2 Samụẹl 1 - Kịrịkẹnị Baịbụl

Devid Ḅe Sọl Ḅe Fị Mị Namẹ

¹ Sọl ḅe fị ḅọrọso sịkị Devid ḅe vinpịkị ḅomẹ ori Amalẹk apụma nẹngịma nyọ mị ḅụ, se mama ḍin nwọse Ziklag mị ḅie simemẹ.

² Anịḅe eneḅa gbọrị asẹmẹnịḅọ Sọl ikowarị mị ḅie ḅụ pakaḅomẹ. Se oria kururu mị ḍiepakụma ḅụ oria ḅụchụayema ọ̀ nwọ kanmẹ, pịkị fọn se ọ̀ tịḅị saramẹ. Ò Devid ḅe damaḅo se tịḅịtu ọ̀ pịrịmẹ osi se ọ̀ pịrị ḅụ.

³ Devid ḅe nwọse ò gbelamẹ, “Ndeju ḅụ ị́ ḅo?” “Izrẹlapụma pike sime ikowarịma ḅie ḅụ à mangị ḅomẹ,” ọ̀ nwọse ọ̀ pẹkẹrẹmẹ.

⁴ “Ḍuko ị̀ pịrị cheye paka,” Devid ḅe nwọ ḅẹmẹ. “Mịna ọmụogbo mị anị mangịmẹ ọmụ mị ḅie,” ọ̀ nwọ pẹkẹrẹmẹ, “se mịna anga apụma ḅụ tọn apụ ini nwọ ḅaamẹ. Sọl ḅe na yayo Jonatan ḅe na sọnị ini ini ḅaamẹ.”

⁵ Devid ḅe nwọse ò gbelamẹ, “Nde ị́ nemi ọkụ na Sọl ḅe na Jonatan ḅe na ini fị̀mẹ?”

⁶ Ọ̀ nwọ pẹkẹrẹmẹ, “Gilboa Tụndụ mị ọgọnọ ḅụ à simemẹ, se àrị ọrịmẹ na Sọl ḅe oria angwa mị ḅụ ọ̀ sẹrẹrẹ waraḅẹ, anịsịkị tarakapụma owuni kporokporoma na asụn-ọgọnọ-owuni ma na ini ḅo orina kpeki-eḅoaḅẹ.

⁷ Anị ọ̀ tọrụ pịkị se ị̀ ọrị se ị̀ chịnye-ẹ. Àrị ọ̀ pẹkẹrẹmẹ, ‘Iin, mị ị̀rị̀-ẹ, ị̀ nyanaḅọ!’

⁸ Ị́rị́ tụḅọ ọ̀ nwọse ị̀ gbelamẹ, se à ḍuko ọ̀ pịrịmẹ na ị̀rị̀ Amalẹkḅọ-ẹ.

⁹ Anịsịkị ọ̀ nwọse ị̀ ḅẹmẹ, ‘Mịanga ḅo se ị̀ ḅaa! Ye siḅara se ị̀ lasam anị gose à fị-ẹtọn aḅẹ.’

¹⁰ Anịẹrẹchị àrị ọ̀ damamun se ọ̀ ḅaamẹ, anịatịḅị à nemimẹ na gbarịmaka ḅaraḅụ ọ̀ fịḅịa, ọ̀ ḅịkị kirikiri. Anịsịkị àrị ọ̀ tịḅị amanyanaḅọchu mị sinmẹ, pịkị ọ̀ ḅarakọngọ sime ikulele-aba-gbanaye mị na, se àrị àrị ọkịḅo se ị́ pịrịmẹ, ị̀ nyanaḅọ.”

¹¹ Devid ḅe kururu ḅụ oria ḅụchụayema nụnụ kanmẹ, se ori na sime owuapụ mamgba pịkị ọkọ mịẹmẹ.

¹² Ini opu ḅụosọ na kururu ḅụ na ḅuru se ḅụḅaama ḅụ sime mun saso ḅiri nwọ lamẹ, Sọl ḅe na Jonatan ḅe na pịkị Izrẹl mị na gose, anịatịḅị Nyanaḅọ Ḅe oria tomonima ḅụ tọn apụ ini nwọ ḅaamẹ ọmụ mị ḅie ḅụ.

¹³ Devid ḅe nwọse ḅo ḅẹrẹ mị ḍuko ọ̀ pịrị asẹmẹnịḅọ ḅe gbelamẹ, “Ị́rị́ nde ama ḅọ?” Ọ̀ nwọ pẹkẹrẹmẹ, “Ị̀rị̀ Amalẹkḅọ-ẹ, ọkụma ị́ya sẹ mị ḅie àrị angamẹ.”

¹⁴ Devid ḅe nwọse ò gbelamẹ, “Cheye ị́ kuḅiekụrọma ị́ Nyanaḅọ Ḅe sẹlẹọkị se pulo se tịḅị sarasa amanyanaḅọ ḅe ḅaa?”

¹⁵ Anị Devid ḅe orina sime owuapụma ḅie gbọrịḅọ chịn se nwọse ọ̀ ḅẹye-ẹ, “Ọ̀ ḅaa!” Nweniḅọ ḅe Amalẹkḅọ ḅe temi ḅaamẹ,

¹⁶ se Devid ḅe nwọse Amalẹkḅọ ḅe ḅẹmẹ, “Ị́ ḅịpị ḅie pakaḅoye anị mịn fị mị ọkịḅo ị́ pịrịye-ẹ. Ị́ ḅẹrẹsipẹlẹ ị́ ḅụ pịrịmẹ na ị́ fị gbẹịnmẹ, Nyanaḅọ Ḅe sẹlẹọkị se pulo se tịḅị sarase amanyanaḅọ mịẹḅọ ḅe ị́ nwọ ḅaamẹ nwọ ḅẹye mị ị́ nwọ ḅereni ọkịye gose.”

Devid Ḅe Kururumẹ Sọl Ḅe Na Jonatan Ḅe Na Gose

¹⁷ Devid ḅe mị kururu nime mị chumẹ Sọl ḅe na yayo Jonatan ḅe na gose,

¹⁸ se kụrọ pịrịmẹ na ini anị seni Juda apụma ḍie. (Jesha ḍiri mị ḅie anị gịẹịn koroma waraḅẹ.)

¹⁹ “Izrẹl chịngịma ọgọnọ ḅụ mịna tịḅịnịma ini nwọ ḅaamẹ! Mịna owunima ḅie ḅụ kụrọtẹịn apụma ini ḅịkịsam!

²⁰ Gat mị ḅie ḅụ ómine anị ḍukopakụmama pịkịna Ashkẹlọn ateli ma ḅie ḅụ sọnị. Ọ́ mịẹse Filistia eremeni ma ḅieḅẹlẹma; jịn-a oru tẹkẹ eremeni awọma ó ḅerenima ini ḍoroku.

²¹ “Ye ene anịkanịka ijiriji ngịsị koroma Gilboa chịngịma ọgọnọ ḅụ; ḍumo nyanaye sọnị anịa chuku pakaḅoma gbaso! Anịatịḅị kụrọnị ma inia agbọ ma anịju sara sime waraḅẹ ḅụgererema ḅaraḅụ; Sọl ḅe oria agbọ mị ini ḅarị pulo se anị tan ẹkẹ.

²² Jonatan lubu mị nweni ḅaaye-ẹ, Sọl okola-agiji mị anị ḍikitịḅịfoin nyanakẹ, kụrọnị ma pẹlẹ gbin pịkị tarakapụma ḅaa mị ḅụ.

²³ “Sọl ḅe na Jonatan ḅe na, ini opuma jụmḅọ jụmḅọ ḅẹlẹma pịkị yelamẹ; inia ḍumo sịkị ḅụ gbọrịḅụ ini simemẹ, fị sịkị ḅụ ini pịkị gbọrịḅụ simemẹ; ini mangị igo nẹngịmẹ, ini pịkị kụrọ chịrịḅama nẹngịmẹ.

²⁴ “Izrẹl eremeni-awọ, ó kururu Sọl ḅe pịrị! Anị iḅi yela awụwụ ḅịtẹ nwọse ó ḅirimaḅọ ḅe pịkịna opuma yela pụkọchụaye na, goli na se ó ḅirimaḅọ ḅe.

²⁵ “Kụrọ owunima ini ḅịkịsam, ọmụ ḅie ini ini ḅaamẹ. Jonatan ḅe chịngịma ọgọnọ ọ̀ fị ḅọlọlọ sime waraḅẹ.

²⁶ “Àrị ị́ gose kururumẹ, mbire Jonatan; ị́ opuma ị̀ ḅụ yelamẹ! Ị́ nyana ị̀ pịrị ḅẹlẹma opuma ḅụgbiripumamẹ, anị ikutẹịn eremeni ḅẹlẹma nẹngịmẹ.

²⁷ “Kụrọ pịkị ọbịrị owunima ini ḅịkịsam, inia owuniayema àrị sarasimesam, àrị ngịsị ḅarị mịẹye ḅụ ofori-ẹ.”