1 Samụẹl 11 - Kịrịkẹnị Baịbụl

Sọl Ḅe Amọn Apụ Ma Nẹngịmamẹ

¹ Gbọrị akalụ pembeye ḅọrọ sịkị Amanyanaḅọ Nahash Amọn ḅọ ḅe oria ọmụogbo mị se mun Jebẹsh ama mị gbẹịnmachịẹmẹ Giledị eke mị ḅụ. Jebẹsh apụma nwọse Nahash ḅe ḅẹmẹ, “Mine na ḍiri gịẹịn anịsịkị wa ị́ ḅereniḅịa ị́rị́ mịna tịḅịdaḅọ ḅaraḅụ.”

² Nahash ḅe nwọse ini pẹkẹrẹmẹ, “Gbọrị ẹmbẹ ḅụ anị à se ómine na ḍiri gịẹịnḅịaye-ẹ: Àrị ọrụḅọḅọ amaḅaranga tọrụmgbọlụ mị sọkị sinḅịa se ḅụgerere ọkịḅo Izrẹlapụ mamgba tọrụ chụaḅịa.”

³ Jebẹsh tịḅịnịma nwọse ọ̀ ḅẹmẹ, “Sọnọma ḍin se wa pịrị se wa okumun-apụ seni bebe Izrẹl sẹ mị mgba fịrịma kelema. Nemikase ḅarachụa wa pịrịḅịa gbọrịḅọ sọnị ofori-ẹ ḅẹḅẹ, anịsịkị wa ḅara dekichịẹma ị́ pịrịḅịa.”

⁴ Okumun-apụ ma mun Gibia mị lamẹ, anị Sọl ḅe anga ama mị, se ini ḅẹrẹ mị ḍuko sịkị, tomoni mamgba sakị owumẹ ḅalafa ḅụ.

⁵ Sọl ḅe anịsịkị ozu ḅie ò so ama mị ḅie sọ ḅoaḅẹ oria owoi-nambulo ma na, se ò gbelamẹ, “Che siye paka? Cheye ẹrẹchị nweni mamgba owuma owuma-ao?” Jebẹsh mị ḅie sime ḅo okuḅoapụ ma ḍukoye mị ini nwọ ḍuko ọ̀ pịrịmẹ.

⁶ Sọl ḅe mịn mị naa sịkị, Tamụnọ Ḅe tẹmẹ ḅo oria ọgọnọ gbanamẹ se ò ḅụosọ nyanamẹ.

⁷ Ori mama owoi-nambulo ọkị, se àrị pẹlẹ kọsịmamẹ, se okumun-apụ fịrịmamẹ na ini ikiḅa ikiḅa ma deki se bebe Izrẹl sẹ mị kelema se nwọse ini ḅẹ, “Sọl ḅe na Samụẹl ḅe na ḍuko mun ọmụgbinkaḅọ goyegoye mị ini se nụḅọ owoi-nambulo ma mịẹḅịa ọkụ mị-ẹ!” Izrẹlapụma Nyanaḅọ Ḅe mịẹḅịaye mị inia ḅalafamamẹ, se inimgba, kọnḅọ kiri kọnka ḅaraḅụ, paka ḅomẹ.

⁸ Sọl ḅe inimgba koḅirima koromamẹ Bizẹk ḅie. Izrẹl mị ḅie kịnị tẹrẹfa poku-a mesi na kịnị-a oyi ẹndẹ, pịkị Juda ḅie kịnị-a tẹrẹ-a poku na jie ẹndẹ na paka ḅomẹ.

⁹ Ini nwọse Jebẹsh mị ḅie ḅo okuḅoapụ ma ḅẹmẹ, “Ó ḍuko ọ́mịna ama apụma pịrị na ḅa eneogboin laḅịa sịkị ini ḍụaḅọrọma nyanaḅịa.” Jebẹsh apụma oku mị naa sịkị ini kọn ḅieḅẹlẹ mị saḅaḅọrọmẹ

¹⁰ se ini nwọse Nahash ḅe ḅẹmẹ, “Ḅa wa ḅara dekichịẹma ị́ pịrịḅịa, se ị́ ḅụḅẹlẹḅara se wa mịẹ.”

¹¹ Anị ḍin ḅie Sọl ḅe ori oria tomonima se tẹrẹ-a kpo ḍiemẹ, se ḅaso ḅiri ḅụ ini mangị ini na tarakapụma ikowarịma pike sime nyọ mun se owu se Amọn apụma pakamẹ. Eneogboin ḅiri ḅụ ini ini ḅaasinmẹ. Kọn apụma ini galagalamẹ, ọrụḅọḅọ mangị mịnaju damẹ.

¹² Anịsịkị Izrẹlapụma nwọse Samụẹl ḅe ḅẹmẹ, “Sọl ḅe mịna amanyanaḅọ sọ ẹkẹ nwọḅẹ apụma nde ini? Ini pakụma ḅo wa pịrị, wa ini ḅaaḅịa!”

¹³ Ọkụma Sọl ḅe nwọ ḅẹmẹ, “Mịmgba ḅụ wa ḅaaḅịa ḅọ ofori-ẹ, anịatịḅị mịmgba anị Nyanaḅọ Ḅe Izrẹl mị ḍụaḅọrọmaye-ẹ.”

¹⁴ Samụẹl ḅe nwọse ini ḅẹmẹ, “Ó ye mine mgba so Gilgalị mun se pịkị gbọrị sịkị na se Sọl ḅe ḍukopakụma mịna amanyanaḅọ ḅaraḅụ.”

¹⁵ Anị inimgba so Gilgalị mun ye-ẹ, anị osi nyana nyọ mị ḅụ ini ḅelema ḍukopakụmamẹ na Sọl ḅe amanyanaḅọ-ẹ. Ini gboloma agba mịẹmẹ, se Sọl ḅe na bebe Izrẹlapụma na alalị mị fịgbolomamẹ.