1 Samụẹl 1 - Kịrịkẹnị Baịbụl

Ẹlkena Ḅe Na Ò Furo Mị Na Ḅụ Ḅẹrẹ Shịlo Mị Ḅụ

¹ Ẹlkena nwọ chịn gbọrị owuḅọ simemẹ Ifrem sẹ ḅie, Rema ama mị ḅie ori angamẹ, Ifrem chịngị ọgọnọ sẹ mị ḅieḅụ. Jeroham ḅe yayo-ẹ, oria opuḍaḅọ anị Ilaịhu ḅe-ẹ, Tohu furo mị ḅie, anị Zọf sẹ mị anịa ịkpangị-ẹ.

² Ẹlkena ḅe mama eremeni ọ̀ nwọ simemẹ, Hana ma na Pẹnịna ma na. Pẹnịna ma árị awọ yimẹ, ọkụma Hana ma gbọrị tọkụ sọnị á yikẹ.

³ Kụra goyegoye Ẹlkena ḅe, Rema mị ḅieḅụ ò somun Shịlo ḅie tẹkẹ pịkị agbamịẹ Kụrọmamgba Nyanaḅọ Ḅe pịrịpịrịmẹ, anị Ịlaị mama owuapụ awọ, Hofnaị ḅe na Fịnehas ḅe na Nyanaḅọ Ḅe agbamịẹapụ sọ nyọ mị.

⁴ Ẹlkena ḅe oria agba mị mịẹ sịkị goyegoye, nama mị ḅụ ọ̀ gbọrị ḍiekiri seni Pẹnịna ma pịrịpịrịmẹ pịkị arịa awọma ḅụ gbọrịḅọ, gbọrị ḍiekiri gbọrị ḍiekiri nwọ nyana-nyanamẹ.

⁵ Hana ma ori opuma á ḅẹlẹmamẹ nwọḅẹ sọnị gbọrị kiri kẹngẹ anị ò seni á pịrịpịrịye-ẹ, anịatịḅị Nyanaḅọ Ḅe ori awọ seni á pịrịkẹ.

⁶ Arịa afọnọ, Pẹnịna ma árị á kuḅiesima pịkị á seni papaye mịẹmịẹmẹ, anịatịḅị Nyanaḅọ Ḅe ọ̀ tọkụ seni á pịrịkaye ẹrẹchị.

⁷ Kụra goyegoye mị gbọrị ḅara mị-ẹ, ini Nyanaḅọ Ḅe warị ḅie sọmun sịkị goyegoye Pẹnịna ma á Hana ma kuḅie sima so ọkụma, árị owuḅịa á pịkị gbọrịye sọnị fị ḍụkụ-ẹkẹ.

⁸ Dewu Ẹlkena ḅe pa á gbelaḅẹ, “Hana, cheye ẹrẹchị ị́ owu-ao? Cheye ẹrẹchị ị́ yefịka? Cheye ẹrẹchị ị́ sịkịmamgba kururu ḅụ sime-ao? Ị̀rị̀ àrị oyi-a owuapụ awọ nẹngịka ị́ ḅụ?”

Hana Ma Tamụnọ Ḅe Ḅara Tọkụ Ḅimẹ

^9-10 Gbọrị ene, ini Shịlo ḅie Nyanaḅọ Ḅe warị ḅie yefị so sịkị, Hana ma á sịsẹmẹ. Opu kururu á ḅie sọmẹ, se á ḅụakụ ḅara se owukọn Nyanaḅọ Ḅe pịrịmẹ tẹkẹ ḅụ. Anịsịkị mị ḅụ Ịlaị agbamịẹḅọ ḅe ọ̀ kpọnjị sime waraḅẹ ḅọkọ mị anga ḅụ anị ò sime sime nyọ mị.

¹¹ Anịsịkị Hana ma á kụrọma yeḅereni se nwọ ḅẹmẹ: “Yei Kụrọmamgba Nyanaḅọ, ị̀rị̀ ị́ya fịrịnwẹngịḅọ ma ḍiki! Ị̀ya ḅụfụka mị ḍiki se ị̀ seni ḅiekoroma! Ị̀ seni ḅieḅaramama! Ị́ nemikase gbọrị owutọkụ se ị̀ pịrịmẹ ḅẹḅẹ, à ḅerenimẹ na àrị ò se osiḅụ wẹrị ị́ pịrịḅịa oria ḍumo ene mamgba ḅụ, ọ̀ tịḅị inime sọnị ngịsị iri la-ẹkẹ.”

¹² Hana ma á Nyanaḅọ Ḅe tẹkẹ ḅụ sime mun ḅọlọ sịkị lamẹ, se Ịlaị ḅe á ḅịpịpẹkẹrẹma ḍikimẹ.

¹³ Á miniminima tẹkẹ aḅẹ; á ḅịpịpẹkẹrẹ ma jikeaḅẹ, ọkụma árị ọkwẹịn pakụmakẹ. Anịẹrẹchị Ịlaị ḅe ọ̀ nwọ chịnmẹ, na árị iruḅu tọrụḅaamasam,

¹⁴ se ọ̀ nwọse á ḅẹmẹ, “Ḅarị iruḅu tọrụḅaamaye mịẹma! Ḅarị iruḅuaye mịẹma se tọrụ kweinma!”

¹⁵ “Ẹn-ẹn, àrị iruḅu ị̀ tọrụḅaamakẹ, ị̀ nyanaḅọ,” á nwọ pẹkẹrẹmẹ. “Àrị iruḅukẹ! Ị̀ tọrụ kwein waraḅẹ, à tẹkẹ ḅụ omi-ẹ, ị̀ya ḅụfụkama à nwọse Nyanaḅọ Ḅe tọrọkọ sarakoromaḅẹ.

¹⁶ Koromama na ị̀rị̀ yeḅụsọka eremeniḅọ-ẹ. À gose mị ḅara mị se tẹkẹarịye à mịẹḅịa ọkụ ngịsị ofori-ẹ.”

¹⁷ Ịlaị ḅe nwọse á ḅẹmẹ, “Dein na mun se ye Izrẹl Tamụnọ Ḅe ị́ ọ̀ ḅara ḅiarịye mị se ị́ pịrị.”

¹⁸ Á nwọse ọ̀ pẹkẹrẹmẹ, “Sisi sịkịmamgba pa ị̀ se ḅiekoroma.” Anịsịkị á somun yefịmẹ, se á ḅarị kururukẹ.

Hana Ma Samụẹl Ḅe Yi Mẹ

¹⁹ Anịḅe eneḅa dede funfun ḅie, Ẹlkena ḅe na ò furo mị na ini sịsẹmẹ, se ini Nyanaḅọ Ḅe tẹkẹ so sịkị, ini so inia ama Rema mị mun mẹ. Ẹlkena ḅe ọ̀ tarọ Hana ma na gbolomamẹ, se Nyanaḅọ Ḅe ori arịa tẹkẹ mị naamẹ.

²⁰ Anị ḅụ á ḅo simekọnmẹ se gbọrị owutọkụ nwọ yimẹ. Á nwọse ọ̀ chịnmẹ Samụẹl, mịn mị fiemẹ “Nyanaḅọ Ḅe ḅara àrị ò ḅiḅomẹ.”

²¹ Sịkị mị ḅo lamẹ Ẹlkena ḅe na ò furo mị na ini somun Shịlo mị ḅie kụrakụra agba mị na pịkị ò ḅereni kịrị agba mị na mịẹ Nyanaḅọ Ḅe pịrịḅịa sịkị mị ḅo lamẹ.

²² Ọkụma mị sịkị mị ḅụ Hana ma á munkẹ. Á ḍuko dewu ḅe pịrịmẹ na “Tọkụ ḅe ndo kụma kirikiri, àrị ò seni Nyanaḅọ Ḅe warị munḅịa, anịju ḅụ ó simeḅịa oria ḍumo ene mamgba ḅụ.”

²³ Ẹlkena ḅe nwọse á pẹkẹrẹmẹ, “Iḅimẹ, ị́ koromaḅo iḅitẹịnye mị nwọ mịẹ; warị ḅie sime mun ị́ ọ̀ ḅịpị ndosin sịkị la, se ye Nyanaḅọ Ḅe mị ọkwẹịn mị mịẹ anị ḅo kọkọmaye sọ.” Anịẹrẹchị Hana ma á warị ḅie sime tọkụ ḅe ḍikiḍikimẹ.

²⁴ Árị ọ̀ ḅịpị ndosin sịkị, àrị ò seni Shịlo mị mun mẹ, gbọrị tẹrẹ-a kụra lasa owoi nambulo na, gbọrị ḅara sịkịrị panị ḅeinḅịa fịlawa na pịkị ere iru ḅie ḅein gbọrị nama oju apụra akpa na á nwọse chụa mun mẹ. Á Samụẹl ḅe seni Nyanaḅọ Ḅe warị mun mẹ Shịlo ḅie, ò boka la ḅiri mị ḅụ.

²⁵ Ini owoi nambulo ḅe ḅaa so sịkị, ini tọkụ ḅe se mun Ịlaị ḅe pịrịmẹ.

²⁶ Hana ma nwọse ọ̀ ḅẹmẹ, “Ịganịma-ao, ị̀ nyanaḅọ. Ị́ ị̀ se ḅiekoroma? Ị̀rị̀ anị mịanga chịẹ Nyanaḅọ Ḅe tẹkẹ sime se ị́ ọrị eremeniḅọ ma-ẹ.

²⁷ Àrị ọ̀ ḅaraḅụ mị tọkụ mị ḅimẹ, ọ̀ pịkị à ḅiye mị se ị̀ pịrịmẹ.

²⁸ Anịẹrẹchị àrị ò seni osiḅụ-wẹrị Nyanaḅọ Ḅe pịrịaḅẹ. Oria ḍumo ene mamgba ò sime Nyanaḅọ Ḅe pịrịḅịa.” Anịsịkị ini anịju ḅụ Nyanaḅọ Ḅe tẹkẹmẹ.