1 Timoti 2 - Kịrịkẹnị Baịbụl

Chọchị Mị Ḅe Tẹkẹ Ḅara

¹ Tatarịye, à ḅi kụrọmamẹ na, ọ́ kụrọma Tamụnọ Ḅe ḅara ye ḅi ọ́ ḅụ pịrị, tẹkẹ, yeḅi jịn apụ pịrị, pịkị mịẹḅaka seni ọ̀ ḅẹ tomoni mamgba tịḅị gose;

² amanyanapụ gose pịkị kụrọ nyana se ḅẹrẹtọn-arị jịn apụ mamgba na gose, mịẹse wa yawụma dein ḍumo kọnḅịa ḅara, mangịma nyana Tamụnọ Ḅe ḅụ, pịkị karakara tọrụgbẹịn ḍumo kọn ḅụ na.

³ Mịn mị iḅimẹ anị pịkị Tamụnọ Ḅe mịna Ḍụaḅọrọmaḅọ Ḅe ḅụḅẹlẹmẹ,

⁴ ḅi na nweni mgba ḍụaḅọrọma nyana nwọ ḅẹ ḅọ ḅe, pịkị ḅo kọkọmaye mị nemi nwọ ḅẹ ḅọ ḅe.

⁵ Anịatịḅị gbọrị Tamụnọ omi-ẹ, gbọrịḅọ pịkị omi-ẹ Tamụnọ Ḅe na tomonima na nwọ ọkị gboloma ḅọ, anị Kraịst Jizọs Ḅe-ẹ,

⁶ tomoni mamgba pẹkẹrẹ gose mịna ḅụ se agba mịẹ ḅọ ḅe. Anị mị ḍiepakụmamẹ na tọn wẹrị sịkị mị ḅo lasịkị, Tamụnọ Ḅe ḅimẹ na nweni mgba ḍụaḅọrọma nyana.

⁷ Anịẹrẹchị mị ini ị̀ se sẹịnye-ẹ, na àrị okunwẹngịḅọ na yeḍieḅọ na nwọ sọ se Jịnsẹapụma pịrị-ẹ, ḅereni mị na pịkị kọkọmaye mị na ḅe oku mị ḍukopakụmaḅịaye gose àrị iruokọnkẹ; à kọkọmaye ḍukoaḅẹ!

⁸ Chọchị mị mịẹarị sịkị goyegoye, à ḅimẹ owuapụma tẹkẹ, mịna ḅụ se osiḅụ wẹrị Tamụnọ Ḅe pịrị sa apụma; ini ine inia ḅarama dekichịẹmaḅịa, ịganị na ḅẹrẹjinea na ofori ḅara ḅụ.

⁹ À pịkịna ḅimẹ eremeni ma inia ḅụ ma nwọ kpaịnma se nemi nyana inia ḅụchụaye na gbolomaye ḅụ iḅiọkụ seni ye ḅiri; anị mị ḅẹkẹ na ini pụkọsolima ḅara nwọse inia tịḅị-inimema wẹrị, anịkanịka goli na yela ogbulu na, kịlarị na, opu igbiki la ḅiriaye ini nwọ ḅiri-ẹ,

¹⁰ ọkụma iḅiye mịẹ ḅara nwọ nyana, anị Tamụnọ tẹkẹarị eremeni mịẹ gbẹịn ḅara ḅụ.

¹¹ Eremeni ma ini ọkwẹịnka ḅụ sime yeḍawọ gbẹịnmẹ pịkị opu ḅụiderima ḅụ na.

¹² À ḅereni ini pịrịkẹ na ini yeḍie anịkanịka owuapụ ḅụ kụrọ nyana; ini ọkwẹịn ma.

¹³ Anịatịḅị Adam ḅe tatarị tẹmẹmẹ se Ivi ma ḅo tẹmẹmẹ.

¹⁴ Adam ḅe ini pịkị nwọ dairimakẹ; eremeniḅọ ma mị ini dairimaye-ẹ; se Tamụnọ Ḅe oloko mị nwọ kanmẹ.

¹⁵ Ọkụma eremeniḅọ ma ini à ḍụaḅọrọmaḅịa árị awọ yiḅịa sịkị ḅụ, á nemikase ḅereni ḅụ na ḅẹlẹma ḅụ na ḅụ se osiḅụ wẹrị sime se inema ḅụ ḅụkpaịnmamẹ ḅẹḅẹ.