2 Samụẹl 20 - Kịrịkẹnị Baịbụl

Shiba Ḅe Oria Nyanaḅerenika Mị

¹ Gilgalị mị ḅie ye ḅụ oforika gbọrị simịẹ ḍumo nyanaḅọ omi-ẹ, oria ẹrẹ anị Shiba, Bikraị ḅe yayo-ẹ, Bẹnjamin sẹ mị ḅie. Ori oḍu ofuro se nwenima chịn se nwọ ḅẹmẹ, “Devid, Jẹsi yaḅe ḅụ wa nyana sọye ofori-ẹ! Izrẹl owuapụ, ó ye wa so mịna warịma mun!”

² Mịn ẹrẹchị Izrẹlapụma Devid ḅe wẹrịso se Shiba, Bikraị yaḅe ḍuko nwẹngịmẹ, ọkụma Juda owuapụma ini kụrọma chịẹsime se Devid inia amanyanaḅọ ḅe ḅụsimemẹ Jọdan mị ḅụ ọkịmun Jerusalẹm mị la.

³ Devid ḅe ò mun Jerusalẹm mị ḅie oria amanyanaḅọ warị mị lasịkị, ò se koroma amanyanaḅọ warị mị ḍikiḍiki-ẹ nwọḅẹ oyi-a ịgwa eremeni ma; ori ini se gbọrị warị ḅie chu koroma se nyọ koruapụ ọkị se ini korumẹ. Ini ḅiye goyegoye ọ̀ mịẹ ini pịrịmẹ, ọkụma ori ini na gbolomakẹ kirikọn inia ḍumo ene mamgba ḅie. Mị ḅara anị ini sime mun inia kuluma ene la ọkụ-ẹ, deapụ fịsa ere sime ọkụ.

⁴ Amanyanaḅọ ḅe nwọse Amasa ḅe ḅẹmẹ, “Juda owuapụ mamgba chịn koḅirima tẹrẹ karama ene ḅụ, se ini na mịanga ḅo.”

⁵ Amasa ḅe ò mun ini chịnmẹ, ọkụma amanyanaḅọ ḅe ọ̀ ḅẹ na ọ̀ pịkịma ḅo-ẹ nwọ ḅẹ sịkị mị ḅụ ọ̀ ḅarị ḅokẹ.

⁶ Anị amanyanaḅọ ḅe nwọse Abishaị ḅe ḅẹye-ẹ, “Shiba, Bikraị yaḅe mịna ḅụfụkamatẹịn Absalọm ḅe nẹngịḅịa. Ị̀ya fịrịnwẹngịapụma ọkị se ò ḍuko, anị ofori ò mun kụrọ owuni ama ḅie anga se mịna ḅara pẹlẹmasoḅịa.”

⁷ Anịẹrẹchị, Joab ḅe owunima na amanyanaḅọ ḅe koruapụma na, pịkị Jerusalẹm ḅie kọn owuni mamgba Abishaị ḅe ḅụ sọ se Shiba, Bikraị yaḅe ḍukomẹ.

⁸ Ini mun Gibiọn ḅie opu ḍụparị mị lasịkị, Amasa ḅe ini na ịrịamẹ. Joab ḅe ori owuniaye ḅirimẹ, anịaḅụ kongo omi-ẹ anịa lubu ḅie, ḅirikunye mị ḅụ kpọ sime waraḅẹ. Ọ̀ nwẹngị tọrọkọ mun-arị sịkị, kongo mị sokoro koromẹ.

⁹ Joab ḅe nwọse Amasa ḅe ḅẹmẹ, “Nde anị ị́rị́na simeọkụ, inikio?” se oria amaḅara mị ọ̀ nwọse ọ̀ ḅapuko ọgụrẹ ma ọlọmẹ, ọ̀ ḅịpị nọnjụ ḅịa ẹrẹchị.

¹⁰ Amasa ḅe ò nemikẹ na Joab ḅe ísí ḅaraḅie ò kongo ọlọ ọkụ, se Joab ḅe ọ̀ ḅụlọ ḅụ kongo mị se ò temi se ọ̀ ḅụlọ ḅie ịla ma pakaḅo kiri ọgọnọ saramẹ. Anị kirikiri ọ̀ fịmẹ, se Joab ḅe ọ̀ ḅarị ḅara se ọ̀ lamakẹ. Anịsịkị Joab ḅe na numbireowu Abishaị ḅe na sakị Shiba, Bikraị yaḅe ḍukoma mun mẹ.

¹¹ Joab ḅe owuapụma ḅie gbọrịḅọ Amasa ḅe oria fị oju mị angasịkị chịẹsime se olokuaḅẹ, “Joab ḅe na Devid ḅe na ḅụ simeḅọ goyegoye Joab ḅe ḍuko nwẹngị!”

¹² Anịsịkị Amasa ḅe oria oju mị, pulo anị mgba gbẹịnmẹ se ateli mị ogboku ḅụ anị ḅọlọlọ sime waraḅẹ. Joab warịḅọ ḅe ori ọrị mẹ na, ḅo anị laḅọ goyegoye dachịẹaḅẹ nwọḅẹ sịkị, ori ateli ogbo oju mị fọnọ se piri ḅie chu se ḅịtẹ se anị gbẹịnmẹ.

¹³ Ini ateli ogbo oju mị fọnọ sin so sịkị, ọrụḅọḅọ Joab ḅe ḅụsọ se Shiba, Bikraị yaḅe ḍukoma mun mẹ.

¹⁴ Shiba ḅe Izrẹl sẹ mị ḅie ama ama mamgba ḅie toluḅọrọ se ḅo Ebẹl Bẹt Meaka opuama mị lamẹ, se Bikraị apụ mamgba ḅo gboloma se ò ḍuko nwẹngị mun opuama mị ḅie sọmẹ.

¹⁵ Joab ḅe ḅụsime owuapụma ini naamẹ na Shiba, Bikraị yaḅe anịju ori omi-ẹ nwọ ḅẹ sịkị; ini opuama mị ḍẹkịkelemamẹ anga-anga ḅụ. Ini aḅaịn se onu mị ḅụ wẹrị kpọlị iwoḅịa nyọ nwọ namamẹ; ini pịkị onu mị chukuḅie sokuaḅẹ anị sokoroḅịa ọkụ.

¹⁶ Gbọrị yenemi eremeniḅọ opuama mị ḅie omi-ẹ, árị ama mị ḅie onu agbagba ḅụ sime se olokuaḅẹ, “Poki! Poki! Ḍuko Joab ḅe pịrị ọ̀ mịanga ḅo, àrị ori na ọkwẹịn ḅimẹ.”

¹⁷ Joab ḅe ò kpekima á damamunmẹ, se árị ò gbelamẹ, “Joab ḅe ị́rị́?” “Iin, ị̀rị̀-ẹ,” ọ̀ nwọ pẹkẹrẹmẹ. “Ị̀ poki, ị̀ nyanaḅọ,” á nwọ ḅẹmẹ. “À pokiaḅẹ,” ọ̀ nwọ pẹkẹrẹmẹ.

¹⁸ Á nwọ ḅẹmẹ, “Ḅọlọsa sịkị ḅụ ini ḅẹḅẹmẹ na, ‘Mun Ebẹl opuama mị ḅie iḅi tetema nwọ ọkị’—anị ḅara anị ini se inia ḅẹrẹ ma tẹlịma tẹlịma ọkụ-ẹ.

¹⁹ Mịna ama mị ḍụḅa opuama-ẹ, Izrẹl sẹ mị ḅie ḅụ deinma ḍọkị, pịkị kuḅie se gbana na gbẹịn amama ḅụ gbọrị ama-ẹ. Cheye gose ị́ ama mị fama ḍọkị-ao? Cheye gose sime Nyanaḅọ Ḅe pịrịye mị ị́ nwọ sima ḅe.

²⁰ “Ngịsị anị ọkọ simekẹ!” Joab ḅe nwọ pẹkẹrẹmẹ. “Ọ́mịna opuama mị ngịsị àrị anị sima ẹkẹ, à pịkị anị fama-ẹkẹ!

²¹ Anị mị wa tọn ḅarakẹ. Ọkụma gbọrị owuḅọ, Bikraị ḅe oria tọkụ-ẹ, oria ẹrẹ anị Shiba, Ifrem chịngị mị ama mị ḅie ḅọ-ẹ; nyana ḅerenika ḅụ ò sitịḅị chụa pịkị Amanyanaḅọ Devid ḅe na tụḅụrụmẹ. Ḅe ḅọ ḅe ọ́ nwọ ḅọrọmaḅo ị̀ pịrị, anịọkụma opuama mị ḅụ à ḅarasinḅịa.” “Wa ọ̀ tịḅị mị se onu mị ọgọnọ ḅụ wẹrị gbin saḅama ị́ pịrịḅịa,” árị ọkọ ḅẹmẹ.

²² Anịsịkị árịa yenemi mị á nwọse mun opuama mị ḅie tomonima na ịrịama mẹ, anị ini Shiba, Bikraị yaḅe tịḅị pẹlẹ, se anịse onu mị ọgọnọ ḅụ wẹrị gbin saḅama Joab ḅe pịrịye-ẹ. Ori oḍu ofuro se oria owuapụma pịrịmẹ elekima ḅaraḅụ na ini opuama mị ḅụḅarasin, se ḅọḅọ pịkịma so nụḅọ warị mun mẹ. Se Joab ḅe pịkịmaso mun Jerusalẹm ḅie Devid ḅe damamunmẹ.

Devid Fịrịtịḅịnị Ma

²³ Joab ḅe Izrẹl owunima tịḅịdamẹ; Bẹnaya, Jẹhoịada yaḅe, Devid ḅe ḍikiḍikiapụ ma tịḅịnịḅọ-ẹ;

²⁴ Adonaịram ḅe anị kụrọ ḅaraḅụ ọkịḅo apụma inia fịrịtịḅịnịḅọ-ẹ; Jẹhoshafat, Ahaịlud yaḅe ye se ọrụ tọn ḍiri gịẹịn tịḅịdaḅọ-ẹ;

²⁵ Shiva ḅe anị ḅẹrẹkọn warị mị ḅie ḍiri gịẹịnḅọ-ẹ; Zadọk ḅe na, Abaịata ḅe na, anị agbamịẹapụ ma-ẹ,

²⁶ Ịra, Jea ama ḅọḅe sọnị Devid agbamịẹapụma ḅie gbọrịḅọ-ẹ.