1 Pita 5 - Kịrịkẹnị Baịbụl

Tamụnọ Anana Ogbo Mị

¹ Ị̀rị̀ sọnị sẹnịḅọ ḅara ḅụ tetema se ọ́mịna ḅie sime chọchị mị ḅie sẹnịapụma pịrịaḅẹ. Ị̀rị̀ Kraịst Ḅe ọrị tọrụsiọrị ma ḅe onyechịẹḅọ-ẹ, à pịkị ḍiekiri nyanaḅịa boma mị mịẹḅelemaḅịa sịkị. À tetema se ọ́ pịrịaḅẹ na

² ómine anana ḍikiḍikiapụ sọ se Tamụnọ Ḅe se ọ́ ḅarachụa anana ogbo mị pịrị, se ọ́mịna kuḅie laḅara se ini ḍikiḍiki Tamụnọ Ḅe ḅi na ọ́ mịẹ nwọ ḅẹ ḅara ḅụ, kuḅie laka ḅaraḅụkẹ. Papa igbiki fị pụkọ ọ́ nwọse ọ́mịna fịrịnwẹngị ma, ọkụma kọkọma fịrịnwẹngị gbẹịn ḅara ḅụ.

³ Ḅẹrẹtọn ini se ọ́ ḅarachụa apụma pịrịḅịa ḅara ọ́ nwọse yemịẹ ma, ọkụma ḍikiḍaḅịa apụ ọ́ nwọ sọ anana ogbo mị pịrị.

⁴ Se Tịḅịnị Ananaḍikiḍikiḅọ ḅe ḅoḅịa sịkị, anịa ḅịa mị ngịsị ḍinma ẹka boma nyana amanyanaḅọchu ọ́ ḅara laḅịa.

⁵ Anị gbọrị ḅara ḅụ, ómine asẹmẹnị ma sọnị ọ́ ḅụiderima ọ́ nẹngịapụ ma pịrị. Ómine mgba ḅụiderima mị se ḅụchụaye mịẹ chụa se fịrịnwẹngị jịnḅọ jịnḅọ pịrị; anịatịḅị fịafịa ḍiri mị nwọ ḅẹmẹ na, “Tamụnọ Ḅe ọḅụdekichịẹma ḅọ ḅe na tụḅụrụ tụḅụrụmẹ, se ḍikiḅụgerere nyana ḅụiderima ḅọ ḅe pịrịpịrịmẹ.”

⁶ Anịẹrẹchị, ọ́ ḅụiderima Tamụnọ Ḅe opu ḅara mị chuku ḅie, mịẹse ò ḅi sịkị mị ḅụ ori ó dekichịẹmaḅịa ọkụ.

⁷ Ọ́mịna ḅụḅalaḅalama ó se sarakoroma ọ̀ pịrị anịatịḅị ori mị ó ḍikiḍikiarịye-ẹ.

⁸ Sịkịmamgba, ḅụkarakarama, ó koru ḅụ sime! Ómine na taraka ḅọ ḅe, Oru ḅe, chịrịḅa oloku kelekele ọkụ, ọ̀ nwọse oloku kelekelema ḅọrọaḅẹ, se ọ̀ kanị pẹịḅịa ḅọ ḍọkịaḅẹ.

⁹ Ọ́ kụrọma chịẹ ọ́mịna ḅereni ḅụ, se ininachịn ọ̀ pịrị, ngịsị ẹmbẹ finji ọ̀ pịrị ma, anịatịḅị ó nemimẹ na, ma gbọrị tọrụsiọrị ma anị ó juo ḅereniapụ mamgba ọrịarịye ma-ẹ, bebe tomonikiri mị ḅie mgba ḅụ.

¹⁰ Ọkụma ó kele tọrụsiọrị so sịkị; ḍikiḅụgerere mamgba ḅe Tamụnọ Ḅe, ọ́ chịn na ó ḅo Kraịst Ḅe ḅụ sọ oria simegbamaso boma mị ḍiaọkị nwọ ḅẹ ḅọ ḅe, gbarị ẹka chukusẹkẹ ḍụparị se ọ́ pịrịḅịa.

¹¹ Ye kụrọ mị sime ọ̀ pịrị gbamaso! Amẹn.

Kuluma Kereniḅịpị

¹² Saịlas ḅe ḅarachụa ị̀ pịrị se à kẹsịnịma mị ḍiri mị gịẹịn se ọ́ fịrịmamẹ, anị Kraịst Ḅe ḅie ḅụ à kuḅie se ḅụgbana gbẹịn mịnaḅọ ḅara seni ọkị ḅọ ḅe, à ḅimẹ àrị ó kuḅie kụrọma, se pịkị ḍukopakụma ọ́ pịrị na mịn mị anị Tamụnọ Ḅe oria kọkọma ḍikiḅụgerere mị-ẹ. Ọ́ kụrọma anịa ḅie chịẹ.

¹³ Babilọn mị ḅie sime ọ́mịna mịnapụ chọchị mị, anị sọnị Tamụnọ Ḅe sẹlẹọkị sa ye mị, na ị̀ya tọkụ Mak ḅe na ini ó kerenimẹ.

¹⁴ Kraịst Ḅe ḍukonwẹngị apụ ḅẹlẹma ọ́ nwọse ḅịpị-nọnjụ ḅụ jịnḅọ jịnḅọ kereni. Ye deinma sime ómine Kraịst Ḅe ḅụ sime apụ mamgba pịrị.