1 Samụẹl 14 - Kịrịkẹnị Baịbụl

Jonatan Ḅe Kuḅiekụrọma Mịẹye Mị

¹ Gbọrị ene Jonatan ḅe nwọse oria owuniayema pụra asẹmẹnịḅọ ḅe ḅẹmẹ, “Ye wa saḅa Filistia apụma ikowarịma pike nyọ mị mun.” Ọkụma Jonatan ḅe ò ḍuko ḍawu Sọl ḅe pịrịkẹ,

² anị mgbafa chịn mị chuku ḅụ ikowarị pike simeḅọ ḅe Migrọn mị ḅieḅụ, Gibia ḅieḅụ mun anị nyọ mị la mị ḅọlọkẹ; ineda kịnị ẹndẹ oyiasi fịnjị pembeye laḅịa owuapụ orina anịju ḅụ simemẹ.

³ (Ifọd mị ḅara sime agbamịẹḅọ anị Ahaịja ḅe-ẹ, Ikabọd ḅe numbireowu Ahaịtọb yaḅe, anị Fịnehas yaḅe, oria opuḍaḅọ anị Ịlaị, Shịlo ḅie Nyanaḅọ Ḅe oria agbamịẹḅọ ḅe.) Jonatan ḅe ori ini wẹrịsosa ọkụ owuapụma ini nemikẹ.

⁴ Mikmash Ḅọrọnyọ mị ḅụ, anị Jonatan ḅe ḅọrọmun Filistia apụma ikowarịma pike sime nyọ laḅịa anga mị ḅụ, mama gele ḍụparị simemẹ, ḅọrọnyọ mị ḅụ, gbọrịye gbọrị pẹkẹrẹ, gbọrị pẹkẹrẹ ḅụ simemẹ; gbọrịye ini nwọse anị chịnmẹ Bozẹz se ísíye mị ini nwọse anị chịnmẹ Sinẹ.

⁵ Gbọrịye ḅọrọnyọ mị ḅe ọgọnọju daọrụ ḅụ simemẹ, se tọrụ se Mikmash mị damẹ, se ísíye mị pịkị chukuju daọrụ ḅụ simemẹ, tọrụ se Giba mị damẹ.

⁶ Jonatan ḅe nwọse asẹmẹnịḅọ ḅe ḅẹmẹ, “Ye wa saḅa mun anị oruḅẹrẹnemi Filistia apụma ikowarịma pike sime nyọ mị mun. Sosi Nyanaḅọ Ḅe ọ̀ ḅarachụa wa pịrịḅịa; ò nemikase ḅarachụaḅịa-ọkụma, ineda ò kiki se ori ọmụḅaraiḅi se wa pịrị-ẹkaye ngịsị ofori-ẹ; wa boka la-ọkụ la-ọkụ sọnị.”

⁷ Asẹmẹnịḅọ ḅe nwọse ọ̀ pẹkẹrẹmẹ, “Ị́rị́ nyana se mịẹḅiye goyegoye, àrị ị́rị́na-omi-ẹ.”

⁸ “Iḅimẹ,” Jonatan ḅe nwọ ḅẹmẹ. “Wa saḅa munḅịa se ye Filistia apụma wa ọrị.

⁹ Ini nemikase nwọḅẹ na wa ini koru se ini wa sime anga ḅoḅịa ḅẹḅẹ, anịọkụma wa mịju simeḅịa wa sime nyọ mị ḅụ.

¹⁰ Ọkụma ini nemikase wa ḅẹ na wa ini damamun nwọ ḅẹḅẹ, anịọkụma wa munḅịa, anịatịḅị Nyanaḅọ Ḅe ori elekima se wa ḍiesam na ori anị mịẹ sarasarama wa pịrịsam wa ini nẹngịma.”

¹¹ Anịẹrẹchị ini mịẹmẹ Filistia apụma ini ọrị, se Filistia apụma nwọ ḅẹmẹ, “Ḍiki! Hibru apụma ini ḅọị sime ḅụkụ ma ḅie dapụ pakaḅo aḅẹ!”

¹² Anị ini Jonatan ḅe na asẹmẹnịḅọ ḅe na chịnye-ẹ, “Ómine iwo mịju ḅo! Wa ḍuko ọ́ pịrịḅịaye omi-ẹ!” Jonatan ḅe nwọse asẹmẹnịḅọ ḅe ḅẹmẹ, “Ị̀ ḍukoḅo. Nyanaḅọ Ḅe ọ̀ mịẹse sarasarama Izrẹl mị pịrịsam se ini nẹngịma.”

¹³ Jonatan ḅe, ọ̀ ḅarama na ḅụọ ịkpụkụma na se ikiri kpọlị iwo ḅọrọnyọ mị mun mẹ, se asẹmẹnịḅọ ḅe sọnị ò ḍukomunmẹ. Jonatan ḅe ori owu se Filistia apụma paka se ini fomugbin se asẹmẹnịḅọ ḅe ini ḅaamẹ.

¹⁴ Anị tatarị ene mị ḅụ Jonatan ḅe na asẹmẹnịḅọ ḅe na si keme pembeye ini nwọ ḅaamẹ, gbọrị nyọ ḅụ, anịa finji na nangwọ na, oyi-a kuḅu ḅe pembemaye lamẹ.

¹⁵ Sẹ mị ḅụ anị pẹkẹrẹ mị ḅie sime Filistia apụ mamgba ḅụgeregere iniaḅụ sọmẹ, ọḅụ owu mun apụma na ikowarịma pike sime nyọ ḅụ sime owuni mamgba inia ḅụgeregeremẹ ḅalafa ḅụ; kiri mị jikemẹ, se opu-tẹmẹ-taịntaịn iniaḅụ sọmẹ.

Filistia Apụ Ma Nẹngịma Mị

¹⁶ Sọl owuapụ Gibia ḅie korusime apụma, anị Bẹnjamin eke mị ḅụ sime apụma, Filistia apụma, tọrụpikiri ḅụ mangịarị-ọkụ ọrịmẹ.

¹⁷ Anị Sọl ḅe nwọse oria owuapụma ḅẹye-ẹ, “Ómine owunima kịẹn se iniaḅụ ofori ḅọ nwọ nemi.” Ini ọ̀ ḅẹ ḅara mị mịẹse ọrịmẹ na Jonatan ḅe na oria owuniayema dekiḅọ ḅe na inia ḅie ini ofori-ẹ.

¹⁸ Sọl ḅe nwọse Ahaịja agbamịẹḅọ ḅe ḅẹmẹ, “Tamụnọ Ọḅọkụ Igbe mị se mịju ḅo.” (Anịsịkị mị ḅụ Ọḅọkụ Igbe mị Izrẹlapụma ḅara omi-ẹ.)

¹⁹ Sọl ḅe ọkwẹịn agbamịẹḅọ ḅe pịrịarị sịkị ḅụ, Filistia apụma ḅe tọrụpikiri mị anị sitẹịn ma mun aḅẹ, anịẹrẹchị Sọl ḅe nwọse ọ̀ ḅẹmẹ, “Yese Nyanaḅọ Ḅe gbelaḅịa sịkị ḅarị ofori-ẹ!”

²⁰ Anị ori na oria owuapụma na kụrọma nwẹngị mun Filistia apụma na ọmụgbinye-ẹ, anị ngẹrị ḅarị ḅịpịogbosọka ḅụ owu se jụmḅọ jụmḅọ pakarị apụma.

²¹ Filistia apụma pẹkẹrẹ ḅụ sime se ini na somun ini pike sime ikowarịma ḅie sime da Hibru apụ sọnị saḅa ḅọrọ se Sọl ḅe na Jonatan ḅe na ḅụ sọmẹ.

²² Ini Ifrem chịngịma ḅie ḅọị sime apụma ini naamẹ na Filistia apụma ini mangị soaḅẹ nwọ ḅe sịkị, ini sọnị ḅo ḅarachụa owu se Filistia apụma pakamẹ,

²³ ini ini na pịrị-a nweni ọkịmun Bẹt-Avẹn mị ḅọrọkoromẹ. Nyanaḅọ Ḅe ori Izrẹl mị ḍụaḅọrọmamẹ anị ene mị ḅụ.

Ọmụ Mị Ḅọrọso Se Mịẹaye Ma

²⁴ Izrẹlapụma ịnyọ iniaḅụ famẹ ḅuru pụkọ tarị ḅụ, anịatịḅị Sọl ḅe ọ̀ kụrọma yekarị ḅaraḅụ nwọ ḅẹmẹ, “Ma àrị ị̀rị̀na-tarakapụ ma ḅụ sowuḅika simeogbo yefịḅọ goyegoye worinime sime nụḅọ pịrị.” Anịẹrẹchị gbọrịḅọ sọnị yefịkẹ bebe ene mị mgba ḅie.

²⁵ Se inimgba ḅo gbọrị piri ḅie sọ se ḅẹịn ọrịmẹ nyọ mị mgba ḅụ.

²⁶ Piri mị ḅie mgba ḅẹịn ḅeinmẹ, ọkụma gbọrịḅọ sọnị anị seni ḅịpịlamakẹ anịatịḅị ini Sọl worinime mị ḍikiḅalafamẹ.

²⁷ Ọkụma Jonatan ḅe ḍawu ḅe ò worinime se tomonima ḅalafama ọkụ ma ọ̀ naakẹ; anị ori ọ̀ ḅara sime chịn mị sụma anị seni ḅẹịn akpa mị ḅie su se anị taḅaye-ẹ. Anị gbọrị kirikiri ịnyọ ọ̀ ḅụ sọmẹ.

²⁸ Ọkụma owuapụma ḅie gbọrịḅọ nwọ ḅẹmẹ, “Mine mgba ịnyọ mịnaḅụ fasam, ḅurupụkọtarị ḅụ ọkụma ị́ ḍaḅe ò worinime se mịna ḅalafama se nwọ ḅẹmẹ, ‘Worinime sime mịmgba ene ḅie ye fịḅọ goyegoye pịrị.’”

²⁹ Jonatan ḅe pẹkẹrẹ se nwọ ḅẹmẹ, “Mị che ḅalafamaye ị̀ ḍaḅe ọ̀ nwọse mịna tomonima mịẹ! À ḅẹịn mị taḅaye ẹrẹchị ịnyọ ị̀ ḅụ sọ ọkụ ḍiki!

³⁰ Ịnyọ mịna tomonima ḅụ sọ laḅịa ọkụ ḍiki, ini nemikase inina-tarakapụma nẹngịma sịkị ḅụ ini ọkị fịye mị ini nwọ fịmẹ nwọ ḅẹ ọkụma. Ini ḅaaḅịa Filistia apụma mgbọkụ ḅaka laḅịa ọkụ ḍiki!”

³¹ Anị ene mị ḅụ Izrẹlapụma ini Filistia apụma nẹngịmamẹ, Mikmash mị ḅie ini sakị owusọ nweni ọkịmun Aịjalọn mị lamẹ. Anị ḅo nwọ lasịkị, Izrẹlapụma ịnyọ opuma iniaḅụ fasam ḅurupụkọtarị ḅụ,

³² anịẹrẹchị ini mangị mun inina-tarakapụma ḅara ini ọkị ayema ḅụ, ananama na, nambuloma na kun ḅaamẹ se anịju ḅụ namama pẹịmẹ puloma na.

³³ Ini ḍuko Sọl ḅe pịrịmẹ, “Ḍiki, tomonima ini Nyanaḅọ Ḅe ḅụ si mịẹ-aḅẹ anị pulo ḅụ sime nama pẹị ḅụ.” “Ómine ịbafịapụ-ẹ!” Sọl ḅe oloku se nwọ ḅẹmẹ. “Gbọrị opu ḍụparị ọ́ nwọ mbimbileḅo mịanga ị̀ pịrị.”

³⁴ Anịsịkị ọ̀ pịkị jịn kụrọ pịrịmẹ; “Ó tomonima ḅie mun se ḍuko ini pịrị ini inia nambuloma na ananama na se mịanga ḅo. Ini mịanga àrị ḅaa pịkị àrị pẹịḅịa; ini ḅarị Nyanaḅọ Ḅe ḅụ si mịẹma anị pulo ḅụ sime ịwọ nama pẹịḅụ.” Anịẹrẹchị anị ḍin mị ḅie inimgba inia namama pakụmaḅo se ini anịanga àrị ḅaamẹ.

³⁵ Sọl ḅe ori agbamịẹ ẹbẹ nama Nyanaḅọ Ḅe pịrịmẹ, anị ọ̀ tatarị namaye mị-ẹ.

³⁶ Sọl ḅe nwọse oria tomonima ḅẹmẹ, “Ó ye wa mun ḍin owu se Filistia apụma paka, ini ọfọịn, pịkị inimgba ḅaasin.” Ini nwọse ọ̀ pẹkẹrẹmẹ, “Ị́rị́ ḍiki se mịẹ na iḅitẹịn ḅara goyegoye ọkọ mịẹ.” Ọkụma agbamịẹḅọ ḅe nwọ ḅẹmẹ, “Ó ye wa tatarị Tamụnọ Ḅe ḅịpị gbela.”

³⁷ Anị Sọl ḅe Tamụnọ Ḅe gbelaye-ẹ, “Filistia apụma owu mị àrị ini paka? Ị́ ọmụḅaraiḅi se wa pịrịḅe?” Ọkụma Tamụnọ Ḅe ọ̀ pẹkẹrẹkẹ anị ene mị ḅụ.

³⁸ Anị Sọl ḅe nwọse tomonima ḅe tịḅịnịma ḅẹye-ẹ, “Ó ḅo wa ini mịẹ si mị nwọ ḍọkị pakụmaḅo mịmgba mị ḅụ.

³⁹ Ḍumo sime Nyanaḅọ Ḅe ẹrẹ ḅụ à yeḅerenimẹ, anị ọmụḅaraiḅi se Izrẹl mị pịrịḅọ ḅe, na simịẹḅọ ḅe ọ̀ fị ḅụ sọḅịa, ị̀ nịa Jonatan ḅe ori-ẹ nwọḅẹ sọnị.” Ọkụma gbọrịḅọ sọnị yeḍukokẹ.

⁴⁰ Anị Sọl ḅe nwọse ini ḅẹye-ẹ, “Ómine mgba anịju ọ́ chịẹ, se Jonatan ḅe na ị̀rị̀ na mịanga chịẹḅịa.” Ini nwọse ọ̀ pẹkẹrẹmẹ, “Ị́rị́ ḍiki se mịẹ na iḅitẹịn ḅara goyegoye ọkọ mịẹ.”

⁴¹ Sọl ḅe nwọse Nyanaḅọ, Izrẹl Tamụnọ Ḅe ḅẹmẹ, “Nyanaḅọ, cheye ẹrẹchị ị́ ị̀ pẹkẹrẹka mịmgba? Nyanaḅọ, Izrẹl Tamụnọ, yela fịafịa ḍụparịma ḅụ ḅọrọ ị̀ pẹkẹrẹ. Nemikase Jonatan ḅe anịkanịka ị̀rị̀ siye mị mịẹmẹ ḅẹḅẹ, Ụrịm mị ḅụ ḅọrọ pẹkẹrẹ; ọkụma nemikase ị́ya tomoni Izrẹlapụma mịẹ si-ẹ ḅẹḅẹ, gbọrị Ụrịm mị ḅụ ḅọrọ pẹkẹrẹ.” Pẹkẹrẹ ḅịpị mị ḍiepakụmamẹ na Jonatan ḅe na Sọl ḅe na-ẹ, ọkụma tomonima anị ini ọlọkẹ.

⁴² Anị Sọl ḅe nwọ ḅẹye-ẹ, “Ị̀ nịa Jonatan ḅe na ị̀rị̀ na ogboku ḅụ karakaraye mị gbela ḅo.” Jonatan ḅe mị anị goye-ẹ.

⁴³ Anị Sọl ḅe nwọse Jonatan ḅe gbelaye-ẹ, “Cheye ị́ nwọ mịẹ?” Jonatan ḅe nwọse ọ̀ pẹkẹrẹmẹ, “Ị̀ ḅara sime chịn mị à nwọse ḅẹịn kalaye gbọ se taḅamẹ. Mịn ị̀rị̀-ẹ, à ḅụkarakaramamẹ fịḅịa ẹrẹchị.”

⁴⁴ Sọl ḅe nwọse ọ̀ ḅẹmẹ, “Ye Tamụnọ Ḅe ị̀ fomu ḅaa à nemikase ị́ ḅaakẹ ḅẹḅẹ!”

⁴⁵ Ọkụma tomonima nwọse Sọl ḅe ḅẹmẹ, “Jonatan ḅe, anị mị opu ọmụḅaraiḅi mị nyana ḅo wa pịrịḅọ ḅe, ị́ nwọ ḅaaḅe? Ẹn-ẹn! Wa ḍumo sime Nyanaḅọ Ḅe ẹrẹ ḅụ yeḅerenimẹ na ọ̀ tịḅị inime ḅara kẹngẹ sọnị fa-ẹkẹ. Mịmgba ọ̀ nwọ mịẹye mị Tamụnọ Ḅe ḅarachụa ḅụ ori anị mịẹmẹ.” Anịẹrẹchị tomonima ini Jonatan ḅe ḍụaḅọrọmamẹ fị mị ḅụ.

⁴⁶ Anị mị ḅọrọ sịkị, Sọl ḅe ọ̀ ḅarị Filistia apụma ḍukokẹ, se ini so inia amama mun mẹ.

Sọl Amada Mị Na Ò Furo Mị Na

⁴⁷ Sọl ḅe Izrẹl amanyanaḅọ sọ sịkị mị ḅụ ori na tarakapụ mamgba ori ini na owusọmẹ angana anganaḅụ: Moab apụma na, Amọn apụma na, pịkị Idọm apụma na, Zoba amanyanapụma na pịkị Filistia apụma na. Ori ọmụ mun anga goyegoye ọmụ ọ̀ ḅara iḅiḅimẹ.

⁴⁸ Ori ọmụ alaḅọ ḅara se ọmụgbinmẹ pịkị Amalẹk apụma sọnị nẹngịmamẹ. Ori Izrẹlapụma ḍụaḅọrọmamẹ ini se ini paka owu mamgba ḅie.

⁴⁹ Sọl ḅe oria owuapụ awọma anị Jonatan ḅe na, Ishvaị ḅe na, pịkị Malkishụa ḅe na-ẹ. Ḅarọ sẹnịḅọ ma ẹrẹ anị Mirab, kalaḅọ ma ẹrẹ anị Maịkal.

⁵⁰ Tarọ ma ẹrẹ anị Ahinoam, Ahimeaz ḅe ḅarọ ma; oria ọmụtịḅịdaḅọ ḅe ẹrẹ anị Abna, ḍawu numbireowu yaḅe, ḍawu numbireowu ḅe ẹrẹ anị Na.

⁵¹ Sọl ḍa Kish ḅe na Abna ḍa Na ḅe na Ebiẹl awọ-ẹ.

⁵² Sọl ḅe oria ḍumo ene mamgba ḅụ ori iḅiọkụma Filistia apụma na owusọmẹ. Anịẹrẹchị ọ̀ kụrọḅọ anịkanịka ọmụgbin ḍinḅọ ọrị sịkị goyegoye, ori nụḅọ se oria ọmụogbo mị ḅieḅụ chuchumẹ.