1 Kọrịntapụ 5 - Kịrịkẹnị Baịbụl

Chọchị Mị Ḅie Sime Sẹfị Ḍumo Mị Ḅe Ḅẹrẹ

¹ Mịọkụ, ini kọkọma ọkọ ḍukomẹ na opu sẹfị ọ́mịna ogboku ḅaka so ọkụma, oruḅẹrẹ nemiapụ ma na mịnaḅụ na nwọ sime ḅẹrẹḅarasi nyana ẹkẹ. Ini ḍuko ị̀ pịrịmẹ na gbọrịḅọ ọ̀ ḅụ ḍẹkịsọ nyengiḅọ na sẹfịaḅẹ!

² Anịọkụma, nde ómine ineda ḅụdekichịẹmaḅịa ọkụ? Anịnakaraka ọ́ ḅakama kururu na iḅimẹ, se mịn mị mịẹḅọ ḅe ọ́mịna koḅiria ḅie ọ́ nwọ desin.

³ Ojumịnị ḅụ àrị ómine na sasamẹ nwọ ḅẹ sọnị, à pa tẹmẹ ḅụ ómine na omi-ẹ; à pịkị pa ómine na omi-ẹ nwọ ḅẹ ḅara ḅụ, à Nyanaḅọ Jizọs Kraịst Ḅe ẹrẹ ḅụ ḅẹrẹsi pẹlẹ mị ḅalafamaye mị mịẹḅọ ḅe pịrịsam.

⁴ Ó ḅo koḅirima sịkị, à ḅo pịkị ị̀ tẹmẹ ḅụ ọ́mịna na ịrịa sịkị, mine na sime Nyanaḅọ Jizọs Kraịst Ḅe kụrọ ḅụ,

⁵ ó ḅe ḅọ ḅe saḅama Oru ḅe pịrị se ori oria ojumịnị mị ḅaa, mịẹse ọ̀ tẹmẹ mị Nyanaḅọ Ḅe Ene ḅụ ḍụaḅọrọma nyanaḅịa ọkụ.

⁶ Opuayemịẹ mị ọ́ gbẹịnkẹ! Mịn ọkwẹịn mị ó nemimẹ, “Kala yesumaye mị mịẹse fịturu mị mgba sumẹ.”

⁷ Mịn olomu yesumaye si mị ọ́ nwọ sin mịẹse ómine okorona okorona yoriyoriḅịa ḅara. Anịsịkị, yesumaye ḅie ofori ịwọ fịturu mịẹ fịlawa kịkẹye ọ́ nwọ sọḅịa, à se kọkọma ó nemi ḅara ḅụ. Anịatịḅị, mịna Saḅaḅọrọ Alalị mị lasam, mịọkụ Kraịst Ḅe mịna Saḅaḅọrọ ayamburama anana ḅe ini nwọse agbamịẹsam.

⁸ Ó ye wa mịna Saḅaḅọrọ Alalị mị fị, olomu yesumaye ḅie sime si na sitịḅị na ḅie sime fịturu wa nwọse anị fị ẹkẹ, ọkụma yesumaye ḅie ofori fịturu-ẹ, yoriyori kọkọmaye fịturu mị-ẹ.

⁹ À gịẹịn ọ́ pịrị ḍiri ḅie à ḍuko ọ́ pịrịmẹ ọ́ sẹfị apụ na nwẹngị gboloma ma.

¹⁰ Mịọkụ oru ḅẹrẹnemiapụ à nwọ ḅẹkẹ, ini anị sẹfị anịkanịka opufịye ḍọkị anịkanịka furu, anịkanịka oru tẹkẹ apụma. Ómine ini ḍiki ḅụtọnḅịa ọkụ anị ómine okorona okorona mị tomonikiri ḅie pakaḅoḅịa.

¹¹ À ḍukoye mịn mị anị-ẹ, ngịsị ómine ọkọsime ḅọ na yemịẹgboloma ẹkẹ, anị mịnaḅọ nwọse mịna ḅụ chịnḅọ, ọkụma iniḅọ sẹfịaḅẹ anịkanịka opu fịye ḍọkịḅọ-ẹ, anịkanịka oru tẹkẹ ḅọ-ẹ, anịkanịka nweni ḍukosima ḅọ-ẹ, anịkanịka iruḅu tọrụḅaama ḅọ-ẹ anịkanịka furu ḅọ-ẹ. Ọkọsime ḅọ ngịsị iniḅọ na gbọrị anga kpọnjị sime yefị ma.

^12-13 Anịḅe kuluma, ị̀ya kirikẹ, ḅẹrẹpẹlẹ jịn apụ pịrị. Tamụnọ Ḅe mị ḅẹrẹpẹlẹ ini pịrịḅịaye-ẹ. Ọkụma ómine na gbọrị ḅereni nyana apụma ọ́ ḅẹrẹkọn ini pịrị ẹka? Fịafịa ḍiri mị ḍuko ḅara, “Ọ́mịna ḅie ó si ḅọ ḅe desin.”