1 Samụẹl 3 - Kịrịkẹnị Baịbụl

Nyanaḅọ Ḅe Ḅụ Se Samụẹl Ḅe Ḍiemẹ

¹ Anị enema ḅie, Samụẹl kalatọkụ ḅe Ịlaị ḅe chuku ḅie sime fịrịnwẹngị Nyanaḅọ Ḅe pịrịarị sịkị mị, boka oku kẹngẹ anị Nyanaḅọ Ḅe tẹmẹ ḅụ fịrịma fịrịmaye-ẹ, pịkị tẹmẹ ḅieḅụ ye ọrị mị sọnị sarasarakẹ.

² Gbọrị ene ḍin, Ịlaị tọrụmgbọlụ giniginisaḅọ ḅe, oria jukuru ḅie ọ̀ mọnọaḅẹ;

³ Samụẹl ḅe tẹkẹ warị mị ḅie ọ̀ mọnọaḅẹ, anị osiḅụ sime Ọḅọkụ Igbe mị sime nyọ mị. Ḅaso ma sọka simeogbo, tọnjie mị pa kọrịarị sịkị ḅụ,

⁴ Nyanaḅọ Ḅe ọ̀ Samụẹl ḅe chịnmẹ. Ò ḅerenimẹ, “Aan, ị̀ nyanaḅọ!”

⁵ ọ̀ mangị Ịlaị ḅe damamunse nwọ ḅẹmẹ, “Ị́ ị̀ chịnmama, mị ị̀rị̀-ẹ.” Ọkụma Ịlaị ḅe nwọse ọ̀ pẹkẹrẹmẹ, “Àrị ị́ chịnkẹ; vinpịkị so mun mọnọ.” Anị Samụẹl ḅe ọ̀ pịkịna somun mọnọye-ẹ.

^6-7 Nyanaḅọ Ḅe, ọ̀ pịkị Samụẹl ḅe chịnmẹ. Tọkụ ḅe ò nemikẹ na Nyanaḅọ Ḅe ori-ẹ, anịatịḅị jịn sịkị ḅụ Nyanaḅọ Ḅe ma ori ọkwẹịn ọ̀ pịrịkẹ. Anịẹrẹchị ọ̀ sịsẹ Ịlaị ḅe damamun se nwọse ọ̀ ḅẹmẹ, “Ị́ ị̀ chịnmama, mị ị̀rị̀-ẹ.” Ọkụma Ịlaị ḅe nwọse ọ̀ pẹkẹrẹmẹ, “Ị̀ya tọkụ, àrị ị́ chịnkẹ, vinpịkị somun mọnọ.”

⁸ Nyanaḅọ Ḅe, ọ̀ tẹrẹ-a sịkị karama Samụẹl ḅe chịnmẹ; ọ̀ sịsẹ Ịlaị ḅe damamun se nwọse ọ̀ ḅẹmẹ, “Ị́ ị̀ chịnmama, mị ị̀rị̀-ẹ.” Anịsịkị re mị Ịlaị ḅe ò nemiye-ẹ na Nyanaḅọ Ḅe anị tọkụ ḅe chịn arịye-ẹ,

⁹ anị ọ̀ nwọse ọ̀ ḅẹye-ẹ, “Vinpịkị somun mọnọ; se nemikase ọ̀ pịkị ị́ chịnmẹ ḅẹḅẹ, ḅẹ-ẹ, ‘Ḍuko, Nyanaḅọ, ị́ya fịrịnwẹngịḅọ ḅe ò pokiaḅẹ.’” Anị Samụẹl ḅe ò vinpịkị somun mọnọye-ẹ.

¹⁰ Nyanaḅọ Ḅe ḅo anịju ḅụ chịẹ, se ọ̀ tatarị ọ̀ chịn ḅara mị se ọ̀ chịnmẹ, “Samụẹl! Samụẹl!” Samụẹl ḅe pẹkẹrẹ se nwọ ḅẹmẹ, “Ḍuko; ị́ya fịrịnwẹngịḅọ ḅe ò pokiaḅẹ.”

¹¹ Nyanaḅọ Ḅe nwọse ọ̀ ḅẹmẹ, “Gbọrị ene ḅụ à seni Izrẹlapụma mịẹḅịaye, anị ḅalafama so ọkụma; anị naaḅọ goyegoye nụḅọ ḅụgbiripuḅịa.

¹² Anị ene ḅụ, mị à seni Ịlaị furo mị ẹrẹma aye mamgba à nwọ mịẹḅịaye-ẹ, sakị ḅụ ọkịmun kuluma la.

¹³ À ḍuko ọ̀ pịrị ḅọrọsam na à fomuḅara seni ò furo mị pịrị gbasoḅịa anịatịḅị oria owuapụ awọma ini ị̀ fiesimasam. Ịlaị ḅe ini nwọ simeye mịẹarị ọkụ ò nemimẹ, ọkụma ori ini kikikẹ.

¹⁴ Anịẹrẹchị à kuḅie laḅaraḅụ ḅelema ḍukopakụma Ịlaị furo mị pịrịmẹ na se mị ḅalafama simịẹ fomuḅara mị dekisinḅịa agba anịkanịka ḍiepịrịye ngịsị ofori-ẹ.”

¹⁵ Samụẹl ḅe mọnọye mị ọgọnọ ḅụ ọ̀ ḅọlọlọ sime mun dede lamẹ; anịsịkị ọ̀ sịsẹ se Nyanaḅọ Ḅe warị ḅọkọ ma finjimẹ. Tẹmẹḅụ ọ̀ naaye mị ḍuko Ịlaị ḅe pịrị mị ọ̀ ḅalafamamẹ.

¹⁶ Ịlaị ḅe ori ọ̀ chịnmẹ, “Samụẹl, ị̀ya tọkụ!” “Aan, ị̀ nyanaḅọ,” Samụẹl ḅe nwọ pẹkẹrẹmẹ.

¹⁷ “Nyanaḅọ Ḅe ò che ḍuko ị́ pịrị?” Ịlaị ḅe nwọse ò gbelamẹ. “Gbọrịye sọnị se ị̀ ḅọịmama. Tamụnọ Ḅe ori opu ḅụakụma fomuḅara se ị́ pịrịḅịa, nemikase ò ḍukoye goyegoye ị́ nwọ ḍuko ị̀ pịrịkẹ ḅẹḅẹ.”

¹⁸ Anị Samụẹl ḅe yegoyegoye ḍuko ọ̀ pịrịye-ẹ; gbọrịye sọnị ọ̀ kọnmakẹ. Ịlaị ḅe nwọ ḅẹmẹ, “Ori anị Nyanaḅọ Ḅe-ẹ; ori ma ḍiki se ọ̀ ḅụḅẹlẹḅara anị ọ̀ mịẹḅịaye-ẹ.”

¹⁹ Samụẹl ḅe sẹnị paka sịkị, Nyanaḅọ Ḅe ori ọ̀ ḅụ simemẹ pịkị Samụẹl ḅe ḍukoye goyegoye mịẹse anị ḅọ kọkọmaye sọmẹ.

²⁰ Anịẹrẹchị bebe Izrẹlapụ mamgba, sẹ mị ḅie mị ịkọlị ọkịmun ísí ịkọlị la nemimẹ na Samụẹl ḅe kọkọma Nyanaḅọ Ḅe oria ịkịankoroḅọ-ẹ.

²¹ Nyanaḅọ Ḅe pa ọ̀ ḅụ ḍiepakụma aḅẹ Shịlo ḅie, anị ori ọ̀ ḅụ seni Samụẹl ḅe ḍie pịkị ḅẹrẹ ḍuko ọ̀ pịrị nyọ mị. Se Samụẹl ḅe, ọ̀ ḅẹrẹ ḍuko ini pịrị sịkị pịrị sịkị, bebe Izrẹl mị mgba pokimẹ.