Biblia Todo Logo
Bìoball air-loidhne

- Sanasan -

1 Samụẹl 12 - Kịrịkẹnị Baịbụl


Samụẹl Ḅe Ọkwẹịn Tomoni Ma Pịrịmẹ

1 Anịsịkị Samụẹl ḅe nwọse Izrẹlapụma ḅẹmẹ, “Ómine ị̀ ḅẹ mịẹ nwọḅẹye mị à mịẹsam. Àrị amanyanaḅọ se ọ́ pịrịsam ḅẹrẹtọn ọ́ pịrịḅịa ḅọ,

2 mịọkụ ómine ori ọkị se ọ́ tịḅịnịḅọ sọ ọ́ pịrị. Ị̀rị̀ ọkụma àrị olomu pịkị iḅulu-chụasam, ị̀ya owuapụ awọma ini ómine na omi-ẹ. Ị̀ya asẹmẹnị sịkị ngịsị à tịḅịnịḅọ sọ ọ́ pịrị nweni ḅo mịọkụ lamẹ.

3 Mị ị̀rị̀-ẹ. À nemikase mịẹirimaye omi-ẹ ḅẹḅẹ ọ́ gbọkụ ḍuko pakụma Nyanaḅọ Ḅe na ori ḅarana sẹlẹọkịsa amanyanaḅọ ḅe na tọrụkuḅu ḅụ. Ị̀rị̀ à nambulo anịkanịka yepụra asụn ọkịsa gbọrịḅọ omi? Àrị inuma anịkanịka pụnụma gbọrịḅọ omi? À ḅara ọḅụfị gbọrịḅọ omi? À nemikase mịna ayema ḅụ mịẹye omi-ẹ ḅẹḅẹ, à gbẹịnḅịa àrị ọkịye mị.”

4 Tomonima nwọse ọ̀ pẹkẹrẹmẹ, “Ẹn-ẹn, ị́ wa inumakẹ, ị́ pịkị wa pụnụmakẹ; mịna ḅie ḅụ ị́rị́ nụḅọye ọkịḅọ ngịsị ofori-ẹ.”

5 Samụẹl ḅe nwọse ini pẹkẹrẹmẹ, “Nyanaḅọ Ḅe na, ori ḅarana sẹlẹọkịsa amanyanaḅọ ḅe na, anị ị̀ya onyechịẹ apụ-ẹ mịmgba ọ́ ḍọkịḅo ọrịsam na ị̀rị̀ anị ngịsị si nemikaḅọ-ẹ.” Ini nwọse ọ̀ pẹkẹrẹmẹ, “Iin, Nyanaḅọ Ḅe anị mịna onyechịẹḅọ ḅe-ẹ.”

6 Samụẹl ḅe pa ḍuko aḅẹ, “Nyanaḅọ Ḅe anị Moziz ḅe na Erọn ḅe na sẹlẹọkị pịkị ọ́mịna olomu-aḍapụma ọkị pakụmaḅoye-ẹ Ijipt mị ḅieḅụ.

7 Mịọkụ ọ́ chịẹ anga ḅụ ọ́ chịẹ, se à ye ḍuko ọ́mịna ọgọnọ gbanaḅịa Nyanaḅọ Ḅe tọrụkuḅu, anị Nyanaḅọ Ḅe nwẹngịsa opu-a fịrị mamgba se ó ḅiekoroma ḅụ, se ómine na ọ́mịna olomu-aḍapụma na ḍụaḅọrọmaḅịa ẹrẹchị.

8 Jekọb ḅe na oria furo mị na so Ijipt mun sịkị, Ijipt apụma ini ini pụnụmamẹ, se ọ́mịna olomu-aḍapụma ini owu Nyanaḅọ Ḅe pịrịmẹ ọ̀ ḅarachụa ini pịrịḅịa ẹrẹchị, se ò Moziz ḅe na Erọn ḅe na nwọse ini fịrịmamẹ, anị Ijipt ḅieḅụ ini ọkịpakụmaḅo mị ama mị ḅie koroma apụma.

9 Ọkụma tomonima ini Nyanaḅọ inia Tamụnọ Ḅe se ḅieḅaramamẹ, se anịẹrẹchị ò Filistia apụma na Moab amanyanaḅọ ḅe na pịkị Sisera, Hezọ opuama mị ḅe ọmụogbo ọmụtịḅịdaḅọ ḅe na wẹrịso ini ọ́mịna olomu-aḍapụma na owusọ pịkị ini nẹngịmamẹ.

10 Anị ini owu Nyanaḅọ Ḅe pịrị se nwọḅẹye-ẹ, ‘Wa simịẹsam, anịatịḅị wa ị́ ḅụ ḅarasinmẹ, Nyanaḅọ, se mun Beal mị na Astate mị na oru ma tẹkẹmẹ. Mine na tarakapụma ḅara ḅie wa ḍụaḅọrọma, wa pịkị ị́ tẹkẹḅịa!’

11 Anịsịkị Nyanaḅọ Ḅe Gidiọnị ḅe na, pịkị Barak ḅe na, pịkị Jẹfta ḅe na, pịkị kulumaḅụ ị̀rị̀ na se ọ́ fịrịmamẹ. Mịnaḅụ ḅọḅọ ómine na tarakapụma ḅara ḅie ọ́ ḍụaḅọrọmamẹ, se mịọkụ ó deinma ḅụ anga waraḅẹ.

12 Ọkụma Amọn Amanyanaḅọ Nahash ḅe ori owuse ọ́ paka-oḅoarị ọkụ ọ́ nwọ ọrị sịkị, ọ́ Nyanaḅọ Ḅe sịkịmẹ ọ́mịna amanyanaḅọ sọ ọ́ pịrịḅụ, se nwọse ị̀ ḅẹmẹ, ‘Ḅẹrẹtọn wa pịrịḅịa amanyanaḅọ wa nwọ ḅimẹ.’

13 “Mịọkụ ḅe ọ́ sẹlẹọkị amanyanaḅọ ḅe-ẹ, ómine ḅarana ò ḅimẹ, se mịọkụ Nyanaḅọ Ḅe ori ò seni ọ́ pịrịsam.

14 Yemamgba ómine na iḅiḅịa ó nemikase Nyanaḅọ ọ́mịna Tamụnọ Ḅe osi, fịrịnwẹngị ọ̀ pịrị, ọ̀ ḅịpị poki, se oria olokoma koko pịkị nemikase ómine na ọ́mịna amanyanaḅọ ḅe na ò ḍukonwẹngịmẹ ḅẹḅẹ.

15 Ọkụma ó nemikase Nyanaḅọ Ḅe ḅịpị pokikẹ oria olokoma kokokẹ nwọ ḅẹḅẹ, ori ómine na tụḅụrụḅịa pịkị ọ́mịna amanyanaḅọ ḅe sọnị.

16 Anịẹrẹchị ọ́ chịẹ anga ḅụ ọ́ chịẹ se Nyanaḅọ Ḅe mịẹḅịa opuye mị ómine ọrịḅịa.

17 Mị ịrụa kpoinye-ẹ, anịka? Ọkụma à tẹkẹḅịa, se Nyanaḅọ Ḅe ò soalagba na ene na fịrịmaḅịa. Mịn mị mịẹsa ḅẹḅẹ anịsịkị anị ó ḅụokoroḅịa na ómine ọ̀ ḅara amanyanaḅọ ḅiye mị ómine opu simịẹmẹ Nyanaḅọ Ḅe ḅụ.”

18 Anị Samụẹl ḅe ọ̀ tẹkẹye-ẹ, se anị gbọrị ene mị ḅieḅụ Nyanaḅọ Ḅe soalagba na irisi ene na fịrịmamẹ. Anịsịkị tomoni mamgba Nyanaḅọ Ḅe na Samụẹl ḅe na ḍikiḅalafamẹ,

19 se ini nwọse Samụẹl ḅe ḅẹmẹ, “Sisi, wa nyanaḅọ, ị́ nyana Tamụnọ Ḅe tẹkẹ wa pịrị, mịẹse wa fị ẹka ḅara. Mịọkụ anị mịna ḅụokorosam na mịna sima sikima ọkụma, wa simịẹmẹ wa amanyanaḅọ ḅiye gose.”

20 “Ọ́ ḅalafama,” Samụẹl ḅe nwọse ini ḅẹmẹ. “Ọ́ nwọ sime siye mịẹsam nwọḅẹ sọnị, Nyanaḅọ Ḅe ḅụ ọ́ ḅarasinma, ọkụma ómine ó kuḅie mgba se fịrịnwẹngị ọ̀ pịrị.

21 Iruo-a oru ma ómine àrị ḍuko nwẹngịma; àrị ineda ḅarachụa ọ́ pịrị ẹkẹ pịkị ineda ọ́ ḍụaẹkẹ, anịatịḅị àrị ma kọkọmayekẹ.

22 Nyanaḅọ Ḅe ò yeḅereni kụrọmamẹ, ọ̀ pịkị ó seni sarakoroma ẹkẹ, anịatịḅị ọ̀ tọnpẹlẹsam na ori ó seni oria tomoni mịẹḅịa.

23 Ị̀rị̀ ọkụma, Nyanaḅọ Ḅe ḍụkụma àrị ọ̀ ḅụ simịẹ anị ḅarị tẹkẹ ọ́ pịrịka ḅụ. Anịnakaraka, ọ́ mịẹ na gbẹịn iḅiye pịkị karakaraye na à nwọse ó ḍieḅịa.

24 Ọ́ Nyanaḅọ Ḅe ḅịpị poki pịkị ọ́mịna kuḅie mgba se ḅereni nyana ḅaraḅụ fịrịnwẹngị ọ̀ pịrị. Ọ̀ mịẹ ọ́ pịrịsa opuaye ma ọ́ nwọse ḅiekoroma.

25 Ọkụma ó nemikase pa simịẹma mun aḅẹ ḅẹḅẹ ómine na ọ́mịna amanyanaḅọ ḅe na ọ́ fịfasinḅịa.”

The Bible Society of Nigeria

Bible Society of Nigeria
Lean sinn:



Sanasan