1 Samụẹl 30 - Kịrịkẹnị Baịbụl

Ini Amalẹk Apụ Ma Na Gbin Ọmụ Mị

¹ Mama ḍin ḅọrọ sịkị Devid ḅe na oria owuapụma na ini vinpịkị ḅo Ziklag mị lamẹ. Amalẹk apụma ọḅụ owu se Juda ḅụ chuku ọrụ mị pakamẹ, ini pịkị owu se Ziklag mị pakamẹ. Ini ama mị dọkịma

² se pịkị eremeni mamgba kun somẹ; gbọrịḅọ sọnị ini ḅaakẹ, ọkụma ini ini se chụa somẹ.

³ Devid ḅe na oria owuapụma na mun lasịkị, ini ọrịmẹ na ama mị ini dọkịmasam, pịkị inia eremeni ma na owuapụ awọma na, eremeni awọma na ini kun se sosam.

⁴ Devid ḅe na oria owuapụma na sakị owu nweni ịnyọ iniaḅụ famẹ.

⁵ Devid ḅe oria mama eremeni ma, Ahinoam ma na Abigẹl ma na sọnị ini ini se somẹ.

⁶ Devid ḅe ò ḅo opu ḅụfụka ḅie sọsam, anịatịḅị oria owuapụ mamgba pakaye mị anị opuma inia ḅụosọmẹ, na inia awọma ḅarị ofori-ẹ, se ini imgbele deki seni ò gbin ḅịa ẹrẹchị ḍọkịmẹ; ọkụma Nyanaḅọ, ọ̀ Tamụnọ Ḅe ò kuḅiekụrọmamẹ.

⁷ Devid ḅe nwọse agbamịẹ Abaịata Ahimẹlẹk yaḅe ḅẹmẹ, “Ifọd mị ọkịḅo ị̀ pịrị,” se Abaịata ḅe anị ọkịḅo ọ̀ pịrịmẹ.

⁸ Devid ḅe nwọse Nyanaḅọ Ḅe gbelamẹ, “Nwọ ḅo ọḅụ owu paka apụma àrị ini ḍuko? Àrị ini kunḅe?” Ọ̀ nwọse ọ̀ pẹkẹrẹmẹ, “Iin ini ḍuko, ị́ ini kunḅịa, ị́ pịkị ini kun soarị apụma ḍụaḅọrọmaḅịa.”

⁹ Anịẹrẹchị Devid ḅe na oria owuapụ ẹndẹ oyiasi fịnjịma na sakị paka mun mẹ, ini mun Biso ideri mengi mị lasịkị, iniaḅụ dapụ anịju ḅụ simemẹ.

¹⁰ Devid ḅe owuapụ ẹndẹ ọ̀ nwọse nwẹngịma mun mẹ, ísí owuapụ oyiasi ma ịnyọ opuma iniaḅụ famẹ anị gose ini ḅarị ineda ideri mengi mị saḅakẹ, anịẹrẹchị ini ọḅụju simemẹ.

¹¹ Devid ḅe na mun owuapụma ama mị ḅie ini gbọrị Ijipt owutọkụ ọrịmẹ, ini ori ọkịḅo Devid ḅe pịrịmẹ. Ini fịye na mengi na seni ọ̀ pịrịmẹ,

¹² samịnasa fịturu mịẹye na, pịkị iru-mịẹ-chịnmgbọlụ mama izuruku na. Ò ye mị fịso sịkị ịnyọ ọ̀ ḅụ sọmẹ; bebe tẹrẹ-a ḍin ḅụ ma ọ̀ gbọrị fịye sọnị ọrị fịkẹ, pịkị mengi sọnị ọrị ḅukẹ.

¹³ Devid ḅe nwọse ò gbelamẹ, “Tụḅọ ị́ nyana, anịsịkị ndeju ị́ sime ḅo?” “Ị̀rị̀ Ijipt ḅọ-ẹ, àrị omoniḅọsọ gbọrị Amalẹkḅọ pịrịmẹ,” ọ̀ nwọ pẹkẹrẹmẹ. “Àrị obiye gose ị̀ nyanaḅọ ḅe, tẹrẹ-a ḍin ḅọrọsa sịkị ḅụ, ị̀ se koroma somẹ.

¹⁴ Wa ọḅụ owu se mun Juda ḅụ chuku da eke ḅụsime Kẹrẹtaị apụma pakamẹ, pịkị Kelẹb warị mị ḅe eke mị na, wa pịkị Ziklag mị dọkịmamẹ.”

¹⁵ “Ị́ ineda ị̀ se ọḅụ owu ḅo apụma ḍọkịma munḅe?” Devid ḅe ọkọse ò gbelamẹ. Ọ̀ nwọse ọ̀ pẹkẹrẹmẹ, “Àrị ị́ se munḅịa ị́ nemikase Tamụnọ Ḅe ẹrẹ ḅụ yekarịfị ị̀ pịrị na ị́ ị̀ ḅaa ẹkẹ, pịkị ị̀ seni ị̀ nyanaḅọ ḅe pịrị ẹkẹ nwọ ḅẹḅẹ.”

¹⁶ Anị ò Devid ḅe se ini ḍọkịma mun ye-ẹ. Ọḅụ owu paka apụma ini galagala bebe nyọ mịmgba kelema fị na, ḅu na, pịkị alalị fịaḅẹ, ini Filistia na pịkị Juda na ḅie ọfọịn so ayema ḅaka la-ọkụ mị gose.

¹⁷ Anị ḍukoma ene mị ḅe ḅaso ḅiri ḅụ Devid ḅe owu se ini pakamẹ se ini owusọ nweni mun saso ḅiri lamẹ. Yepụra asụnma ḅụkụlọ mangịso asẹmẹnị ma, anị kịnị ẹndẹ ma sikima ọkụma, gbọrịḅọ sọnị sokẹ.

¹⁸ Devid ḅe inimgba ḍụaḅọrọmamẹ, pịkị Amalẹk apụma ọkịso aye layelaye mamgba na, pịkị oria mama eremeni ma sọnị;

¹⁹ fa gbọrịye sọ ofori-ẹ. Devid ḅe oria owuapụma inia owuapụ awọma na eremeni awọma na ori ini ọkị pakụma ḅomẹ, pịkị Amalẹk apụma ọfọịn ọkị aye mamgba na.

²⁰ Anana ogboma na nambulo ogboma na sọnị ori ọkịmẹ, oria owuapụma namama se inia tọrọkọ ḅụ mun-arị sịkị ini nwọ ḅẹmẹ, “Mị sime Devid ḅe pịrịmẹ!”

²¹ Anịsịkị Devid ḅe vinpịkị kịnị oyiasi ma ḍọkịma mun mẹ anị ịnyọ opuma ḅụ fa se ḅarị ineda ò ḍukomunka se ọḅụju sime apụma Biso ideri mengi mị nyọ ḅụ. Ini pakaḅo mẹ ḅo Devid ḅe na oria owuapụma na ịrịaḅịa ẹrẹchị, se Devid ḅe mun ini kerenimẹ ḅieḅẹlẹ ḅaraḅụ.

²² Ọkụma Devid ḅe na mun oforifori pịkị yeḅụsọka dapụ nwọ ḅẹmẹ, “Ini mine na munkẹ, anịẹrẹchị wa ọfọịn ḅo ayema ḅụ gbọrịye sọnị wa ini pịrị ẹkẹ. Ini ineda inia eremeni ma na awọmẹnịma na ọkị se nwẹngị soḅịa.”

²³ Ọkụma Devid ḅe nwọse ini pẹkẹrẹmẹ, “Ị̀ya mịnapụ owuapụ, ómine ineda Nyanaḅọ Ḅe se wa pịrịye mị seni ọkọ mịẹ ẹkẹ! Ọ̀ wa kokomẹ se ye wa laka ḅaraḅụ, ọ̀ pịkị mịẹ sarasarama wa pịrịmẹ ọḅụ owu se wa paka apụma wa nwọ nẹngịmamẹ.

²⁴ Ó ḍukoye mị nwọ ḅereniḅịa gbọrịḅọ sọnị ofori-ẹ! Nweni mamgba gbọrị ḅara se yeḍia ọkịḅịa; nwọ ọḅụju sime se fịayema ḍikiḍiki apụma na ọmụ mị mun apụma na gbọrị ḅara se ḍiekiri nwọ nyanaḅịa.”

²⁵ Devid ḅe mịn mị seni oloko ḅụ wẹrịmẹ, anịsịkị ngịsị Izrẹl mị ḅieḅụ ini mị oloko mị kokomẹ.

²⁶ Devid ḅe ò vinpịkị so Ziklag mun sịkị ini ọfọịn ayema ḅụ da aye ọ̀ nwọse ori ikiapụ ma sẹịnmamẹ, Juda tịḅịnịma ọ̀ pịkị oku seni ini fịrịmamẹ, “Mị Nyanaḅọ Ḅe na tarakapụma ḅara wa ọfọịn ḅo ayema ḅụ ọ́ lalamẹ ḍiekiriye-ẹ.”

²⁷ Ò se Bẹtẹl mị ḅie sime apụma na, Rema mị ḅie sime apụma na anị Juda mị ḅụ chuku daọrụ mị, pịkị Jata mị na sẹịnmamẹ,

²⁸ Aroa mị na, Sifmọt mị na, Ẹshtẹmoa mị na,

²⁹ pịkị Rikal mị na, anịa ama mamgba na fịrịmamẹ; Jiramịẹl sẹ mị na, Kenaị apụma na,

³⁰ pịkị Họma mị na, Bor-Ashan mị na, Etak mị na,

³¹ pịkị Hibrọn apụma na. Ori na oria owuapụma na gelegele ḅụ mun la se anga nyọ goyegoye ò ye seni ini sẹịnmamẹ.