1 Samụẹl 13 - Kịrịkẹnị Baịbụl

Filistia Apụ Ma Na Ọmụgbin Mị

¹ Sọl ḅe kụra soi ọ̀ nwọ la se ò ḅo amanyanaḅọ sọ se Izrẹl mị pịrịmẹ, kụra mesi na mama kụra ọ̀ nwọse tịḅịnịḅọ sọ mẹ.

² Sọl ḅe owuapụma ḅụ kịnị-a sọnọma ẹndẹ oyiasi fịnjị ọ̀ nwọ ọkịmẹ, inia ḅie sọnọ ẹndẹ ọ̀ nwọse koroma ọ̀ ḅụ wẹrịmamẹ, Mikmash mị ḅieḅụ na pịkị Bẹtẹl chịngị ọgọnọ sẹ mị ḅieḅụ na, se kịnị-a mẹndẹ oyiasi fịnjị ọ̀ nwọse yayo Jonatan ḅe ḅụchụa se Gibia mị fịrịmamẹ, Bẹnjamin furo eke mị ḅụ. Ísí kirikọn owuapụma Sọl ḅe ori ini seni ama fịrịmamẹ.

³ Jonatan ḅe ò Filistia apụ ọmụtịḅịdaḅọ ḅe ḅaamẹ Giba ḅie, se bebe Filistia apụ mamgba anị naamẹ. Anịsịkị Sọl ḅe okumun-apụ fịrịma se ini oḍu ofuro ḅụ Hibru apụma chịn bebe sẹ mị kelemamẹ ini mun ọmụgbinḅịa ẹrẹchị.

⁴ Bebe Izrẹlapụ mamgba ini ḍuko ini pịrịmẹ na Sọl ḅe ò Filistia apụma inia ọmụtịḅịdaḅọ ḅe ḅaasam anịẹrẹchị Filistia apụma ini ini ḍikiḅụnwọnwọmẹ. Anịẹrẹchị tomonima ini Sọl ḅe oria chịn ḅịpị mị ḅereni se mun Gilgalị ḅie ọ̀ ḅụsọmẹ.

⁵ Filistia apụma ini ḅo koḅirimamẹ Izrẹlapụma na owusọḅịa ẹrẹchị; kporokporo ọmụarụ ḅụ tẹrẹ-a poku na jie ẹndẹ ini nwọ nyanamẹ, asụn ọgọnọ owunima jie ẹndẹ, pịkị owunima ḅaka ḅara, tọrụ aka onwun ḅaka ọkụ ḅakamẹ. Ini so Mikmash mị mun mẹ, Bẹt-Avẹn mị ḅụ ịrụapakapaka nyọ daọrụ ḅụ, se anịju ini ikowarịma pike simemẹ.

⁶ Anịanga ḅụ ini ịnyọ nyana ḅara se owu seni Izrẹlapụma pakamẹ, anị mịẹse inia tọrụ pikirimẹ. Izrẹlapụma ḅie dapụ ḍụparịma na pokoloma na ḅie ḅọịmẹ pịkị ịkụma na, oluluma na, pịkị tiḅema ḅie na;

⁷ ísíapụma ini Jọdan Tọrụ mị saḅa mun Gadị na Giledị na ḅe ekema ḅụ sọmẹ. Sọl ḅe ọ̀ pa Gilgalị mị ḅieḅụ sime waraḅẹ, se ori na sime apụma inia ḅụgeregere aḅẹ ḅalafa ḅụ.

⁸ Sọnọma ḍin ọ̀ nwọse sime Samụẹl ḅe korumẹ, anị Samụẹl ḅe se ọ̀ ḅẹ ḅaraḅụ, ọkụma Samụẹl ḅe ma ọ̀ pa ḅo Gilgalị mị lakẹ. Tomonima ini sakị Sọl ḅe koroma mangịso aḅẹ,

⁹ anịẹrẹchị ọ̀ nwọse ini ḅẹmẹ, “Dọkịma agbamịẹayema na nwẹngịgboloma agbamịẹayema na ọ́ nwọ ọkịḅo ị̀ pịrị.” Ọ̀ dọkịma agba mị mịẹmẹ,

¹⁰ ori anị mịẹ famaso-arị-ogbo, Samụẹl ḅe ḅolamẹ. Sọl ḅe mun ọ̀ la se ò kerenimẹ,

¹¹ ọkụma Samụẹl ḅe nwọse ọ̀ ḅẹmẹ, “Mịn cheye ị́ nwọ mịẹ?” Sọl ḅe nwọse ọ̀ pẹkẹrẹmẹ, “Tomonima ini ị̀ koroma mangịso aḅẹ, ị́rị́ pịkị ị́ ḅoḅịa nwọḅẹ sịkị mị ḅụ ḅokẹ; anị sikima ọkụma, Filistia apụma pịkị mun Mikmash mị ḅie koḅirimaḅẹ.

¹² Anịẹrẹchị à koromamẹ, ‘Filistia apụma ini ḅo mịanga Gilgalị mị ḅie owu se ị̀ pakaḅịa, ma à Nyanaḅọ Ḅe ḅarachụa nwọ nyanaka sịkị.’ Anịẹrẹchị à koromamẹ na àrị agbamịẹḅịa.”

¹³ “Anị nemiḅụ-ofori-mịẹye-ẹ,” Samụẹl ḅe nwọse ọ̀ pẹkẹrẹmẹ. “Tamụnọ Ḅe chụa ị́ pịrị oloko mị ị́ kokokẹ. Ị́ nemikase ḅịpị pokimẹ ḅẹ ọkụma, mgbọkụ ori ị́ mịẹse ị́rị́ na ị́ furo ḅie apụma na Izrẹl mị da gbasoḅịa.

¹⁴ Ọkụma mịọkụ ị́ya amada mị ḅarị sime ma mun ẹkẹ. Anịatịḅị ị́ ọ̀ ḅịpị pokikẹ, Nyanaḅọ Ḅe ori ò ḅiarị ḅara mịẹḅịa ḅọ ọ̀ nwọ ḍọkị se amadaḅọ mịẹ oria tomonima pịrịḅịa.”

¹⁵ Samụẹl ḅe ò Gilgalị mị wẹrịso se somẹ. Tomonima ḅie kọn apụma ini Sọl ḅe ḍuko so mun oria owunima ḅie sọmẹ. Ini Gilgalị mị ḅụ so mun Gibia mị lamẹ Bẹnjamin eke mị ḅụ. Sọl ḅe ori oria owunima ḍikikelemamẹ, ini ineda kịnị ẹndẹ oyiasi fịnjị pembeye laḅịa.

¹⁶ Sọl ḅe na, yayo Jonatan ḅe na, pịkị inia owuapụma na Bẹnjamin eke, Giba ḅie ini inia ikowarịma pike simemẹ; Filistia apụma Mikmash mị ḅie inia ikowarịma pike simemẹ.

¹⁷ Filistia owunima ini ikowarịma pike sime nyọ mị ḅụ ini so mun ọḅụ owu pakamẹ tẹrẹ-a kpoḅụ: gbọrị kpo so Ọfra mị damunmẹ anị Shụal eke mị ḅụ,

¹⁸ jịn kpo so Bẹt Horọn mị damunmẹ, se ísí kpo mị pịkị Zẹboịm Pẹsịkiri mị na piri ele mị na ḍikia-ḍikia eke mị damunmẹ.

¹⁹ Izrẹl mị ḅie tẹmẹnị ofori-ẹ, anịatịḅị Filistia apụma ini tọnpẹlẹsam na ngịsị ini ḅereni ẹkẹ Hibru apụma okola-agiji ma na sụḅa ma na tẹmẹ.

²⁰ (Izrẹlapụma ini so Filistia apụma damamun se inia ozu ḍipiaye ma na, ọgụ ma na, apala ma na pịkị fịye soku agiji ma na farịfarịmẹ;

²¹ apala farị na pịkị ini se namama datekerema-tekerema ikulele ḅịpịḅọkọ ḅụ sime nangwọ chịn mị tẹlịma chụa ḅụ ini gbẹịnḅịaye anị gbọrị kala igbiki-ẹ, anịsịkị namama fọnọ se kiri soku sokuye mị na ọgụ mị na farịḅịaye anị mama igbiki-ẹ.)

²² Anịẹrẹchị ọmụgbin ene mị ḅụ Izrẹl owunima ḅụ okola-agiji anịkanịka sụḅa nyana gbọrịḅọ sọnị ofori-ẹ, Sọl ḅe na yayo Jonatan ḅe na sikima ọkụma.

²³ Filistia apụma ini gbọrị owuni kpo se Mikmash Ḅọrọnyọ mị fịrịmamẹ se ini dachịẹmaḅịa ẹrẹchị.