1 Kọrịntapụ 12 - Kịrịkẹnị Baịbụl

Ma Mị Fịafịa Tẹmẹ Ḅe Ḍiepịrịaye Ma-ẹ

¹ Mịọkụ Fịafịa Tẹmẹ Ḅe ḅụ ḅo ḍiepịrịayema gose ọ́ gịẹịn ye mị. À ḅimẹ ómine àrị ḅe kọkọmaye mị nwọ nemi, ị̀ya mịnapụ.

² Ó nemimẹ na ómine oru ḅe ḅie sime sịkị, tọn-a achọ ḅụ ini ọ́ dairima mun ḍumo nyanaka ini karayema tẹkẹmẹ.

³ À ḅimẹ ó nemi na Tamụnọ Tẹmẹ Ḅe ateli se ḍiearịḅọ goyegoye ineda “Jizọs Ḅe wori ẹkẹ,” pịkị ineda “Jizọs Ḅe Nyanaḅọ-ẹ” nwọ ḍukopakụmaḅịa ḅọ ofori-ẹ Fịafịa Tẹmẹ Ḅe iniḅọ dagbụkụkụmaka simeogbo.

⁴ Kịrịkịrị Tẹmẹ anga ḍiepịrịaye omi-ẹ, ọkụma àrịmgba pịrịḅọ anị gbọrị Tẹmẹ Ḅe-ẹ.

⁵ Kịrịkịrị fịrịnwẹngị ḅara omi-ẹ, ọkụma gbọrị Tamụnọ Ḅe mị ịnyọ se ini pịrị se ini se fịrịnwẹngị ọ́ pịrịarịye-ẹ.

⁶ Se fịrịnwẹngịḅịa kịrịkịrị ịnyọ omi-ẹ, ọkụma gbọrị Tamụnọ Ḅe mị ịnyọ se inimgba nwọ pịrịye-ẹ.

⁷ Nweni mgba iḅi gose Tẹmẹ Ḅe achọ kịrịkịrị ḅụ ḅọḅọ ḅie ọ̀ ḅụ ḍiepakụmamẹ.

⁸ Tẹmẹ Ḅe ò nemi oku nwọse gbọrịḅọ pịrịmẹ, ori gbọrị Tẹmẹ Ḅe ḍawọnemi se jịnḅọ nwọ pịrịmẹ.

⁹ Ori gbọrị Tẹmẹ Ḅe pịkị ḅereni nwọse gbọrịḅọ pịrịmẹ, anịsịkị ọ̀ pịkị ḅụgwọ kụrọ seni jịnḅọ nwọ pịrịmẹ.

¹⁰ Tẹmẹ Ḅe ḅụgbiripumaye mịẹ kụrọ nwọse gbọrịḅọ pịrịmẹ, jịnḅọ ịkịankoro ḍiepịrịye ọ̀ nwọse iniḅọ pịrịmẹ; pịkị jịnḅọ Tamụnọ Ḅe ḅụ ḅo Tẹmẹ na ọ̀ ḅụ ḅo ka Tẹmẹ na nemi ḍiepịrịye ọ̀ nwọse iniḅọ pịrịmẹ. Ọ̀ kịrị ḅẹlẹ se ọkwẹịn kụrọ nwọse jịnḅọ pịrịmẹ, pịkị jịnḅọ, ọkwẹịn pufinji kụrọ ọ̀ nwọse iniḅọ pịrịmẹ.

¹¹ Ọkụma Ḅe gbọrị Tẹmẹ Ḅe mị mamgba nwọ mịẹarịye-ẹ; ò ḅi ḅara ḅụ, kịrịkịrị ḍiepịrịaye seni ḅọḅọ nwọ pịrịmẹ.

Nyanaḅọ Ḅe Gbọrị Oju Mị, Pẹkẹrẹ Kịrịkịrị Nyanamẹ

¹² Kraịst Ḅe tọn-a pẹkẹrẹ nyana gbọrị oju sime ọkụ ọ̀ nwọ simemẹ; pa pịkị gbọrị oju mị-ẹ, tọn-a pẹkẹrẹ anịa ḅụ omi-ẹ nwọ ḅẹ sọnị.

¹³ Anị gbọrị ḅara mị ḅụ, mine mgba ḅọrọ Juapụ-o anịkanịka Jịnsẹapụ-o, omoniapụ-o anịkanịka furoawọ-o, gbọrị oju mị ḅụ mị ini mengi se wa saraye-ẹ, ori gbọrị Tẹmẹ Ḅe ḅụ, ini pịkị gbọrị Tẹmẹ Ḅe se wa pịrị se wa se ḅumẹ.

¹⁴ Anịatịḅị oju mị na mịnaḅụ na gbọrị pẹkẹrẹ kẹngẹ anị nwọ nyanakẹ; ọkụma tọn-a pẹkẹrẹ-ẹ.

¹⁵ Ḅụọ mị nemikase nwọ ḅẹ, “Ị̀rị̀ ḅaraka ẹrẹchị à sime oju mị pịrịkẹ nwọ ḅẹ ọkụma,” anị ḅẹkẹ na oju mị ḅụ anị ofori-ẹ.

¹⁶ Ḅeri mị nemikase pịkị nwọ ḅẹ na, “Ị̀rị̀ tọrụmgbọlụkẹ, àrị oju ḅụ ofori-ẹ,” nwọ ḅẹ ọkụma, anị ḅẹkẹ na oju mị ḅụ anị ofori-ẹ.

¹⁷ Bebe oju mị nemikase gbọrị tọrụmgbọlụ kẹngẹ-ẹ nwọ ḅẹ ọkụma, nde anị ineda ye naaḅịa ọkụ? Pịkị anị nemikase gbọrị ḅeri kẹngẹ-ẹ nwọ ḅẹ ọkụma, nde anị ineda ye iniḅịa ọkụ?

¹⁸ Anị simeọkụ simeọkụ sọnị Tamụnọ Ḅe kịrịkịrị pẹkẹrẹ nwọse oju mị ḅụ chụa waraḅẹ ò ḅi ḅara ḅụ.

¹⁹ Oju mgbọkụ sime ẹkẹ anị nemikase gbọrị pẹkẹrẹ kẹngẹ nwọ nyanamẹ ḅẹ ọkụma!

²⁰ Mịọkụ anị simeọkụ tọn-a pẹkẹrẹ omi-ẹ, ọkụma gbọrị oju-ẹ.

²¹ Anịẹrẹchị tọrụmgbọlụ mị ineda nwọse ḅara mị ḅẹ ẹkẹ, “Àrị ị́ ḅikẹ!” Anịkanịka tịḅị mị pịkị ineda nwọse ḅụọma ḅẹ ẹkẹ, “Ị̀rị̀ sọnị, àrị ó ḅikẹ!”

²² Ẹn-ẹn, anịnakaraka, oju mị ḅụ ịnyọ oforitẹịnmẹ nwọ ḅẹ pẹkẹrẹma re, anị yesọaye ma-ẹ.

²³ Se opuma ye ḅụ sọkẹ wa nwọ koroma pịrịarị pẹkẹrẹma àrị mị wa abala tẹịnye-ẹ,

²⁴ mịna oju ḅụ iḅitẹịn pẹkẹrẹma opu abala nwọ ḅikẹ. Tamụnọ Ḅe na mịnaḅụ na oju ḅụ simeayema nwọ gboloma so-ọkụma, opu osi nwọse osi nyanaka pẹkẹrẹma pịrịmẹ.

²⁵ Anịgose pua oju mị ḅụ ofori-ẹ, ọkụma anịa ḅụ sime pẹkẹrẹ kịrịkịrị mamgba jịnye jịnye abalamẹ.

²⁶ Oju mị ḅe gbọrị pẹkẹrẹ tọrụsiọrịaḅẹ ḅẹḅẹ, ísí-a pẹkẹrẹ mamgba anịa ḅụ sọ tọrụsiọrịmẹ; ini gbọrị pẹkẹrẹ nwọ tokonimẹ ḅẹḅẹ, ísí-a pẹkẹrẹ mamgba anịa ḅụ sọ ḅieḅẹlẹmẹ.

²⁷ Ómine mgba anị Kraịst oju mị-ẹ, ḅọḅọ anịa ḅụ pẹkẹrẹ-ẹ.

²⁸ Tamụnọ Ḅe nweni mamgba se chọchị mị ḅie kirikiri ḅụ koromamẹ: tatarị kiri anị okufịrịnwẹngịapụ ma-ẹ, maịn karama kiri anị ịkịankoroapụ ma-ẹ, pịkị tẹrẹ karama kiri anị yeḍieapụ ma-ẹ, pịkị ḅụgbiripumaye mịẹ apụ na, ini ḅụgwọ kụrọ se pịrị apụma ini ḍukomamẹ, anịkanịka ḅarachụa jịn apụ pịrị apụma, anịkanịka kịrị ọkwẹịnma mịẹse nweni àrị kaịnḅo apụma.

²⁹ Inimgba okunwẹngịapụkẹ, anịkanịka ịkịankoroapụkẹ, anịkanịka yeḍieapụkẹ. Ḅẹḅọ ḅẹḅọ ḅụgbiripumaye mịẹ kụrọ nwọ nyanakẹ

³⁰ anịkanịka obi gwọ ẹkẹ, pịkị kịrị ọkwẹịn ḅẹlẹ se ọkwẹịn apụkẹ, anịkanịka kọn ọkwẹịn mị nwọ ḍukoḅelemapụkẹ.

³¹ Ómine anịọkụma ọ́mịna kuḅiemgbọlụma nwọse opumaye sọ ḍiepịrịayema ḅụ gbana. Àrịmgba ḅụ tẹịnye anị ị́ kaịnḅotẹịn aye ma-ẹ.