1 Jọn 5 - Kịrịkẹnị Baịbụl

Wa Tomonikiri Mị Nẹngịmasam

¹ Na Jizọs Ḅe anị Mẹsaya Ḅe-ẹ nwọ ḅẹye mị ḅereniḅọ goyegoye anị Tamụnọ tọkụ-ẹ, na ḍaḅọ ḅe ḅẹlẹma ḅọ goyegoye pịkị oria tọkụ ḅe sọ ḅẹlẹmamẹ.

² Mịn wa wẹrị nemi ọkụ mị-ẹ na wa Tamụnọ awọma ḅẹlẹmamẹ: anị Tamụnọ Ḅe ḅịpịpoki na pịkị oria olokoma koko na ḅụ.

³ Na wa ḅẹlẹma nyana Tamụnọ Ḅe pịrịmẹ ḅẹye mị fieaḅẹ na wa oria olokoma kokomẹ. Oria olokoma koko mị opuma mịnaḅụ dakẹ.

⁴ Anịatịḅị Tamụnọ tọkụ goyegoye ineda tomonikiri mị nẹngịmaḅịa. Mịna ḅereni ḅụ wa ḅụkụrọma tomonikiri mị nẹngịmamẹ.

⁵ Tụḅọ ineda tomonikiri mị nẹngịma ḅe? Anị ḅereni na Jizọs Ḅe Tamụnọ Tọkụ-ẹ nwọ ḅẹ ḅọ ḅe-ẹ.

Jizọs Kraịst Ḅe Gboloma Onyechịẹ Mị

⁶ Jizọs Kraịst Ḅe anị oria mengisara mị na oria fị mị ḅe pulo mị na se ḅo ḅọ ḅe-ẹ. Mengi mị ngẹrị ngẹrị ọ̀ nwọse ḅokẹ, ọkụma mengi mị na pulo na-ẹ. Tẹmẹ Ḅe na mịnaḅụ na onyechịẹ mịn mị pịrịmẹ na kọkọmaye-ẹ, anịatịḅị Tẹmẹ mị anị kọkọmaye mị-ẹ.

⁷ Ini tẹrẹ-a onyechịẹ apụ-ẹ:

⁸ Tẹmẹ Ḅe na, mengi mị na, pịkị pulo mị na; ma tẹrẹ-a yemamgba gbọrị onye mị chịẹmẹ.

⁹ Tomoniḅọ chịẹ onye sọnị wa ḅerenimẹ ọkụma Tamụnọ Ḅe chịẹ onye mị ḅakama kụrọtẹịnmẹ; ori pịkị onyechịẹ seni oria Tọkụ Ḅe pịrịsam.

¹⁰ Anịẹrẹchị, Tamụnọ Tọkụ Ḅe ḅereniḅọ goyegoye mị onyechịẹ mị iniḅọ kuḅie ḅụ omi-ẹ, ọkụma Tamụnọ Ḅe ḅerenika ḅọ goyegoye iniḅọ ò seni iruokọnḅọ mịẹsam, anịatịḅị Tamụnọ Ḅe oria Tọkụ Ḅe ḅụ chịẹ onye mị iniḅọ anị ḅerenikẹ.

¹¹ Mịn onyechịẹ mị-ẹ: na Tamụnọ Ḅe ḅene-ḅene ḍumo se wa pịrịsam se mịn ḍumo mị oria Tọkụ Ḅe ḅụ mị anị wẹrị ḅoye-ẹ.

¹² Tọkụ Ḅe nyanaḅọ goyegoye mịn ḍumo mị nyanamẹ; Tamụnọ Tọkụ ḅe nyanaka ḅọ goyegoye iniḅọ ḍumo nyanakẹ.

Simegbamaso Ḍumo

¹³ À gose mịn ḍiri mị gịẹịn ọ́ sẹịnmarịye anị mịẹse ó nemi na ó simegbamaso ḍumo nyanamẹ—anị ómine Tamụnọ Tọkụ Ḅe ḅereni apụma.

¹⁴ Tamụnọ Ḅe tọrụkuḅu ḅụ wa kụrọ kuḅie nyanamẹ, anịatịḅị wa iḅiọkụma nemimẹ na, ò ḅiarị ḅara mị wa nwọse ye ḅimẹ ḅẹḅẹ ọ̀ naanaamẹ, ọ̀ pịkị mịẹ wa pịrịpịrịmẹ.

¹⁵ Wa ọ̀ ḅara ye ḅi sịkị goyegoye ọ̀ naanaamẹ; ọ̀ pịkị mịẹ wa pịrịpịrịmẹ, wa nemimẹ na mịn mị kọkọmaye-ẹ ḅẹ sịkị, wa pịkị nemimẹ na ọ̀ ḅara wa ḅiye ò se wa pịrịpịrịmẹ.

¹⁶ Nemikase ị́ ọrịmẹ na ị́ya mịnaḅọ ḅe mịẹ si mị fị dekiḅo ọ̀ pịrịḅịayekẹ ḅẹḅẹ, Tamụnọ tẹkẹ ọ̀ pịrị anị ḍumo se ọ̀ pịrịḅịa ḅọ ḅe. Mịn mị anị sime fị dekiḅo ẹka simịẹ apụma pịrịmẹ. Ọkụma fị dekiḅoḅo si omi-ẹ, à ḅẹkẹ na ọkọ sime si gose ọ́ Tamụnọ Ḅe tẹkẹ.

¹⁷ Mịẹirima goyegoye si-ẹ, ọkụma fị dekiḅo ẹka si omi-ẹ.

¹⁸ Wa nemimẹ na Tamụnọ awọ ḅie simịẹma tọrọkọ mun-arị ḅọ ofori-ẹ, anịatịḅị Tamụnọ Tọkụ Ḅe iniḅọ kokomẹ anịgose Si Ḅọ ḅe ọ̀ pịkị ineda ye se iniḅọ lama ẹkẹ.

¹⁹ Si Ḅọ ḅe tomonikiri mị mgba ọ̀ ḅara omi-ẹ nwọ ḅẹ sọnị, wa nemimẹ na mine ma wa sime Tamụnọ Ḅe pịrịmẹ.

²⁰ Wa nemimẹ na Tamụnọ Tọkụ Ḅe ò ḅosam, se ọ̀ pịkị ye kaịnḅo se wa pịrịsam, anịgose kọkọma Tamụnọ Ḅe wa ó nemimẹ. Gbọrị kpo ḅụ anị wa kọkọma Tamụnọ Ḅe na ḍumoye-ẹ—gbọrịḅụ oria Tọkụ Jizọs Kraịst Ḅe na ḍumomẹ. Ḅe anị kọkọma Tamụnọ Ḅe-ẹ pịkị mịn mị anị simegbamaso ḍumo mị-ẹ.

²¹ Ị̀ya awọ, iruo-a oru ma ḅụ ọ́ ḅụsin!