1 Timoti 1 - Kịrịkẹnị Baịbụl

¹ Mịn fịrịfịrịmaḍiri mị Pọl, Kraịst Jizọs okunwẹngịḅọ ḅe ḅara anị ḅomẹ, anị Tamụnọ mịna Ḍụaḅọrọmaḅọ ḅe na pịkị Kraịst Jizọs wa tọrụseḍikiarị ḅọ ḅe na tọn ḅara ḅụ—

² À se Timoti, ḅereni mị ḅie ị̀ya kọkọma tọkụ ḅe sẹịnmamẹ: Ye Tamụnọ Ḍaḅọ Ḅe na Kraịst Jizọs wa Nyanaḅọ Ḅe na ḍikiḅụgerere na ḍikitịḅịfoin na pịkị deinma na se ị́ pịrị.

Iruo Ḍieye Ḅe Ḅerijine Ọkwẹịn Kọnmẹ

³ À ḅimẹ ị́ Ẹfịsọsị ḅie sime, à ḍuko kụrọma ị́ pịrị ḅara ḅụ, à ḅọrọ so Masidonia nwọ mun-arị sịkị mị ḅụ, anịnyọ sime dapụ iruoaye nwọ ḍieaḅẹ, tọn ini pịrị na ini ḅarị ọkọsimeye ḍie ma.

⁴ Ḍuko ini pịrị ini àrị egberi-a ḅẹrẹma ḍuko mị na pịkị àrị nangwọ ḅieju-aḍapụ ẹrẹma ḅe ḍiri ma go mị na ḅụ ḅarasin, mayema ḅẹrẹjinea kẹngẹ mị àrị dekiḅoḅoye-ẹ; àrị Tamụnọ iḅi fịrịnwẹngị nwẹngịkẹ, anị ḅereni ḅụ ini ḅọrọ nemiye mị.

⁵ Mịn mị gose tọn ye, anị kuḅiemgbọlụ ḅie sime ḅẹlẹma mị nwọ wosịsẹma-ẹ, fịafịasa si na iḅi na nemi kuḅie na pịkị gwaka ḅereni na-ẹ.

⁶ Dapụ mịnaye ma ḅụ ḅarasin mun nemi ḅie ofori ḅẹrẹ ḍuko mị ḅụ ḅọrọ irifasam.

⁷ Ini ḅimẹ ini Tamụnọ oloko ḍieapụ nwọ sọ, ọkụma ini kọn-arị ọkwẹịnma ini kaịnḅokẹ, ini gose anịa ḅụ kụrọma chịẹ ye ḍukoarị ḅẹrẹ mị tịḅị sọnị ini nemikẹ.

⁸ Wa nemimẹ na Oloko mị anị iḅimẹ, anị se fịrịnwẹngị na iḅi ḅara nwọse fịrịnwẹngị ọkụma.

⁹ Wa se ḅiekoroma gbẹịnmẹ na olokoma ini chụa se iḅi apụ pịrịkẹ, ọkụma àrị sime oloko kan apụ nwọ pịrịmẹ, kurakaye mịẹ apụ na, Tamụnọ nemika apụ na, si ḅụ ḅein apụ na, anị sime tẹkẹḅịaye nyanaka apụ pịrịmẹ, pịkị tẹmẹ anga mịẹmịẹaye nyanaka apụ na, inia ḍapụ na nyengiapụ na ḅaa apụ na, nini apụ na.

¹⁰ Fịafịaka ḍumokọn apụ na, sẹfịapụ na, tomoni furuapụ na, iruo kọn apụ na, iruo onyechịẹapụ na pịkị kọkọma ḍieye mị na tụḅụrụye mịẹ apụma pịrịmẹ.

¹¹ Anịọkụma ḍieye mị, anị iḅiọkwẹịn mị ḅie simeye mị ini se ị̀ ḅarachụa ḍuko nwọ ḅẹye mị anị boma na ḅẹlẹma na nyana Tamụnọ Ḅe ḅara ḅo Iḅi Ḅẹrẹ mị-ẹ.

Tamụnọ Ḅe Nyana Ḍikitịḅịfoin Mị Ḅe Mịẹḅaka

¹² À mịẹḅaka seni wa Nyanaḅọ Jizọs Kraịst Ḅe ḅẹmẹ, ịnyọ seni ị̀ya fịrị ḅụ ị̀ pịrị ḅọ ḅe, à mịẹḅaka se ọ̀ ḅẹmẹ, anị ị̀ gbẹịnmẹ nwọ ḅẹ ḅara nwọse ị̀ kịẹnma ḅọ ḅe, pịkị ị̀ tọnmẹ na à fịrịnwẹngị ọ̀ pịrị,

¹³ ḅọrọsa sịkị àrị ọ̀ ḅụ siye ḍukomẹ, ọ̀ tọrụsiọrịma pịkị ọ̀ wọlọmẹ nwọ ḅẹ sọnị. Ọkụma Tamụnọ Ḅe ò ḍikiḅụgerere nyana ị̀ pịrịmẹ, anịatịḅị anị sịkị ma à ḅereni nyanakẹ, pịkị à mịẹarịye tịḅị sọnị à nemikẹ.

¹⁴ Se wa Nyanaḅọ Ḅe oria ḅeinwatawata ḍikiḅụgerere mị nwọse ị̀ ọgọnọ saramẹ, se ḅereni mị na ḅẹlẹma mị na anị sime wa pịrịye mị nwọse ị̀ pịrịmẹ, Kraịst Jizọs Ḅe na gbọrịye mịẹ ḅụ wa nyanaye ma.

¹⁵ Mịn mị kọkọmaye-ẹ, pịkị ḅakama ḅụokoromẹ, ḅereni gbẹịn ḅẹrẹ-ẹ na, Kraịst Jizọs Ḅe tomonikiri ḅomẹ siapụ ḍụaḅọrọma gose ị̀rị̀ inia ḅụ sitẹịn ḅọ-ẹ.

¹⁶ Ọkụma Tamụnọ Ḅe ò ḍikitịḅịfoin nyana ị̀ pịrịmẹ, mịẹse Kraịst Jizọs Ḅe ị̀rị̀ na mịẹarịye ḅụ ḅakama ye-inema nyana ị̀rị̀ siapụma ḅụ sitẹịn ḅọ ḅe pịrịḅịa ọkụ; mịẹse ḍikiḍaḅịa ḅọ à nwọ sọ ọḅụkọ ḅo ò ḅereni se simegbaso ḍumo mị nyanaḅịa apụma pịrịḅịa ẹrẹchị.

¹⁷ Ye osi na boma na sime ori simegbaso Amanyanaḅọ, fịfịkaḅọ pịkị tọrụseọrịrịkaḅọ, ori kẹngẹ Tamụnọ Ḅe pịrị mun ḅene ḅene la! Amẹn.

¹⁸ Timoti, ị̀ya tọkụ, à mị oloko mị nwọse ị́ ḅara chụamẹ, anị ḅọlọ sịkị ngịsị ịkịankoro ọkwẹịnma ị́ ḅụ ḍuko ḅọrọsa ḅara ḅụ, ye àrị ọkwẹịnma ị́ya owuniaye nwọ sọ; iḅi owu mị ị́ nwọ sọarị sịkị;

¹⁹ se ị́ya ḅereni mị na ị́ya fịafịasa si na iḅi na nemi kuḅie mị nwọ ọlọchịẹma, dapụ inia iḅi na si na nemi kuḅie mị pokika ḅụ ḅọrọ inia ḅereni mị simasam.

²⁰ Ini ḅe dapụ, anị Haịminịọs ḅe na pịkị Alẹkzanda ḅe na-ẹ, ini saḅama Oru ḅe kụrọ mị pịrị ḅụ, à ḅọrọ fomuḅara se ini pịrịmẹ; mịn mị anị ye se ini ḍieḅịa se ini ḅarị Tamụnọ fiesima ẹkẹ.