1 Kọrịntapụ 4 - Kịrịkẹnị Baịbụl

Kraịst Ḅe Okufịrịnwẹngịapụ Ma Gbolomaye

¹ Kraịst Ḅe fịrịnwẹngịapụma anị Tamụnọ Ḅe ḅie ḅọị kọkọmaye ma ini nwọse ḅarachụapụ-ẹ nwọ ḅẹ koroma ọ́ nwọ kọn wa pịrị.

² Ọkọ sime fịrịnwẹngịḅọ ḅara ini ḅiarị gbọrịye, anị ọ̀ Nyanaḅọ Ḅe kuḅie se ọ̀ ḅụ gbana gbẹịn ḅara nwọ simeḅịa.

³ Mịọkụ, ómine anịkanịka tomoni yemịẹḅara ḅụ ḅẹrẹkọn ị̀ pịrịḅịa ḅẹye mị, ị̀ ḅụ yelakẹ. À pịkị ḅẹrẹpẹlẹ ị̀ ḅụ pịrịkẹ.

⁴ Ị̀ kuḅie fịafịamẹ, ọkụma anị mị ḍiekẹ na à kọkọma ḅẹrẹḅarasi nyanakẹ. Nyanaḅọ Ḅe ori anị ḅẹrẹpẹlẹ se ị̀ pịrịḅịaye-ẹ.

⁵ Anịgose, ọ́ ḅẹrẹpẹlẹ gbọrịḅọ sọ pịrị ma, karakara sịkị mị ma lakasimeogbo. Kuluma ḅẹrẹkọn mị mịẹka mịẹka ḅara ḅụ koru wẹrị ị̀ Nyanaḅọ Ḅe ḅoḅịa sịkị laḅịa. Kanakana ḅie sime ḅọịaye ma ọ̀ nwọ ọkịḅo enekuḅu ḅie chuḅịa, se tomoni kuḅiemgbọlụma ḅọịma tọnye ma ọ̀ nwọ mịẹse àrị ḅeleḅịa. Anịsịkị, ḅọḅọ iniḅọ gbẹịn tokoniḅịpị Tamụnọ Ḅe ḅara nwọ nyanaḅịa.

⁶ Ómine gose, mịnapụ, maye mamgba à nwọse Apọlọs ḅe na ị̀rị̀ na ḅụ gbinmamẹ, mine mama apụma se elekima mịẹmẹ, mịẹse ọkwẹịn mị fieye mị ọ́ nwọ ḍawọ nemiḅịa ẹrẹchị, “Kọkọma olokoma ọ́ nwọ ọlọ.” Gbọrịḅọ sọ ọ́mịna ḅụ gbọrịḅọ se opuaye mịẹse ísíḅọ ḅe ḍikisima ma.

⁷ Tụḅọ ó se opu chama jịn apụ nẹngị? Tamụnọ Ḅe ọ́ nyana yegoyegoye se ọ́ pịrịka? Anịọkụma, cheye gose ómine ọ́ ḅụ dekichịẹma-ao, ọ́ mịẹarị ḅara ọ́ nyanaye ma ḍiepịrịayeka ọkụ simeka?

⁸ Ọ́ ḅụpalịmaye mamgba ọ́ nyana sa? Ómine alakọn sa? Ómine amanyanapụ sọ sa, mine amanyanapụkẹ ḅẹ sọ? Iin, à ḅimẹ ọ́ kọkọma amanyanapụ sọ, mịẹse wa ómine na gboloma amanyanaḅịaye gose.

⁹ Anịatịḅị, anị ị̀ ḅụ kịkẹ ḅara Tamụnọ Ḅe mine fịrịnwẹngịapụma, kuluma nyọ mị se wa pịrịsam, ini fị ḅẹrẹ ḅarasi pẹlẹ pịrị sa apụ ḅara ḅụ, amaogbo ḍikiye sọ enjẹlapụ na tomoni na pịkị tomonikiri mị ḅie apụ mamgba pịrịḅịa ẹrẹchị.

¹⁰ Kraịst Ḅe gose wa oḅori sọmẹ, ọkụma ómine Kraịst Ḅe ḅie yenemi apụ-ẹ! Mịne wa ịnyọ nyanakẹ; ọkụma ómine ọ́ kụrọmẹ! Ini wa ḍikisimamẹ, ọkụma ómine ini osi se ọ́ pịrịmẹ.

¹¹ Mịọkụ sọnị ḅuru na mengi na wa tarịaḅẹ; kanịkanị ḅiriaye mị wa chụaye-ẹ; ini wa fomumẹ; wa irima ḅọrọmẹ;

¹² wa kụrọma fịrịnwẹngịmẹ, ḅarachụa mịna ḅụ pịrịḅịaye gose. Ini wa wori sịkị, wa ini ḅẹlẹmamẹ; ini ḅụfụka se wa pịrị sịkị, wa inemamẹ;

¹³ ini wa wọlọ sịkị, dein ọkwẹịn ḅụ wa ini pẹkẹrẹmẹ. Wa iḅitẹịn mị tomonikiri ḅe ọfịn-aye ma nẹngịkẹ; ọkịḅo mịọkụ la sọ, mine tomonikiri mị ḅe ọkpọtọ-ẹ!

¹⁴ Ọ́mịna ḅụgererema gose, à mayema gịẹịn ọ́ fịrịmakẹ, ọkụma ómine ị̀ ḅụ yela awọ ḅara ḅụ ye se ó telimaḅịa ẹrẹchị-ẹ.

¹⁵ Anịatịḅị ó se Kraịst Ḅe nemi ḍumo ḅụ, nweni-a poku na nweni-a sọnọ ẹndẹ nemikase ḅọrọ ó ḍikiḍikiaḅẹ nwọ ḅẹ sọ, gbọrị Ḍaḅọ kẹngẹ anị ọ́ nyanaye-ẹ. Anịatịḅị ọ́ Kraịst Ḅe na gboloma ḍumo ḅụ, à ḅo ọ́mịna ḍa nwọ sọsam, Iḅi Ḅẹrẹ mị se ḅo ọ́ pịrị mị gbolomaye ḅụ.

¹⁶ Anịọkụma àrị ọ́ tẹkẹmẹ, ómine ị̀ ḍanwẹngị.

¹⁷ Mịn mị gose à Timoti ḅe se ọ́ fịrịmaḅẹ, ori anị Nyanaḅọ Ḅe nemi ḍumo ḅụ, ị̀ ḅụ yela pịkị kuḅie se ḅụgbana gbẹịn tọkụ-ẹ. Ori à Jizọs Kraịst Ḅe na gboloma mị ḅe ịwọ ḍumo mị ḅụ à ḍiki nwẹngịarị olokoma se ó ḅiekoromaḅịa, anị nyọ mamgba pịkị chọchị ma ḅie mgba à ḍiearịye ma.

¹⁸ Ọ́mịna ḅụ tọn-apụ ḅụdekichịẹmaḅẹ, anịatịḅị ọ́ chịnmẹ na à ḅarị ḅo toluma ó ḍiki-ẹkẹ.

¹⁹ Nyanaḅọ Ḅe ḅọrọ ḅereni ọkụma, anị sime la-ọkụ la-ọkụ, ḅọlọka sịkị à ḅo ó ḍikiḅịa, anịsịkị mị à pịkị ḅarana mịna ḅụdekichịẹma apụma nyana kụrọ mị ḍọkịḅoḅịaye-ẹ, ini ḍukoarịye mịkẹ.

²⁰ Anịatịḅị Tamụnọ Amanyanakiri mị, ọkwẹịn ḅụ anị ofori-ẹ, ọkụma Tamụnọ Ḅe kụrọ ḅụ-ẹ.

²¹ Cheye ọ́ nwọ ḅi? À fomuye se ọ́ damaḅo ḅe, anịkanịka ḅẹlẹma kuḅie na deinma na?