2 Samụẹl 10 - Kịrịkẹnị Baịbụl

Devid Ḅe Amọn Apụ Ma Na Siriapụ Ma Na Nẹngịmamẹ

¹ Amanyanaḅọ Nahash Amọnḅọ ḅe fị ḅọrọ sịkị, yayo Hanọn ḅe ḅo amanyanaḅọ sọmẹ.

² Amanyanaḅọ Devid ḅe nwọ ḅẹmẹ, “Tẹmẹ la ikiaḅọ ḅara à nwọse Hanọn ḅe na angaḅịa, anị ḍawu Nahash ḅe mịẹ ị̀ pịrị ọkụ mị.” Anịẹrẹchị Devid ḅe okumun-apụ fịrịmamẹ, ori ọ̀ ḅụ sọ ngịrị ọkụ mị ḍuko ọ̀ pịrịḅịa ẹrẹchị. Iniḅo Amọn mị lasịkị,

³ Amọn tịḅịnịma nwọse amanyanaḅọ ḅe ḅẹmẹ, “Osi seni ị́ ḍaḅe pịrịḅịa ẹrẹchị Devid ḅe mịnapụma se fịrịmamẹ ị́ nwọ chịn, na iniḅo ori ị́ ḅụ sọ ngịrị ọkụ mị ḍuko ị́ pịrị-ẹ? Ngịsị ọkọkẹ! Ama-ẹnyẹ-apụ ḅaraḅụ ori ini se fịrịmamẹ, mịẹse opuama mị ini nwọ ẹnyẹ kelema, se ori ineda wa nẹngịmaḅịa ọkụ!”

⁴ Hanọn ḅe Devid okumun-apụ ma kun se inia ḅapuko ọgụrẹ ma ḅụ gbọrị pẹkẹrẹ pẹkẹrẹ sẹịnsin pịkị inia igoma ḅụ wẹrị ini chụa ḅụchụayema kịrịsin, se ini desinmẹ.

⁵ Vinpịkị so ama mun mị opuma inia ḅụgereremamẹ. Devid ḅe pakaye mị naa sịkị, ọ̀ ḅịpị se ini fịrịmase nwọ ḅẹmẹ, ọ́ Jẹriko ḅie sime, ó vinpịkị ḅoma ọkịmun ọ́mịna ḅapuko ọgụrẹ ma sẹnị pakaḅo sịkị la.

⁶ Amọn apụma ḅo nemimẹ na ini tarakapụ sọ Devid ḅe pịrịsam, ini mịẹye mị gose, anịẹrẹchị Siria owunima ḅie mama poku na kịnị oyi ẹndẹ na, ini nwọ ọkọmẹ Bẹt Rihọb mị na Zoba mị na ḅie, kịnị poku na oyi ẹndẹ Tọb owuapụma ḅụ, Meaka amanyanaḅọ ḅe kịnị-a mẹndẹ oyiasi fịnjị nwọse ini pịrịmẹ owuapụ ḅụ.

⁷ Devid ḅe iriaḅa mị naa se Joab ḅe na bebe ọmụogbo mị mgba na fịrịma ini dapakamẹ.

⁸ Amọn apụma nwẹngị pakamun Raba, inia tịḅịda opuama mị ateli ḅọkọ ḅụ koḅiria simemẹ, anịsịkị Siriapụ ma na Tọb ḅie ḅụ ḅo owuapụma na pịkị Meaka apụ mamgba na ḅele sẹ mị ḅe gbọrị pẹkẹrẹ ḅụ inia kiriḅụ koḅiria simemẹ.

⁹ Joab ḅe ḅo ọrịmẹ na tarakapụ ọmụogbo ma ọḅụ-na-kuḅu-na ḅu owu se ọ̀ pakaḅịa nwọḅẹ sịkị, Izrẹl mị ḅie owusọtẹịn owunima ọ̀ nwọ ọkị se Siriapụ ma sime pẹkẹrẹ damẹ.

¹⁰ Oria ísí owunima ọ̀ nwọse numbireowu Abishaị ọmụkụlọ mị ḅụ koromamẹ, anịsịkị ori ḅo Amọn apụma sime ọrụ mị damẹ.

¹¹ Joab ḅe nwọse Abishaị ḅe ḅẹmẹ, “Nemikase Siriapụ ma ị̀ nẹngịma aḅẹ ị́ nwọ ọrịmẹ ḅẹḅẹ, ḅo ḅarachụa ị̀ pịrị, pịkịna Amọn apụma nemikase ị́ nẹngịma aḅẹ à nwọ ọrịmẹ ḅẹḅẹ à ḅo ḅarachụa ị́ pịrịḅịa.

¹² Ịnyọ chụa pịkị kụrọkuḅie nyana! Ye wa gagama owusọ se mịna tomonima na pịkị mịna Tamụnọ Ḅe opuamama na pịrị. Se ye Nyanaḅọ Ḅe tọnye mị-ẹ!”

¹³ Joab ḅe na oria owuapụma na nwẹngị sọmunmẹ owupakaḅịa ẹrẹchị, ọkụma Siriapụ ma ini mangịsomẹ.

¹⁴ Amọn apụma, Siriapụ ma mangịsoarị ọkụ nwọ ọrị sịkị, ini sọnị Abishaị ḅe tọrụkuḅu wẹrị mangịso se vinpịkị mun opuama mị ḅie sọmẹ. Anịsịkị Joab ḅe dachịẹmẹ Amọn apụma na owusọ ḅụ se vinpịkị so Jerusalẹm mị mun mẹ.

¹⁵ Anị ḅo Siriapụ ma ḅụokoromẹ na Izrẹlapụma ini nẹngịmasam nwọḅẹ sịkị, inia ọmụogbo ma ini nwọ chịn koḅirimẹ.

¹⁶ Anịsịkị Amanyanaḅọ Hadadiza ḅe anị Yufretis Tọrụ mị ḅụ ịrụapakapaka nyọ daọrụ ḅụ sime Siriapụ ma fịrịma ọkịmẹ, se ini ḅo Hilam mị lamẹ Shobak ḅe ọmụkụlọ ḅụ, anị Amanyanaḅọ Hadadiza, Zobaḅọ ḅe ọmụogbo ọmụtịḅịdaḅọ ḅe.

¹⁷ Devid ḅe anị naa sịkị, Izrẹl owuni kpokpo ma ọ̀ nwọ koḅiri, Jọdan Tọrụ mị saḅa, se nwẹngị mun Hilam mị lamẹ, anị Siriapụ ma inia ḅụ koḅiri se owuse Devid ḅe paka nyọ mị. Owu mị sakịmẹ,

¹⁸ se Izrẹlapụma Siria ọmụogbo mị depịkịmẹ. Devid ḅe na oria owuapụma na kịnị ẹndẹ jieasi fịnjị ini nwọ ḅaamẹ, Siriapụ ḅụ kporokporo ọmụarụ dọkụapụ ma ḅụ, pịkịna asụn ọgọnọ owunima ḅụ sọnọ-a poku ini nwọ ḅaamẹ; ini pịkị yese Shobak ḅe lamamẹ anị tarakapụma ọmụtịḅịdaḅọ ḅe, se ọmụgbin ele ogbo ḅụ ọ̀ fị̀mẹ.

¹⁹ Hadadiza ḅe chuku ḅie sime amanyanapụma, Izrẹlapụma ini nẹngịmasam nwọḅẹye mị nemi sịkị, ini ini na deinma mịẹmẹ se ḅo inia chuku ḅie sime apụ nwọ sọmẹ. Se Siriapụ ma jịn sịkị se ḅo ḅarachụa Amọn apụma pịrị mị anị ḅo inia ḅalafamaye sọmẹ.