2 Samụẹl 13 - Kịrịkẹnị Baịbụl

Amnọn Ḅe Na Tema Ma Na

¹ Devid ya Absalọm ḅe gbọrị ḍikitọrụgbẹịn, ma owuḅọ simeka eremeni mịnaḅọ ọ̀ nwọ nyanamẹ, árị ẹrẹ anị Tema. Amnọn, anị Devid ḅe oria jịn owutọkụ árị na ḅẹlẹmamẹ.

² Ori árị gose opu ḅụḅalaḅala nyana ḅụ obimẹ, anịatịḅị anị sarasarakẹ á nyana ḅo; ma owuḅọ nemika eremeni tọkụ ḅaraḅụ, ini ḅereni á pịrịkẹ árị owuapụ na ịrịa.

³ Ọkụma Amnọn ḅe gbọrị epele ni ikiaḅọ ọ̀ nwọ nyanamẹ, oria ẹrẹ anị Jonadab. Devid numbireowu Shama ḅe yayo-ẹ.

⁴ Jonadab ḅe nwọse Amnọn ḅe ḅẹmẹ, “Ị́rị́ amanyanaḅọ tọkụ-ẹ, ọkụma ene goyegoye àrị ị́ ọrị aḅẹ ị́ kururuaḅẹ. Cheye paka?” Amnọn ḅe ọ̀ pẹkẹrẹmẹ, “Ị̀rị̀ na gbọrị ḍaḅọ yi mịnaḅọ Absalọm ḅe nụmbụrarọ Tema ma árịa mịẹye ị̀ ḅụḅẹlẹmẹ.”

⁵ Jonadab ḅe nwọse ọ̀ ḅẹmẹ, “Obi eleki se mun mọnọye ọgọnọ ḅọlọlọ sime. Ị́ ḍaḅe ḅo ị́ ḍikiḅịa sịkị ḍuko ọ̀ pịrị, ‘Sisi mbụra Tema ma ḅe á ḅo fịye seni ị̀ pịrị. À ḅimẹ á mịanga ḅo àrị árị ọrịḅịa nyọ ḅụ, ḅarana fịye mị mịẹ ị̀ pịrị.’”

⁶ Anịẹrẹchị Amnọn ḅe obi eleki se mun mọnọye ọgọnọ ḅọlọlọ simemẹ. Amanyanaḅọ Devid ḅe mun ò ḍikimẹ, se Amnọn ḅe nwọse ọ̀ ḅẹmẹ, “Sisi ye Tema ma ḅo fọị fịturu kalaye mịẹ ị̀ pịrị mịanga, anị àrị árị ọrịḅịa nyọ ḅụ, pịkịna ye árị ḅarana àrị se ị̀ pịrị se à fị.”

⁷ Anị Devid ḅe ḅịpị se Tema ma fịrịmaye-ẹ amanyanaḅọ warị mị ḅieḅụ, se nwọse á ḅẹmẹ: “So Amnọn ḅe oria warị mun se fịye mịẹ ọ̀ pịrị se ọ̀ fị.”

⁸ Anị Tema ma so numbireowu Amnọn ḅe warị mun se ori ọrịmẹ mọnọye ọgọnọ ọ̀ ḅọlọlọ sime waraḅẹ. Á fịturu mịẹ yemị ọkị se anị karakarama se fịturu mị nwọ mịẹmẹ, ori árị ọrịḅịa nyọ ḅụ. Á fịturu ma fọị

⁹ se àrị seni panị mị ḅie saramẹ, na ori àrị fị-ẹ, ọkụma ọ̀ fị ḍụkụkẹ. Ọ̀ nwọ ḅẹmẹ, “Nweni mamgba depakụma”—se inimgba pakasomẹ.

¹⁰ Anịsịkị ọ̀ nwọse á ḅẹmẹ, “Fịturu ma se ị̀ya mọnọye mị anga ḅo se ḅarana àrị seni ị̀ pịrị se à fị.” Á fịturu ma ọkị se ḅarana numbireowu Amnọn ḅe damamunmẹ.

¹¹ Árị àrị seni ọ̀ pịrịarịogbo, anị ọ̀ kapụma árị ọlọ se nwọ ḅẹmẹ, “Ḅo ị̀rị̀ na mọnọye ọgọnọ ḅọlọlọ.”

¹² Árị nwọse ọ̀ ḅẹmẹ, “Ẹn-ẹn,” “Kụrọḅara se ị̀rị̀ na nwọ sime ḅụsimaye nwọ mịẹma! Mị opu si mịẹmịẹye-ẹ!

¹³ Nde àrị ineda pịkịna ị̀ tọrụ dekichịẹmaḅịa ọkụ tomoni ogboku? Se ị́rị́ ọkụma—ị́ opu yenemikaḅọ na opu ḅụgerere ḅie na sọḅịa Izrẹl mị ḅie. Sisi ḍuko amanyanaḅọ ḅe pịrị, à nemimẹ na gbarịmaka ḅaraḅụ ori ị̀ se ị́ pịrịḅịa.”

¹⁴ Ọkụma ngịsị ori á poki ḍụkụkẹ; se ọ̀ kụrọtẹịn á nẹngịmẹ nwọḅẹye gose ori á nẹngịma se á ḅụ kanmẹ.

¹⁵ Anịeso Amnọn ḅe opu ḍikiḅụnwọnwọ ọ̀ nwọ nyana á pịrịtẹịn ori á ḅẹlẹma ḅara nẹngịmẹ. Ọ̀ nwọse á ḅẹmẹ, “Sịsẹ se nwẹngị paka so sarama!”

¹⁶ Árị nwọse ọ̀ pẹkẹrẹmẹ, “Ẹn-ẹn.” “Mịn ḅara mị seni ị̀ desin mị sitẹịn mịkirikiri ị́ mịẹye mị nẹngịmẹ!” Ọkụma Amnọn ḅe ngịsị ori á poki ḍụkụkẹ;

¹⁷ ori oria fịrịnwẹngịḅọ ḅe chịn warị chu se nwọse ọ̀ ḅẹmẹ, “Ma eremeniḅọ ma fọnọsin ị̀ tọrọkọ! Á seni nụngọ gbin pakụma se ḅọkọ mị ịkasị!”

¹⁸ Fịrịnwẹngịḅọ ḅe árị ọkị pakụma se ḅọkọ mị ịkasịmẹ. Tema ma koroḅụchụaye á nwọ chụa mẹ, anịa ḅarama sọnị pịkị koromẹ, anị àrị enema ḅie ma owuḅọ simeka amanyanaḅọ eremeni awọ ḅụchụaye mị-ẹ.

¹⁹ Á fọn seni á tịḅịkiri saramẹ, árịa ḅụchụaye mị kan, se á ḅarama seni á tịḅị kun se owuma somẹ.

²⁰ Numbireowu Absalọm ḅe árị ọrị sịkị, ori á gbelamẹ, “Amnọn ḅe ori ị́ gulugulumasa? Sisi, mbụratọkụ, ḅerenima se anị opuma ị́ kuḅiesima. Ori na ị́rị́ na gbọrị mịnapụ-ẹ, anịẹrẹchị ḍuko gbọrịḅọ sọnị pịrịma.” Mị gose Tema ma numbireowu Absalọm ḅe warị ḅie kururu ḅụ na kpọngọlọma simemẹ.

²¹ Amanyanaḅọ Devid ḅe pakaye mị naa sịkị, anị iḅiọkụma ori ịganịmamẹ.

²² Ọkụma Absalọm ḅe ori opu taraka se Amnọn ḅe wẹrịmamẹ nụmbụrarọ Tema ma ḅụ ọ̀ nwọ kanye gose, ọ̀ ḅarị pịkị ngịsị ọkwẹịn ọ̀ pịrịkẹ.

Absalọm Ḅe Ḅi Sowu Mị

²³ Mama kụra ḅọrọ sịkị Absalọm ḅe oria ananama oju ichuka ma kịrịsin aḅẹ, Ifrem ama mị na kpeki Beal Hezọ ama mị ḅieḅụ, se ọ̀ chịnḅịpị seni amanyanaḅọ ḅe owuapụ awọma mgba pịrịmẹ na ini anịju mun.

²⁴ Ori Amanyanaḅọ Devid ḅe damamun se nwọse ọ̀ ḅẹmẹ, “Amanyanaḅọ, àrị ị̀ya ananama oju ichuka ma kịrịsin aḅẹ. À chịnḅịpị se ị́rị́ na ị́ya tịḅịnị fịrịnwẹngịapụma na pịrịmẹ ini alalị mị ḅo.”

²⁵ Amanyanaḅọ ḅe ọ̀ pẹkẹrẹmẹ, “Ẹn-ẹn, ị̀ya tọkụ,” “Anị opu ḅụḅalaḅala ọkịḅo ị́ pịrịḅịa nemikase mine mgba mun ọkụma.” Absalọm ḅe pachụajikeaḅẹ na inimgba mun, amanyanaḅọ ḅe ò ḅerenikẹ, ọkụma ori oria ḅẹlẹma se ọ̀ pịrịmẹ.

²⁶ Absalọm ḅe nwọse ọ̀ ḅẹmẹ, “Iḅimẹ, anịọkụma, ị́ pa ḅereni mbire Amnọn ḅe pịrị se ò ḅoḅịaka?” Amanyanaḅọ ḅe nwọ gbelamẹ, “Nde ò gose ḅoḅịa ye?”

²⁷ Ọkụma Absalọm ḅe pachụajikeaḅẹ na ini ḅokaḅoka, ọkị nweni Devid ḅe anịḅe kuluma ḅerenimẹ na Amnọn ḅe na ísí amanyanaḅọ owuapụ awọ mamgba na ini Absalọm ḅe ḍukomun. Absalọm ḅe seni amanyanaḅọ pịrị gbẹịn fịaye na iru na nwọ karakarama koromamẹ

²⁸ se tọn oria fịrịnwẹngịapụma pịrịmẹ: “Ọ́ tọrụ se Amnọn ḅe ḅụ wẹrị ọ̀ ḅaka ma iruḅu ọ̀ tọrụ ḅaama sịkị, se à kụrọ pịrịsa ḅẹḅẹ ómine ọ̀ ḅaa. Ọ́ ḅalafama. Ị̀rị̀ ḅarana anị dekiḅịa. Ọ́ kụrọkuḅie nyana, se pịkịna ḅụgaragarama!”

²⁹ Anịẹrẹchị fịrịnwẹngịapụma Absalọm ḅe se ini ḅẹ ọkụ mị mịẹmẹ se Amnọn ḅe ḅaamẹ. Ísí kirikọn Devid owuapụ awọ mamgba kirikiri inia yepụra asụnma kpọlị se mangịsomẹ.

³⁰ Ini so warị mun-arị sịkị, oku mun Devid ḅe lamẹ na: “Ị́ya owuapụ awọ mamgba Absalọm ḅe ori ini ḅaasosam—na inia ḅụ gbọrịḅọ sọnị ḅarị kọnkẹ!”

³¹ Amanyanaḅọ ḅe sịsẹ chịẹmẹ, kururu ḅụ oria ḅụchụayema kanmẹ, se sokoro kiri koromẹ. Ori na anịju ḅụ sime fịrịnwẹngịapụma sọnị pịkị inia ḅụchụayema kanmẹ.

³² Ọkụma Jonadab, Devid numbireowu Shama yaḅe nwọ ḅẹmẹ, “Amanyanaḅọ, ị́ya owuapụ awọ mamgba ini nwọ ḅaakẹ. Amnọn ḅe kẹngẹ anị fịye-ẹ. Ị́ ineda anị kaịnḅoḅịa ị́ nemikase Absalọm ḅe ḍiki ọkụma, na Amnọn ḅe nụmbụrarọ Tema ma ḅụ kan sịkị ngịsị, na ọ̀ nwọ simeye mịẹḅịa nwọḅẹye mị ò kuḅie omi-ẹ.

³³ Anịẹrẹchị anị ḅẹrẹ mị ḅerenima, na ị́ya owuapụ awọ mamgba ini fịsosam nwọḅẹ ye mị; Amnọn ḅe kẹngẹ anị ini ḅaaye-ẹ.”

³⁴ Mịn sịkị mị ḅụ Absalọm ḅe ọ̀ mangịsosam. Anị gbọrị sịkị ḅụ nyọ koru fịrị ḅụ sime owuniḅọ ḅe, opu tomoni kpo nwọ ọrịmẹ, chịngị mị ọgọnọ ḅụ ini koroḅoaḅẹ, Horoneim ateli mị ḅie ḅụ. Ò so amanyanaḅọ ḅe damamun se ori ọrị ye mị ḍuko ọ̀ pịrịmẹ.

³⁵ Jonadab ḅe nwọse Devid ḅe ḅẹmẹ, “Nwọ ḅo àrị apụma ị́ya owuapụ awọma ini-ẹ, anị à ḍuko na ini ḅoḅịa nwọḅẹ ọkụ mị.”

³⁶ Ọ̀ mịn mị ḍuko so kirikiri, Devid owuapụ awọma sọḅomẹ; ini sakị owumẹ; se Devid ḅe na oria tịḅịnị fịrịnwẹngịapụma na sọnị ḅụakụ ḅara se owumẹ.

^37-38 Absalọm ḅe ọ̀ mangịso Gẹshọ amanyanaḅọ ḅe damamunmẹ, Talmaị, Amaịhud yaḅe, se tẹrẹ-a kụra nwọse anịju ḅụ angamẹ. Devid ḅe ḍụẹịn ḍin yayo Amnọn ḅe pịrị mun ḅọlọ sịkị lamẹ;

³⁹ ọkụma Amnọn ḅe kọn fị mị ọ̀ ḅarị nwọ koroma ka sịkị, yayo Absalọm ḅe ọrị mị iḅiọkụma ọ̀ tarịmẹ.