ḅe pịrịḅịaye ẹrẹchị-ẹ mịẹsosịkị nweni ḅaaḅaa amanwẹngị obi mị dachịẹḅịa ḅara.”

²² “Anị ọkị, Amanyanaḅọ,” Arona ḅe ọkọ ḅẹmẹ se “ị́ ḅụḅẹlẹḅara nwọ seni agbamịẹ Nyanaḅọ Ḅe pịrị. Mịanga nambulo omi-ẹ ị́ seni agbamịẹ ẹbẹ mị ọgọnọ dọkịma agba mịẹḅịa aye, nwọ arịa kọngọ-gbana-chịn ma na, ịpịamgba pịsịrị ḍụpọma na, ị́ se fịnị mịẹ tọnọḅịaye-ẹ.”

²³ Arona ḅe ori arịmgba se amanyanaḅọ ḅe pịrị se nwọ seni ọ̀ ḅẹmẹ, “Ye Nyanaḅọ ị́ Tamụnọ Ḅe ị́ya ḍiepịrịye agba mị ọkị.”

²⁴ Ọkụma amanyanaḅọ ḅe nwọ pẹkẹrẹmẹ, “Ẹn-ẹn, anị laye à nwọ gbẹịn ị́ pịrịḅịa. Ị̀ Nyana Tamụnọ Ḅe, ị̀ ḅara igbiki famakaye à nwọse agbamịẹ ọ̀ pịrị ẹkẹ.” Ịpịamgba pịsịrị nyọ mị na, nambuloma na; seleḅa pẹkẹrẹ-a mesi oyi fịnjị ọ̀ nwọse àrị fẹmẹ.

²⁵ Anịsịkị ori agbamịẹ ẹbẹ nama Nyanaḅọ Ḅe pịrị se dọkịma agba na gboloma agba na mịẹmẹ. Nyanaḅọ Ḅe ori oria tẹkẹ mị pẹkẹrẹ se Izrẹl ḅie nweni ḅaaḅaa-ama-nwẹngị obi mị dachịẹmamẹ.