2 Samụẹl 23 - Kịrịkẹnị Baịbụl

Devid Ḅe Oria Kuluma Ọkwẹịn Ma

¹ Jẹsi ya Devid ḅe ori anị Tamụnọ Ḅe se opuḅọ mịẹḅọ-ẹ, anị Jekọb Tamụnọ Ḅe sẹlẹ se amanyanaḅọ mịẹḅọ-ẹ, pịkị ḅẹlẹ-a nime chu Izrẹl mị pịrịpịrịḅọ-ẹ. Ma ma anị Devid ḅe oria kuluma ọkwẹịn ma-ẹ:

² Nyanaḅọ Ḅe tẹmẹ mị ị̀ ḅụ ḅọrọ ọkwẹịn mẹ; oria oku mị ị̀ ḅẹlẹ ḅụ anị omi-ẹ.

³ Izrẹl Tamụnọ Ḅe ori ọkwẹịn sam; Izrẹl mị ḍikiḍikiarị ḅọ ḅe nwọse ị̀ ḅẹmẹ; “Karakara ḅẹrẹtọn amanyanaḅọ ḅe, Tamụnọ ḍikiḅalafa ḅụ ọ̀ wẹrị ḅẹrẹtọn ḅịa,

⁴ anị so-oḅuto sotọrụ ofori se dede ịrụa paka ọkụ anị ò sime ọkụ-ẹ, anị ene koro lasa osuein ịrụa nwọ mịẹ wananị wananị ma ọkụ.”

⁵ Anị Tamụnọ Ḅe ị̀ furoḅie pakaḅoḅịa apụma ḅẹlẹma ḅịa ọkụ-ẹ, anịatịḅị ori ị̀rị̀na-ḅeneḅene ọḅọkụ fịsam, ngịsị kan ẹka ḅịpị ogbosọ, ḍinma nyanaka yeḅereni ḅịpị. Anị à ḅiḅara mị-ẹ; anị ị̀ya ọmụḅaraiḅi mị-ẹ, se Tamụnọ Ḅe pikipikiye ofori-ẹ ọ̀ mịẹḅịa anị ḅụọ nyana chịẹḅịa.

⁶ Ọkụma Tamụnọ nemikapụ ma ini se gbin wokumasa nangị sime ọkụ anị ini sime ọkụ-ẹ; ineda papa ḅara se ini lamaḅịaḅọ ofori-ẹ.

⁷ Ikulele fịrịnwẹngịye anịkanịka angwa ị́ nwọ ọlọḅịa; ini gbọtụma dọkị kịrịpụḅịa.

Devid Ḅe Oria Ẹrẹpaka Owuni Ma

⁸ Ma ẹrẹ ma anị Devid ḅe oria ẹrẹpaka owunima ẹrẹ ma-ẹ: tatarịḅọ anị Joshẹb Bashibẹt, Takimọn ḅie ḅo ḅọ-ẹ, ori “Tẹrẹ Apụ Ma” ḅụ tịḅịnịḅọ-ẹ, oria angwa mị ò se kịnị-a mẹndẹ na owu sọmẹ se ori inimgba ḅaa famamẹ gbọrị owu ḅieḅụ.

⁹ Tẹrẹ apụma ḅie maịn karama ẹrẹpakaḅọ anị Ẹleaza Dodo yaḅe-ẹ, Aho sẹ mị ḅie ḅọ-ẹ. Gbọrị ene ori na Devid ḅe na Filistiapụma dapakamẹ anị ini koḅiria se ọmụ gbinḅịa nyọ ḅụ. Izrẹlapụma ini ọḅụ damẹ,

¹⁰ ọkụma ọ̀ kụrọma chịẹmẹ ḅerenika ḅara ḅụ Filistiapụma na ọmụ gbin nweni ọkịḅo ọ̀ ḅara mị kongo mị na oḅoloma se ọ̀ ḅarị ineda kongo mị ḅụ ọ̀ ḅara pọkọkẹ. Anị ene Nyanaḅọ Ḅe ori opu ọmụḅaraiḅi nyanamẹ. Anị mị ḅọrọ sịkị, Izrẹlapụma pịkịma Ẹleaza ḅe sime nyọ ḅo se fịapụma ḅụ owuni-a ḅụchụayema sinmẹ.

¹¹ Tẹrẹ apụma ḅie tẹrẹ karama ẹrẹpakaḅọ anị Shama, Agi yaḅe-ẹ, Hara ḅieḅọ ḅe Filistiapụma Lehai ḅie ḅụ ini koḅirimamẹ, obe chịn ḅein gbọrị ozu ḅie. Izrẹlapụma ini mangị Filistiapụma pịrịmẹ,

¹² ọkụma Shama ḅe ḍụkụka se kụrọma ozu mị ḅie chịẹ, ọmụgbin se Filistiapụma ḅaamẹ. Nyanaḅọ Ḅe ori opu ọmụḅaraiḅi nyanamẹ anị ene ḅụ.

¹³ Fịaye soku sịkị mị ḅo kpeki sịkị, “Kịnị Soi” ma ḅie tẹrẹ apụ koro Adulam pokolo mị ḅie mun mẹ anị Devid ḅe sime nyọ mị, anịsịkị Filistiapụma ḅụ gbọrị kpo Rifeim Pẹsịkiri mị ḅie ḅụ ikowarịma pike sime waraḅẹ.

¹⁴ Anịsịkị mị ḅụ Devid ḅe oria kụrọ owunima kụrọma gbori kelema gbọrị chịngị ọgọnọ ḅụ ori omi-ẹ, anịsịkị Filistiapụma ḅụ gbọrị kpo pịkị Bẹtlihẹm ḅie kiri nyana sime waraḅẹ.

¹⁵ Devid ḅe ama mun ọ̀ tarị se ọ̀ nwọ ḅẹmẹ, “À ḅiḅịa mgbọkụ gbọrịḅọ mun Bẹtlihẹm onu ḅọkọ mị anga sịkị ḅụ sime olulu ḅie mengi ḍu ḅo ị̀ pịrị se à ḅuḅịaka!”

¹⁶ Ini tẹrẹ-a ẹrẹpaka owunima, Filistiapụma ikowarị pike sime nyọ mị ḅie kụrọ ḅara se kan tolu mun olulu mị ḅie mengi ọkị se pịkịmaḅo Devid ḅe pịrịmẹ. Ọkụma ori anị ḅukẹ, anịnakaraka ori anị ọsụn se ḍiepịrịye agba mịẹ se Nyanaḅọ Ḅe pịrịmẹ

¹⁷ se nwọ ḅẹmẹ, “Nyanaḅọ, àrị ngịsị ineda mịn mị ḅu ẹkẹ! Anị simeḅịa ḅara anị mịna apụma inia ḍumo abalakapụ ma pulo ḅu ọkụ simemẹ!” Anịẹrẹchị ò ḅuḍụkụkẹ. Anị ini tẹrẹ-a owunima kuḅie kụrọ ḅụ mịẹaye-ẹ.

¹⁸ Joab numbireowu Abishaị ḅe (inia nyengi anị Zẹruaya ma-ẹ) anị “Ẹrẹpaka Owuni Soi” ma ḅie tịḅịdaḅọ-ẹ. Oria angwa mị ọ̀ nwọse kịnị-a jieasi na owusọ se ini ḅaamẹ, se ò ḅo “Kịnị Soi” ma ḅie ẹrẹpakaḅọ sọmẹ.

¹⁹ “Kịnị Soi” ma ḅie oria ẹrẹpakatẹịnmẹ se ò ḅo inia tịḅịnịḅọ sọmẹ, ọkụma ini “Tẹrẹ Apụ” ma ẹrẹpaka ọkụ, oria ẹrẹ ọkọ se pakakẹ.

²⁰ Bẹnaya, Jẹhoịada ya Kabziẹlḅọ ḅe ori sọnị gbọrị ẹrẹpaka owuni ḅọ-ẹ; ọ̀ ḅakama kuḅie kụrọaye mịẹmẹ, ọmụgbin ḍin mama Moab opu owuni ọ̀ nwọ ḅaamẹ. Gbọrị sịkị ọ̀ gbọrị olulu ḅie koro mun gbọrị chịrịḅa ḅaamẹ, ene opuma oḅoku gbọrị ene ḅụ.

²¹ Ọ̀ pịkịna opuma ḍụḅa gbọrị Ijiptḅọ ḅaamẹ, tomoniḅọ ḅe angwa ọ̀ ḅara omi-ẹ. Bẹnaya ḅe ọ̀ ḅara sime chịn ikiḅa ọ̀ nwọse owu se nweniḅọ ḅe paka se, Ijiptḅọ ḅe ḅara ḅie kụrọ ḅara se angwa mị ọkị anị se ọ̀ ḅaamẹ.

²² Àrị ma anị Bẹnaya ḅe mịẹ kuḅie kụrọaye-ẹ anị “Kịnị Soi” ma ḅie gbọrịḅọ ḅe.

²³ Inia ḅie oria ẹrẹ somẹ, ọkụma oria ẹrẹ ini “Tẹrẹ Apụ” ma ẹrẹ so ọkụ sokẹ. Devid ḅe ori ò seni ò ḍikiḍikiapụ ma ḅụ tịḅịnịḅọ mịẹmẹ.

^24-39 Mịna apụma anị “Kịnị Soi” ma ḅie sime ísíapụ ma-ẹ: Asahẹl, Joab numbireowu ḅe Ẹlhanan, Dodo ya Bẹtlihẹmḅọ ḅe Harọd apụ Shama ḅe na Ẹlaịka ḅe na Hilẹz, Pilẹtḅọ ḅe Ịra, Ikẹsh ya Tẹkoaḅọ ḅe Abaịeza, Anatọtḅọ ḅe Mẹbunaị, Hushaḅọ ḅe Zalmọn, Ahoḅọ ḅe Maharaị, Nẹtofaḅọ ḅe Hilẹb, Beana ya Nẹtofaḅọ ḅe Ịtaị, Ribaị ya Bẹnjamin Sẹ Gibia ama ḅieḅọ ḅe Bẹnaya, Paịratọnḅọ ḅe Hidaị, Geash na kpeki pẹsịkiri ma ḅieḅọ ḅe Abaịalbọn, Arabaḅọ ḅe Azmavẹt, Buhurimḅọ ḅe Ẹlaịaba, Shealbọnḅọ ḅe Jeshẹn awọma Jonatan Shama, Haraḅọ ḅe Ahayam, Shara ya Haraḅọ ḅe Ẹlifẹlẹt ya Ahasbaị, Meakaḅọ ḅe Iliam, Ahitofẹl ya Giloḅọ ḅe Hẹzrọ, Kamẹlḅọ ḅe Pearaị, Arab ḅọ ḅe Igal Netan ya Zobaḅọ ḅe Banaị, Gadịḅọ ḅe Zilẹk, Amọnḅọ ḅe Naharaị, Biarọtḅọ, Joab agbọ dekiḅọ ḅe Jata ḅie ḅo Ịra ḅe na Gerẹb ḅe na Yuraya, Hitaịḅọ ḅe na. Inimgba tẹrẹfa-kịnị-a mesi ẹrẹpaka owuni-ẹ.