1 Samụẹl 26 - Kịrịkẹnị Baịbụl

Devid Ḅe Pịkịna Sọl Ḅe Ḍumo Famakẹ

¹ Owuapụ Zif mị ḅieḅụ ḅo ḍuko Sọl ḅe pịrịmẹ Gibia mị ḅieḅụ na Devid ḅe Hakila Tụndụ mị ọgọnọ ḅụ ọ̀ ḅọị sime waraḅẹ Juda piri ele mị aka ḅụ.

² Sọl ḅe ori anị kirikiri Izrẹl mị ḅie owusọtẹịn owuni ḅụ sọnọ-a mẹndẹ oyiasi fịnjị nwọ ọkị ọ̀ ḅụ chụa se somun Zif piri ele mị ḅie Devid ḅe ḍọkịmẹ,

³ se Hakila Tụndụ mị ọgọnọ ḅụ inia ikowarịma pike simemẹ ateli mị anga sịkị ḅụ. Devid ḅe, ọ̀ pa piri ele mị ḅie sime waraḅẹ, se Sọl ḅe ḅo ọ̀ ḍọkịaḅẹ nwọḅẹye ọ̀ nwọ na sịkị,

⁴ ọ̀ nyọ ẹnyẹ apụ fịrịma ini mun ḍọkị nemi ḅomẹ na Sọl ḅe ọ̀ kọkọma anịju ḅụ omi-ẹ.

⁵ Anị kirikiri ò mun Sọl ḅe na Abna, Na yaḅe, Sọl ḅe oria owunima tịḅịnịḅọ ḅe na ini mọnọ anga ḍọkị wẹrịye-ẹ. Sọl ḅe ini pike sime ikowarị mị ḅie ọ̀ mọnọmẹ, se oria owuapụma ikowarịma pike ò kelemamẹ.

⁶ Anịsịkị Devid ḅe Ahimẹlẹk Hitaịḅọ ḅe na, pịkị Abishaị, Joab numbireowu ḅe na gbelamẹ (inia nyengima anị Zẹruaya ma-ẹ), “Ómine mama apụma ḅụ tụḅọ ị̀ ḅụ sọ wa Sọl ḅe oria ikowarị mị pike sime nyọ mị munḅe?” Abishaị ḅe nwọse ọ̀ pẹkẹrẹmẹ, “Ị̀rị̀ à munḅịa.”

⁷ Anị anị ḍin mị ḅie Devid ḅe na Abishaị ḅe na Sọl ḅe oria ikowarị mị pike sime nyọ ḅụ sọmun se Sọl ḅe ọrịmẹ ọ̀ mọnọaḅẹ ini pike sime ikowarịma ogboku ḅụ, oria angwa mị ọ̀ tịḅị na kpeki se kiri pike waraḅẹ. Abna ḅe na owunima na pịkị ò kelema se mọnọaḅẹ.

⁸ Abishaị ḅe nwọse Devid ḅe ḅẹmẹ, “Tamụnọ Ḅe ori ị́rị́na-tarakaḅọ ḅe nwọse ị́ pịrịsam na ọ̀ ḅụ kụrọkọn mị ḍin. Mịọkụ ye àrị oria angwa mị se ò temi tolu mun kiri pike se ọ̀ kakị koroma gbọrị sịkị kẹngẹ ḅụ—à mama sịkị seni ò temi ẹkẹ!”

⁹ Ọkụma Devid ḅe nwọse Abishaị ḅe ḅẹmẹ, “Ngịsị ye seni ọ̀ lamama! Nyanaḅọ Ḅe ḅarana sẹlẹsa amanyanaḅọ ḅe ye se ọ̀ lamaḅọ goyegoye gbarịmaka ḅaraḅụ ò fomuḅara se nụḅọ pịrịḅịa.

¹⁰ Devid ḅe pịkị nwọ ḅẹmẹ, Ḍumo sime Nyanaḅọ Ḅe ẹrẹ ḅụ,” “à nemimẹ na Nyanaḅọ Ḅe mịnaḅụ na ḅarana Sọl ḅe ḅaaḅịa anị ḅọrọ oria sịkị kara se ori amatẹmẹso fị kọnḅịa anịkanịka ori ọmụ ḅie fịḅịa.

¹¹ Nyanaḅọ Ḅe ḍụkụma na ị̀rị̀ mun ye se Nyanaḅọ Ḅe se amanyanaḅọ mịẹsaḅọ nwọ lamamẹ. Ye wa oria angwa mị na mengi ojongo mị na deki se so.”

¹² Anị Devid ḅe angwa mị na pịkị mengi ojongo mị na dekiye-ẹ dada Sọl ḅe tịḅị anga ḅụ, se ori na Abishaị ḅe na somẹ. Pakaye mị ọrị anịkanịka nemi gbọrịḅọ sọnị ofori-ẹ, anịkanịka mọnọḅụ pa boma sịsẹḅọ sọnị ofori-ẹ—inimgba ini iḅiọkụ gbun mọnọ kọnmẹ, anịatịḅị Nyanaḅọ Ḅe iku mọnọ se inimgba ọgọnọ saramẹ.

¹³ Anịsịkị Devid ḅe pẹsịkiri mị saḅa ísí pẹkẹrẹ chịngị mị kpọlị iwo mun ọgọnọju lamẹ, ye ọ̀ la ẹka ḅara nwọse ini na sasamẹ,

¹⁴ se ori oloku Sọl owunima na pịkị Abna ḅe na pịrịmẹ, “Abna! Ị̀ pụkọ ị́ naa-ao?” Abna ḅe nwọ gbelamẹ, “Tụḅọ nwọ oloku se amanyanaḅọ ḅe wosịsẹma-ao?”

¹⁵ Devid ḅe nwọ pẹkẹrẹmẹ, “Abna, Izrẹl mị ḅie opusọtẹịnḅọ ị́rị́ka? Anịsịkị cheye gose ị́ ị́ nyanaḅọ ḅe ḍikiḍikika, anị amanyanaḅọ ḅe? Mịn kirikiri gbọrịḅọ ò pike sime ikowarị mị ḅie sọmẹ ị́ nyanaḅọ ḅe ḅaaḅịa ẹrẹchị.

¹⁶ Ị́ ḅịkịmẹ ị́ya fịrị ḅụ, Abna! À ḍumo sime Nyanaḅọ Ḅe karịfịmẹ, ómine mgba ọ́ fị na iḅimẹ, anịatịḅị ọ́ nyanaḅọ ḅe ómine ò ḍikiḍikikẹ, anị Nyanaḅọ Ḅe se amanyanaḅọ mịẹḅọ ḅe. Ḍiki! Amanyanaḅọ ḅe oria angwa mị nde anị? Ọ̀ tịḅị anga ḅụ sime mengi ojongo mị nde anị?”

¹⁷ Sọl ḅe Devid ḅe pụkọ nemi se nwọ gbelamẹ, “Devid, anịḅọ ị́rị́, ị̀ya tọkụ?” Devid ḅe pẹkẹrẹmẹ, “Iin, Opu Amanyanaḅọ.”

¹⁸ Ọ̀ pịkị nwọ ḅẹmẹ, “Nde ị́ gose ị́ya fịrịnwẹngịḅọ ḅe ḍukoma ḅọrọarịye, ị̀ ḅaaḅịa gose ị̀ nyanaḅọ. À ḅọrọ chịẹ mịẹ? Che siye à nwọ mịẹ?

¹⁹ Opu Amanyanaḅọ, à ḍukoḅịaye mị poki. Nemikase Nyanaḅọ Ḅe ị́ mịẹse ị́ tọrụpịkị ị̀ damẹ ḅẹḅẹ, agbamịẹ ḍiepịrịye se ọ̀ pịrị mị mịẹḅịa ori ò kuḅie ḍinmaḅịa; ọkụma nemikase tomoni anị mịẹmẹ ḅẹḅẹ, ye Nyanaḅọ Ḅe worinime inia ọgọnọ gbana. Anịatịḅị Nyanaḅọ Ḅe ama mị ḅie ini ị̀ depakụmasam, se à mun jịn sẹ oru ma kẹngẹ tẹkẹḅịa nyọ simemẹ.

²⁰ Ḅerenima ini jịn amakiri ọgọnọ ị̀ ḅaa Nyanaḅọ Ḅe na sasa ḅụ. Cheye gose Izrẹl amanyanaḅọ ḅe ḅo ị̀rị̀-ọkụ sime kungu nwọ ḅaa-ẹḅo-ao? Cheye gose ini ḅaaḅịa piri ḅie feni ḍọkị ọkụ ọ̀ nwọ seni ị̀ ḍọkị-ao?”

²¹ Sọl ḅe nwọ pẹkẹrẹmẹ, “À mịẹirimasam. Vinpịkịḅo, Devid, ị̀ya tọkụ! À ḅarị ye se ị́ lama ẹkẹ ngịsị, anịatịḅị ị́ ị̀ ḍumo ḅọrọmamẹ mị ḍin. Àrị oḅorisọmẹ! À ḅalafamaye mịẹsam!”

²² Devid ḅe nwọ pẹkẹrẹmẹ, “Mịn ị́ya angwa mị-ẹ, Opu Amanyanaḅọ. Ye ị́ya owuapụma ḅie gbọrịḅọ saḅaḅo anị ọkị.

²³ Nyanaḅọ Ḅe kuḅie se ḅụgbana gbẹịn pịkị karakara ḍumo kọn apụma ọ̀ gbẹịnye se ini pịrịpịrịmẹ. Mịmgba ori ị́ se ị̀ pịrịmẹ àrị ị́ ḅụ kụrọkọn, ọkụma à ye se ị́ lamakẹ, ị́rị́ Nyanaḅọ Ḅe seni amanyanaḅọ mịẹḅọ ḅe.

²⁴ À nwọ mịmgba ị́ ḍumo ḅọrọma ọkụ mị, ye Nyanaḅọ Ḅe pa pịkị ọkọ seni ị̀ ḍumo mị ḅọrọma pịkị ḅụfụka mamgba ḅieḅụ ị̀ pọkọ pakụmaḅo!”

²⁵ Sọl ḅe nwọse Devid ḅe ḅẹmẹ, “Tamụnọ Ḅe ị́ ḅẹlẹma, ị̀ya tọkụ! Ị́rị́ mịẹye goyegoye ị́ ḅarasọḅịa!” Anị Devid ḅe ò so ò mun-arị anga mun ye-ẹ, se Sọl ḅe vinpịkịso ama mun mẹ.