1 Samụẹl 15 - Kịrịkẹnị Baịbụl

Ini Amalẹk Apụ Ma Na Ọmụgbin Mẹ

¹ Samụẹl ḅe nwọse Sọl ḅe ḅẹmẹ, “Ị̀rị̀ anị Nyanaḅọ Ḅe fịrịma se pulo se ị́ tịḅịsara ị́ se amanyanaḅọ mịẹ oria tomoni Izrẹlapụma pịrị nwọḅẹḅọ ḅe-ẹ. Mịọkụ Nyanaḅọ anị Kụrọmamgba Nyanaḅọ Ḅe ḍukoye mị poki.

² Ò fomuḅara seni Amalẹk apụma pịrị-ẹmun-aḅẹ anịatịḅị inia olomu-aḍapụma ini Izrẹlapụma dapakamẹ ini Ijipt mị ḅieḅụ soḅoarị sịkị.

³ Somun owu seni Amalẹk apụma paka se okorona okorona ini nyanaye goyegoye simafama. Gbọrịye sọnị kọnmama, owuapụma na, eremeni ma na, awọmẹnịma na, pịkị ḅara ḅie sime awọmẹnị mamgba na ḅaafama; nambuloma na, ananama na, ike-nambuloma na, pịkị yepụra asụnma na.”

⁴ Sọl ḅe oria owunima chịn koḅirima se ini la-ọkụ kịẹn nemimẹ Tileim mị ḅieḅụ: Izrẹl mị ḅie owuni ḅụ si sọnọ-a poku fịnjị pakaḅomẹ, se Juda mị ḅie poku na sọnọ ẹndẹ pịkị pakaḅomẹ.

⁵ Anị ori na oria owuapụma na so mun Amalẹk apụ opuama mị ḅie ḅọị simeye-ẹ samịnasa mengi kiri ọgọnọ ḅụ.

⁶ Ò ḅerijine oku se Kenaị apụma fịrịmamẹ, anị inia olomu-aḍapụma iḅianga se Izrẹlapụma na kọn apụma, ini Ijipt ḅieḅụ soḅoarị sịkị: “Ó so-o se Amalẹk apụma ḅụ ọ́ ḅụsikima, mịẹse àrị ó seni ini na chụa ḅaa ẹka ḅara.” Anịẹrẹchị Kenaị apụma ini somẹ.

⁷ Sọl ḅe ori Amalẹk apụma nẹngịmamẹ, Havila mị ḅieḅụ ori ini na sọ nweni mun Shọ mị lamẹ, Ijipt mị ḅụ ịrụapakapaka nyọ daọrụ mị;

⁸ Amalẹk amanyanaḅọ Egag ḅe fị̀ka ḅụ ori ò kun ọkịmẹ se ò tomoni mamgba ḅaamẹ.

⁹ Ọkụma Sọl ḅe na oria owuapụma na Egag ḅe ini ọ̀ ḅaakẹ, iḅitẹịn ananama na nambuloma na ini ḅaakẹ, ayamburama nambuloma na ayamburama ananama na, pịkị iḅiye goyegoye sọnị ini ḅaakẹ; yeḅụsọka pịkị mịẹyeḅụ-ofori-ayema kẹngẹ anị ini simaye-ẹ.

Sọl Ḅe Ini Ọ̀ Sịkịsam Amanyanaḅọ Mị Ḅụ

¹⁰ Nyanaḅọ Ḅe nwọse Samụẹl ḅe ḅẹmẹ,

¹¹ “Anị ị̀ ngịrịmamẹ à Sọl ḅe se amanyanaḅọ mịẹye mị; ori ị̀ ḅụ vinpịkị so se ḅarị ị̀ ḅịpịpokikẹ à tọn ọ̀ pịrịayema ḅụ.” Samụẹl ḅe anị ò ḅụosọmẹ, se bebe ḍin mị mgba ọ̀ Nyanaḅọ Ḅe tẹkẹmẹ owuḅụ.

¹² Anị ḅe eneḅa dede funfun ḅie ò somun Sọl ḅe ḍọkịmẹ. Ọ̀ naamẹ na Sọl ḅe ò so Kamẹl ama mị munsam, anị ọ̀ tẹmẹ ọ̀ ḅụ pịrị lụgụ mị sime nyọ mị se anịju ọ̀ ḅọrọso Gilgalị mị munsam.

¹³ Samụẹl ḅe ò somun Sọl ḅe lamẹ, se Sọl ḅe ò kereni se nwọse ọ̀ ḅẹmẹ, “Ye Nyanaḅọ Ḅe ị́ ḅẹlẹma, Samụẹl! Nyanaḅọ Ḅe tọn ị̀ pịrị ọkụ mị anị à mịẹọkụ mị-ẹ ḅịpịpoki ḅụ.”

¹⁴ Samụẹl ḅe nwọse ò gbelamẹ, “Anịọkụma, nde à gose nambulo na anana na oloku pụkọ naa arịye-ẹ?”

¹⁵ Sọl ḅe nwọse ọ̀ pẹkẹrẹmẹ, “Ị̀ya owuapụma Amalẹk apụma ḅara àrị ọkị ḅomẹ. Iḅitẹịn ananama na nambuloma na ini nwọ koko koromamẹ se agbamịẹ Nyanaḅọ anị ị́ Tamụnọ Ḅe pịrịḅịa ẹrẹchị, se ísí kirikọn ayema wa àrị ḅaafamamẹ.”

¹⁶ “Ḅarị ḍukoma,” Samụẹl ḅe nwọse ọ̀ ḅẹmẹ, “se ye Nyanaḅọ Ḅe ḍin ḅie ḍuko ị̀ pịrịye à nwọ ḍuko ị́ pịrị.” “Ḍuko ị̀ pịrị,” Sọl ḅe nwọse ọ̀ ḅẹmẹ.

¹⁷ Samụẹl ḅe nwọse ọ̀ pẹkẹrẹmẹ, “Ị́ ḅụ ị́ se yechịnkẹ nwọḅẹ sọnị, Izrẹl mị ḅie sẹsẹ ma ị́rị́ arịa tịḅịnịḅọ-ẹ. Nyanaḅọ Ḅe ò pulo se ị́ tịḅịsara mẹ ị́ se amanyanaḅọ mịẹ Izrẹl mị pịrịmẹ,

¹⁸ ọ̀ kụrọ se ị́ pịrịmẹ na mun ini sitịḅịnyana Amalẹk apụma ḅaafama. Ori ị́ ḅẹmẹ na owusọ ọkịmun ị́ inimgba nwọ ḅaafama sịkị la.

¹⁹ Anịọkụma, cheye ẹrẹchị, ị́ ọ̀ ḅịpịpokika? Cheye ẹrẹchị ó mun ye ọfọịn, se Nyanaḅọ Ḅe ḅụḅẹlẹkaye nwọ mịẹ?”

²⁰ “Nyanaḅọ Ḅe ḅịpị à pokimẹ,” Sọl ḅe nwọse ọ̀ pẹkẹrẹmẹ. “Ori ị̀ ḅẹ ḅaraḅụ à paka mun mẹ, se Amanyanaḅọ Egag ḅe kun ḅo, se bebe Amalẹk apụ mamgba ḅaafamamẹ.

²¹ Ọkụma ị̀ya owunima kun iḅitẹịn ananama na nambuloma na ini àrị ḅaakẹ; anịnakaraka, ini àrị ọkị Gilgalị mị ḅomẹ àrị se agbamịẹ Nyanaḅọ ị́ Tamụnọ Ḅe pịrịḅịa ẹrẹchị.”

²² Samụẹl ḅe nwọse ọ̀ ḅẹmẹ, “Nde Nyanaḅọ Ḅe ḅụḅẹlẹtẹịnye: ḅịpịpoki anịkanịka ḍiepịrịaye na agbamịẹaye na ḅụ? Ọ̀ ḅịpịpoki mị iḅitẹịn, iḅitẹịn ananama se agbamịẹ ọ̀ pịrị mị nẹngịmẹ.

²³ Nyanaḅereni ọ̀ pịrịka mị, ḅịrịkọn mị si ọkụ anị anị si ọkụ-ẹ, pịkị ḅụdekichịẹma mị orutẹkẹ mị si ọkụ anị anị si ọkụ-ẹ. Nyanaḅọ Ḅe tọn ị́ pịrịye mị ị́ nwọ sịkịmẹ nwọḅẹ ẹrẹchị, ori sọnị ori ị́ sịkịsam amanyana mị ḅụ.”

²⁴ “Iin, à simịẹsam,” Sọl ḅe nwọse ọ̀ pẹkẹrẹmẹ. “Nyanaḅọ Ḅe tọnye mị à pokikẹ pịkị ị́ ḅẹ na à mịẹ nwọḅẹ ayema sọnị à mịẹkẹ. Ị̀ya owuapụma à nwọ ḍikiḅalafa se ini ḅiye mị nwọ mịẹmẹ.

²⁵ Ọkụma mịọkụ àrị ị́ tẹkẹmẹ, à mịẹ si mị wẹrịso ị̀ pịrị se ị̀rị̀ na vinpịkị mun, mịẹse àrị ineda Nyanaḅọ Ḅe tẹkẹḅịa ọkụ.”

²⁶ “Àrị ị́rị́ na vinpịkị mun-ẹkẹ,” Samụẹl ḅe nwọse ọ̀ ḅẹmẹ. “Nyanaḅọ Ḅe tọn ị́ pịrịye mị ị́ nwọ sịkịmẹ, anịẹrẹchị ori sọnị ori ị́ sịkịsam amanyanaḅọ sọ Izrẹl mị pịrịḅụ.”

²⁷ Anịsịkị Samụẹl ḅe vinpịkịmẹ soḅịa ẹrẹchị, ọkụma Sọl ḅe ori oria ḅụchụaye chuku ọlọmẹ, se anị kan ọ̀ ḅara sọmẹ.

²⁸ Anịsịkị Samụẹl ḅe nwọse ọ̀ ḅẹmẹ, “Nyanaḅọ Ḅe Izrẹl amanyanakiri mị ị́ ḅaraḅụ ori anị kansam mịmgba ḅụ se anịse iḅitẹịn ị́ nẹngịḅọ pịrịsam.

²⁹ Izrẹl amanyana Tamụnọ Ḅe ori iruoruokẹ, ọ̀ pịkị kuḅie ḍinmaḍinmakẹ. Ori tomoniḅọkẹ—ò kuḅie ḍinmaḍinmakẹ.”

³⁰ “À simịẹsam,” Sọl ḅe nwọse ọ̀ ḅẹmẹ. “Ọkụma pa osi se ị̀ pịrị ị̀ya tomonima na tịḅịnịma na pịkị bebe Izrẹl mị na tọrọkọ ḅụ. Pa ị̀rị̀ na vinpịkị mun mịẹse àrị ineda Nyanaḅọ ị́ Tamụnọ Ḅe tẹkẹḅịa ọkụ.”

³¹ Anị Samụẹl ḅe ori na vinpịkịso mun ye-ẹ, se Sọl ḅe ọ̀ Nyanaḅọ Ḅe tẹkẹmẹ.

³² “Amanyanaḅọ Egag ḅe ọkịḅo ị̀ pịrị,” Samụẹl ḅe kụrọ pịrịmẹ. Egag ḅe ḅụgeregere na ḅalafa na ḅụ ọ̀ damaḅomẹ, ọ̀ nwọ koroma mẹ na “Fị mị ḅe akụ mị anị ḅọrọsam!”

³³ Samụẹl ḅe nwọse ọ̀ ḅẹmẹ, “Ị́ya okola-agiji mị mịẹse tọn-a nyengiapụ awọ nyanakapụ sọ ḅara anị ị́ nyengima sọnị à tọkụ nyanakaḅọ sọḅịa ọkụ-ẹ.” Se ori Egag ḅe se ikiḅa-ikiḅa pẹlẹmẹ agbamịẹ ẹbẹ mị tọrọkọ Gilgalị mị ḅieḅụ.

³⁴ Anịeso Samụẹl ḅe ò so Rema mun mẹ, se Amanyanaḅọ Sọl ḅe sọ so Gibia oria ama mị mun mẹ.

³⁵ Samụẹl ḅe ò ḍumo la kọn a ḍin ma ḅie, ọ̀ ḅarị amanyanaḅọ ḅe ọrịkẹ, ọkụma ò kururu ọ̀ pịrịmẹ. Nyanaḅọ Ḅe anị ori ngịrịmamẹ ọ̀ Sọl ḅe se amanyanaḅọ mịẹ Izrẹl mị pịrịye mị.