1 Samụẹl 31 - Kịrịkẹnị Baịbụl

Sọl Ḅe Na Oria Owuapụ Awọ Ma Na Fịmẹ

¹ Gbọrị ene Filistia apụma na Izrẹlapụma na Gilboa Tụndụ mị ọgọnọ ḅụ ini ọmụgbin mẹ. Anịnyọ, Izrẹlapụma ḅụ tọn-apụ fịmẹ, se ísíapụma na Amanyanaḅọ Sọl ḅe na, oria owuapụ awọma na, ini mangịsomẹ.

² Ọkụma Filistia apụma ini ḍuko mun ini kun se Sọl ḅe oria tẹrẹ-a owuapụ awọ, Jonatan ḅe na Abinadab ḅe na, Malkishụa ḅe na ḅaamẹ.

³ Owu mị anị kụrọḅara se Sọl ḅe kelemamẹ, se ori na mịnaḅụ na sọnị tarakapụ ḍẹịn ọ̀ lamẹ, pịkị siḅara seni yese ọ̀ lamamẹ.

⁴ Ọ̀ nwọse oria owuniayema pụra asẹmẹnịḅọ ḅe ḅẹmẹ, “Ị́ya okola-agiji mị wọrọ pakụma se ị̀ ḅaa, mịẹso sịkị mịna oru nemika Filistia apụma ḅo ḅụakụma ḅara se ị̀ ḅaa ẹka ḅara.” Ọkụma asẹmẹnịḅọ ḅe ọkọ mịẹ mị opuma ọ̀ ḅalafamamẹ. Anịẹrẹchị Sọl ḅe ori ngẹrị oria okola-agiji mị deki se ọ̀ ḅụ se chama anịa ọgọnọ gbinmẹ.

⁵ Asẹmẹnịḅọ ḅe Sọl ḅe fị̀sam nwọḅẹye mị ọrị sịkị, ori sọnị oria okola-agiji mị wọrọ pakụma se ọ̀ ḅụ seni chama anịa ọgọnọ gbinmẹ se Sọl ḅe na fị̀mẹ.

⁶ Mị Sọl ḅe na, oria tẹrẹ-a owuapụ awọma na pịkị asẹmẹnịḅọ ḅe na wẹrị fị ọkụ-ẹ; Sọl ḅe oria owuapụ mamgba ini fị̀mẹ anị ene mị ḅụ.

⁷ Izrẹlapụma ḅie Jezriẹl Pẹsịkiri mị ḅieḅụ anị pẹkẹrẹ sime apụma na pịkị Jọdan Tọrụ mị ḅụ ịrụapakapaka nyọ daọrụ ḅụ sime apụma na, naamẹ na Izrẹl owunima ini mangị sosam, pịkị Sọl ḅe na oria owuapụ awọma na ini ini ḅaasam nwọḅẹye mị naa sịkị, ini inia amama wẹrịso se mangịmẹ. Anịsịkị Filistia apụma ḅo amama ọkị se angamẹ.

⁸ Ọmụ mị gbin ḅọrọ ḅe eneḅa Filistia apụma mun fị̀-ḍụẹịn ma ḅụ ngọ ḍọkị-ẹ mun mẹ, anị ini Sọl ḅe na oria tẹrẹ-a owuapụ awọma inia fị̀sa oju akpakpa ma ọrịye-ẹ Gilboa Tụndụ mị ọgọnọ àrị sara sime waraḅẹ.

⁹ Ini Sọl ḅe tịḅị pẹlẹsin mẹ, oria owuni ḅụchụaye mị sin ọkị, se àrị seni okumun-apụ pịrị, se ini àrị se bebe Filistia mị ḅie mgba iḅi ḅẹrẹ ḍuko inia oruma na tomonima na pịrị kelemamẹ.

¹⁰ Anịsịkị ini oria owuniayema se Astate eremeni oru mị warị ḅie koroma, se oria oju akpakpa mị seni Bẹt Shan opuama mị onu ḅọkọ mị ḅụ kakị koromamẹ.

¹¹ Giledị mị ḅie sime Jebẹsh apụma Filistia apụma seni Sọl ḅe mịẹye mị naa sịkị,

¹² kuḅiekụrọtẹịn apụma paka se bebe ḍin mịmgba se nwẹngị Bẹt Shan mị mun mẹ. Ini Sọl ḅe na oria owuapụ awọma na oju akpakpa ma sin koromamẹ onu ḅọkọ mị ḅụ, ini àrị ọkị se vinpịkị Jebẹsh mị ḅo, se àrị dọkịmamẹ anịju ḅụ.

¹³ Anịsịkị ini ịmgbema ọkị se tamarisk eje mị chuku ḅụ ḍipimẹ ama mị ḅieḅụ, se sọnọma ḍin nwọse ḅuru mọ mẹ.