1 Jọn 4 - Kịrịkẹnị Baịbụl

Kọkọma Tẹmẹ Mị Na Iruo Tẹmẹ Mị Na

¹ Ị̀ ḅụ yela ikiapụ, ó ḅereni nyana se Tẹmẹ Ḅe nyanamẹ nwọ ḅẹ ḅọ goyegoye nwọ pịrị ma ọkụma ómine ini ḍaḍiki se ḍọkịḅo ọrị ini nyana tẹmẹ mị Tamụnọ Ḅe ḅụ ḅo na ḅoka na. Anịatịḅị tọntọn-a iruo ịkịankoroapụ pakaḅosam nyọ nyọma ḅie.

² Mịn ọ́ wẹrị Tamụnọ Tẹmẹ Ḅe nwọ nemiḅịa ọkụ mị-ẹ: na Jizọs Kraịst Ḅe ò tomoniḅọ ḅara nwọse ḅomẹ nwọ ḅẹye ḍukopakụmaḅọ goyegoye anị Tamụnọ Ḅe ḅụ ḅo Tẹmẹ Ḅe nyanaye-ẹ.

³ Ọkụma Jizọs Ḅe na gbolomaye ḅụ mịn mị pikiḅọ goyegoye iniḅọ Tamụnọ Ḅe ḅaraḅo Tẹmẹ nyanakẹ. Ọ̀ nyana tẹmẹ ḅe anị Kraịst Ḅe na Tarakaḅọ ḅe ḅara ḅomẹ; ọ́ naamẹ na anị ḅoḅịa, mịọkụ anị ḅo tomonikiri mị ḅie lasam.

⁴ Ọkụma, ómine ị̀ya awọma, ó sime Tamụnọ Ḅe pịrịmẹ, ọ́ pịkịna iruo ịkịankoroapụma nẹngịmasam, anịatịḅị ó ḅie sime Tẹmẹ Ḅe kụrọtẹịn, ini sime mị tomonikiri mị pịrị apụma ḅie sime tẹmẹ mị nẹngịmẹ.

⁵ Ini iruo ịkịankoroapụma tomonikiri ḅụ-a-ḅẹrẹ mị ini ḍuko ḍukoye-ẹ, se tomonikiri mị pịkị ini pokipokimẹ, anịatịḅị ini sime tomonikiri mị pịrịmẹ.

⁶ Ọkụma mine, wa sime Tamụnọ Ḅe pịrịmẹ. Tamụnọ Ḅe nemiḅọ goyegoye wa pokipokimẹ; sime Tamụnọ Ḅe pịrịka ḅọ goyegoye wa pokipokikẹ. Mịn, anịọkụma wa wẹrị ineda kọkọma Tẹmẹ Ḅe na karakaraka tẹmẹ mị na ogboku sime kịrịye mị ḍukoḅịa ọkụ mị-ẹ.

Tamụnọ Ḅe Anị Ḅẹlẹma-ẹ

⁷ Yela ikiapụ, ó ye wa jịnḅọ jịnḅọ ḅẹlẹma, anịatịḅị Tamụnọ Ḅe ḅụ anị ḅẹlẹma mị ḅoye-ẹ. Nweni ḅẹlẹma ḅọ goyegoye anị Tamụnọ tọkụ-ẹ, pịkị Tamụnọ Ḅe nemi ḅọ-ẹ.

⁸ Nweni ḅẹlẹmaka ḅọ goyegoye iniḅọ Tamụnọ Ḅe nemikẹ, anịatịḅị Tamụnọ Ḅe ori anị ḅẹlẹma mị-ẹ.

⁹ Tamụnọ Ḅe ọ̀ nyana wa pịrị ḅẹlẹma mị ḍiepakụmamẹ, anị oria ngẹrị Tọkụ Ḅe se tomonikiri mị fịrịmaye ḅụ, mịẹse wa ọ̀ ḅụ ḅọrọ ḍumo nyanaḅịa ọkụ.

¹⁰ Mị ḅẹlẹma mị simeọkụ-ẹ! Tamụnọ Ḅe wa ọ̀ ḅẹlẹmamẹ nwọ ḅẹyekẹ, ọkụma ori ọ̀ wa ḅẹlẹmamẹ.

¹¹ Yela ikiapụ, mị Tamụnọ Ḅe se wa ḅẹlẹma ọkụ-ẹ nwọ ḅẹḅẹ, anịọkụma, wa jịnḅọ jịnḅọ ḅẹlẹma gbẹịnmẹ.

¹² Tamụnọ Ḅe ọrịsa gbọrịḅọ sọnị ma ofori-ẹ, ọkụma wa nemikase jịnḅọ jịnḅọ ḅẹlẹmamẹ nwọ ḅẹḅẹ, Tamụnọ Ḅe ómine na gbọrịḅụ omi-ẹ, pịkị oria ḅẹlẹma mị mịna ḅie anị karamẹ.

¹³ Wa iḅiọkụma nemimẹ na wa Tamụnọ Ḅe na gbọrịḅụ omi-ẹ, ori pịkị mine na gbọrịḅụ omi-ẹ, anịatịḅị ori ọ̀ Tẹmẹ se wa pịrịsam.

¹⁴ Wa ọrị, pịkị ḍuko jịn apụ pịrịsam, na Ḍaḅọ Ḅe oria Tọkụ Ḅe fịrịmamẹ ḅo tomonikiri mị Ḍụaḅọrọmaḅọ nwọ sọ.

¹⁵ Na Jizọs Kraịst Ḅe anị Ḍaḅọ Ḅe Tọkụ-ẹ nwọ ḅẹye ḍukopakụmaḅọ goyegoye, ori ḅọ ḅe ọ̀ Tamụnọ Ḅe na gbọrịḅụ omi-ẹ, Tamụnọ Ḅe pịkị ori na gbọrịḅụ omi-ẹ.

¹⁶ Mine na mịnaḅụ na Tamụnọ Ḅe se wa pịrị ḅẹlẹma mị wa anị nemi pịkị anị ḅerenimẹ. Tamụnọ Ḅe anị ḅẹlẹma-ẹ, se ḅẹlẹma ḍumokọn ḅọ goyegoye, iniḅọ Tamụnọ Ḅe na gbọrịḅụ omi-ẹ, Tamụnọ Ḅe pịkị iniḅọ na gbọrịḅụ omi-ẹ.

¹⁷ Mịna ḅie, ḅẹlẹma mị anị karagbasịmẹ mịẹse Ḅẹrẹkọn Ene mị ḅie wa kụrọ kuḅie nyanaḅịa ọkụ! Wa pịkị anị nyanaḅịa anịatịḅị mị tomonikiri mị ḅie mịna ḍumo na Kraịst Ḅe ḍumo na gbọrịye-ẹ.

¹⁸ Kpọkpọ gbọrị ḅalafa sọ ḅẹlẹma mị ḅie ofori-ẹ; karagbasị ḅẹlẹma mị anị ḅalafa desin-sinmẹ. Anịọkụma ḅẹlẹma mị ma anị karagbasịkẹ ḅalafa ḍọkịḅọ goyegoye ḅie ḅụ, anịatịḅị ḅalafa mị anị fomuḅara na nwẹngịmẹ.

¹⁹ Wa ḅẹlẹma nyanamẹ anịatịḅị Tamụnọ Ḅe tatarị wa ḅẹlẹmamẹ.

²⁰ Nemikase tomoniḅọ ọkọ ḅẹmẹ na ọ̀ Tamụnọ Ḅe ḅẹlẹmamẹ, ọkụma taraka nyana iniḅọ mịnaḅọ pịrịmẹ nwọ ḅẹḅẹ, ori iruokọnmẹ. Anịatịḅị ori ineda ori ọrịka Tamụnọ Ḅe ḅẹlẹma ẹkẹ, nemikase ori ọrịsa ḅọ ḅe ọ̀ nwọ ḅẹlẹmaka ọkụma.

²¹ Mịn Kraịst Ḅe se wa pịrịsa oloko mị-ẹ: Tamụnọ Ḅe ḅẹlẹma ḅọ goyegoye ye iniḅọ mịnaḅọ sọnị iniḅọ nwọ ḅẹlẹma-ẹ.