1 Kọrịntapụ 11 - Kịrịkẹnị Baịbụl

¹ Ómine ị̀ ḍikima ye mịẹ, à Kraịst Ḅe ḍikima ọkụ mị.

Tịḅị Gbẹịn Se Tẹkẹ Na Gbakịmaye

² Àrị ó tokonimẹ, anịatịḅị ọ́ sịkịmamgba ị̀ se ḅiekoroma koromamẹ pịkị à ḍieaye ma nwọ ḍukonwẹngịmẹ, à saḅama ọ́ pịrịye ma.

³ Ọkụma à ḅimẹ ọ́ mịn mị nwọ kaịnḅo na nweni mgba tịḅịnịḅọ ḅe anị Kraịst Ḅe-ẹ, owuḅọ ḅe anị eremeniḅọ ma tịḅịnịḅọ-ẹ, Tamụnọ Ḅe pịkị Kraịst Ḅe tịḅịnịḅọ-ẹ.

⁴ Anịẹrẹchị gbọrịḅọ tomoni ogbo ḅie sime tẹkẹ anịkanịka Tamụnọ ḅẹrẹ ḍukoarị sịkị ye seni ọ̀ tịḅị gbẹịnmẹ ḅẹḅẹ ọ̀ ḅụgerere se Kraịst Ḅe tọrụ chụamẹ.

⁵ Se eremeniḅọ goyegoye nemikase tomoni ogbo sime tẹkẹ anịkanịka Tamụnọ ḅẹrẹ ḍukoaḅẹ se ye se á tịḅị gbẹịnkẹ ḅẹḅẹ, á ḅụgerere se deḅọ ḅe tọrụ chụamẹ; árị na iniḅọ tịḅị nwọ sẹịn eremeniḅọ na ogboku kịrịye ofori-ẹ.

⁶ Iniḅọ tịḅị nwọ gbẹịnka eremeniḅọ, ye iniḅọ mịna tịḅị nwọ sẹịn sin. Tịḅị sẹịn anịkanịka kịrị mị nwọ eremeniḅọ ma ḅụgereremaye-ẹ nwọ ḅẹ sịkị, árị á tịḅị gbẹịn na iḅimẹ.

⁷ Owuḅọ gose ọ̀ tịḅị gbẹịnḅịaye ofori-ẹ, ori nwọ Tamụnọ Ḅe sime ḅara sime se oria boma nwọ ḍiepakụmarị sịkị; ọkụma eremeniḅọ ma árị owuḅọ ḅe boma nwọ ḍiepakụmamẹ.

⁸ Anịatịḅị ini eremeniḅọ ḅụ pakaḅoye nwọse owuḅọ ḅe tẹmẹkẹ, ọkụma owuḅọ ḅụ ḅo ye ini nwọse eremeniḅọ ma tẹmẹmẹ.

⁹ Ini pịkị eremeniḅọ gose owuḅọ ḅe tẹmẹkẹ, ọkụma ini owuḅọ ḅe gose eremeniḅọ ma tẹmẹmẹ.

¹⁰ Enjẹlapụma gose, eremeniḅọ ma anịọkụma ye se á tịḅị gbẹịn na iḅimẹ, se ḍiepakụma na á deḅọ ḅe kụrọ mị chuku sime waraḅẹ.

¹¹ Nyanaḅọ Ḅe ḅie wa nyana ḍumo mị ḅie, eremeniḅọ ma ineda owuḅọ ofori ḅụ ngẹrị sime ẹkẹ, owuḅọ ḅe sọnị ineda eremeniḅọ ofori ḅụ ngẹrị sime ẹkẹ.

¹² Anịatịḅị ini owuḅọ ḅe ḅụ wẹrị eremeniḅọ ma tẹmẹ ọkụ mị, anị gbọrị ḅara mị eremeniḅọ ma seni owuḅọ ḅe yi pakụmaḅo ọkụ-ẹ; ye mamgba pịkị Tamụnọ Ḅe ḅara ḅomẹ.

¹³ Ómine na mịnaḅụ na anị kọn pẹlẹ, anị ḅụgbẹịn eremeniḅọ tomoni ogbo ḅie papa tịḅị nwọse Tamụnọ Ḅe tẹkẹ?

¹⁴ Che tịḅị, ye mịẹmịẹ ḅara ḅụ ọ́ ḍawọ nemisam na owuḅọ tịḅị-inime nwọ borima mị, anị ḅụgererema ye nwọ sọ ọ̀ pịrịmẹ,

¹⁵ ọkụma anị opuamịẹye nwọ sọ eremeniḅọ ma nwọ pịrịmẹ. Ini árịa nangwọ inimema nwọse á pịrịmẹ árị anị se á tịḅị gbẹịnḅịaye ẹrẹchị.

¹⁶ Ọkụma mịn mị na piki-aḅịa ḅọ omi-ẹ ḅẹḅẹ, à nyana se anịa ḅụ ḍukoḅịaye mamgba anị mị mị-ẹ na, anị ḅọrọ mine-o, pịkị Tamụnọ-a chọchịma-o, nyana jịn tẹkẹ yemịẹ ḅara ofori-ẹ.

Nyanaḅọ Ḅe Saso Fịye Mị Gbolomaye

¹⁷ Àrị ọ́ datekerema-ẹ mun-arịye mị gbolomaye ḅụ àrị ó tokonikẹ, anịatịḅị ómine ḅe koḅirima tẹkẹ mị anị iḅiye ọkịḅo na karaka, ye se ọ́ lamaḅịaye mị anị mịẹarịye-ẹ.

¹⁸ Tatarịye, ini ḍuko ị̀ pịrịsam na ọ́mịna koḅiria ma ḅie pua omi-ẹ, mịn mị à kele anị ḅerenimẹ.

¹⁹ (Pikipikiye ofori-ẹ, na pua ọ́mịna ogboku omi-ẹ mịẹse karakaraye ḅụ sime apụma ini iḅiọkụ nwọ ọrịḅịa ḅara.)

²⁰ Ọ́ gbọrị ogbo apụ ḅaraḅụ ịrịa gbolomarị sịkị, Nyanaḅọ Ḅe saso fịye mị ọ́ nwọ fịḅịa nwọ ḅẹye gosekẹ.

²¹ Anịatịḅị ọ́ fịarị sịkị, simeḅọ simeḅọ iniḅọ fịye nwọ fịaḅẹ, anịẹrẹchị ḅuru dapụ tarịarị sịkị ísíapụma iruḅu tọrụḅaama waraḅẹ.

²² Ọ́mịna ḅarakuḅu warị ofori ó sime yefị pịkị ḅuḅuye ḅuḅịa nyọ? Anịkanịka anị ọ́ ḅụḅẹlẹ ọ́ Tamụnọ chọchị mị nwọ ḍikisima pịkị ḅụgerere se yeḅụpalịmarịapụma tọrụ chụa? Nwọ simeye ḅụ nde ọ́ tọrụ se ḍiki na à ḍukoḅịaye? Àrị ó tokoni ḅe? Ngịsị à mị ḅụ ó tokoniḅịa ọkụ ofori-ẹ.

²³ Anịatịḅị à ḅọrọma ọ́ pịrị ḍieye mị Nyanaḅọ Ḅe ḅara àrị anị nyanaḅomẹ, na Nyanaḅọ Jizọs Ḅe, ini ò se ịbafị ḍin mị ḅie ò fịturu pẹkẹrẹ nwọ ọkịmẹ,

²⁴ mịẹḅaka se Tamụnọ Ḅe ḅẹ, anị pu, se nwọ ḅẹmẹ, “Mịn ị̀ya oju mị-ẹ, sime ọ́ pịrịye mị. Ọ́ mịn mị mịẹ ị̀ se ḅiekoroma ḅụ.”

²⁵ Anị gbọrị ḅara mị ḅụ, saso fịye mị fị so sịkị ori ọmọngọ mị ọkị se, nwọ ḅẹmẹ, “Mịn ọmọngọ mị anị Tamụnọ Ḅe ịwọ ọḅọkụ mị-ẹ, Ị̀ya pulo ini nwọse mịẹkụrọmaye mị. Ómine anị ḅu sịkị ḅu sịkị, ómine anị se ị̀ se ḅiekoroma.”

²⁶ Mịn mị fieaḅẹ na ọ́ mị fịturu mị fị sịkị goyegoye, pịkị mị ọmọngọ mị ḅie simeye mị ḅu sịkị goyegoye ọ́ Nyanaḅọ Ḅe fị mị nwọ ḍukopakụmaḅẹ ọkịmun ori ḅe ḅo mị nwọ la.

²⁷ Anị ḅẹaḅẹ na tomoniḅọ nemikase osi se ọ̀ pịrịka ḅara nwọse Nyanaḅọ Ḅe fịturu mị fị, pịkị oria ọmọngọ mị ḅie pakaḅoye ḅumẹ ḅẹḅẹ iniḅọ si mịẹmẹ nwọ ḅẹ ḅẹrẹ ḅarasi nwọ nyanasam oria oju na pulo na ḅụ.

²⁸ Anịẹrẹchị simeḅọ simeḅọ tatarị iniḅọ ḅụ nwọ sẹlẹ ḍiki, anị sịkị re iniḅọ fịturu mị fị pịkị ọmọngọ mị ḅie ḅo ye nwọ ḅụ.

²⁹ Anịatịḅị iniḅọ ḅụgbẹịnka ḅara ḅụ wẹrị fịturu mị fị pịkị ọmọngọ mị ḅie ḅo ye ḅu mẹ ḅẹḅẹ, Kraịst oju mị nwọse ḅiekoromaka ḅụ, anị fiearịye na, iniḅọ Tamụnọ ḅẹrẹkọn nwọ fị pịkị ḅu iniḅọ ọgọnọ gbanaḅẹ, anịatịḅị iniḅọ Kraịst fị mị nwọse tiaḅẹ.

³⁰ Mịn mị, mị mịẹse ọ́mịna ḅie tọn apụ obiarịye-ẹ pịkị ịnyọ nyanakaye-ẹ, ḅaka apụ pịkị fịsam.

³¹ Wa nemikase tatarị mịna ḅụ ma nwọ pekele ḍikimẹ nwọ ḅẹ ọkụma, wa mgbọkụ Tamụnọ ḅẹrẹkọn ḅie sọ ẹkẹ.

³² Ọkụma Nyanaḅọ Ḅe ḅẹrẹkọn wa pịrị pịkị ḅụfụka se wa pịrịmẹ, mịẹse wa tomonikiri mị ḅụ sọ se ḅẹrẹsi nwọ nyana ẹka ḅara.

³³ Anịẹrẹchị, ị̀ya mịnapụ, ó koḅirima gboloma Nyanaḅọ Ḅe Saso fịye mị nwọ fịḅịa sịkị, ọ́ jịnḅọ jịnḅọ koru.

³⁴ Ḅuru pụkọtarịḅọ omi-ẹ ḅẹḅẹ, ye iniḅọ warị ḅie yefị, mịẹse Tamụnọ ḅẹrẹkọn ọ́ pịrị ẹka ḅara, ó ḅo ịrịa gboloma sịkị. Ísí-a ḅẹrẹma ọkụma à ḅo sịkị àrị àrị ḍuko pẹlẹḅịa.