1 Samụẹl 29 - Kịrịkẹnị Baịbụl

Filistia Apụ Ma Devid Ḅe Sịkịmẹ

¹ Filistia apụma inia owuni kpo mamgba ọkịḅo Efẹk mị ḅieḅụ koḅirimamẹ, anịsịkị Izrẹlapụma Jezriẹl Pẹsịkiri mị ḅie ideri mengi mị nyọ ḅụ inia ikowarịma pike simemẹ.

² Filistia sọnọ-a amanyanapụma inia owuni-a sọnọasi kpo ma na pịkị mẹndẹ oyiasi fịnjị fịnjịma na nwẹngị pakaḅomẹ, Devid ḅe na oria owuapụma na ọḅụju ḅụ pịkị Amanyanaḅọ Ekish ḅe na nwẹngị pakaḅomẹ.

³ Filistia apụ ọmụtịḅịnị ma ini ọrị se gbelamẹ, “Mịna Hibruapụ ma ini cheye-ao mịanga?” Ekish ḅe pẹkẹrẹmẹ, “Ḅe anị Devid, Izrẹl Amanyanaḅọ ḅe, Sọl fịrịnwẹngịḅọ ḅe ori-ẹ. Ori ị̀rị̀ na anga ḅọlọ sịkị lasam. Ò soḅo mịanga ị̀ la ene ngịsị àrị ọ̀ ḅụ ḍọkịḅosa si ofori-ẹ.”

⁴ Ọkụma Filistia ọmụtịḅịnị ma ini ịganị Ekish ḅe pịrị se nwọse ọ̀ ḅẹmẹ, “Ye ḅe ḅọḅe pịkịma so ị́ se ọ̀ pịrị ama mị mun. Ḅerenima ò mine na so ọmụ mị mun; owukiri ḅụ ori ineda vinpịkị owuse wa pakaḅịa. Anịnyọ ò se ọ̀ nyanaḅọ ḅe tọrụkuḅu iḅifẹḅịaye mị ọ̀ ḅụ yelatẹịn mịna owuapụma fị mị nẹngị ẹka?

⁵ Ḅe Devid ḅe orika, eremeni ma sẹkị àrị sịkị ḅụ ini se nimechuḅọ ḅe, na ‘Sọl ḅe mẹndẹ oyiasi fịnjị ọ̀ nwọ ḅaamẹ, ọkụma Devid ḅe poku na sọnọ ẹndẹ ọ̀ nwọ ḅaamẹ.’”

⁶ Ekish ḅe Devid ḅe chịn se nwọse ọ̀ ḅẹmẹ, “Ḍumo sime Tamụnọ Ḅe à nwọ karịfịmẹ na ị́ nyana ḅereni ị̀ pịrịmẹ, anị pịkị ị̀ ḅụḅẹlẹḅịa ị́ ị̀ ḅụ sọmun mị ọmụ mị gbin. Ị́ soḅo ị̀rị̀ na mịanga anga sịkị ngịsị ma àrị ị́ ḅụ gbọrị siye sọ ḍọkịḅokẹ. Ọkụma ísí amanyanapụma ini ḅereni ị̀ pịrịkẹ.

⁷ Anịẹrẹchị deinma ḅụ vinpịkị so ama mun, se inia ḅụḅẹlẹ-ẹkaye nwọ mịẹma.”

⁸ Devid ḅe nwọse ọ̀ pẹkẹrẹmẹ, “Che mịẹirima à nwọ nyanasa, ị̀ nyanaḅọ? Nemikase, ị́ ḍuko ḅaraḅụ, gbọrị siye sọnị ị̀ ḅụ ma ị́ ḍọkịḅokẹ nwọḅẹ ọkụma, à nwọ sakị fịrịnwẹngị ị́ pịrị ene ngịsị, anịọkụma, nde à gose ị́rị́, ị̀ nyanaḅọ pịkị amanyanaḅọ ḅe na mun ị́rị́ na tarakapụma na owusọ ẹkaye?”

⁹ “À ḅerenimẹ,” Ekish ḅe nwọse ọ̀ pẹkẹrẹmẹ. “À koromamẹ, Tamụnọ enjẹlḅọ nyana ḅereni ḅara ị́ nwọse nyana ḅereni ị̀ pịrịmẹ. Ọkụma ísí amanyanapụma nwọ ḅẹmẹ na ị́ mine na ọmụ mị munḅịa ọkụ ofori-ẹ.

¹⁰ Anịẹrẹchị, Devid, ḅa dede ḅie ómine Sọl ḅe wẹrịso saḅa ị̀ damaḅo apụ mamgba ómine iḅi sịkị sịsẹḅịa se ene mị finji kirikiri ó so.”

¹¹ Anịẹrẹchị Devid ḅe na oria owuapụma na anịḅe eneḅa dede funfun ḅie sakị vinpịkị so Filistia mị mun mẹ, se Filistia apụma so Jezriẹl mị mun mẹ.