2 Samụẹl 21 - Kịrịkẹnị Baịbụl

Sọl Furo Ḅie Apụ Ma Ini Ini Ḅaamẹ

¹ Devid ḅe amanyana ḅụ sime sịkị ḅụ, tẹrẹ-a kụra ḅie opu ḅuruḅaa ama mị ḅie sọmẹ. Anịẹrẹchị Devid ḅe ọ̀ Nyanaḅọ Ḅe gbelamẹ anị gose ọkọ pakaye, se Nyanaḅọ Ḅe nwọ ḅẹmẹ, “Sọl ḅe na oria furo mị na ninikọn ḅe ḅẹrẹ ḅarasi ini nwọ nyanamẹ, anị ò Gibiọn apụma ḅaa ye gose.”

² (Gibiọn apụma Izrẹlapụkẹ; ini anị Amọraị apụma ḅụ kala kpo-ẹ, anị Izrẹlapụma ḅereni ini pịrịmẹ na ini ini ḅaa-ẹkẹ nwọ ḅẹ apụ ma-ẹ, ọkụma mịẹsosịkị Sọl ḅe, Izrẹlapụma na Judapụma na oria kụrọ mị nemi-ẹ nwọḅẹye ẹrẹchị ori ini ḅaasinmẹ.)

³ Anị Devid ḅe Gibiọn apụ mamgba chịn koḅirima se nwọse ini ḅẹye-ẹ, “Cheye à nwọ mịẹ ọ́ pịrịḅe? À ḅimẹ ini se ọ́ mịẹ siaye ma à nwọ tẹlịma ọ́ pịrị, mịẹsosịkị ọ́ ḅẹlẹma se Nyanaḅọ Ḅe a tomonima pịrịḅịa ọkụ.”

⁴ Ini nwọ pẹkẹrẹmẹ, “Sọl ḅe na, ò furo mị na, mine na nyana ḅẹrẹ mị; goli anịkanịka seleḅa sọnị ineda anị deinmaẹkẹ, wa pịkị gbọrị Izrẹlḅọ sọnị ḅaa ḅikẹ.” “Anịsịkị ó koroma ḅara cheye à nwọ mịẹ se ọ́ pịrị na iḅi?” Devid ḅe nwọse ini gbelamẹ.

⁵ Ini nwọ pẹkẹrẹmẹ, “Sọl ḅe ò ḅimẹ ò mine mgba ḅaafama, mịẹse mịna ḅụ gbọrịḅọ sọnị kọn ẹka ḅara Izrẹl sẹ mị ḅie.

⁶ Anịẹrẹchị oria awọma ḅụ sọnọma apụ ọ́ nwọse wa pịrị, Gibia ḅie Nyanaḅọ Ḅe tọrọkọ ḅụ wa ini kpọ ḅaaḅịa, anị Sọl, Nyanaḅọ Ḅe sẹlẹọkịsa amanyanaḅọ ḅe ama mị ḅie.” “Àrị ini seni ọ́ pịrịḅịa,” amanyanaḅọ ḅe nwọ pẹkẹrẹmẹ.

⁷ Ọkụma ori na Jonatan ḅe na fị osi nyana ọḅọkụ mị gose, Devid ḅe Sọl ya Jonatan tọkụ Mẹfịboshẹt ḅe ọ̀ ḅara se ọ̀ lamakẹ.

⁸ Amanyanaḅọ ḅe Aịa ḅe ḅarọ Rizpa ma yi Sọl ḅe pịrị mama owuapụ awọ, Amọnaị ḅe na Mẹfịboshẹt ḅe na ọ̀ nwọ ọkịmẹ; pịkị Sọl ḅe ḅarọ Mirab ma yi Bazilaị anị Mẹholaḅọ ḅe ya Adriẹl ḅe pịrị sọnọ-a owuapụ awọma na.

⁹ Devid ḅe ini ḅọrọma Gibiọn apụma pịrịmẹ se tụndụ mị ọgọnọ Nyanaḅọ Ḅe tọrọkọ ini ini kpọ ḅaamẹ—ini sọnọmapụ mamgba anịsịkị mị ḅụ ini fịmẹ. Ini ini ḅaa sịkị mị fịaye soku sịkị mị sakị àrị sịkị mị-ẹ, ini pịkị sakị irumịẹ ịpịamgba nwọ pẹlẹaḅẹ.

¹⁰ Anịsịkị Aịa ḅa, Sọl ḅe oria ịgwa eremeniḅọ Rizpa ma, ḍụẹịn ḍin ḅịtẹ nwọse ḍụẹịn ma sara sime ḍụparị mị gbẹịn wasama á ḅụ pịrịmẹ, se anịju ḅụ simemẹ, fịaye soku sịkị mị ḅụ ọkịmun ene sakị koro arịa ọgọnọ sara sịkị lamẹ. Enekaka ḅụ á fenima desin mẹ ḍụẹịn ma ḅụ, á pịkị ḍin ḅụ ḍụẹịn ma kpa mẹ owoi-a namama gose.

¹¹ Rizpa ma mịẹye mị Devid ḅe nwọ naa sịkị,

¹² ò mun Giledị ḅie Jebẹsh apụma ḅara Sọl ḅe na yayo Jonatan ḅe na imgbe ma nwọ ọkịmẹ. (Bẹt Shan ama ogbo ini àrị furumẹ, Filistiapụma ini ḅaa ene ini ini seni kpọ sololo koroma nyọ Gilboa Tụndụ mị ọgọnọ ḅụ.)

¹³ Devid ḅe, Sọl ḅe na Jonatan ḅe na imgbe ma nwọ dekimẹ, ọ̀ pịkị ini kpọḅaa sọnọmapụ ma imgbe ma nwọ kolokolomẹ.

¹⁴ Anịsịkị Sọl ḅe na Jonatan ḅe na, inia imgbe ma ini seni Sọl ḅe ḍawu Kish ḅe iḍupu ḅie ḍipimẹ Bẹnjamin ama Zila mị ḅieḅụ; amanyanaḅọ ḅe tọn ini pịrịye goyegoye ini mịẹmẹ. Anị mị ḅọrọ so sịkị, Tamụnọ Ḅe ini inia sẹ mị gose kọn-a tẹkẹma nwọ pẹkẹrẹmẹ.

Ini Filistia Opu Godoro-a Tomoni Ma Na Sọ Owu Ma

¹⁵ Filistiapụma na Izrẹl mị na ini pịkịna jịn ọmụ gbin mẹ, se Devid ḅe na oria owuapụma na mun Filistiapụma na owusọmẹ. Ma owu ma ḅe gbọrị owu ḅụ Devid ḅe ọ̀ ḅụ ịnyọ famẹ.

¹⁶ Gbọrị opu godoroḅọ oria ẹrẹ anị Ishbibẹnọb, alapẹlẹka ikulele sụḅa ọ̀ nwọ dekimẹ anị opuma ikumẹ, ọ̀ pịkị ịwọ kongo se ọ̀ ḅụ amụmẹ, ọ̀ nwọ chịnmẹ na ori ineda Devid ḅe ḅaaḅịa.

¹⁷ Ọkụma Abishaị, Zẹruaya yaḅe ḅarachụa Devid ḅe pịrị se owu se opu godoroḅọ ḅe paka se ọ̀ ḅaamẹ. Anị Devid owuapụma yekarịfị ḅụ nwọse Devid ḅe ḅẹmẹ, ị́ ḅarị mine na paka ọmụ mun-ẹkẹ. “Ị́rị́ anị Izrẹl mị tọrụseḍikiarịḅọ ḅe-ẹ, wa ḅi ẹkẹ ị́ fị,” ini nwọ ḅẹmẹ.

¹⁸ Mịn mị ḅọrọ se so ini pịkịna Filistiapụma na Gob ḅie ḅụ jịn ọmụ gbinmẹ; anị ọmụ mị ḅie, Husha ḅie ḅọ Sibekaị ḅe gbọrị opu godoro tomoniḅọ nwọ ḅaamẹ, oria ẹrẹ anị Saf.

¹⁹ Ini pịkịna Filistiapụma na jịn ọmụ gbinmẹ Gob ḅie ḅụ, anị ọmụ mị ḅie Ẹlhanan Jea ya Bẹtlihẹm ḅie ḅo ḅọ ḅe Golaịat, Gat ḅie ḅo godoro ḅọḅe ḅaamẹ, oria sụḅa mị ḅịtẹ ḍori mgbẹsẹchịn kpokoro ọkụ kpokoromẹ.

²⁰ Jịn ọmụ Gat mị ḅie ḅụ ini pịkị nwọ gbinmẹ, anị nyọ ḅụ gbọrị owu-a-mịẹ-aye ḅẹlẹma opu godoroḅọ simemẹ. Gbọrị ḅara ḅụ sonio-a ḅaratụmgbalị sonio-a ḅaratụmgbalị, pịkị gbọrị ḅụọ ḅụ sonio-a ḅụọtụmgbalị sonio-a ḅụọtụmgbalị ọ̀ nwọ nyanamẹ.

²¹ Ori iḅiọkụma Izrẹlapụma ḍikisimamẹ; ngịsị ọ̀ ḅụ ini ye sọkẹ, ọkụma Jonatan, Devid numbireowu Shama yaḅe ọ̀ ḅaamẹ.

²² Mịna inein-a apụma Gat opu godoro apụma furo ḅie apụ-ẹ, se Devid ḅe na, oria owuapụma na ini ḅaamẹ.