2 Samụẹl 12 - Kịrịkẹnị Baịbụl

Netan Ḅe Oku Mị Na Devid Ḅe Siḅụ-pịkị Mị Na

¹ Nyanaḅọ Ḅe ịkịankoro Netan ḅe fịrịma Devid ḅe damamunmẹ. Netan ḅe ọ̀ damamun se nwọse ọ̀ ḅẹmẹ, “Mama owuapụ gbọrị ama ḅie angamẹ; gbọrịḅọ ngọ kọnmẹ, ísíḅọ ḅe igweinḅọ-ẹ.

² Ngọ kọnḅọ ḅe ọ̀ tọn-a nambulo na anana na nyanamẹ,

³ anịsịkị igweinḅọ ḅe gbọrị anana tọkụ kẹngẹ anị ọ̀ nyanaye-ẹ, fẹ ḅaraḅụ ori ọ̀ nyanamẹ. Ọ̀ tọrụ se ọ̀ ḅụ wẹrịmẹ, oria awọma na ori na gbọrị ḅụ sẹnị pakaḅomẹ. Oria fịye anị ò se anana tọkụ ḅe pịrị fịfịye-ẹ, pịkị oria ọmọngọ mị ò se mengi se ọ̀ pịrị ḅuḅuye-ẹ, ọ̀ pịkị ò deki ọ̀ ḅụọ ọgọnọ gbana-gbanamẹ. Anana tọkụ ḅe oria eremeni tọkụ-ẹ nwọḅẹ ḅara ọ̀ nwọ simemẹ ọ̀ ḅụ.

⁴ Gbọrị ene igoniḅọ ngọ kọnḅọ ḅe warị ḅomẹ. Ngọ kọnḅọ ḅe oria namama ḅụ gbọrịye sọnị ọ̀ ḅaa se igoni se igoniḅọ ḅe kọn ḍụkụkẹ; anịnakaraka igweinḅọ ḅe anana tọkụ ḅe ọ̀ nwọ kun se fịye mịẹ oria igoniḅọ ḅe pịrịmẹ.”

⁵ Ngọ kọnḅọ ḅe mịẹye mị anị iḅiọkụma Devid ḅe ḅụosọ so ọkụma ọ̀ nwọ ḅẹmẹ, “À ḍumo sime Nyanaḅọ Ḅe karịfịmẹ na mịn mị mịẹ ḅọḅe ọ̀ fị na gbẹịnmẹ!

⁶ Nwọ sime opu siye mịẹḅọ, ọ̀ mịẹye mị gose, ori ọkị yemị ḅe inein-a kiri anị ọ̀ gbẹịnḅịaye-ẹ anịatịḅị ò ḍikitịḅịfoin nyanakẹ.”

⁷ “Ị́rị́ anị ori ḅọḅe-ẹ,” Netan ḅe nwọse Devid ḅe ḅẹmẹ. “Nyanaḅọ Izrẹl Tamụnọ Ḅe nwọ ḅẹmẹ, ‘Àrị ị́ se amanyanaḅọ mịẹ Izrẹl mị pịrị pịkị Sọl ḅe ḅara ḅie ị́ ḍụapakụmaḅomẹ.

⁸ Oria amanyanakiri mị na oria eremeni ma na à seni ị́ pịrịmẹ; àrị ị́ se amanyanaḅọ mịẹ Izrẹl mị na Juda mị na pịrịmẹ. Mịn mị ḅọrọ ị́ karakẹ nwọḅẹ ọkụma mgbọkụ anị ḅe mama kiri à nwọse ị́ pịrịḅịa.

⁹ Nde, anịọkụma ị́ gose ị̀ya olokoma kokoka ye? Cheye ẹrẹchị nwọ sime siye ị́ nwọ mịẹ? Ị́rị́ mịẹse ini Yuraya Hitaịḅọ ḅe ḅaamẹ ọmụ ḅieḅụ; ị́rị́ mịẹse Amọn apụma ọ̀ ḅaamẹ, anịsịkị ị́ tarọ ma ọkị se árịna simemẹ!

¹⁰ Mịọkụ, sakị ọkịmun ḅụọḅụọ la, ị́ furo ḅie pakaḅoḅịa tọn apụ kụrọ fị kọnḅịa, anịatịḅị ị́ ḅịpịpokika ḅụ Yuraya Hitaịḅọ ḅe tama ọkị sime ye gose.

¹¹ Mị Nyanaḅọ Ḅe ḍuko ọkụ-ẹ, ḍiki à mịẹḅịa ị́ furo mị ḅie ḅụfụka ḅo ị́ ọgọnọ gbanaḅịa, ị́ ọrị ḅịa àrị ị́ya erema ọkị se jịn owuḅọ nwọ pịrịḅịa; se ori ị́ tọrụkuḅu, enekaka ḅụ ini na gbolomaḅịa.

¹² Ḅọịma ḅụ ị́ si mị mịẹmẹ, ọkụma à mịẹse mịn mị enekaka ḅụ pakaḅịa se bebe Izrẹl mị mgba anị ọrịḅịa.’”

¹³ Devid ḅe nwọḅẹmẹ, “Nyanaḅọ Ḅe ḅụ à siye mịẹsam.” Netan ḅe ḅo nwọse ọ̀ ḅẹmẹ, “Nyanaḅọ Ḅe ò siḅụ-ḅarasin ị́ pịrịḅịa, ị́ fịẹkẹ.

¹⁴ Ọkụma ị́ Nyanaḅọ Ḅe ḅịpị ḍiki sima se nwọ sime siye mịẹye gose, ini yi ị́ pịrị tọkụ ḅe ọ̀ fịḅịa.”

¹⁵ Anịeso Netan ḅe ò so oria warị mun mẹ. Nyanaḅọ Ḅe mịẹse Yuraya tama yi Devid ḅe pịrị tọkụ mị ḅo opuma obimẹ.

Devid Yaḅe Ọ̀ Fịmẹ

¹⁶ Anịgose Devid ḅe Tamụnọ Ḅe tẹkẹmẹ mịẹse tọkụ mị ḅụ iḅiḅịa ḅara. Ọ̀ pịkị ngịsị gbọrịye sọnị fị ḍụkụkẹ, se ḍin goyegoye ori oria jukuruḅie sọmun se bebe ḍin mị mgba se kiri ḅọlọlọ-ḅọlọlọmẹ.

¹⁷ Oria odo ḅie fịrịnwẹngịapụ tịḅịnịma ọ̀ damamun se ḅụkụrọma mịẹse ọ̀ sịsẹḅịa ọkụ ḍọkịmẹ, ọkụma ọ̀ ḍụkụkẹ ọ̀ pịkị ḅarị ini na gbọrịye sọnị fị ḍụkụkẹ.

¹⁸ Gbọrị fẹnị anga ḅo ḅọrọ sịkị tọkụ mị fịmẹ, anị Devid fịrịnwẹngịapụma tịḅịnịma ḅalafamamẹ ḅẹrẹ mị ḍuko ọ̀ pịrị. Ini nwọ ḅẹmẹ, “Tọkụ mị ḍumo sime sịkị ḅụ, Devid ḅe ọ̀ wa pẹkẹrẹ ḍụkụkẹ wa ọkwẹịn ọ̀ pịrị sịkị. Nde wa ineda ḍuko ọ̀ pịrịḅịa ọkụ na oria tọkụ mị fịmẹ? Sosi ori ineda ye se ọ̀ ḅụ lamaḅịa!”

¹⁹ Devid ḅe ini minimini ma ọkwẹịn jụmḅọ jụmḅọ pịrịarị ọkụ nwọ ọrị sịkị, ò nemimẹ na tọkụ mị fịsam. Anị ori ini gbelaye-ẹ, “Tọkụ mị fịsa?” Ini nwọse ọ̀ pẹkẹrẹmẹ, “Iin, ọ̀ fịsam.”

²⁰ Devid ḅe kiri ḅụ sịsẹmẹ, mengi ḅiri, ọ̀ tịḅị adala, se oria ḅụchụayema ḍinmamẹ. Anị ò so Nyanaḅọ Ḅe warị ḅie mun se tẹkẹye-ẹ. Ò vinpịkị amanyanaḅọ warị mị ḅo sịkị, ò fịye ḅimẹ se ini anị karakarama ọ̀ pịrị se kirikiri ọ̀ sakị ye fịmẹ.

²¹ Anị oria fịrịnwẹngịapụma nwọse ọ̀ ḅẹye-ẹ, “Mị cheye ị́ nwọ mịẹ? Tọkụ ḅe ḍumo sime sịkị, ò gose ị́ owumẹ, ị́ pịkị yefị ḍụkụkẹ; ọkụma ọ̀ fị gbọrị kirikiri ị́ sịsẹ se yefịmẹ!”

²² Devid ḅe nwọse ini pẹkẹrẹmẹ, “Iin,” “Ò ḍumo sime sịkị ḅụ à ḅuru se ị̀ ḅụḅama pịkị owumẹ. À nwọ chịnmẹ na Nyanaḅọ Ḅe ori ị̀ ḍikitịḅịfoin ḅụ tọkụ ḅe wẹrịso se ò ḍumoḅịa.

²³ Ọkụma, mịọkụ ọ̀ nwọ fịsa sịkị; cheye ẹrẹchị à pa ḅuru se ị̀ ḅụḅamaḅe? Àrị ineda tọkụ ḅe pịkị ḅo ḍumo ḅụ chuḅe? Gbọrị ene ḅụ à so ò sime nyọ munḅịa, ọkụma ngịsị ori ineda vinpịkị ị̀ damaḅo ẹkẹ.”

Ini Sọlọmọn Ḅe Yisam

²⁴ Anịsịkị Devid ḅe tarọ Batshiba ma kuḅie kụrọmamẹ. Se pịkị árị na gbolomamẹ, se á gbọrị owutọkụ nwọ yimẹ, anị Devid ḅe Sọlọmọn nwọse chịnḅọ ḅe-ẹ. Nyanaḅọ Ḅe ọ̀ tọkụ ḅe ḅẹlẹmamẹ

²⁵ anịẹrẹchị ori oku se ịkịankoro Netan ḅe fịrịmamẹ na Jẹdidaịya ọ̀ nwọse kala tọkụ ḅe chịn, anịatịḅị Nyanaḅọ Ḅe ori ọ̀ ḅẹlẹmamẹ.

Devid Ḅe Raba Mị Ọkịmẹ

²⁶ Mị sịkị mị ḅụ Joab ḅe ori owuse Raba anị Amọn mị tịḅịda opuama mị paka se anị ọkị ḍọkịmẹ.

²⁷ Ori okumun-apụ se Devid ḅe fịrịmamẹ se ini mun ḍuko ọ̀ pịrị: “Àrị owuse Raba mị pakamẹ se mengi se anị pịrịarị nyọ mị ọkịsam.

²⁸ Mịọkụ kirikọn owunikpo mị koḅiri se owuse anị paka se ḅarana anị ọkị. À ḅikẹ ị̀rị̀ anị ọkịmẹ nwọḅẹ ẹrẹso à nwọ nyana.”

²⁹ Anị Devid ḅe oria owunikpo mị koḅiri se so Raba mị mun, owuse anị paka se anị nẹngịmamẹ.

³⁰ Amọn apụ oru Mọlẹk ḅe tịḅị ọgọnọ sime opuma iku goli goli amanyanaḅọchu mị Devid ḅe nwọ sin se ọkịmẹ, anịa ḅie opuma yela ḍụparị pịkị omi-ẹ. Devid ḅe ò yela ḍụparị mị ọkị se oria amanyanaḅọchu mị ḅụ chụamẹ. Opuama mị ḅie ọ̀ pịkị tọn aye ọfọịn ọkịmẹ

³¹ se opuama mị ḅie sime-a tomonima ọ̀ nwọ ọkịḅo mẹ, ori ini se fịkịfịkị na, ikulele ọgụ ma na, ikulele apala ma na, se fịrịnwẹngịmẹ; ọ̀ pịkị kụrọḅaraḅụ ini mịẹse ini aḅaịn biriki nwọ okpomẹ. Anị gbọrị ḅara mị ọ̀ pịkị se bebe Amọn apụ mamgba mịẹye-ẹ. Anịsịkị re Devid ḅe na oria tomonima na vinpịkị so Jerusalẹm mị ḅie mun mẹ.