2 Samụẹl 11 - Kịrịkẹnị Baịbụl

Devid Ḅe Na Batshiba Ma Na

¹ Fọngụ aya ḅịpị mị ḅụ, anị kụra mị ḅie amanyanapụma ọmụ munmun sịkị ḅụ, Devid ḅe Joab ḅe na oria ọmụtịḅịnị ma na Izrẹl ọmụogbo mị na fịrịma pakụmamẹ; ini Amọn apụma nẹngịma se Raba opuama mị gbẹịnmachịẹmẹ. Ọkụma Devid ḅe Jerusalẹm mị ḅie ò simemẹ.

² Gbọrị ene, eneogboin ḅiri kele ḅọrọsam, se Devid ḅe eneogboin mọnọ ḅụ sịsẹ se mun amanyanaḅọ warị ochu mị kpọlịmẹ. Ori anịa ọgọnọju ḅụ nwẹngịma ḅọrọarị sịkị, gbọrị eremeniḅọ ọ̀ nwọ ọrịmẹ, á mengi ḅiri aḅẹ. Árị opuma eremeni iḅi kọnmẹ.

³ Anịẹrẹchị ori okumunḅọ se á fịrịmamẹ, mun ḍọkịnemi árị tụḅọ, se ọ̀ naamẹ na Batshiba ma árị-ẹ, Iliam ḅe ḅarọma-ẹ anị Yuraya Hitaịḅọ ḅe tarọ ma.

⁴ Devid ḅe okumun-apụ fịrịmamẹ na ini árị ọkịḅo ọ̀ pịrị, ini árị ọkịḅomẹ se ori árị na gbolomamẹ. (Mị sịkị mị anị árị árịa sịkị nwọ ọrịso se á ḅụ fịafịama aḅẹ.) Anịeso á so árịa warị mun mẹ.

⁵ Ọḅụkọ árị á ḅụ ḍọkịḅo ọrịmẹ na á sime kọnsam, se árị oku se Devid ḅe fịrịma se nwọ ḅẹmẹ, “À sime kọnsam.”

⁶ Anịẹrẹchị Devid ḅe oku seni Joab ḅe fịrịma se nwọse ọ̀ ḅẹmẹ, “Yuraya Hitaịḅọ ḅe se ị̀ fịrịma.” Joab ḅe Yuraya ḅe se Devid ḅe fịrịmamẹ.

⁷ Yuraya ḅe ḅo lasịkị, Devid ḅe ò gbelamẹ, Joab ḅe na owuni kpo mị na iniaḅụ sime ọkụ, pịkịna owu mị tọrọkọ mun-arị ọkụ na.

⁸ Anịeso ọ̀ nwọse Yuraya ḅe ḅẹmẹ, “So warị mun se kele ịnyọsara.” Yuraya ḅe amanyanaḅọ ḅe warị ḅie ḅụ paka somẹ, se Devid ḅe ḍiepịrịaye seni oria warị fịrịmamẹ.

⁹ Ọkụma Yuraya ḅe ò so warị munkẹ; anịnakaraka ori amanyanaḅọ ḅe odo ḅọkọ mị ḅụ amanyanaḅọ ḅe koruapụma na mọnọmẹ.

¹⁰ Yuraya ḅe ò so warị munkẹ nwọḅẹye mị Devid ḅe nwọ naa sịkị, ọ̀ nwọse ò gbelamẹ, “Ị́ ama ofori mun ḅọlọ sịkị la se mịọkụ ị́ so ḅomẹ, cheye gose ị́ so ị́ya warị mun ḍụkụka?”

¹¹ Yuraya ḅe nwọse ọ̀ pẹkẹrẹmẹ, “Izrẹl mị na Juda mị na ḅe owuapụma ọmụ mị ḅie ini omi-ẹ, Ọḅọkụ Igbe mị sọnị pịkị ini na omi-ẹ; ị̀ya ọmụtịḅịdaḅọ Joab ḅe na oria owutịḅịnị ma na ele ogbo ini ikowarị pike se anịanga sime waraḅẹ. Nde anịọkụma àrị ineda so warị mun, fị na ḅu na ḅụ sime, pịkị ị̀ tama na ḅọlọlọ se mọnọḅịa ọkụ? À fịafịa ḅụ sime yemamgba se ḅụpikimamẹ na àrị ineda ọkọsimeye mịẹ ẹkẹ!”

¹² Anịẹrẹchị Devid ḅe nwọse ọ̀ ḅẹmẹ, “Anịọkụma mịanga sime mịmgba, se ḅa lasịkị àrị ị́ seni sẹịnḅịa.” Anị gose Yuraya ḅe anị ene mị na pịkị anị ḍuko ma ene mị na seni Jerusalẹm ḅie simemẹ.

¹³ Devid ḅe saso fịye fị sịkị ḅụ ọ̀ chịnḅo se orina yefịso se mịẹse iru ọ̀ tọrụḅaamẹ, ọkụma anị ḍin mị sọnị Yuraya ḅe ọ̀ pịkịna so warị munkẹ, anịnakaraka oria mọnọye gbẹịnye mị ọ̀ nwọse mọnọmẹ amanyanaḅọ ḅe warị mị ḅie nyọ koruapụ ḅie mị ḅụ.

¹⁴ Anịḅe jịn eneḅa, dede ḅie Devid ḅe ḍiri gịẹịn seni Joab ḅe sẹịnmamẹ Yuraya ḅe ḅaraḅụ.

¹⁵ Ọ̀ nwọ gịẹịnmẹ: “Yuraya ḅe se owu mị ọfịrịtẹịn pẹkẹrẹ ḅụ tọrọkọda koroma anịsịkị ómine ọḅụda se ye ini ọ̀ ḅaa.”

¹⁶ Anị ḅụ Joab ḅe mun opuama mị gbẹịnmachịẹ sịkị ḅụ, ò nemimẹ anị tarakapụma ḅara kụrọtẹịn pẹkẹrẹ mị ḅụ anị ò Yuraya ḅe se koromaye-ẹ.

¹⁷ Tarakapụ ma owunima kpo ḅụ opuama mị ḅie pakaḅo se Joab ḅe owunima na owusọmẹ; Devid ḅe oria owutịḅịnị ma ḅie tọn apụ ini nwọ ḅaamẹ, Yuraya Hitaịḅọ ḅe sọnị ini ọ̀ ḅaamẹ.

¹⁸ Anịsịkị Joab ḅe ḅịpị se Devid ḅe fịrịma se ọmụ mị sime ọkụ ḍuko ọ̀ pịrịmẹ,

¹⁹ se ọ̀ nwọse okumunḅọ ḅe ḅẹmẹ, “Owu mị gbolomaye mị ị́ nwọ ḍuko amanyanaḅọ ḅe pịrịso sịkị,

²⁰ anị ò ḅụosọ se ọ̀ nwọse ị́ gbelaḅịa, ‘Cheye ẹrẹchị ómine ọkọ se mun gbọkụ opuama mị na kpeki ini na owusọ? Ó nemika na ini onu ma ḅụ wẹrị ḍẹịn se ọ́ tẹịnḅịa ọkụ?

²¹ Ini wẹrị Abimẹlẹk, Gidiọnị yaḅe ḅaa ọkụ mị ó se ḅiekoromaka? Tebẹs mị ḅie ḅụ anị gbọrị eremeniḅọ kọkọ ama mị onu mị ọgọnọ ḅụ ḍụparị ḅara se ò gbin se ọ̀ ḅaaye? Nde anịọkụma ó gose ọkọ se mun gbọkụ ama mị onu na kpekiye?’ Nemikase amanyanaḅọ ḅe ọkọ se ị́ gbelamẹ ḅẹḅẹ, ḍuko ọ̀ pịrị, ‘Ị́ya owutịḅịnịḅọ Yuraya Hitaịḅọ ḅe sọnị ini ọ̀ ḅaamẹ.’”

²² Anị okumunḅọ ḅe so Devid ḅe damamun se Joab ḅe se ọ̀ fịrịma oku mamgba ḍuko ọ̀ pịrịye-ẹ.

²³ Ọ̀ nwọse ọ̀ ḅẹmẹ, “Mine na tarakapụma ini kụrọtẹịn wa nẹngịmẹ se ini opuama mị ḅie pakaḅo owu se wa pakamẹ ele ogboku, ọkụma wa ini depịkị mun opuama mị ḅọkọ lamẹ.

²⁴ Anịsịkị ini ḍẹịn seni wa tẹịnmẹ ama mị onu mị ọgọnọ ḅụ, se Ị́rị́ Amanyanaḅọ ḅe owutịḅịnị ma ḅụ tọn apụ ini nwọ ḅaamẹ; ị́ya owutịḅịnịḅọ Yuraya ḅe sọnị ini ọ̀ ḅaamẹ.”

²⁵ Devid ḅe nwọse okumunḅọ ḅe ḅẹmẹ, “Joab ḅe kuḅie kụrọma se ḍuko ọ̀ pịrị na ori ò kuḅie simama, anịatịḅị ọmụ ḅie fịḅịaḅọ nemiḅịaḅọ ofori-ẹ, ḍuko ọ̀ pịrị na kụrọtẹịn tatarị sịkị mị nẹngị ḅara ọ̀ nwọse owu se opuama mị paka se anị ọkị.”

²⁶ Bẹtshiba ma dewu ḅe ini ọ̀ ḅaasam nwọḅẹye mị á nwọ naa sịkị á kururu ọ̀ pịrịmẹ.

²⁷ Kururu sịkị mị ḅo ḅọrọ sịkị, Devid ḅe ḅịpị se á fịrịmamẹ na á so ḅo amanyanaḅọ warị ori na anga; se á ḅo tarọ sọmẹ, se gbọrị owutọkụ nwọ yi ọ̀ pịrịmẹ. Ọkụma Devid ḅe mịẹye mị Nyanaḅọ Ḅe ọ̀ ḅụḅẹlẹkẹ.