1 Pita 4 - Kịrịkẹnị Baịbụl

Ḍinmasa Ḍumo Ma

¹ Kraịst Ḅe nwọ ojumịnị ḅụ tọrụsiọrịsa sịkị, ómine sọnị ọ́ nyana gbọrị koroma mị, ọ́ nwọse ḅụ keke anịatịḅị ojumịnị ḅụ tọrụsiọrịsa ḅọ goyegoye iniḅọ ḅarị si na mịẹgboloma nyanakẹ.

² Anịẹrẹchị, mịọkụ ọkị tọrọkọ mun, ye Tamụnọ Ḅe ḅẹrẹtọn tomonikiri ḅie ọ́mịna ḍumo ma ḅie kọn ḍin ma pịrị se ọ́ ḅarị ojumịnị mị ḅiarịyema ḍukonwẹngị ma.

³ Ḅọrọsa sịkị ọ́ ḅakama sịkị fama oru ḅẹrẹ nemi apụma mịẹmẹaye ma nwọ mịẹsam. Ọ́mịna ḍumo mamgba ó se fịafịakaye na, sẹfị na, iruḅutọrụḅaama na, ḅụtima na, iruḅu ogbo tọn na pịkị galagalasa oru tẹkẹ mịẹmịẹye ḅụ chumẹ.

⁴ Mịọkụ ini oruḅẹrẹnemi apụma anị inia ḅụgbiripumasam ọ́ nwọ ḅarị ini na gboloma mun anị ḅụabalaka pịkị oforifori ḍumo mị kọnka sịkị, anịẹrẹchị ini ó ḍukosimaḅịa.

⁵ Ọkụma ini ḅarana inia ḅụ se opoli tọn Tamụnọ Ḅe pịrịḅịa anị ḅụkarakarama ḅẹrẹkọn ḍumoapụ na fịapụ na pịrịḅịaḅọ ḅe.

⁶ Anịẹrẹchị, mịn ini Iḅi Ḅẹrẹ mị nwọ ḍuko se fịapụma sọnị pịrịye-ẹ, anị inia ojumịnị ḅe ḍumo ḅụ ini ḅẹrẹkọn pịrị ḅọrọsa apụma, ini wẹrị ḅẹrẹkọn se ḅọḅọ pịrịsa ḅara ḅụ, ini Tamụnọ ọkwẹịnkọn ini pịrịmẹ, mịẹse ini tẹmẹ anga ḅe ḍumo ḅụ, Tamụnọ Ḅe ḍumo ọkụ mị se ḍumoḅịa ḅara.

Iḅi Ḅara Se Tamụnọ Ḍiepịrịaye Ma Se Fịrịnwẹngịapụ Ma

⁷ Ye mamgba ḅe kuluma mị kpekisam. Ómine ọ́ ḅụ ọlọ se ḅụkarakarama, mịẹse ómine ineda tẹkẹḅịa ọkụ.

⁸ Ye mamgba nẹngịye, karakara ḅara ọ́ nwọse jịnḅọ jịnḅọ ḅẹlẹma anịatịḅị ḅẹlẹma mị anị tọntọn-a si nwọ gbẹịnmẹ.

⁹ Yetụndụka ḅara ḅụ ọ́mịna warị ḅie ma ọ́ nwọ finji jịnḅọ jịnḅọ pịrị.

¹⁰ Ye ḅọḅọ, iḅi ḅara se Tamụnọ Ḅe oria kịrịkịrị-a ḍiepịrịayema se fịrịnwẹngịarị ḅọ ḅara ḅụ, ọ̀ Tamụnọ Ḅe ḅara nyanaḅo sa kịrị ḍiepịrịye mị se jịn apụ ḅụ iḅi gose fịrịnwẹngị.

¹¹ Iḅi Ḅẹrẹ mị ḍukoḅọ goyegoye Tamụnọ Ḅe oku ma nwọ ḍuko; fịrịnwẹngịḅọ goyegoye iniḅọ Tamụnọ Ḅe se iniḅọ pịrị ịnyọ mị se fịrịnwẹngị mịẹse, ḅẹyeḅẹye ḅụ tokoni ḅọrọ mun Tamụnọ Ḅe laḅịa ọkụ Jizọs Kraịst Ḅe ḅụ, ori ḅene ḅene la, boma na kụrọ na sime pịrịḅọ ḅe. Amẹn.

Kraịst Ḅe Ḅereniḅọ Ḅara Ḅụ Tọrụsiọrị

¹² Ị̀ ḅụ yela ikiapụ, anị ọ́ ḅụgbiripumaye sọ ma ḅụakụ ḍaḍiki tọrụsiọrị ọ́ nwọ ọrịarị ye mị. Pakapakakaye ḅara ọ́ nwọse anị ọkị ma.

¹³ Ọkụma ó ḅieḅẹlẹ na Kraịst Ḅe tọrụsiọrị ọ́ nwọ ḍiaọkịaḅẹ, mịẹse ḅieḅẹlẹ ọ́mịna ḅie ḅeinḅịa ọkụ oria boma mị ḅelema pakaḅoḅịa sịkị ḅụ.

¹⁴ Ḅieḅẹlẹ sime ọ́ pịrịmẹ, nemikase Kraịst Ḅe ọḅụḍukoapụ ọ́ nwọ sọ ye gose ini ó ḍukosima ọkụma. Mịn mị fieaḅẹ na boma nyana Tẹmẹ Ḅe anị Tamụnọ Tẹmẹ Ḅe, ọ́mịna ọgọnọ ọ́ gbana waraḅẹ.

¹⁵ Nemikase ọ́ mịna ḅie gbọrịḅọ tọrụsiọrịmẹ nwọ ḅẹḅẹ, anị ọkọpaka ma na ori anị nweni ḅaa ḅọ-ẹ, anịkanịka furoḅọ-ẹ, anịkanịka opu siye mịẹ ḅọ-ẹ, anịkanịka ori ḅụ se jịn apụ-aḅẹrẹ ḅie chuchuḅọ-ẹ.

¹⁶ Ọkụma, ị́rị́ Kraịst Ḅe ḅereni ḅọ-ẹ nwọ ḅẹye gose ị́ tọrụsiọrịmẹ nwọ ḅẹḅẹ, anị ị́ ḅụgererema ma, ọkụma mịẹḅaka nwọse Tamụnọ Ḅe ḅẹ ị́ Kraịst Ḅe ẹrẹ mị fịmẹ nwọ ḅẹye ẹrẹchị.

¹⁷ Ḅẹrẹkọn mị sakịḅịa sịkị lasam, se Tamụnọ Ḅe oria tomonima anị ini tatarị ḅẹrẹkọn pịrịḅịaye-ẹ. Anị nemikase mịnaḅie sakịḅịa nwọ ḅẹ ọkụma, nde anị se ini na kulumaḅịa ọkụ, nwọ Tamụnọ Ḅe ḅụ ḅo Iḅi Ḅẹrẹ mị ḅerenika apụma?

¹⁸ Anị fịafịa ḍiri mị ḍuko ḅara ḅụ, “Anị ḅụfụkamamẹ iḅiapụ ma ḍụaḅọrọma nyana; nde, anịọkụma, anị paka Tamụnọ nemika simịẹapụma pịrịḅịa ọkụ?”

¹⁹ Anịẹrẹchị, Tamụnọ Ḅe ọkọ se anị tọn ini pịrịmẹ ḅẹye gose tọrụsiọrịarị apụma, ye ini inia iḅi-a fịrịma ḅụ okorona okorona inia ḅụ ma sịkị, seni ini Tẹmẹḅọ Ḅe pịrị, anị sịkịmamgba ò ḅereniye mịẹmịẹ ḅọ ḅe.