1 Samụẹl 28 - Kịrịkẹnị Baịbụl

¹ Ḅo gbọrị sịkị lasịkị, Filistia apụma ini inia owuni kpo ma chịn koḅirimamẹ, Izrẹlapụma na owusọḅịa ẹrẹchị, se Ekish ḅe nwọse Devid ḅe ḅẹmẹ, “Ị́ nemimẹ na ị́rị́ na ị́ya owuapụma na ị̀ya pẹkẹrẹ ḅụ ó sime owu mị sọḅịa.”

² “Karakaraye-ẹ,” Devid ḅe pẹkẹrẹmẹ. “Ị̀rị̀ ị́ya fịrịnwẹngịḅọ-ẹ, ị́ pịkị ḅarana tọrụ se ọrịḅịa àrị ineda mịẹḅịaye.” Ekish ḅe nwọ ḅẹmẹ, “Iḅimẹ! Àrị ị́ seni gbọtụma ị̀ ḍikiḍikiḅọ mịẹḅịa.”

Sọl Ḅe Ḅịrịḅọ Ḅara Yegbelamẹ

³ Mịọkụ Samụẹl ḅe ọ̀ fịḅọrọsam, se bebe Izrẹlapụ mamgba kururu ọ̀ pịrị se oria opuama, Rema mị ḅieḅụ ò ḍipimẹ. Sọl ḅe ḅaraḍikiapụ ma na pịkị ḅịrịapụ mamgba na Izrẹl mị ḅieḅụ ori ini desinmẹ.

⁴ Filistia owuni kpo ma Shụnẹm ama mị na kpekima koḅirima se inia ikowarịma pike simemẹ; Sọl ḅe ori Izrẹlapụma koḅirima se Gilboa Tụndụ mị ḅụ inia ikowarịma pike simemẹ.

⁵ Sọl ḅe ò Filistia owunima ọrị sịkị ọ̀ ḅala opuma famẹ, ọ̀ tẹmẹ pịkị taịnmẹ,

⁶ anị ọ̀ mịẹḅịa ọkụ ọ̀ nwọse Nyanaḅọ Ḅe gbelaye-ẹ. Ọkụma Nyanaḅọ Ḅe ngịsị ori ọ̀ pẹkẹrẹkẹ, anị ḅọrọ ḍawọ ḅụ-o anịkanịka gele agbamịẹapụ ọkwẹịn gbelaye ma ḅụ-o pịkị ịkịankoroapụ ḅụ sọnị.

⁷ Anị Sọl ḅe oria fịrịnwẹngịapụma fịrịmaye-ẹ, “Gbọrị eremeni ḅịrịḅọ ọ́ nwọ ḍọkị ị̀ pịrị, à mun á ḅara yegbelaḅịa.” Ini nwọse ọ̀ pẹkẹrẹmẹ, “Ẹndọ ḅie gbọrịḅọ omi-ẹ.”

⁸ Anị Sọl ḅe ọḅụ ḍinmaye-ẹ, jịn kịrị ḅụchụaye ọ̀ nwọ chụamẹ, se ene san sịkị, oria owuapụma ḅie mama apụ ori na eremeniḅọ ma damamunmẹ. “Tẹmẹ ma gbela se pakaḅịaye mị ḍuko ị̀ pịrị,” ọ̀ nwọse á ḅẹmẹ. “Àrị ẹrẹ go ḅịa ḅọḅe tẹmẹ mị chịnpakụmaḅo.”

⁹ Eremeniḅọ ma nwọse ọ̀ pẹkẹrẹmẹ, “Pikipikiye ofori-ẹ Amanyanaḅọ Sọl ḅe mịẹye mị ị́ nemimẹ, ori Izrẹl mị ḅieḅụ ḅaraḍikiḍikiapụ ma na ḅịrịapụma na desin ọkụ mị. Cheye gose ị́ ḅo ḍẹịn tu ị̀ pịrị se ị̀ ḅaa-ẹḅo-ao?”

¹⁰ Anịsịkị Sọl ḅe osi nyana ḅara seni Nyanaḅọ Ḅe ẹrẹ ḅụ yekarịfịmẹ. Ọ̀ nwọse á ḅẹmẹ, “Ḍumo sime Nyanaḅọ Ḅe ẹrẹ ḅụ à yekarịfịmẹ na ị́ fomuḅara da ẹkẹ mịn mị mịẹ ḅụ.”

¹¹ Eremeniḅọ ma nwọse ò gbelamẹ, “Tụḅọ à nwọ chịn pakụmaḅo ị́ pịrịḅe?” “Samụẹl ḅe-ẹ,” ọ̀ nwọ pẹkẹrẹmẹ.

¹² Eremeniḅọ ma Samụẹl ḅe ọrị sịkị, á ḅalafa ḅụ oloku se nwọse Sọl ḅe ḅẹmẹ, “Cheye gose ị́ epele se ị̀ ti? Ị́rị́ anị Amanyanaḅọ Sọl ḅe-ẹ!”

¹³ Amanyanaḅọ ḅe nwọse á ḅẹmẹ, “Ḅalafama!” “Cheye ị́ nwọ ọrị?” “Gbọrị tẹmẹ à nwọ ọrịmẹ kiri ḅieḅụ anị pakaḅoaḅẹ,” á nwọ pẹkẹrẹmẹ.

¹⁴ “Anị che kịkẹ?” ọ̀ nwọse á gbelamẹ. “Olomusa owuḅọ anị pakaḅoarịye-ẹ,” á nwọse ọ̀ pẹkẹrẹmẹ. “Ò koroḅụchụaye chụamẹ.” Anịsịkị Sọl ḅe ò nemisam na Samụẹl ḅe ori-ẹ, se ori ọ̀ tịḅịtu kiri damẹ osi se ọ̀ pịrịḅụ.

¹⁵ Samụẹl ḅe nwọse Sọl ḅe gbelamẹ, “Cheye gose ị́ ị̀ ḅụḅalaḅalama-ao? Cheye gose ị́ ị̀ mịẹse à vinpịkịḅo?” Sọl ḅe nwọ pẹkẹrẹmẹ, “Àrị opu ḅụfụka ḅie omi-ẹ! Filistia apụma ini ị̀rị̀ na ọmụgbin-ẹtọn-aḅẹ, ọkụma Tamụnọ Ḅe ori ị̀ wẹrịsosam. Ọ̀ ḅarị ị̀ pẹkẹrẹkẹ ngịsị, anị ḅọrọ ịkịankoroapụ ḅụ anịkanịka ḍawọ ḅụ sọnị. Anị gose àrị ị́ chịnmẹ, à mịẹḅịa ye ị́ pa nwọ ḍuko ị̀ pịrịḅịa ḅara.”

¹⁶ Samụẹl ḅe nwọ pẹkẹrẹmẹ, “Cheye gose ị́ ị̀ chịn Nyanaḅọ Ḅe nwọ ị́ wẹrịso pịkị ḅo ị́rị́ na tarakaḅọ sọsa sịkị?

¹⁷ Nyanaḅọ Ḅe ori ị̀ ḅụ ḅọrọ ḍuko ị́ pịrịye mị ọ̀ nwọ mịẹsam: amanyanakiri mị ị́ ḅara ḅụ ori anị ọkị se Devid ḅe pịrịsam.

¹⁸ Nyanaḅọ Ḅe ḅịpị ị́ pokikẹ, ị́ pịkị Amalẹk apụma ḅaasinkẹ, ini nyana aye mamgba ị́ simakẹ. Anịẹrẹchị mị Nyanaḅọ Ḅe gose mị ḅara nwọse ị́ mịẹarịye-ẹ.

¹⁹ Ori ị́rị́ na Izrẹl mị na se Filistia apụma pịrịḅịa. Ḅa ị́rị́ na ị́ya owuapụ awọma na, ómine ị̀ ḅụsọ se mịanga simeḅịa, se Nyanaḅọ Ḅe ọ̀ pịkị Izrẹl ọmụogbo mị ḅọrọma se Filistia apụma pịrịḅịa.”

²⁰ Anị gbọrị kirikiri Sọl ḅe ḅịkịkoro se kiriogbo ḅọlọlọ simemẹ, Samụẹl ḅe ḍuko ye mị ọ̀ tẹmẹtaịn mamẹ. Ịnyọ pịkị ọ̀ ḅụ famẹ, anịatịḅị bebe ene mị mgba na ḍin mị mgba na, ma ò ye fịkẹ.

²¹ Eremeniḅọ ma ọ̀ damamun se ọrịmẹ na tẹmẹtaịn ọ̀ ḅụ sọsam, anị á nwọse ọ̀ ḅẹye-ẹ, “Sisi, ị̀ nyanaḅọ, àrị ị̀ ḍumo abalaka ḅaraḅụ ị́ ḅi yemị mịẹmẹ.

²² Mịọkụ sisi à ḍukoye mị mịẹ. Ye à pa fịye kalaye mịẹ ị́ pịrị. Ye fị mịẹse ineda ịnyọ nyana se soḅịa ọkụ.”

²³ Sọl ḅe ọ̀ ḍụkụkẹ se nwọ ḅẹmẹ na gbọrịye sọnị ọ̀ fị ẹkẹ. Ọkụma oria fịrịnwẹngịapụma sọnị ọ̀ ḅụfụkamamẹ na ò ye fị-ẹ. Anịḅe kuluma ò ḅereni se kiri ogbo sịsẹ, se mọnọye mị ọgọnọ kpọnjị simemẹ.

²⁴ Eremeniḅọ ma ḅo á kokoarị ayamburama nambulo nwọ ḅaamẹ. Anịsịkị fịlawa ọkị, anị tẹlịma, se fịturu sumaye sọka fịturu nwọ mịẹmẹ.

²⁵ Á fịye mị seni Sọl ḅe na oria fịrịnwẹngịapụma na tọrọkọ koromamẹ, se ini anị fịmẹ. Se anị gbọrị ḍin mị ḅieḅụ somẹ.