2 Samụẹl 19 - Kịrịkẹnị Baịbụl

Joab Ḅe Devid Ḅe Ḍiki Ịganịmẹ

¹ Ini ḍuko Joab ḅe pịrịmẹ na Amanyanaḅọ Devid ḅe ori owu pịkị ḍụẹịn ḍin Absalọm ḅe pịrịaḅẹ.

² Anịẹrẹchị ọmụḅaraiḅi ḅieḅẹlẹ mị anị pịkịna ḅo kururu sọ se Devid ọmụgbin apụma pịrịmẹ anị ene mị ḅụ, anịatịḅị ini naamẹ na amanyanaḅọ ḅe ò kururu yayo ḅe pịrịaḅẹ.

³ Ini yawụma opuama mị ḅie simemẹ, ọmụgbin kiri ḅụ ọmụ ḅarasi owuni ḅụgerere ḅụ soarị sịkị mịẹmịẹ ọkụ mị.

⁴ Amanyanaḅọ ḅe ọ̀ tọrụ gbẹịn se oloku owumẹ, “Yei ị̀ya tọkụ! Ị̀ya tọkụ Absalọm! Absalọm, ị̀ya tọkụ!”

⁵ Joab ḅe so amanyanaḅọ ḅe warị mun se nwọse ọ̀ ḅẹmẹ, “Mịmgba ị́ya owuapụma ị́ ini se ḅụgerere ḅie chusam—ị́ ḍumo ḍụaḅọrọma, pịkị ị́ya owuapụ awọma na, eremeni awọma ḍumo ma na, pịkị ị́ya erema na, ịgwa eremeni ma na ḍụaḅọrọma apụma.

⁶ Ị́ ị́ ḅẹlẹma apụma na tụḅụrụmẹ anịsịkị ị́ ḍikiḅieḅu apụma re ị́ nwọ ḅẹlẹmamẹ! Ị́ ḍiepakụmasam na ị́ya ọmụtịḅịnị ma na fịrịnwẹngịapụma na ị́ ḅụ gbọrịye ḅụ sọnị ini ofori-ẹ. Àrị ọrịmẹ na mịmgba nemikase Absalọm ḅe ḍumomẹ se mine mamgba fị ọkụma ị́ ḅie opuma ḅẹlẹḅịa.

⁷ Mịọkụ sịsẹ se mun kuḅie laḅara se ọkwẹịn kọn ị́ya fịrịnwẹngịapụma pịrị. À Nyanaḅọ Ḅe ẹrẹ karịfịmẹ na ị́ nemikase munkẹ ḅẹḅẹ, ḅa dede laḅịa sịkị iniaḅụ gbọrịḅọ sọnị ḅarị ị́rị́ na sime ẹkẹ. Mịn anị siye sọ ị́ pịrịtẹịn ị́ kalatọkụ ḅụ sime sịkị ọkịḅo mịọkụ la, ị́ lasa ḅụfụka nẹngịḅịa.”

⁸ Anịsịkị amanyanaḅọ ḅe sịsẹ, se mun opuama mị nụngọ ḅọkọ ḅụ kpọnjị simemẹ. Oria tomonima ḅo naamẹ na ori anịju ḅụ omi-ẹ nwọḅẹ sịkị, inimgba ḅo ò gbori kelemamẹ. Mịọkụ bebe Izrẹlapụ mamgba ini mangị so sam, ḅọḅọ so nụḅọ ama munsam.

Devid Ḅe Ọ̀ Pịkịna So Jerusalẹm Mun Mẹ

⁹ Bebe sẹ mị ḅie mgba ini sakị kamụ se iniaḅụ paka aḅẹ. Ini nwọse jụmḅọ jụmḅọ ḅẹ aḅẹ, “Amanyanaḅọ Devid ò mine na tarakapụma ḅara ḅie wa ḍụaḅọrọmamẹ.” “Ori Filistia apụma ḅara ḅie wa ḍụamẹ, ọkụma mịọkụ ọ̀ mangịsam Absalọm ḅe gose se sẹ mị wẹrịsosam.

¹⁰ Wa pulo seni Absalọm ḅe tịḅịsaramẹ mịna amanyanaḅọ ḅaraḅụ, ọkụma ini ọ̀ ḅaasam ọmụ ḅieḅụ. Mịọkụ cheye ẹrẹchị wa mun Amanyanaḅọ Devid ḅe ọkị pịkịma ḅo ẹka?”

¹¹ Izrẹlapụma ḍukoarịye mị Amanyanaḅọ Devid ḅe nwọ naa sịkị, ori agbamịẹapụma, Zadọk ḅe na Abaịata ḅe na fịrịmamẹ na ini Juda tịḅịnịma gbela, “Cheye ẹrẹchị ómine kuluma apụ sọḅe amanyanaḅọ ḅe ọkịḅo oria amanyanaḅọ warị mị ḅie chu ḅụ?

¹² Ómine ị̀ya mịnapụ-ẹ, pịkị ị̀ya ojumịnị mị na imgbe mị na-ẹ; cheye ẹrẹchị ómine kuluma apụ sọḅe ị̀ ọkịḅo mị ḅụ?”

¹³ Devid ḅe pịkị ḍuko ini pịrịmẹ na ini Amasa ḅe ḅẹ, “Ị́rị́ ị̀ya mịnaḅọ-ẹ. Àrị ị́ seni tịḅịnịḅọ mịẹ ị̀ya ọmụogbo mị pịrịmẹ, ị́ se Joab ḅe kiriḍinma ḅụ, mịọkụ sakị tọrọkọ mun. Ye Tamụnọ Ḅe ị̀ fomuḅaa à nemikase ọkọ mịẹkẹ ḅẹḅẹ!”

¹⁴ Devid ḅe Juda owuapụ mamgba kuḅie ọ̀ nwọ fẹ ọ̀ ḅụ pịrịmẹ, se ini ḅịpị seni ọ̀ fịrịmamẹ na ori oria fịrịtịḅịnị ma na ḅo.

¹⁵ Amanyanaḅọ ḅe pịkịmasoarị sịkị, Juda owuapụma mun Jọdan Tọrụ mị ḅụ ori na ịrịamẹ, Gilgalị mị ḅụ ọ̀ ḅọrọma tọrụ mị saḅaḅịa ẹrẹchị.

¹⁶ Anị gbọrị sịkị ḅụ Shimẹaị, Gira ya, Bẹnjamin ḅọḅe, Bahurim mị ḅie ḅụ be so Jọdan mị mun mẹ Amanyanaḅọ Devid ḅe na ịrịaḅịa gose.

¹⁷ Bẹnjamin sẹ mị ḅie kịnị-a mẹndẹ oyiasi fịnjị ori na mun mẹ owuapụ ḅụ. Pịkị Ziba, Sọl furo mị ḅie fịrịnwẹngịḅọ ḅe sọnị, oria jie owuapụ awọma na mun mẹ pịkị si-a fịrịnwẹngịapụ na, se ini tatarị mun Jọdan mị lamẹ amanyanaḅọ ḅe ma ḅolaka simeogbo.

¹⁸ Ini tọrụ mị saḅamẹ amanyanaḅọ ḅe na ọ̀ ḅụ sime apụma na ḅọrọmaḅoḅịa ẹrẹchị, pịkị amanyanaḅọ ḅe ḅiye goyegoye nwọ mịẹḅịa ye gose. Amanyanaḅọ ḅe ọ̀ saḅaḅịa ẹrẹchị ḅụkarakaramarị sịkị, Shimẹaị ḅe ọ̀ ḅụ se chama gbinmẹ ọ̀ tọrọkọ

Devid Ḅe Iḅi Seni Shimẹaị Ḅe Mịẹmẹ

¹⁹ se nwọ ḅẹmẹ, “Amanyanaḅọ, sisi à mịẹirimaye mị se ḅieḅarama anị ị́ Jerusalẹm mị ḅie mangị pakasoarị sịkị ḅụ. Anị se si kịẹn ị̀ pịrịma pịkị ḅarị anị se ḅiekoromama.

²⁰ À nemimẹ, ị̀ nyanaḅọ, na à siyemịẹmẹ, anịẹrẹchị mị à gose ọgọnọju da sẹ mị ḅie tatarị ḅo ị́rị́ Amanyanaḅọ ḅe na ịrịa ḅọ nwọ sọye-ẹ mịmgba.”

²¹ Abishaị, Zẹruaya yaḅe nwọ ḅẹmẹ; “Shimẹaị ḅe ọ̀ ḅaa na iḅimẹ anịatịḅị ò worinime se Nyanaḅọ Ḅe sẹlẹ se amanyanaḅọ mịẹ ḅọḅe pịrịmẹ.”

²² Ọkụma Devid ḅe nwọse Abishaị ḅe na numbireowu Joab ḅe na ḅẹmẹ, “Tụḅọ ọ́ ḅịpị chịn? Ọ́ ḅụfụka se ị̀ pịrị ḅe? Ị̀rị̀ anị Izrẹl amanyanaḅọ ḅe-ẹ mịọkụ, gbọrị Izrẹlḅọ sọnị fị ẹkẹ mịmgba.”

²³ Se ọ̀ nwọse Shimẹaị ḅe ḅẹmẹ, “Ị́ ḅaaḅịa ḅọ ofori-ẹ, amanyanaḅọ ḅe yekarịfị ọ̀ pịrịmẹ.”

Devid Ḅe Iḅi Se Mẹfịboshẹt Ḅe Mịẹmẹ

²⁴ Anịsịkị Mẹfịboshẹt, Sọl yaḅe tọkụ ḅe, ḅo amanyanaḅọ ḅe na ịrịamẹ. Ọ̀ ḅụọma mà ọ̀ sịkịrịkẹ, ọ̀ tọrụ ọgụrẹ ma sọnị ma ọ̀ sẹịn sinkẹ, oria ḅụchụayema sọnị ma ọ̀ pịkị sịkịrịkẹ, amanyanaḅọ ḅe Jerusalẹm mị ḅie mangị pakaso sịkị ngịsị ọkịḅo oria ọmụḅaraiḅi na, ò vinpịkịḅo sịkị lamẹ.

²⁵ Mẹfịboshẹt ḅe Jerusalẹm mị ḅie ḅụ sọḅo amanyanaḅọ ḅe na ịrịa sịkị, amanyanaḅọ ḅe nwọse ọ̀ ḅẹmẹ, “Mẹfịboshẹt, ị́ ị̀ ḍuko pakasokẹ. Cheye ẹrẹchị ị́ ị̀ ḍukoka?”

²⁶ Ori nwọse ọ̀ pẹkẹrẹmẹ, “Amanyanaḅọ, ị́ nemimẹ na ị̀rị̀ ikeliḅọ-ẹ. Àrị ị̀ya fịrịnwẹngịḅọ ḅe ḅẹmẹ na ò yese ị̀ya yepụra asụn ḅe ọgọnọde mịẹse àrị ị́rị́ na gbọrịḅụ pakasoḅịa ọkụ, ọkụma ori ị̀ seni ịbafịmẹ.

²⁷ Ori ị̀ seni iruokọn Ị́rị́ Amanyanaḅọ ḅe pịrịmẹ, ọkụma ị́rị́ anị Tamụnọ Ḅe enjẹlḅọ kịkẹḅọ-ẹ, anịẹrẹchị ị́ mịẹ na iḅi yemị nwọ mịẹ.

²⁸ Amanyanaḅọ, bebe ị̀ ḍaḅe furo mị mgba ị́ nwọ ḅaa nakaraka, ị́ kụrọ se ị̀ pịrịmẹ na àrị ị́rị́na ị́ya dẹbụl mị ọgọnọ yefị. À gbọrị kụrọ sọnị nyanakẹ se Ị́rị́ Amanyanaḅọ ḅe ḅara pịkị jịn ḍikiḅụgerere nwọ ḅi.”

²⁹ Amanyanaḅọ ḅe nwọse ọ̀ ḅẹmẹ, “Ḅarị tọntọn-aye ḍukoma. À tọnpẹlẹsam na ị́rị́ na Ziba ḅe na Sọl ngọ mamgba ḍiaọkịḅịa.”

³⁰ “Ye Ziba ḅe àrịmgba ọkị,” Mẹfịboshẹt ḅe ọkọse ọ̀ pẹkẹrẹmẹ. “Ị́rị́ Amanyanaḅọ ḅe ye ị́ laka ḅaraḅụ nwọ deinma ḅo ama mị la yemị anị ị̀rị̀ na deinkoromẹ.”

Devid Ḅe Iḅi Se Bazilaị Ḅe Mịẹmẹ

³¹ Bazilaị, Giledị ḅọḅe sọnị, Rogẹlim ḅie ḅụ ḅo amanyanaḅọ ḅe ḅọrọma Jọdan mị saḅaḅịa ẹrẹchị ḅomẹ.

³² Bazilaị ḅe anị opuma olomusa ḅọ-ẹ, kụra iniasi ọ̀ nwọ lasam. Ori opuma ngọ kọnmẹ, ọ̀ pịkị fịye seni amanyanaḅọ ḅe pịrịmẹ Mahaneim mị ḅie ò sime sịkị.

³³ Amanyanaḅọ ḅe nwọse ọ̀ ḅẹmẹ, “Ḅo ị̀rị̀ na so Jerusalẹm mun, àrị ị́ ḍikiḍikiḅịa.”

³⁴ Ọkụma Bazilaị ḅe nwọse ọ̀ pẹkẹrẹmẹ, “À ḅarị ḅọlọ sịkị la-ẹka sịkị, nde à gose Ị́rị́ Amanyanaḅọ ḅe ḍuko so Jerusalẹm mị munḅịaye?

³⁵ À kọkọ kụra iniasi lasa, se ị̀ tọrụ ḅẹlẹmaḅịaye ḅarị ofori-ẹ ngịsị. À ḅarị ineda à fịarịye na à ḅuarịye na ḅe ḅẹlẹ nwọ nemikẹ, nimeni ma pụkọ ma sọnị à ḅarị ineda naa ẹkẹ. À papa ḅụḅalaḅalamaye sọ Ị́rị́ Amanyanaḅọ ḅe pịrịḅịa.

³⁶ Mịn opu gbẹịnye mị ị̀ gbẹịnkẹ. Anịẹrẹchị à pa kele ị́rị́ na mun Jọdan mị ḅọrọkoroḅịa.

³⁷ Anịsịkị ị̀ wẹrịso à somun ị̀ ḍaḅe na ị̀ nyengima na iḍupuma na kpekima sime se fị. Ọkụma ḅe anị Kimham, ị̀ nịa ḅe-ẹ, anị ineda fịrịnwẹngị ị́ pịrịḅịa ḅọ-ẹ; ori ọkị se chụa so, Amanyanaḅọ, se ị́ koroma se ineda mịẹ ọ̀ pịrị na gbẹịnye mịẹse ọ̀ pịrị.”

³⁸ Amanyanaḅọ ḅe nwọse ọ̀ pẹkẹrẹmẹ, “Àrị ori ọkị seni chụa soḅịa se ị́rị́ ḅiye goyegoye à mịẹ seni ọ̀ pịrịḅịa. À pịkị ị́ ḅiye goyegoye mịẹse ị́ pịrịḅịa.”

³⁹ Anịsịkị Devid ḅe na oria owuapụ mamgba na Jọdan mị saḅa koromẹ. Ọ̀ Bazilaị ḅe ḅịpị nọnjụ se oria ḅẹlẹma seni ọ̀ pịrịmẹ se Bazilaị ḅe vinpịkịso oria warị mun mẹ.

Juda Na Izrẹl Na Ịgbanịa Nyanamẹ Amanyanaḅọ Ḅe gose

⁴⁰ Amanyanaḅọ ḅe na ọ̀ ḅọrọma Juda owuapụ mamgba na, pịkị Izrẹl owuapụma ḅụ gbọrị pẹkẹrẹ na saḅa sịkị, ọ̀ Kimham ḅe na so Gilgalị mị mun mẹ.

⁴¹ Anịsịkị bebe Izrẹlapụ mamgba so amanyanaḅọ ḅe damamun se nwọse ọ̀ ḅẹmẹ, “Amanyanaḅọ, cheye ẹrẹchị mịna mịnapụ, Juda owuapụma kụrọ nyana se ị́ ọkị se so, pịkị ị́ ḅọrọma ḅo Jọdan ḅie koroma, ị́ furo mị na pịkị ị́ya owuapụma na?”

⁴² Juda owuapụma nwọse ini pẹkẹrẹmẹ, “Wa gose ọkọ mịẹye amanyanaḅọ ḅe mịna mịnaḅọ-ẹ. Nde anịọkụma mịn mị gose ó ḅụosọḅịaye? Wa amanyanaḅọ ḅe oria fịye fị sịkị omi, anịkanịka ò seni wa pịrịye omi?”

⁴³ Izrẹlapụma nwọse Juda apụma pẹkẹrẹmẹ, “Amanyanaḅọ Devid ḅe ḅụ ọ́ nyana kụrọ ma ḅụ ḅe oyi-a kiri anị mine wa nyanaye-ẹ, ori ọ́mịna pulo mịnaḅọ-ẹ nwọḅẹ sọnị. Cheye ẹrẹchị ọ́ wa ḍikisima ḅe? Ó se ḅieḅaramama na mine anị tatarị amanyanaḅọ ḅe pịkịma ḅo nwọḅẹ ḅẹrẹ ḍukoye-ẹ!” Ọkụma Juda owuapụma owoi-kuḅie ḅara se inia karakaraye mị ḍuko kụrọmatẹịn Izrẹl owuapụma nẹngịmẹ.