2 Samụẹl 14 - Kịrịkẹnị Baịbụl

Joab Ḅe Absalọm Ḅe Vinpịkịḅoḅịa Ọkụ Nwọ Ḍọkịmẹ

¹ Joab ḅe ò nemimẹ na Amanyanaḅọ Devid ḅe ọ̀ ḅarị Absalọm ḅe ọrịka ye mị opuma ọ̀ ḅụ lamẹ,

² anịẹrẹchị Tẹkoa ḅie anga gbọrị iḅiọkụ yenemi eremeniḅọ ọ̀ nwọ fịrịma ḅomẹ. Á ḅola sịkị, ọ̀ nwọse á ḅẹmẹ, “Ị́ ḍụẹịn ḍin aḅẹ nwọḅẹ ḅara se ị́ ḅụ wẹrị; ị́ya ḍụẹịn ḍin ḅụchụayema chụa, se ị́ tịḅị-inime ma adalama. Ḍụẹịn ḍin ḅọlọ sịkị lasa eremeniḅọ ḅara se ị́ ḅụ wẹrị.

³ Anịsịkị so amanyanaḅọ ḅe damamun se à ḍuko ị́ pịrịḅịa yemị nwọ ḍuko ọ̀ pịrị.” Anị ḅaraḅụ Joab ḅe á ḍukoḅịa yemị nwọ ḍuko á pịrịmẹ.

⁴ Eremeniḅọ ma so amanyanaḅọ ḅe damamun se tịḅịtu kiri da ọ̀ pịrịmẹ osi ḅaraḅụ, se nwọ ḅẹmẹ, “Ḅarachụa ị̀ pịrị, Amanyanaḅọ!”

⁵ Ori á gbelamẹ, “Cheye ị́ nwọ ḅi?” Á nwọ pẹkẹrẹmẹ, “Ị̀rị̀ deḅọ fịsa igwein eremeniḅọ-ẹ, ị̀ nyanaḅọ.” “Ị̀ deḅe ọ̀ fịsam.

⁶ Ị̀ nyanaḅọ, mama owuapụ awọ à nwọ yimẹ, gbọrị ene, eleogbo ini kamụsọmẹ, ini kpesinḅọ oforika ḅaraḅụ anị nyọ ḅụ, iniaḅụ gbọrịḅọ ísí ḅọḅe ḅaamẹ.

⁷ Mịọkụ, ị̀ nyanaḅọ, bebe furo mị ḅie sime apụ mamgba vinpịkị ị̀ dapaka se ḅiaḅẹ na à tọkụ ḅe seni ini pịrị ini ọ̀ ḅaa ò numbireowu ḅe nini ye gose. Nemikase ini ọkọ mịẹ ọkụma, à ḅarị owutọkụ nyana ẹkẹ. Anị ḅaraḅụ ini ị̀ya kuluma kuḅie kụrọma yemị famaḅịa, pịkịna mịẹse ị̀ deḅe ḅarị gbọrị owutọkụ sọnị nyana se ori ẹrẹ go ẹkẹ.”

⁸ Amanyanaḅọ ḅe nwọse á pẹkẹrẹmẹ, “Vinpịkị so warị mun, ḅẹrẹ mị àrị anị ọkị tẹlịmaḅịa.”

⁹ Árị nwọse ọ̀ ḅẹmẹ, “Amanyanaḅọ, ị́ mịẹḅịa yegoyegoye ḅụ, ye ị̀ furo mị na ị̀rị̀ na anịa ḅẹrẹ ḅarasi mị pụra; ị́rị́ na amanyanaḅọ kiri mị na ó nemiye ofori-ẹ.”

¹⁰ Amanyanaḅọ ḅe nwọse á pẹkẹrẹmẹ, “Nemikase ị́ ẹrẹmaḅọ omi-ẹ ḅẹḅẹ, nụḅọ ọkịḅo ị̀ pịrị, se nụḅọ ḅarị ḅụfụka se ị́ pịrị ẹkẹ.”

¹¹ Á nwọse ọ̀ ḅẹmẹ, “Amanyanaḅọ, sisi ị́ Nyana Tamụnọ Ḅe tẹkẹ mịẹse ọsụn pulo mị ḅe sowuḅi ḍọkịarị ḅọḅe ḅarị jịn sitẹịn ye nwọ mịẹ ẹka ḅara, anị ị̀ya kọn tọkụ ḅe ḅaa mị ḅụ.” Devid ḅe nwọse á pẹkẹrẹmẹ, “Nyanaḅọ Ḅe ḍumosime àrị ogbo, à nwọse yeḅerenimẹ na ị́ya tọkụ ḅe ngịsị gbọrịye sọnị ọ̀ la ẹkẹ.”

¹² Eremeniḅọ ma nwọse ọ̀ ḅẹmẹ, “Sisi, Amanyanaḅọ, ye à pa pịkị gbọrịye ḍuko.” Ọ̀ nwọse á pẹkẹrẹmẹ, “Ḍuko.”

¹³ À nwọse ọ̀ ḅẹmẹ, “Cheye gose ị́ mịn ḅara seni Tamụnọ-a tomonima mịẹ sima-ao? Ị́ ḅerenikẹ ị́ya tọkụ ḅe ọ̀ mangị mun sime ama mị ḅie pịkịmaḅo, ị́ ḅarana si ḅẹrẹpẹlẹ ị́ ḅụ pịrịsam ị́ nwọ mị kirikiri ḍuko yemị ḅụ.

¹⁴ Mine mgba wa fịḅịa, kiri ọgọnọḅụ ọsụn galagala mengi sime ọkụ anị wa simesa ọkụ-ẹ, anị koḅirimaḅịa ọkụ ḅarị ofori-ẹ. Tamụnọ Ḅe ọkọ sime ḅọ ḍumo ọ̀ nwọ fama ẹkẹ, mịẹse oria mangị fa tọkụ ḅe pịkịmaḅo nwọ ḍọkị ḅọ ḅe.

¹⁵ Mịọkụ, Amanyanaḅọ, à gose ḅo mịn ọkwẹịn mị kọnye, anị tomonima ini mịẹse ị̀ ḅalafa sam, anịẹrẹchị à nwọse ị̀ ḅụ ḅẹmẹ na àrị ọkwẹịn seni ị́ pịrịḅịa, à koroma mẹ na à ḅi ye ị́ mịẹ ị̀ pịrịḅịa.

¹⁶ À koroma mẹ na ị́ pokiḅịa, se ị̀ya tọkụ ḅe na ị̀rị̀ na ḍụaḅọrọmaḅịa anị Tamụnọ Ḅe seni oria tomonima pịrị ama mị ḅieḅụ wa ḅaa pịkị mịna tọrụ famaḅịa ẹrẹchị ḍọkịarị ḅọḅe ḅara ḅieḅụ.

¹⁷ À kaịnḅo mẹ, ị̀ nyanaḅọ, na ị́ya yeḅereni ḅịpị mị anị mịẹse ye ị̀ la ẹkẹ, anịatịḅị amanyanaḅọ ḅe Tamụnọ enjẹlḅọ sime ọkụ anị ò sime ọkụ-ẹ, ọ̀ pịkị ineda iḅi na si na nemi sikimaḅịa. Ye Nyanaḅọ ị́ Tamụnọ Ḅe ị́rị́ na sime!”

¹⁸ Amanyanaḅọ ḅe nwọse á pẹkẹrẹmẹ, “À gbọrịye se ị́ gbelaḅịa, pịkị kọkọmaye nwọ ḍuko ị̀ pịrị.” Á nwọse ọ̀ pẹkẹrẹmẹ, “Ị́ seni ị̀ gbelaḅịaye goyegoye ị̀ gbela, Amanyanaḅọ.”

¹⁹ Ọ̀ nwọse á gbelamẹ, “Joab ḅe mị ḅara mị seni ị́ fịrịmaka?” Á nwọse ọ̀ pẹkẹrẹmẹ, “Osiḅụ sime aye mamgba à nwọ karịfịmẹ, Amanyanaḅọ, na mịẹse ị́ gbelaye mị à nwọ pẹkẹrẹ ẹka ḅara ofori-ẹ. Kọkọmaye ḅụ ị́ya ọmụtịḅịdaḅọ Joab ḅe anị à mịẹḅịa ọkụ na, pịkị à ḍukoḅịaye na nwọ ḍuko ị̀ pịrịye-ẹ.

²⁰ Seni ḅẹrẹ mị tẹlịmaḅịa ẹrẹchị ọ̀ mịn mị mịẹmẹ. Ọkụma Ị́rị́ Amanyanaḅọ ḅe Tamụnọ enjẹlḅọ yenemi ọkụ ị́ nwọse yenemi, pịkị tomonikiri pakaye goyegoye nwọ nemimẹ.”

²¹ Sịkị ḅọrọ sịkị Amanyanaḅọ ḅe nwọse Joab ḅe ḅẹmẹ, “À tọnpẹlẹsam na ị́ ḅiye mị àrị anị mịẹḅịa. Mun asẹmẹnịḅọ Absalọm ḅe ọkị se pịkị mịju ḅo.”

²² Joab ḅe Devid ḅe tọrọkọ ḅịkịkoromẹ, osi se ọ̀ pịrị ḅụ, se nwọ ḅẹmẹ, “Tamụnọ Ḅe ị́ ḅẹlẹma, Amanyanaḅọ! Mịọkụ mị à nemiye-ẹ na ị̀ya mịẹmịẹye ị́ ḅụḅẹlẹmẹ, anịatịḅị à ḅiye mị ị́ nwọ mịẹ ị̀ pịrịsam.”

²³ Anị ọ̀ sịsẹ somun Gẹshọ ḅieḅụ Absalọm ḅe ọkị se pịkịma Jerusalẹm mị ḅoye-ẹ.

²⁴ Anị-ẹ nwọḅẹ sọnị, amanyanaḅọ ḅe, ọ̀ kụrọ pịrịmẹ na Absalọm ḅe amanyanaḅọ warị mị ḅie ori angama. Amanyanaḅọ ḅe nwọ ḅẹmẹ, “À ḅikẹ à tọrụse ori ọrị.” Anịẹrẹchị Absalọm ḅe ò somun oria warị ḅe angamẹ, amanyanaḅọ ḅe tọrọkọ laka ḅaraḅụ.

Absalọm Ḅe Devid Ḅe Na Ḅẹrẹfamasam

²⁵ Izrẹl mị ḅieḅụ Absalọm ḅe ḍikitọrụ ḅụ kọn iḅi nwọ kọn ḅọ ofori-ẹ; tịḅị ḅụ ọkịmun ḅụọchuku la, ọ̀ ḅụ gbọrị ịlọlị sọnị ofori-ẹ.

²⁶ Ọ̀ tịḅị inime opuma ḅakamẹ, se kụra tịḅị gbọrị sịkị anị ò seni anị kịrịkịrịye-ẹ. Anị opuma sẹnị nangwọ pịkị ikusa ḅẹḅẹ, amanyanaḅọ yetọn yemị ḅụ anị ineda iku ḅụ mama kala ḅarasịkịrị panị ḅe iku nwọ lamẹ.

²⁷ Absalọm ḅe tẹrẹ-a owuapụ awọ na gbọrị eremeni tọkụ na ọ̀ nwọ yimẹ, eremeni tọkụ ma árị ẹrẹ Tema, árị opuma iḅi mẹ.

²⁸ Absalọm ḅe Jerusalẹm mị ḅie ori anga mun mama kụra lamẹ amanyanaḅọ ḅe tọrụ ọrịka ḅaraḅụ.

²⁹ Anị ọ̀ ḅịpị seni Joab ḅe fịrịmaye-ẹ na, ò ḅo oria ẹrẹ ḅụ amanyanaḅọ ḅe damamun; ọkụma Joab ḅe ò ḅo ḍụkụkẹ. Absalọm ḅe kpoto pịkị ḅịpị seni ọ̀ fịrịmamẹ, Joab ḅe ọ̀ pa pịkị ḅo ḍụkụkẹ.

³⁰ Anị gose Absalọm ḅe nwọse oria fịrịnwẹngịapụma ḅẹmẹ, “Ḍiki, Joab ozu mị ị̀ya ozu mị na kpekimẹ, anịa ḅie ịnyọ pịrị ḅuye mịẹ ịpịamgba pakaḅẹ. Ó mun fịnị seni anịaḅụ chụa.” Anị ini mun fịnị seni ozu mị ḅụ chụaye-ẹ.

³¹ Joab ḅe sịsẹ se so Absalọm ḅe warị mun se ò gbelamẹ, “Cheye gose ị́ya fịrịnwẹngịapụma fịnị seni ị̀ya ozu mị ḅụ chụa?”

³² Absalọm ḅe nwọse ọ̀ pẹkẹrẹmẹ, “Anịatịḅị à ḅịpị seni ị́ fịrịmamẹ, ọkụma ị́ ḅo ḍụkụkẹ. À ḅimẹ ị́ amanyanaḅọ ḅe damamun se nwọse ò gbela ị̀ pịrị; ‘Cheye gose à Gẹshọ mị ḅieḅụ so mịju ḅo? Àrị anịju sime mị ị̀rị̀ na iḅitẹịnḅịa.’” Absalọm ḅe pịkị nwọ ḅẹmẹ, “À ḅimẹ ị́ ẹmbẹ ḍọkị ị̀ pịrị se à mun amanyanaḅọ ḅe ọrị, se nemikase ḅẹrẹ ị̀ ḅara sime ḅẹḅẹ, anịọkụma ye ori ị̀ ḅaa.”

³³ Anị Joab ḅe so Amanyanaḅọ Devid ḅe damamun se Absalọm ḅe ḍuko yemị ḍuko ọ̀ pịrịmẹ. Amanyanaḅọ ḅe ḅịpị seni Absalọm ḅe fịrịmamẹ, se ori ọ̀ damamun seni ọ̀ tọrọkọ tịḅịtu ọ̀ pịrịmẹ. Amanyanaḅọ ḅe ọ̀ ḅịpị nọnjụ se ọ̀ da ọkịmẹ.