2 Kọrịntapụ 9 - Kịrịkẹnị Baịbụl

Ḅarachụa Inia Juo Kraịst Ḅereniapụma Pịrị

¹ Kọkọmaye-ẹ à gose ḍiri gịẹịn ọ́ sẹịnmaḅịaye ofori-ẹ, ómine ḅe ḅarachụa se Judia ḅie sime Tamụnọ-a tomonima nwọ fịrịma mị ḅụ.

² À nemimẹ na ó ḅerenimẹ ḅarachụa ini pịrị, à pịkị ó se ḅụboma Masidonia ḅie sime apụma pịrịsam. À nwọ ḅẹmẹ na, “Akaya ḅie sime mịnapụma nwọ ḅọrọsa kụra ngịsị ḅụkarakaramasam ḅarachụaḅịa ẹrẹchị.” Ọ́mịna kuḅie chịẹ-chịẹ-chịẹ mị inia ḅụ tọn-a apụ jike sịsẹmamẹ.

³ Mịọkụ à mịna mịnapụma seni fịrịmaḅẹ, mịẹse wa ó se ḅịpịkọn ye mị papa ọkwẹịn nwọ sọ ẹka ḅara. Ọkụma, à ḍukosa ḅara mị nwọ ḍiepakụmaḅịa ọkụ, na ọ́ ḅụkarakarama waraḅẹ ḅarachụaḅịa ẹrẹchị.

⁴ Anịatịḅị Masidonia apụma nemikase ị̀ ḅụ sọ ḅo se ḍọkịḅo ọrịmẹ na ọ́ ḅụkarakaramakẹ nwọ ḅẹ ọkụma, anị mine kẹngẹ ḅụgererema ẹkẹ—ọkụma ómine sọnị-ẹ—wa opuma kuḅie se ọ́ ḅụ gbanaye ẹrẹchị.

⁵ Anịẹrẹchị, à koromamẹ na anị ḅụgbẹịnmẹ à tatarị mịnapụma se fịrịma, à ḅoka simeogbo ọ́ pịrịḅịa ẹrẹchị ó ḅereniye mị ọ́ nwọ karakaramaḅịa ḅara, sịkị ma laka simeogbo. Anịọkụma à ḅoḅịa sịkị anị karakarasam, anị ḍiepakụmaḅịa na kuḅie lokoloko ḅụ ọ́ pịrịmẹ, ọkụma ngọrị tẹmẹ ḅụkẹ.

⁶ Se ḅiekoroma na kẹsịmaye ḍipi ḅọ ḅe, ọ̀ pịkị kẹsịma sokuḅịa, ḅakama ye ḍipi ḅọ ḅe pịkị ḅakama sokuḅịa.

⁷ Ḅọḅọ iniḅọ kuḅie tọn pẹlẹsa ḅara nwọ pịrị, kuḅie manamatọn ḅaraḅụkẹ anịkanịka nwẹngị gbẹịn fịrị nwọ nwẹngị ḅika ḅaraḅụkẹ; anịatịḅị Tamụnọ Ḅe Ò ḅieḅẹlẹ ḅụ ye pịrị ḅọ nwọ ḅẹlẹma ḅẹlẹmamẹ.

⁸ Tamụnọ Ḅe Ọ̀ pịkị ineda anị ḅụpalịma ḅara nẹngịma ọkụ nwọse ọ́ pịrịḅịa, mịẹse ọ́ sịkịmamgba ye ọ́ ḅụpalịma laḅara ḅe aye nwọ nyana ọ́mịna ḅụ ma pịrịḅịa, pịkị nyana saḅa mun se iḅi fịrị goyegoye nwẹngịḅịa ḅara laḅịa.

⁹ Fịafịa ḍiri mị nwọ ḅẹmẹ na, “Ọ̀ ḅie lokoloko ḅara se yeḍie seni mịẹḅịa ọkụ ofori apụma nwọ pịrịmẹ; oria iḅimịẹ mị simegbasomẹ.”

¹⁰ Se Tamụnọ Ḅe, ḍipi ḅịa mgbọlụ nwọse yeḍipiapụma pịrịpịrịḅọ Ḅe, pịkị fịḅịa fịturu nwọ pịrịpịrịḅọ Ḅe, pịkị ọ́ ḅụpalịma ḍipiye mamgba nwọse ọ́ pịrịḅịa, Ọ̀ pịkị mịẹse àrị sẹnịpaka se iḅi soku sịkị ḅụ ḅaka chịnmgbọlụ nwọse ọ́ pịrịḅịa, ọ́mịna ḅara pakụmaye pịrị mị gose.

¹¹ Ọ̀ mịẹse sịkịmamgba ọ́ ḅakama ye nyanaḅịa mịẹse sịkịmamgba ọ́ ḅarapakụma ḅara se iḅi mịẹḅịa ḅara, mịẹso ọkụma tọn-apụ wa ọ́ ḅara ọkịḅo ini pịrịarị ḍiepịrịayema gose mịẹḅaka se Tamụnọ Ḅe ḅẹḅịa ḅara.

¹² Anịatịḅị ọ́ nwẹngịarị fịrị mị anị Tamụnọ-a tomonima ḅụpalịmaye kẹngẹ nwọ mịẹpẹlẹkẹ ọkụma àrị pịkị ḅeinwasa mịẹḅaka nwọ ọkịḅo Tamụnọ Ḅe pịrịmẹ.

¹³ Se mị ọ́ nwẹngịarị fịrị mị ḅe ḍiepakụmaye ma tọn-apụ boma se ḅo Tamụnọ Ḅe pịrịḅịa, ọ́mịna Kraịst iḅiọkwẹịn mị ọkị iḅi ḅara mị gose, anị ó ḍukopakụmaye mị, se ọ́mịna ḅarapakụma ḅara se ye pịrị ḅụ ómine ini na pịkị ḅẹḅọ ḅẹḅọ na ḍiaye mị.

¹⁴ Anịẹrẹchị gbun ḅẹlẹma ḅụ ini tẹkẹ ọ́ pịrịḅịa, Tamụnọ Ḅe ọ̀ ḅụ ḍiepakụma wa saḅakoro opu ḍikiḅụgerere mị gose.

¹⁵ Ó ye wa mịẹḅaka se Tamụnọ Ḅe ḅẹ Oria ḅịpị ineda ḍuko ẹka ḍiepịrịye mị gose.