2 Amanyanapụ Sịkị Mịẹaye Ma 9 - Kịrịkẹnị Baịbụl

Shiba Amanyanaḅọ Eremeniḅọ Ma Ḅe Ḅo Mị

¹ Shiba amanyana eremeniḅọ ma, á Amanyanaḅọ Sọlọmọn ḅe ẹrẹso mị na gbolomaye nwọ naamẹ, se á so Jerusalẹm mun mẹ, ḅụfụkamaye seni ò gbelaḅịa ẹrẹchị. Fịrịnwẹngị á pịrịḅịa apụ á ḅakama nwọse chụa ḅomẹ, ike-nambulo na, ye kụnụmaye na, yela ḍụparị na pịkị ḅaka goli na àrị nwọ pụramẹ. Á ḅo Sọlọmọn ḅe na ịrịa sịkị, árị ineda se ḅiekoroma aye mamgba á nwọse ò gbelamẹ.

² Ori àrịmgba pẹkẹrẹmẹ, mị re ọ̀ ḅụfụkamamẹ se ò ḅelema ḍuko á pịrịkaye ofori-ẹ.

³ Shiba amanyana eremeniḅọ ma, Sọlọmọn ḅe oria yenemi mị na gbolomaye á naamẹ, ọ̀ nama amanyanaḅọ warị mị sọ á pịkị ọrịmẹ.

⁴ Oria dẹbụl ọgọnọ ini se gbana fịayema ọrịmẹ, oria fịrịnwẹngịapụma anga warịma na, oria amanyanaḅọ warị ḅie fịrịnwẹngịapụma ḅiriaye ma na, ini ọrụtọn sime ḅara mị na, dẹbụl ọgọnọ ò ye fịarịsịkịḅụ ò koruarị fịrịnwẹngịapụma chụa ḅụchụayema na, pịkị Oputẹkẹwarị mị ḅieḅụ ọ̀ mịẹ agbama na. Àrị á ḅụlọḅeinma pịkị á ḅụgbiripumamẹ.

⁵ Á nwọse amanyanaḅọ ḅe ḅẹmẹ, “Ị̀ya sẹ ḅie, ị́rị́ na ị́ya yenemi mị na, gbolomaye ḅụ á naaye ma kọkọmaye-ẹ!

⁶ Ini ḍuko ị̀ pịrịayema à ḅerenika nweni à ḅo ḅarana tọrụmgbọlụ se àrị ọrị sịkị lamẹ. Ị́ya yenemi mị gbolomaye ḅụ pẹkẹrẹ sọnị ma à naakẹ. Ị́ yenemitẹịn tomonima ḍuko ḅara mị nẹngịmẹ.

⁷ Fịrịnwẹngị ị́ pịrịarị apụma nyana iḅifụḅara mị ḍiki, anị sịkịmamgba ị́ tọrọkọ sime se ẹmbẹ nyana ị́ya yenemi ọkwẹịnma naa àrị apụma!

⁸ Ị́ Nyana ị́ Tamụnọ Ḅe tokoni! Ọ̀ nyana ị́ pịrị ḅereni mị ọ̀ nwọ mịẹpakụmamẹ, anị ori ị́ se amanyanaḅọ mịẹmẹ na oria ẹrẹḅụ ḅẹrẹtọn ọ̀ nwọḅẹye mị, anịatịḅị oria tomoni Izrẹlapụma ọ̀ nwọ ḅẹlẹmamẹ nwọḅẹye gose, ọ̀ pịkị ini koko gbasoḅịa ẹrẹchị, ori ị́ seni inia amanyanaḅọ nwọ mịẹsam mịẹse ị́ ineda oloko na karakaraye na nwọ ọlọ kụrọmaḅịa ọkụ.”

⁹ Á se ḅo ḍiepịrịayema á nwọse Amanyanaḅọ Sọlọmọn ḅe pịrịmẹ: goli ḅụ ḍụḅa ḍụḅa sọnọ-a opu okpokpo na, pịkị opuma ḅaka ye kụnụmaye na, kụnụ olo mịẹaye na, pịkị yela ḍụparịma na. Shiba amanyana eremeniḅọ ma se Amanyanaḅọ Sọlọmọn ḅe pịrị fịaye ḅẹlẹmaye ma na kụnụ olo mịẹaye ma na, iḅiọkụ iḅi aye jịn sịkịḅụ ma ofori-ẹ.

¹⁰ (Amanyanaḅọ Hiram owuapụma na Amanyanaḅọ Sọlọmọn owuapụma na anị Ọfa ḅieḅụ goli ma sẹịn ḅo apụma anị pịkị junipa chịnma na yela ḍụparịma na se chụa sẹịn ḅoye-ẹ.

¹¹ Sọlọmọn ḅe ḍụpọ pu chịnma, ò seni Oputẹkẹwarị mị ḅụ na pịkị oria amanyanaḅọ warị mị ḅụ na tanjị iwo na koro na ịkpịkpa nwọ mịẹmẹ, ọ̀ pịkị àrị se ọbọ mịẹ nime chuapụ na yefarị apụ na pịrịmẹ. Juda ama mị ḅie jịn sịkị ọkọsimeye ngịsị ma ini ọrịkẹ.)

¹² Amanyanaḅọ Sọlọmọn ḅe Shiba amanyana eremeniḅọ ma ḅiye goyegoye ò se á pịrịmẹ. Mayema ò se chụa á pịrịmẹ, se á se ḅo ọ̀ pịrịayema na ḍinmamẹ. Anịsịkị anị árị na árịa fịrịnwẹngịapụma na pịkịmaso Shiba ama mị mun ye-ẹ.

Amanyanaḅọ Sọlọmọn Ḅe Kọn Ala Mị

¹³ Kụra goyegoye Amanyanaḅọ Sọlọmọn ḅe goli ḅụ okpokpo-a mẹndẹ oyiasi fịnjị ofori tẹrẹ-a poku ọ̀ nwọ daọkịkịmẹ,

¹⁴ seni tuḅonima na opu-a tuḅonima na inia ama ocho igbiki ma ḅụ chụa. Arebia amanyanapụma na pịkị Izrẹl amama ḍikiḍikiapụ ma na seleḅa na goli na nwọ ọkịḅo ọ̀ pịrịpịrịmẹ.

¹⁵ Sọlọmọn ḅe ḍụḅa ḍụḅa agbọ oyiasi ọ̀ nwọ mịẹmẹ, gbọrị agbọ, goli jie opu okpokpo, jie opu okpokpo ọ̀ nwọ sanị àrị oḅolomẹ,

¹⁶ ọ̀ pịkị gbam gbam agbọ-a jieasi nwọ mịẹmẹ, se gbọrị agbọ goli nine-a opu okpokpo nine-a opu okpokpo ọ̀ nwọ sanị àrị oḅolomẹ. Lẹbanọn Opu Piri mị ḅie sime Warị mị ḅie ori àrị se koromamẹ.

¹⁷ Amanyanaḅọ ḅe pịkị gbọrị amanyanaḅọ ngada nwọ mịẹmẹ. Anịa ḅụ gbọrị pẹkẹrẹ oḍu ọ̀ nwọse anị oḅolomẹ se ísí pẹkẹrẹ ma jokoma goli ọ̀ nwọse pịkị anị oḅolomẹ.

¹⁸ Amanyanaḅọ ngada mị ịkpịkpa sonio-a ḅụọ ị́ nwọ kpọlị se mun anịa ọgọnọju laḅịa, ḅụọ sẹkẹ ịkasịe anịa ḅụ omi-ẹ, goli ọ̀ nwọse anị oḅolomẹ. Amanyanaḅọ ngada mị ḅụ ḅara gbanaye anga anga ḅụ omi-ẹ, se chịrịḅa ọ̀ nwọ mịẹ gbọrị pẹkẹrẹ gbọrị pẹkẹrẹ ḅụ chịẹmamẹ.

¹⁹ Oyimaịn chịrịḅa fịnjị ịkpịkpa ma ọgọnọ ḅụ omi-ẹ. Ịkpịkpa ḅụ mama pẹkẹrẹ ịkọlị ma ọgọnọ, gbọrị ịkpịkpa ọgọnọ gbọrị wu gbọrị wu omi-ẹ. Jịn amanyanakiri ḅụ jịn sịkị nwọ sime amanyanaḅọ ngada ma pakaḅokẹ.

²⁰ Amanyanaḅọ Sọlọmọn ḅe oria mengi ḅu ọmọngọ mamgba goli ọ̀ nwọse àrị mịẹmẹ, pịkị Lẹbanọn Opu piri mị ḅie sime warị mị ḅie sime yefịaye mamgba jokoma goli-ẹ. Sọlọmọn ḍumo enema ḅie seleḅa mị ini seni yelaye kịẹnmakẹ.

²¹ Amanyanaḅọ Hiram onwoin arụ ma na dọkụ abaji sọsọ tọn-a onwoin arụ ọ̀ nwọ nyanamẹ. Tẹrẹ-a kụra goyegoye ḅụ, oria ḅaka onwoin arụ ma àrị pịkịmaḅoḅịa sịkị àrị goli na, seleḅa na, oḍu ma na, kpako ma na, pịkị ḅụkọ ma na nwọse ḅoḅomẹ.

²² Amanyanaḅọ Sọlọmọn ḅe ori ngọ kọntẹịn pịkị yenemitẹịn bebe tomonikiri ḅie sime amanyanapụ goyegoye nẹngịmẹ.

²³ Inimgba ini ọ̀ damaḅo ọ̀ ḅara tetema ḅiḅimẹ, pịkị Tamụnọ Ḅe se ọ̀ pịrị nemi mị na pokiḅịa ẹrẹchị.

²⁴ Inia ḅụ ḅọḅọ yese ḅo ḍie Sọlọmọn ḅe pịrịpịrịmẹ—seleḅa na goli na, koroḅụchụaye ma na, ọmụgbin aye na, kụnụ olo ma na, asụnma na, pịkị yepụra asụnma na. Mịn mị kụrakụra ḅụ ini anị mịẹmịẹmẹ.

²⁵ Amanyanaḅọ Sọlọmọn ḅe kporokporo ọmụarụ ma na asụnma na kokoḅịa warị ḅụ oyi ẹndẹ ọ̀ nwọ nyanamẹ, se kiri ọgọnọ ọmụgbin asụnma ḅụ poku na oyi ẹndẹ na ọ̀ nwọ nyanamẹ. Àrịa ḅụ daye ọ̀ nwọse Jerusalẹm ḅie wẹrịmẹ, se ísí kọn ayema ori àrị se jịn kịrịkịrị opuamama ḅie koromamẹ.

²⁶ Anị pẹkẹrẹ mị mgba ḅụ ori anị tịḅịda amanyanaḅọ-ẹ Yufretis Tọrụ mị ḅụ ọkịmun Filistia na Ijipt na eke mị la.

²⁷ Ori amadarị sịkị ḅụ seleḅa mị ngịsị yesọkẹ Jerusalẹm ḅie, papa ḍụparị yesọka ọkụ simemẹ, awụ chịnma sọnị Juda chịngịma chuku ḅụ sime papa ịḅa ejema ḅaka ọkụ ḅakamẹ.

²⁸ Sọlọmọn ḅe Musraị ḅie na pịkị jịn-a sẹma ḅieḅụ na anị ori asụnma fẹḅoḅoye-ẹ.

Sọlọmọn Amada Mị Mgba Gboloma

²⁹ Sọlọmọn ḅụa ḅẹrẹ ḅụ kirikọn ayema, ngei ḅụ sakịmun kuluma la; pịkị ịkịankoro Ahaịja, Shịloḅọ ḅe ọrị ịkịan mị na, ịkịankoro Netan ḅụa ḅẹrẹ ḍiri mị ḅie gịẹịn waraḅẹ, pịkị ịkịankoro Ido ḅe Amanyanaḅọ Jeroboam Izrẹlḅọ ḅe ḅụ ori ọrị ayema na gbolomaye sọnị.

³⁰ Sọlọmọn ḅe kụra mesi ọ̀ nwọse Jerusalẹm mị ḅie sime ḅẹrẹtọn bebe Izrẹl mị mgba pịrịmẹ.

³¹ Ọ̀ fịmẹ se Devid Opuama mị ḅie ini ò ḍipimẹ se yayo Rihoboam ḅe ò kiriḍinmamẹ amanyanaḅọ ḅaraḅụ.