1 Samụẹl 24 - Kịrịkẹnị Baịbụl

Devid Ḅe Ọ̀ Sọl Ḅe Ḍumo Famakẹ

¹ Sọl ḅe Filistia apụma na owusọ so se vinpịkị ḅo sịkị, ini ḍuko ọ̀ pịrịmẹ na Devid ḅe piri ele mị ḅie ori omi-ẹ Ẹngẹdaị mị na kpeki nyọ ḅụ.

² Sọl ḅe ori Izrẹl mị ḅieḅụ owusọ ḍintẹịn owunima ḅụ kịnị-a sọnọ mẹndẹ oyiasi fịnjị nwọ ọkị se mun Devid ḅe na oria owuapụma na ḍọkịmẹ, Piriḅie-Oḅori-Ḍụparị ma nyọ ḅụ ịrụapakapaka nyọ daọrụ mị ḅụ.

³ Ò ḅo gbọrị pokolo lamẹ, anị ateli anga ḅụ ini anana koko koko nyọ mị na kpekimẹ, se ò sọmun ḅie ịnyọsaramẹ. Anị ḅo ọkọ pakamẹ na anị gbọrị pokolo mị ḅieju ḅụ anị Devid ḅe na oria owuapụma na pịkị sọmun ḅọị simenyọ-mị-ẹ.

⁴ Ini nwọse ọ̀ ḅẹmẹ, “Mịn anị ẹmbẹ paka ị́ pịrị sịkị mị-ẹ! Nyanaḅọ Ḅe ò ḍuko ị́ pịrị ḅọrọsam na ori ị́rị́ na tarakaḅọ ḅe se ị́ ḅara ḅie dẹrị se ị́ ọ̀ ḅụ kụrọkọn se pịkị ineda ị́ ḅietọn ḅara nwọse ọ̀ mịẹḅịa.” Devid ḅe ikiri saḅa mun Sọl ḅe oria ḅụchụaye mị ḅụ ye kịrị ọkịmẹ, Sọl ḅe nemika ḅaraḅụ.

⁵ Ọkụma Devid ḅe ò kuḅie ḅẹrẹḅarasi kọn ọ̀ pịrịmẹ,

⁶ se ọ̀ nwọse oria owuapụma ḅẹmẹ, “Ye Nyanaḅọ Ḅe ị̀ dachịẹma, ye seni ị̀ nyanaḅọ ḅe lama mị ḅụ, anị Nyanaḅọ Ḅe sẹlẹ seni amanyanaḅọ mịẹsaḅọ ḅe! Ngịsị à ye se ọ̀ lama ẹkẹ, anịatịḅị ori anị Nyanaḅọ Ḅe sẹlẹsa amanyanaḅọ ḅe-ẹ!”

⁷ Anị ḅụ Devid ḅe mịẹse anị oria owuapụma ḅụokoromẹ na ini ngịsị owu se Sọl ḅe paka ma. Sọl ḅe ọ̀ sịsẹmẹ, pokolo mị ḅie, paka se sakị nwẹngị ma ò ju damẹ.

⁸ Anịsịkị Devid ḅe sọ pokolo mị ḅie paka se oria ọḅụju ḅụ nwẹngị ò ḍukomẹ, se ọ̀ chịnmẹ, “Opu Amanyanaḅọ!” Sọl ḅe ò vinpịkịmẹ, se Devid ḅe tịḅịtu kirikoro ọ̀ pịrịmẹ osiḅụ,

⁹ se nwọse ọ̀ ḅẹmẹ, “Cheye ẹrẹchị à ye seni ị́ lama ḍọkịaḅẹ nwọḅẹ apụma ḅịpị ị́ nwọ poki?

¹⁰ Ị́rị́ ngẹrị ḅarana ḍiki na mị kirikiri ḅụ pokolo mị ḅie Nyanaḅọ Ḅe ori ị́ se ị̀ ḅaraḅie dẹrịmẹ ị́ ḅụ kụrọkọn ḅịa ẹrẹchị. Ị̀ya owuapụma ḅụ dapụ ị̀ ḅẹmẹ na àrị ị́ ḅaa, ọkụma àrị ị́ ḍikitịḅịfoin se nwọse ini ḅẹmẹ na ngịsị à ye se ị́ lama ẹkẹ, anịatịḅị ị́rị́ anị Nyanaḅọ Ḅe sẹlẹ se amanyanaḅọ mịẹsaḅọ ḅe-ẹ.

¹¹ Ḍiki, ị̀ya ḍaḅọ, ị́ya ḅụchụaye mị ḅụ pẹkẹrẹ mị ḍiki ị̀ ḅaraḅie àrị ọlọye mị! Mgbọkụ àrị ị́ ḅaasam, ọkụma anịnakaraka à papa mịn mị kịrị ọkịmẹ. Ye mịn mị mịẹse anị ị́ ḅụokoro na à nyana ḅereni ị́ pịrị ẹkẹ à nwọ koroma sịkị ofori-ẹ, anịkanịka ye se ị́ lama à nwọse ḅietọn sịkị pịkị ofori-ẹ. Ị́ ị̀ ḍọkịma ḅọrọ ḅo mịju lamẹ ị́ pa ị̀ ḅaaḅịa ẹrẹchị, à seni ị́ mịẹirimasaye ma ofori-ẹ nwọḅẹ sọnị.

¹² Ye Nyanaḅọ Ḅe kọn, mịna ḅie jụmḅọ mịẹirimaḅọ irimaḅọ! Ị́ nwọse ị̀ mịẹarị ye mị, ye ori anịa fomuḅara se ị́ pịrị, anịatịḅị ị̀rị̀ ọkụma ngịsị à ye seni ị́ lama ẹkẹ.

¹³ Sẹnịapụ ma ḍukoye mị ị́ nemimẹ, ‘Si apụma kẹngẹ anị siye mịẹmịẹye-ẹ.’ Anịẹrẹchị à ye se ị́ lama ẹkẹ.

¹⁴ Izrẹl amanyanaḅọ ḅe mun ḅaaḅịa ẹrẹchị ḍọkịarịye mị ma ọ́ nwọ ḍiki! Ori-na-gbasịḅọ mangị ḍukoarịye mị ma ọ́ ḍiki! Fịsa obiri, papa kungu!

¹⁵ Nyanaḅọ Ḅe kọnḅịa, ọ̀ pịkị ḅẹrẹ mị pẹlẹḅịa mịnaḅie jụmḅọ mịẹirimaḅọ irimaḅọ. Ye ori ḅẹrẹ mị ḅie ḍiki, ị̀ ḅịpị kọn, pịkị ị́ ḅaraḅie ị̀ ḍụaḅọrọma.”

¹⁶ Devid ḅe ori ọkwẹịn so sịkị, Sọl ḅe nwọse ọ̀ ḅẹmẹ, “Anị ḅo kọkọma ị́rị́, Devid ị̀ya tọkụ ḅe?” Se ọ̀ sakị owumẹ.

¹⁷ Anịsịkị ọ̀ nwọse Devid ḅe ḅẹmẹ, “Ị́ karakaramẹ, ị̀rị̀ à mịẹirimamẹ. Ị́ opuma iḅi se ị̀ mịẹsam, ọkụma ị̀rị̀ à nwọ sime ḅara se ị́ mịẹirimasa sọnị!

¹⁸ Mịmgba, ị́ sime iḅiọkụ ị́ nwọse ị̀ ḍiesam, anịatịḅị ị́ ị̀ ḅaakẹ, Nyanaḅọ Ḅe ị̀ se ị́ pịrịmẹ na ị̀ ḅụ kụrọkọn nwọḅẹmẹ sọnị.

¹⁹ Nde tomoniḅọ ḅe sịkịmamgba orina tarakaḅọ ḅe kun se ye seni ọ̀ lamaka ḅaraḅụ papa ọ̀ wẹrịsoḅịa ọkụ? Nyanaḅọ Ḅe ị́ ḅẹlẹma ị̀ ḅụ ị́ kọn ḍumo mị gose mịmgba ḅụ!

²⁰ Mịọkụ àrị iḅiọkụ nemisam na ị́ amanyanaḅọ sọ Izrẹl mị pịrịḅịa, na amanyanakiri mị pịkị ị́ ḅaraḅie simema munḅịa ị́ya ḅẹrẹtọn mị ḅụ.

²¹ Ọkụma yeḅereni ị̀ pịrị Nyanaḅọ Ḅe ẹrẹ ḅụ na ị̀ furoḅie apụma ị́ ini ḅaa-ẹkẹ, mịẹse ị̀ya ẹrẹ mị na pịkị ị̀ furo mị ẹrẹ mị na okorona okorona faẹka ḅara.”

²² Devid ḅe ò yeḅerenimẹ na ori ọkọ mịẹḅịa. Anịsịkị Sọl ḅe vinpịkị so ama mun mẹ, se Devid ḅe na oria owuapụma na vinpịkị so ini ḅọị sime nyọ mị mun mẹ.