1 Samụẹl 22 - Kịrịkẹnị Baịbụl

Ini Agbamịẹapụ Ma Ḅa Mẹ

¹ Devid ḅe Gat opuama mị ḅie ọ̀ mangị somẹ se mun Adulam ama mị na kpeki gbọrị pokolo ḅie simemẹ. Oria owuapụ mịnapụma na pịkị ísí kirikọn furo ḅie apụma na, anịju ori omi-ẹ nwọ naa sịkị, ini mun ọ̀ ḅụ sọmẹ.

² Ini ḅụḅalaḅala se pịrị apụ na, safị apụ na, pịkị yeḅụ-na-deinka apụma na so ọ̀ damamunmẹ, ini kịnị ẹndẹ pembeye owuapụ ḅụ nwọ lamẹ, se ori inia tịḅịnịḅọ sọmẹ.

³ Devid ḅe anịju ḅụ ò so Mizpa mun mẹ Moab mị ḅieḅụ se nwọse Moab amanyanaḅọ ḅe ḅẹmẹ, “Sisi ye ị̀ ḍaḅe na ị̀ nyengima na ḅo ị́rị́ na sime ọkịmun Tamụnọ Ḅe mịẹ ị̀ pịrịḅịaye à nwọ ḍọkịḅo sịkị la.”

⁴ Anịẹrẹchị Devid ḅe nyọngọrọma na ḍawu ḅe na se koroma Moab amanyanaḅọ ḅe pịrịmẹ, se ini anịju ḅụ simemẹ, Devid ḅe ò pokolo mị ḅie ḅọị sime sịkị mị mgba ḅụ.

⁵ Anịsịkị ịkịankoro Gadị ḅe Devid ḅe damaḅo se nwọse ọ̀ ḅẹmẹ, “Mịanga simema, mịkirikiri so Juda ama mị mun.” Anịẹrẹchị Devid ḅe ò so Hirẹt piri mị ḅie mun mẹ.

⁶ Gbọrị ene Sọl ḅe Gibia ḅie, chịngị ọgọnọ sime gbọrị tamarisk eje chuku sime waraḅẹ, oria angwa mị ọ̀ ḅara omi-ẹ, se oria owunitịḅịnị mamgba pịkị chịẹ ò kelema waraḅẹ. Ini ḍuko ọ̀ pịrịmẹ na Devid ḅe na oria owuapụma na ini ini ọrịsam,

⁷ se ọ̀ nwọse oria owunitịḅịnịma ḅẹmẹ, “Ó poki, Bẹnjamin owuapụ! Ó koroma ḅara Devid ḅe ori ozu-a kiri na irumịẹ chịnmgbọlụ ozu-a kiri na se ómine mgba pịrị pịkị oria ọmụogbo mị ḅieḅụ ó se owunitịḅịnị mịẹḅe?

⁸ Anị ó gose ḅẹrẹḅia ị̀ pịrịarịye? Ọ́mịna ḅie gbọrịḅọ kẹngẹ sọnị ḍuko ị̀ pịrịkẹ na ị̀ya tọkụ ḅe ò Devid ḅe na gbọrịḅụ simesam. Ị̀ gbolomaye ḍuko gbọrịḅọ kẹngẹ sọnị ọ́mịna ḅie ofori-ẹ anịkanịka pa ḍuko ị̀ pịrị na Devid, ị̀ya owuapụma ḅie gbọrịḅọ ḅe, mịọkụ ori ẹmbẹ ḍọkịaḅẹ ị̀ ḅaaḅịa ọkụ, na ị̀ya tọkụ ḅe pịkị ò kuḅiekụrọmamẹ nwọḅẹye mị!”

⁹ Doẹg ḅe anịju ḅụ Sọl owunitịḅịnị ma na chịẹ sime, se nwọ ḅẹmẹ, “À Devid ḅe ọrịmẹ ò so Ahimẹlẹk, Ahaịtọb yaḅe ḍọkịma mun sịkị Nọb mị ḅie ḅụ.

¹⁰ Ahimẹlẹk ḅe Devid ḅe mịẹḅịa ọkụ se Nyanaḅọ Ḅe gbelamẹ, anịsịkị ọ̀ pịkị fịye se ọ̀ pịrịmẹ, pịkị Golaịat Filistiaḅọ ḅe okola-agiji mị na.”

¹¹ Anịẹrẹchị Amanyanaḅọ Sọl ḅe agbamịẹ Ahimẹlẹk ḅe na oria mịnapụ mamgba na fịrịmamẹ, ini sọnị agbamịẹapụ-ẹ Nọb mị ḅieḅụ, se ini ọ̀ damaḅomẹ.

¹² Sọl ḅe nwọse Ahimẹlẹk ḅe ḅẹmẹ, “Poki, Ahimẹlẹk!” “Mị ị̀rị̀-ẹ, ị̀ nyanaḅọ,” ori nwọse ọ̀ pẹkẹrẹmẹ.

¹³ Sọl ḅe nwọse ọ̀ gbelamẹ, “Cheye ẹrẹchị ị́ Devid ḅe na ḅẹrẹḅia ị̀ pịrị? Cheye ẹrẹchị ị́ fịye na pịkị okola-agiji na se ọ̀ pịrị, pịkị Tamụnọ Ḅe ḅịpịgbela ọ̀ pịrị? Mịọkụ ò vinpịkị ị̀ dapakasam se koruaḅẹ ori ẹmbẹ nyana se ị̀ ḅaaḅịa ọkụ!”

¹⁴ Ahimẹlẹk ḅe nwọse ọ̀ pẹkẹrẹmẹ, “Devid ḅe anị ị́ya owunitịḅịnị ma ḅie ị́ ḅerenitẹịnḅọ ḅe-ẹ! Ori anị ị́ ndụḅa ma dewu ḅe-ẹ, ị́ ḍikiḍikiarị owunima inia tịḅịnịḅọ ḅe-ẹ, se amanyanaḅọ nụngọ ḅie sime ḅọ goyegoye pịkị opu osi se pịrịḅọ ḅe-ẹ.

¹⁵ Iin, à Tamụnọ Ḅe ḅịpịgbela ọ̀ pịrịmẹ, mị anị tatarị sịkịkẹ. Ḅẹrẹḅia ị́ pịrị mị ọkụma, Amanyanaḅọ, ngịsị ye se ị̀ pụnụmama pịkị ị̀ ḍa furo ḅie gbọrịḅọ kẹngẹ sọnị. Mịn ḅẹrẹ mị gbolomaye ḅụ à nemiye ofori-ẹ!”

¹⁶ Amanyanaḅọ ḅe nwọ ḅẹmẹ, “Ahimẹlẹk, ị́rị́ na ị́ya mịnapụ mamgba na ọ́ fịḅịa.”

¹⁷ Anịsịkị ọ̀ nwọse ori na kpekima chịẹ ò ḍikiḍikiarị apụma ḅẹmẹ, “Ọ́ Nyanaḅọ Ḅe agbamịẹapụma ḅaa! Ini Devid ḅe na ḅiamẹ se ḍuko ị̀ pịrịkẹ na ọ̀ mangị sosam, ini anị nemi ḅọrọsam nwọḅẹ sọnị.” Ọkụma ò ḍikiḍikiarị apụma ini gbọrị ḅara sọnị dekichịẹma Nyanaḅọ Ḅe agbamịẹapụma ḅaa ḍụkụkẹ.

¹⁸ Anịẹrẹchị Sọl ḅe nwọse Doẹg ḅe ḅẹmẹ, “Ị́rị́ ini ḅaa!”—se Doẹg ḅe inimgba ḅaamẹ. Anị ene ḅụ agbamịẹapụma ḅụ kịnị-a iniasi na sọnọ apụ ọ̀ nwọ ḅaamẹ, anị ifọd mị deki lasa apụ ḅụ.

¹⁹ Sọl ḅe pịkị kụrọ pịrịmẹ na ísí Nọb mị ḅie sime apụ mamgba, ini ini ḅaa, anị agbamịẹapụ opuama mị, owuapụma na pịkị eremeni na, awọmẹnị na pịkị ḅaraḅie sime awọma na, nambuloma na, yepụra asụnma na, pịkị ananama na—àrịmgba ini àrị ḅaamẹ.

²⁰ Ọkụma Abaịata, Ahimẹlẹk owuapụ awọma ḅie gbọrịḅọ mangị somẹ, se mun Devid ḅe ḅụ sọmẹ.

²¹ Sọl ḅe Nyanaḅọ Ḅe agbamịẹapụma ḅaa ọkụ mị ọ̀ nwọ ḍuko ọ̀ pịrịmẹ.

²² Devid ḅe nwọse ọ̀ ḅẹmẹ, “Anị ene mị ḅụ anịnyọ ḅụ à Doẹg ḅe ọrị sịkị, à nemimẹ na gbarị ẹkẹ ò ḍuko Sọl ḅe pịrịḅịa. Anịẹrẹchị ị́ya mịnapụ mamgba ị̀ tịḅị fị mị ini kọnye-ẹ.

²³ Ị̀rị̀ na sime pịkị ḅalafama. Sọl ḅe ò ḅimẹ ori ị́rị́ na ị̀rị̀ na ḅaa, ọkụma ị́rị́ na ị̀rị̀ na gbọrịye sọnị wa la ẹkẹ.”