2 Pita 2 - Kịrịkẹnị Baịbụl

Iruo Yeḍieapụ

¹ Ḅọrọsa sịkị ḅụ iruo ịkịankoroapụ pakaḅomẹ. Anị gbọrị ḅara mị anị iruo yeḍieapụ ọ́mịna ḅie ḅụ pakaḅoḅịa ọkụ-ẹ. Ini ye simaḅịa, karakaraka ḍieaye nwọse ḅoḅịa, se Yeḍieḅọ Ḅe, anị ini pẹkẹrẹ pakụmaḅo ḅọ ḅe, nwọ pikiḅịa. Anịẹrẹchị ini bẹkẹma fị nwọ ọkịḅo inia ḅụ ma pịrịḅịa.

² Anị ọkọ simemẹ ḅẹ sọnị, tọn apụ ini si mịẹmịẹaye ma ḍukonwẹngịḅịa; ọkụma ini mịẹaye gose, dapụ karakara Ateli mị ḅụ si-ọkwẹịnkọnḅịa.

³ Inia ngẹrịfị ḍọkị mị ḅụ, ma iruo yeḍieapụ ma, nwọ ḍuko ọ́ pịrịarị ḅẹrẹ ma ḅụ ini sọye mịẹḅịa. Anịatịḅị inia Ḅẹrẹkọn ḅọ ḅe, ọ̀ ḅụkarakarama ini koruaḅẹ. Ini Ḅaaḅịa ḅọ ḅe sọnị ọ̀ mọnọkẹ.

⁴ Tamụnọ Ḅe ọ̀ ḅarasin se simịẹ enjẹlapụma pịrịkẹ, ọkụma, ori ini se tọrụsiọrị kọrịfịnị ḅie gbinmẹ; anịanga ḅụ ini kanakana ḅie ikoli se ini ịkasị koroma se Ḅẹrẹkọn Ene mị koruaḅẹ.

⁵ Tamụnọ Ḅe ọ̀ ḅarasin olomu tomonikiri mị pịrịkẹ, ọkụma opu mengi ọ̀ nwọse ḅo Tamụnọ nemika apụma famamẹ. Ọ̀ ḍụaḅọrọmapụ anị Noa, karakara ḅẹrẹ mị ḍuko ḅọ ḅe na, jịn sọnọma apụ na-ẹ.

⁶ Tamụnọ Ḅe ó si ḅẹrẹ pẹlẹ se Sọdọm na Gomọra na amama pịrịmẹ, se orumo se ini famamẹ, ori ini se Tamụnọ nemika apụma laḅịaye nwọ otomamẹ.

⁷ Lọt, iḅi ḅọ ḅe, oloko lekirika se si ḍumokọn apụma ḅe ḍumo mị ḅụḅalaḅalama ḅọ ḅe, ori ọ̀ ḍụapakụmaḅomẹ.

⁸ Ori iḅi ḅọ ḅe inia ḅie angamẹ, se eneḅeneḅene ḅụ, ori inia si mịẹmịẹaye ma ọrị pịkị naa sịkị, anị ò kuḅie ọyịmamẹ.

⁹ Anịgose, Nyanaḅọ Ḅe ḍaḍiki ma ḅie Tamụnọ nemiapụ ma ḍụaḅịa ọkụ mị ò nemimẹ, pịkị sitịḅịnyana apụma se tọrụsiọrị ḅie wẹrị mun Ḅẹrẹkọn Ene mị laḅịa ọkụ mị sọnị,

¹⁰ anịtẹịn anga, ini inia ịlọlị ojumịnị ma ḍiki pụkọsoliaye ma ḍukonwẹngị se pịkị Tamụnọ Ḅe kụrọ mị ḍiki alịma apụma. Ma iruo yeḍieapụ ma ini kụrọkuḅie nyana pịkị ḅụdekichịẹmamẹ, ini pịkị osi seni ọgọnọ ḅie sime boma nyanapụ ma pịrịkẹ, anịnakaraka ini ini ḍukosima-simamẹ.

¹¹ Anị enjẹlapụma ini kụrọtẹịn pịkị ịnyọ nyanatẹịn iruo yeḍieapụ ma nẹngịmẹ ḅẹ sọnị, ini Nyanaḅọ Ḅe tọrọkọ ḅụ ini ḍukosimakẹ.

¹² Ọkụma mịna tomonima piri ḅie nama kịkẹ apụma, anị ini ye se kun ḅaa pẹịḅịa nama simeọkụ sime apụma, ini ineda kaịnḅoka ye goyegoye, ini anịa ḅụ ḍukosimaye nyanamẹ. Piri ḅie nama ḅaa ọkụ ini nwọse ini ḅaaḅịa.

¹³ Se tọrụsiọrị ini nwọse ini gbẹịnḅịa ini mịẹse jịn apụ tọrụsiọrị ye gose. Sime ini pịrị ḅieḅẹlẹ anị enekaka fịafịa ogbo ḅụ inia ojumịnị ma ḅụḅẹlẹḅịaye goyegoye nwọ mịẹ mị-ẹ. Ini ḅụgereremamẹ pịkị ḅụ simamẹ ini ómine na yefị gbolomarị sịkị, sịkịmamgba ini nwọ inia epele-a ḍumo ma ḅụ ḅieḅẹlẹarị sịkị.

¹⁴ Sẹfị eremeni ma sikima ini tọrụ se jịnye ḍikikẹ; simịẹ mị ngịsị inia pụkọtankẹ. Ini ịnyọ ḅụ ofori apụma telima mun ḍẹịn ḅie chuchumẹ. Inia kuḅie mgba ngẹrịfị ḍọkị ḅụgbanamẹ. Tamụnọ worinime sime ini pịrịmẹ.

¹⁵ Ini gbụkụkụ ateli mị wẹrịso irisam. Belam, Beọ yaḅe, siye mịẹ ḅụ igbiki ḅẹlẹma ọkịḅọ ḅe ateli mị ini nwọ ọkịsam

¹⁶ oria si gose ini pịkị ò ḍiki ịganịmẹ. Oria asụn ḅe, tomoni pụkọ se ọkwẹịn se ịkịankoroḅọ ḅe nọmụ mịẹmịẹye mị dachịẹmẹ.

¹⁷ Mịna apụma fịḅịsa olulu ini nwọ kịkẹmẹ, pịkị irisi sumama ḅọrọarị soḅuno ini nwọ kịkẹmẹ. Tamụnọ Ḅe anị gbuntẹịn kanakana mị ḅie ọ̀ nwọ sikima koroma ini pịrịsam.

¹⁸ Ini ḅụdekichịẹma pịkị yenemika ọkwẹịn nwọ kọnkọnmẹ, anịsịkị, inia ojumịnị mị ḍikipụkọsoliarị sima, ini nwọse ḍẹịntu siḅụ mangị soarị apụma pịrịmẹ.

¹⁹ Ini ḅụ nyana ḅereni ini pịrịmẹ ọkụma ini na mịnaḅụ na ini omoniapụsọ nweni ḅaaḅaa simịẹmịẹye mị pịrịmẹ.

²⁰ Nemikase wa Nyanaḅọ pịkị mịna Ḍụaḅọrọmaḅọ Jizọs Kraịst Ḅe ḍawọnemi ḅụ tomonima tomonikiri simearịye ma ḅụ pọkọsomẹ se àrị pịkị ini kun se ini nẹngịmamẹ ḅẹḅẹ, ọkọ sime apụma ḅe kuluma mị sitẹịn anịḅe sakị mị nẹngịmẹ.

²¹ Mgbọkụ anị iḅitẹịnye nwọ sọ ini pịrịḅịa, ini nemikase anị karakara ateli mị ma nwọ lekirika ọkụma, se ini se ini pịrị sa fịafịa oloko mị ḅụ vinpịkị so mị nẹngịmẹ.

²² Paka ini pịrịarịye ma ḍiepakụmamẹ na kaḅoma kọkọmaye-ẹ; “Obiri ḅe ò vinpịkị so mun ori ọsụn pakụmaḅosaye mị taḅamẹ” Anị pịkị, “ini sịkịrịsa oporopo ḅe vinpịkị so mun ọpọtọkọ ḅie kpeleki ọkụ-ẹ.”