1 Samụẹl 25 - Kịrịkẹnị Baịbụl

Samụẹl Ḅe Oria Fị Mị

¹ Samụẹl ḅe ọ̀ fịmẹ, se bebe Izrẹlapụ mamgba ḅo gboloma se kururu ọ̀ pịrịmẹ. Oria ama ḅie ini ò ḍipimẹ Rema mị ḅieḅụ. Mịn mị ḅọrọ seso, Devid ḅe ò so Peran piri ele ḅie mun mẹ.

Devid Ḅe Na Abigẹl Ma Na

^2-3 Kelẹb sẹ mị ḅie gbọrị owuḅọ Nebal anị oria ẹrẹ-ẹ, oriḅọ ḅe Meọn ama ḅọ-ẹ, Kamẹl ama mị na kpeki nyọ ḅụ ò kiri nyanamẹ. Ori opuma ngọ kọnmẹ, anana sọnọ-a mẹndẹ oyiasi fịnjị na oḅori-a mẹndẹ oyiasi fịnjị na ọ̀ nwọ nyanamẹ. Tarọ Abigẹl ma á ḍikitọrụgbẹịnmẹ, á pịkị yenemimẹ, ọkụma ori anị nemi-nyanaka-sikuḅie nyana papa tomoniḅọ-ẹ. Nebal ḅe Kamẹl mị ḅie oria ananama oju-ichuka ọ̀ nwọ kịrịaḅẹ,

⁴ se Devid, anị piri ele mị ḅie sime ḅọ ḅe anị naamẹ,

⁵ anị ori oyi-a asẹmẹnị fịrịmaye-ẹ se tọn ini pịrịmẹ na ini Kamẹl mun Nebal ḅe ḍọkị, se ò kereni ọ̀ pịrị.

⁶ Ọ̀ nwọse ini ḅẹmẹ na, ini Nebal ḅe ḅẹ: “Devid ḅe ori ị́ kerenimẹ, ị̀ya ikiaḅọ, ori iḅi kereniḅịpị se ị́rị́ na, ị́ furo mị na, pịkị ị́ nyanaye goyegoye mamgba na pịrịmẹ.

⁷ Ọ̀ naamẹ na ị́ya ananama oju-ichuka ị́ nwọ kịrịaḅẹ, se ò ḅimẹ ị́ nemi na ị́ya anana ḍikiḍikiapụ ma ini mine na simemẹ, wa pịkị ye se ini lamakẹ. Ini nwọ Kamẹl ḅie sime sịkị ngịsị iniaye ma ḅụ nweni furu gbọrịye sọnị ofori-ẹ.

⁸ Ini gbela ḍiki, ini ḍuko ị́ pịrịḅịa. Alalịfị ene mị ḅie wa ḅomẹ, se Devid ḅe nwọ ḅẹmẹ, na iḅiọkụ se wa daọkị. Sisi ị́ ḅarapakaye se mine ị́ya fịrịnwẹngịapụma pịrị, pịkị ị́ ḅụyela ikiaḅọ Devid ḅe na.”

⁹ Devid ḅe oria owuapụma ini mị oku mị daḅọrọma Nebal ḅe pịrịmẹ Devid ḅe ẹrẹ ḅụ. Anịsịkị ini anịju ḅụ sime korumẹ,

¹⁰ se Nebal ḅe anịḅe kuluma nwọse ini pẹkẹrẹmẹ, “Devid ḅe? Ori tụḅọ? Jịn sịkị ma àrị ò gbolomaye naakẹ! Sẹ mị ḅie mangị omoniapụ ḅein waraḅẹ, mịn sịkị mị ḅụ!

¹¹ Ị̀ya fịturu na mengi na, pịkị à ḅaa seni ị̀ya ananama oju-ichuka kịrịarị apụma pịrịḅịa namama à se ini sime ḅo nyọ nemika apụ pịrị ẹkẹ!”

¹² Devid owuapụma ini vinpịkị somun Nebal ḅe ḍukoye mị ḍuko ọ̀ pịrịmẹ.

¹³ “Ọ́mịna okola-agiji ma ọ̀ nwọ sụka!” Devid ḅe kụrọ pịrịmẹ, se inimgba àrị sụkamẹ. Devid ḅe sọnị oria okola-agiji mị sụka se kịnị ẹndẹ laḅịa apụ oria owuapụma ḅụ nwọ ọkị ọ̀ ḅụ chụamunmẹ, pịkị kịnị oyiasi ọ̀ nwọse iniaye ma na koromamẹ.

¹⁴ Nebal ḅe oria fịrịnwẹngịapụma ḅie gbọrịḅọ nwọse Nebal ta Abigẹl ma ḅẹmẹ, “Pakaye ị́ naasa? Devid ḅe piri ele mị ḅie okuḅo apụ se wa nyanaḅọ ḅe fịrịmamẹ se ò kerenimẹ, ọkụma ori ini wọlọmẹ.

¹⁵ Ini iḅiọkụ mine na angamẹ, ini mịna ḅụfụkamakẹ, pịkị wa nwọ ini na ele mị ḅie sime sịkị mamgba-o mịnaye ḅụ tomoni furuye ofori-ẹ.

¹⁶ Ḍin na enekaka na ḅụ ini wa ḍikitọrụsinkẹ wa ini na sime mịna ananama ḍikiḍikiarị sịkị mị mgba ḅụ.

¹⁷ Sisi koroma kọn mịn mị pịrị se ị́ mịẹḅịa ọkụ nwọ ḍọkị. Mịn mị anị ineda fa ọkịḅo mine nyanaḅọ ḅe na ò furo mị mgba na pịrịḅịa. Oria yeḅụoforika mị mịẹso ọkụma, ye ḍuko se ò pokiḅịaḅọ ngịsị ofori-ẹ!”

¹⁸ Abigẹl ma kirikiri à fịturu okpokpo oyiasi nwọ ọkịmẹ, iru ḅie ḅein mama nama apụra akpa na, fọịsa sọnọ-a anana na, sọnọ-a kala ḅara sịkịrị panị ḅeinḅịa kpangịrịsa fịayemgbọlụ na, irumịẹ chịnmgbọlụ ḅụ izuruku-a sọnọasi na pịkị samịna figi se mịẹ keki ḅụ oyiasi na, se arịmgba seni yepụra asụn ọgọnọ gbanamẹ.

¹⁹ Anịsịkị á nwọse fịrịnwẹngịapụma ḅẹmẹ, “Ómine tọrọkọ tarị mun se àrị ò ḍukoḅịa.” Ọkụma dewu ḅe gbọrịye sọnị á ḍuko ọ̀ pịrịkẹ.

²⁰ Arịa yepụra asụn ḅe á nwọse nwẹngị chịngị mị aka ḅụ anda kanama aḅẹ anị á bẹkẹma ḅaraḅụ Devid ḅe na ịrịaye-ẹ, oria owuapụma na ini nwẹngị á daḅoaḅẹ.

²¹ Devid ḅe nwọ koroma aḅẹ, “Cheye ẹrẹchị à tọrụ se oriḅọ ḅe ngọma ḅụ wẹrị nweni, se ini àrị ọkị pakaso mị piri ele mị ḅie? Oriaye ḅụ ini furu gbọrịye kẹngẹ sọnị ofori-ẹ, se mị à nyana ọ̀ pịrị ḅarachụa mị ḅụ ò seni ị̀ gbẹịnye!

²² Ye Tamụnọ Ḅe ị̀ fomuḅaa à nemikase ene ḅa dede laḅịa sịkị, oria owuapụma ḅie à ḅaa kọnmaḅọ simemẹ ḅẹḅẹ!”

²³ Abigẹl ma á Devid ḅe ọrị sịkị, á be koro se á ḅụse chama kiri gbinmẹ

²⁴ Devid ḅe ḅụọchuku ḅụ, se nwọse ọ̀ ḅẹmẹ, “Sisi, ị̀ nyanaḅọ, ị̀ poki! Ye à mị si mị ḅereni ọkị.

²⁵ Sisi Nebal ḅe ò ḍikimama ngịsị, ori yeḅụoforiḅọ ḅe! Oria ẹrẹ mị jokoma fieye mị ḅara anị ọ̀ pịkị kọkọma sime ọkụ-ẹ—yenemikaḅọ! Àrị ofori-ẹ ị́ya fịrịnwẹngịapụma ḅo lasịkị, ị̀ nyanaḅọ.

²⁶ Nyanaḅọ Ḅe anị ị́ mịẹse ị́ sowuḅika pịkị ị́rị́na-tarakapụ ma ḅaakaye-ẹ. Mịọkụ à ḍumo sime Nyanaḅọ Ḅe karịfị ị́ pịrịmẹ na ị́rị́na-tarakapụ ma na pịkị ye se ị́ lama ḍọkịarị apụ mamgba na; Nebal ḅe nwọ fomuḅara daḅịa ọkụ anị ini sọnị pịkị fomuḅara daḅịa ọkụ-ẹ.

²⁷ Sisi, ị̀ nyanaḅọ, ma à se ḅo ị́ pịrị ḍiepịrịye ma ọkị, se àrị seni ị́ya owuapụma pịrị.

²⁸ Sisi ị̀ nyanaḅọ, à mịẹirimaye goyegoye wẹrịso ị̀ pịrị. Nyanaḅọ Ḅe ori ị́ seni amanyanaḅọ mịẹḅịa pịkị ị́ furo ḅie pakaḅo ḅịa apụma na, anịatịḅị oria ọmụ ị́ nwọ gbin aḅẹ; ị́ pịkị gbọrị si sọnị mịẹ ẹkẹ ị́ya ḍumo enema ḅieḅụ.

²⁹ Owu seni ị́ paka se ị́ ḅaaḅịa ẹrẹchị ḍọkịḅọ goyegoye, Nyanaḅọ ị́ Tamụnọ Ḅe ori ị́ ḍụaḅịa, se ye ị́ la ẹkẹ, anị tomoniḅọ yela ngọ koru ọkụ simemẹ. Ị́rị́na-tarakapụ ma ọkụma, anị sime ọkụ sime ọkụ sọnị, ori ini se gbin wokumaḅịa, anị tomoniḅọ ḍụparị mgbọlụ seni oria akarabọsị ḅie chụa tẹịn ọkụ simemẹ.

³⁰ Se Nyanaḅọ Ḅe ò ḅereni ị́ pịrịsa iḅiaye ma ọ̀ nwọ mịẹ ị́ pịrị pịkị ị́ se Izrẹl amanyanaḅọ mịẹsa ḅẹḅẹ,

³¹ à nwọ nemi ọkụma anịkanịka si koroma ḅarị ị́ ḅie sọ ẹkẹ, ị̀ nyanaḅọ, anị si mịẹkaḅọ ḅaa ḅụ, anịkanịka ị́rị́ ḅarana ị́ya sowu ḅi mị ḅụ. Se Nyanaḅọ Ḅe ị́ ḅẹlẹmasa ḅẹḅẹ, ị̀ nyanaḅọ, sisi ị̀ se ḅieḅaramama.”

³² Devid ḅe nwọse á ḅẹmẹ, “Nyanaḅọ Ḅe tokoni, Izrẹl Tamụnọ Ḅe, anị ị́ fịrịma se ị́ ḅo mịmgba ị̀rị̀na-ịrịaḅọ ḅe!

³³ Mịẹḅaka se Tamụnọ Ḅe ḅẹ ị́ya iḅi nemi mị gose, ị́ pịkị mịmgba mịẹsam à ḅarị nini-kọn-si-kọnḅọ sọkẹ, pịkị ḅarị ḅarana ị̀ya sowu ḅikaye mị na gose.

³⁴ Nyanaḅọ Ḅe ori ị̀ dachịẹmasam ye se ọ́ lama mị ḅụ. Ọkụma à ḍumo sime Izrẹl Tamụnọ Ḅe karịfịmẹ na ị́ nemikase nwọse be ḅo ị̀rị̀na-ịrịaye mị ka ọkụma mgbọkụ Nebal ḅe oria owuapụ mamgba ini fịsam dede laḅịa sịkị!”

³⁵ Anịsịkị Devid ḅe á se ḅo ọ̀ pịrịayema daọkị se nwọse á ḅẹmẹ, “Vinpịkị so warị mun se ḅụḅalaḅala se ị́ ḅụ pịrịma. Ị́ ḅiye mị à mịẹḅịa.”

³⁶ Abigẹl ma vinpịkị so Nebal ḅe damamunmẹ, anị warị ḅie sime amanyanaḅọ fị gbẹịn alalị nwọ fịarịḅọ ḅe. Ori iruḅu ọ̀ tọrụḅaama se tọrụḅẹlẹḅụ omi-ẹ, anịẹrẹchị gbọrịye sọnị á ḍuko ọ̀ pịrịkẹ ọkịmun jịn eneḅa dede lamẹ.

³⁷ Anịsịkị ọ̀ tọrụ dein koro sịkị, á yegoyegoye ḍuko ọ̀ pịrịmẹ. Ḅụọ-na-ḅara-na-fị obi ọ̀ lamẹ se ò ḅo gbọtụma sokoro saramẹ.

³⁸ Oyi-a ḍin pembeye laḅịa sịkị Nyanaḅọ Ḅe Nebal ḅe fomu se ọ̀ fịmẹ.

³⁹ Nebal ḅe ọ̀ fịsam Devid ḅe nwọ naa sịkị ọ̀ nwọ ḅẹmẹ, “Nyanaḅọ Ḅe Tokoni! Nebal ḅe ḅụ ò sowuḅisam ori ị̀ wọlọye gose, ọ̀ pịkị ị̀rị̀ oria fịrịnwẹngịḅọ ḅe dachịẹmamẹ mịẹirimaye ḅụ. Nyanaḅọ Ḅe ò fomuḅara se Nebal ḅe pịrịsam oria si gose.” Anịsịkị Devid ḅe, ori Abigẹl ma na simeḅịa oku nwọse á fịrịmamẹ.

⁴⁰ Oria fịrịnwẹngịapụma so á damamunmẹ Kamẹl ḅie se nwọse á ḅẹmẹ, “Devid ḅe wa fịrịmamẹ na wa ḅo ị́ ọkịmun ọ̀ pịrị se ị́ tarọ sọḅịa.”

⁴¹ Abigẹl ma tịḅịtu kirilama se nwọ ḅẹmẹ, “Ị̀rị̀ oria fịrịnwẹngịḅọ-ẹ, à ḅụkarakaramamẹ oria fịrịnwẹngịapụma ḅụọma sịkịrịḅịa ẹrẹchị.”

⁴² Anị kirikiri á sịsẹ se árịa yepụra asụn ḅe tanjịmẹ. Arịa sọnọ-a eremeni fịrịnwẹngị awọma á ḅụ sọmẹ se á Devid fịrịnwẹngịapụma na somun se á ḅo tarọ sọmẹ.

⁴³ Devid ḅe Ahinoam, Jezriẹlḅọ ma ori á sime ḅọrọsam, se mịọkụ Abigẹl ma pịkị ḅo tarọ sọsam.

⁴⁴ Mịn sịkị mị ḅụ Sọl ḅe ḅarọ Maịkal, anị Devid ta sọḅọrọsaḅọ ma seni Palti, Leish yaḅe pịrịsam anị Galim amaḅọ ḅe.