1 Pita 2 - Kịrịkẹnị Baịbụl

Ḍumo Ḍụparị mị na pịkị Fịafịa Sẹ mị na

¹ Anị gose siaye mamgba ḅụ ómine ọ́ ḅụ sin, ọ́ ḅarị iruo anịkanịka epekelepepe ḍumo anịkanịka jịnḅọ ḍiki pụkọsoli anịkanịka jịnḅọ wọlọ ọkwẹịn kọn ma.

² Ómine ịwọma yi awọ simeọkụ sime, sịkịmamgba tẹmẹ anga ndo mengi ọ́mịna pụkọ tarị, mịẹse anị mị ḅụ ọ́ ḅọrọ sẹnị pịkị ḍụaḅọrọma nyanaḅịa ọkụ.

³ Fịafịaḍiri mị ḍukoḅaraḅụ, “Nyanaḅọ Ḅe iḅi mịẹmịẹye mị ọ́ ḅarana ọrịsam.”

⁴ Nyanaḅọ Ḅe damaḅo, ḍumo ḍụparị Ḅe, anị tomonima sịkị yelakẹ nwọ ḅẹ ḅọ ḅe, ọkụma Tamụnọ Ḅe ọ̀ sẹlẹọkịmẹ yelaḅọ ḅara ḅụ.

⁵ Ḍumo ḍụparị ḅara ọ́ nwọse ḅo, se ye ini ó seni tẹmẹ anga ḅe Oputẹkẹwarị mị nama, anị osiḅụ sime agbamịẹapụ ḅara ḅụ, ó sime Jizọs Kraịst Ḅe ḅụ ḅọrọ tẹmẹ anga ḅe ye na pịkị ọkị gbẹịn agba na mịẹḅịa nyọ mị.

⁶ Anịatịḅị fịafịa ḍiri mị nwọ ḅẹmẹ, “À yela ḍụparị nwọ sẹlẹọkịmẹ, àrị anị seni Zaịyọn ḅie ịkọlịda ḍụparị ḅara ḅụ koromaḅẹ; ò ḅereniḅọ goyegoye iniḅọ ḅietọnye iniḅọ gbarị ẹkẹ.”

⁷ Mịn ḍụparị mị opuma yelaye-ẹ, ómine ḅereniapụma ḅụ ọkụma ini ḅerenika apụma: “Warịnama apụma sịkị na yeḅụ oforiye-ẹ nwọ ḅẹ ḍụparị mị vinpịkị opu yelatẹịn ḍụparị sọsam.”

⁸ Se fịafịa ḍiri mị jịn anga ḅụ nwọ ḅẹmẹ, “Mịn mị anị mịẹse tomoni ḅụọ tọmbụlọḅịa ḍụparị mị-ẹ, ini mịẹse ini ḅịkịḅịa ịkụ mị-ẹ.” Inia ḅụọ tọmbụlọmẹ, anịatịḅị ini ọkwẹịn mị ḅerenikẹ; anị Tamụnọ Ḅe ḅi ọkụ-ẹ na anị ọkọ paka ini pịrị.

⁹ Ọkụma ómine anị sẹlẹọkịsa apụ ma-ẹ, Amanyanaḅọ Ḅe agbamịẹapụma, osiḅụ sime sẹ mị, Tamụnọ Ḅe oria tomoni-ẹ, ọ̀ sẹlẹọkị seni oria ḅụgbiripuma mịẹmịẹaye ma ḍukopakụmaḅịa apụma, kanakana ḅie ọ́ chịn pakụmaḅo se oria ḅụgbiripuma enekuḅu ḅie chu ḅọ ḅe.

¹⁰ Gbọrị sịkị ḅụ ómine Tamụnọ-a tomonikẹ, ọkụma mịọkụ ómine oria tomoni-ẹ; gbọrị sịkị, Tamụnọ Ḅe ò ḍikitịḅịfoin nyana ọ́ pịrịkẹ, ọkụma mịọkụ ómine oria ḍikitịḅịfoin mị ọkịsam.

Tamụnọ Omoniapụ

¹¹ Ị̀ya ikiapụ, à kụrọma ḍuko ọ́ pịrịaḅẹ, mị tomonikiri mị ḅie igoniapụ na pịkị tịḅị se nweni pịrị apụma na ḅara ḅụ! Ómine ọ́ ḅụ se ojumịnị mị pụkọtarịarịye ma pịrị ma, sịkịmamgba tẹmẹ mị na ọmụgbin-arịye ma.

¹² Mịẹse oru ḅẹrẹ nemiapụ ogboku, ọ́mịna yemịẹḅara sịkịmamgba iḅiḅịa ọkụ, mịẹse ini si ye mịẹ apụ ḅara seni ó ḍukosimaḅịa sịkị ini ọ́mịna iḅi mịẹmịẹaye ma ọrị, se Tamụnọ Ḅe tokoniḅịa ọkụ ò ḅoḅịa Ene mị ḅie.

¹³ Nyanaḅọ Ḅe gose, ómine ọ́ ḅụ ma iderima kụrọ nyanaḅọ goyegoye nwọ pịrị; anị ḅọrọ Sẹdaḅọ ḅe-o, opu ḅẹrẹtọn tịḅịnịḅọ ḅara ḅụ,

¹⁴ pịkị gọvịnapụ ma sọnị, ò seni fịrịma, ḅụfụka se siye mịẹ apụ pịrị pịkị iḅiaye mịẹ apụ tokoni-ẹ nwọ ḅẹ apụma.

¹⁵ Anịatịḅị Tamụnọ Ḅe ḅiarịye anị, mịẹse ó yenemika apụma, inia oḅori ọkwẹịn ma ḅụ, inia ḅịpị gbẹịn, ọ́mịna iḅi mịẹ mị ḅụ.

¹⁶ Ómine ngẹrị mịnaḅụ nyana apụ ḅara nwọse ḍumokọn, ọ́mịna ngẹrị ḅụ nyana mị, ọ́ nwọse gbẹịnma si ye mịẹ ma, ọkụma ọ́ Tamụnọ Ḅe omoniapụ ḅara nwọse ḍumokọn.

¹⁷ Tomoni goyegoye nwọ osi, ómine ó juo ḅereniapụma ḅẹlẹma, Tamụnọ Ḅe ḍikiḅalafa, pịkị osi se Sẹdaḅọ ḅe pịrị.

Kraịst Ḅe Tọrụsiọrị Mị Ḅe Elekima

¹⁸ Ómine fịrịnwẹngịapụma, ọ́ ḅụiderima pịkịna ḅakama osi se ọ́mịna tịḅịnịma pịrịḅịa. Mịn mị ó seni iḅiyemịẹḅara nyana apụ na, pịkị jịn apụ se yechịn apụ na kẹngẹ nwọ pịrị ẹkẹ, ọkụma si ḍumo nyana apụma sọnị-ẹ.

¹⁹ Mịn mị gose Tamụnọ Ḅe ori ọ́ ḅẹlẹmaḅịa, nemikase ómine inema nyana, ọ́ la gbẹịnka tọrụsiọrị mị nwọ pịrị ọkụma, anị ómine ó ḅereniye mị nwọ nemiye ẹrẹchị.

²⁰ Anịa ḅie che sọye omi, nemikase ómine inema nyana se ọ́ mịẹirima ye ḅe fomuḅara nwọ nyana ọkụma? Se Tamụnọ Ḅe pịkị ọ́ ḅẹlẹmaḅịa, ó nemikase karakaraye mịẹ ḅụ ḅo ọ́ pịrị tọrụsiọrị mị nwọ inema ọkụma.

²¹ Mịn mị gose anị Tamụnọ Ḅe ọ́ chịnye-ẹ, anịatịḅị Kraịst Ḅe na mịnaḅụ na, ọ̀ tọrụsiọrị pịkịna elekima nwọse koroma ọ́ pịrịmẹ, mịẹse ómine ọ̀ ḅụọ ḍikiḍaḅịa ḅara.

²² Ọ̀ gbọrị si sọ mịẹkẹ, pịkị ọ̀ ḅịpịapẹkẹrẹ ma ḅụ iruo jene nweni ma nwọ naakẹ.

²³ Ini ọ̀ wọlọ sịkị, ọ̀ wọlọ pẹkẹrẹḅịpị se ini pịrịkẹ; ọ̀ tọrụsiọrị sịkị ori ini ẹrẹmakẹ, ọkụma Tamụnọ Ḅe, anị karakara ḅẹrẹkọnḅọ Ḅe ḅụ, mị ò kuḅie se gbanaye-ẹ.

²⁴ Kraịst Ḅe na mịnaḅụ na, oria oju mị ọ̀ nwọse mịna sima pụra mgbẹsẹchịn mị tanjịmẹ, mịẹse wa fị si pịrị se ḍumo karakaraye mị pịrịḅịa ḅara. Ọ̀ laye ma ḅụ, ọ́ ḅọrọ gwọsam.

²⁵ Irisa anana simeọkụ anị ó simeọkụ-ẹ, ọkụma mịọkụ ini ọ́ da se Anana-koruḅọ ḅe pịrịsam, ori anị pịkị ọ́mịna tẹmẹ ma Kokoḅọ ḅe-ẹ.