1 Jọn 2 - Kịrịkẹnị Baịbụl

Kraịst Mịna Ḅarachụaḅọ Ḅe

¹ Ị̀ya awọ, à mịn mị gịẹịn ọ́ sẹịnmaḅẹ mịẹse ó simịẹ ẹka ḅara. Ọkụma ọ́mịna ḅie si mịẹḅọ omi-ẹ ḅẹḅẹ, mịna tịḅị gose Ḍaḅọ Ḅe na ọkwẹịn àrị ḅọ omi-ẹ ori anị—Jizọs Kraịst, karakara Ḅọ ḅe-ẹ.

² Kraịst Ḅe ḅụ mị ini ḅọrọ mịna sima dekisinye-ẹ, mịna sima kẹngẹkẹ; ọkụma tomoni mamgba sima na-ẹ.

³ Nemikase wa Tamụnọ Ḅe olokoma kokomẹ ḅẹḅẹ, anịsịkị re mịn anị mịna ḅụokorosaye-ẹ na wa ò nemisam.

⁴ Nemikase tomoniḅọ ḅẹmẹ na ori ò nemimẹ, ọkụma oria olokoma kokokẹ ḅẹḅẹ, ọkọ simeḅọ ḅe iruokọnḅọ-ẹ, kọkọmaye mị pịkị ò ḅie ofori-ẹ.

⁵ Ọkụma oria ọkwẹịn mị kokoḅọ goyegoye, ori ḅọ ḅe nyana Tamụnọ Ḅe pịrị ḅẹlẹma mị anị ḅo jokoma karasaye nwọ sọsam, mịn ḅara mị anị wa se iḅiọkụma nemiḅịaye-ẹ na wa Tamụnọ Ḅe na gbọrịḅụ omi-ẹ nwọ ḅẹye mị.

⁶ Na ọ̀ Tamụnọ Ḅe na gbọrịḅụ omi-ẹ nwọ ḅẹ ḅọ goyegoye, Jizọs Kraịst Ḅe ḍumo nyana.

Ịwọ Oloko Mị

⁷ Ị̀ ḅụ yela ikiapụ, à gịẹịn ọ́ sẹịnmarị oloko mị ịwọ yekẹ, ọkụma olomu oloko mị anị-ẹ, anị sakị sịkị ngịsị ọ́ nyanaye mị-ẹ, olomu oloko mị anị ọ́ naasa oku mị-ẹ.

⁸ Ọkụma, mịọkụ à gịẹịn ọ́ sẹịnmarị oloko mị ịwọye-ẹ, anịatịḅị anịḅe kọkọmaye mị, Kraịst Ḅe na pịkị ọ́mịna ḅie ḅụ na ini anị ọrịsam, kanakana mị anị ḅọrọ soaḅẹ, anịsịkị jokoma enekuḅu mị sakị ḅịaḅẹ.

⁹ Na ori enekuḅu mị ḅie ori omi-ẹ nwọ ḅẹ ḅọ goyegoye, ọkụma iniḅọ mịnaḅọ ḍikiḅụnwọnwọmẹ ọkịḅo mịọkụ lamẹ nwọ ḅẹ sọnị, iniḅọ pa kanakana ḅie omi-ẹ.

¹⁰ Iniḅọ mịnaḅọ ḅẹlẹmaḅọ goyegoye enekuḅu mị ḅie iniḅọ omi-ẹ, anịẹrẹchị ò ḅie, jịnḅọ mịẹse iniḅọ mun si mịẹḅịaye ofori-ẹ.

¹¹ Ọkụma iniḅọ mịnaḅọ ḍikiḅụnwọnwọ ḅọ goyegoye kanakana ḅie ori omi-ẹ. Anịa ḅie mị ọ̀ nwẹngịarịye-ẹ, pịkị ò mun-arị anga sọnị ò nemikẹ, anịatịḅị kanakana mị anị ọ̀ tọrụmgbọlụma pụnụmasam.

¹² Ị̀ya awọ, à gose ḍiri gịẹịn ọ́ sẹịnmarịye anị Kraịst Ḅe tịḅịgose ọ́mịna sima ini ḅarasin ọ́ pịrịsam.

¹³ À ḍiri gịẹịn ómine ḍapụma sẹịnmaḅẹ anịatịḅị sakị sịkị ngịsị sime ḅọ ḅe ómine ò nemimẹ. À ḍiri gịẹịn ómine asẹmẹnị ma sẹịnmaḅẹ anịatịḅị Si ḅọ ḅe ómine ọ̀ nẹngịmasam.

¹⁴ À ḍiri gịẹịn ómine ị̀ya awọma sẹịnmaḅẹ anịatịḅị Ḍaḅọ Ḅe ómine ò nemimẹ. À ḍiri gịẹịn ọ́mịna ḍapụma sẹịnmaḅẹ, anịatịḅị sakị sịkị ngịsị sime Ḅọ ḅe ómine ò nemimẹ. À ḍiri gịẹịn ómine asẹmẹnị ma sẹịnmaḅẹ anịatịḅị ọ́ kụrọmẹ: Tamụnọ ọkwẹịn mị ó ḅie anị omi-ẹ, ọ́ pịkị Si ḅọ ḅe nẹngịmasam.

¹⁵ Tomonikiri mị anịkanịka sime anị pịrịye goyegoye ọ́ nwọ ḅẹlẹma ma. Ó nemikase tomonikiri mị ḅẹlẹmamẹ nwọ ḅẹḅẹ ọ́ Ḍaḅọ Ḅe ḅẹlẹmakẹ.

¹⁶ Sime tomonikiri mị pịrịye mamgba—anị ojumịnị mị ḍikipụkọsoliaye ma na—pịkị ḍumo mị ḅe opuamịẹmịẹaye ma na Ḍaḅọ Ḅe ḅara ḅokẹ, ọkụma tomonikiri mị ḅe-aye-ẹ.

¹⁷ Tomonikiri mị na anịa ḅie sime tomoni ḍikipụkọsoliaye mamgba ḅọrọ soaḅẹ; ọkụma Tamụnọ Ḅe ḅiye mịẹ ḅọ anị ḅene-ḅene ḍumo mị nyanaye-ẹ.

Kraịst Ḅe Na Taraka Ḅọ Ḅe

¹⁸ Ị̀ya awọ, kuluma mị kpekisam! Ini ḍuko ọ́ pịrịmẹ na Kraịst Ḅe na Tarakaḅọ ḅe ò ḅoḅịa; ọkụma mịọkụ Kraịst Ḅe na taraka tọn apụ ḅosam, anịẹrẹchị wa nemimẹ na kuluma mị kpekisam.

¹⁹ Mịna apụma ini jokoma sime mịna koḅirima ogbo mị pịrịkẹ; mịn mị gose anị ini wa wẹrịsoye-ẹ, nemikase ini sime mịna koḅirima ogbo mị pịrị ọkụma mgbọkụ, ini mine na simesam. Ọkụma ini mine wẹrịsomẹ, mịẹse anị ḅelepakaḅịa ọkụ na ini jokoma sime wa pịrịkẹ.

²⁰ Ọkụma ómine Kraịst Ḅe Fịafịa Tẹmẹ Ḅe se ọ́mịna ọgọnọ sara sa ye ẹrẹchị, ómine mgba ọ́ kọkọmaye mị nemisam.

²¹ Anịọkụma, à gose ḍiri gịẹịn ọ́ sẹịnmarịye, kọkọmaye mị ó nemikẹ nwọ ḅẹye gosekẹ; anịnakaraka ómine anị nemisam nwọ ḅẹye ẹrẹchị-ẹ, ọ́ pịkị nemimẹ na kọkọmaye mị ḅie iruoye ofori-ẹ.

²² Tụḅọ, anịọkụma, iruokọnḅọ? Anị Jizọs Ḅe Mẹsaya Ḅe ọrịkẹ nwọ ḅẹ ḅọ goyegoye-ẹ. Ọkọ sime ḅọ anị Kraịst Ḅe na Tarakaḅọ ḅe-ẹ—ọ̀ Ḍaḅọ Ḅe na Tọkụ Ḅe na sịkịmẹ.

²³ Anịatịḅị Tọkụ Ḅe sịkị ḅọ goyegoye pịkị Ḍaḅọ Ḅe sịkịmẹ; Tọkụ Ḅe ọkịḅọ goyegoye pịkị Ḍaḅọ Ḅe ọkịmẹ.

²⁴ Anị ḅụokoroye nwọ sọ na, sakị sịkị ngịsị ọ́ naasa oku mị ó kuḅie ḅụ ọ́ nwọse ḅiekoroma. Anị oku mị ọ́ nwọ kokomẹ ḅẹḅẹ, anịsịkị re anị ó ḅo Tọkụ Ḅe na pịkị Ḍaḅọ Ḅe na gbọrịḅụ simeḅịaye-ẹ.

²⁵ Anịsịkị, mịn anị Kraịst Ḅe ḅarana ḅereni wa pịrị sa—ḅeneḅene ḍumo mị-ẹ.

²⁶ Oḅori se ọ́ chịn ḍọkịarịapụma gose anị à mịn mị gịẹịn ọ́ sẹịnmarịye-ẹ.

²⁷ Ómine ọkụma, Kraịst Ḅe ọ̀ Tẹmẹ Ḅe se ọ́mịna ọgọnọ sarasam. Ọ̀ Tẹmẹ Ḅe ó ḅie sime sịkị goyegoye ọ́ ḅarị jịnye se ó ḍieḅịa ḅọ ḅikẹ. Anịatịḅị ọ̀ Tẹmẹ Ḅe mị yegoyegoye se ó ḍiearịye-ẹ, ọ̀ pịkị se ó ḍiearịye goyegoye kọkọmaye-ẹ. Anịọkụma, Tẹmẹ Ḅe ḍiearịye ma ọ́ nwọ ọkị se Kraịst Ḅe na gbọrịḅụ sime.

²⁸ Iin, ị̀ya awọ, ómine ori na gbọrịḅụ sime, mịẹse ò ḅoḅịa sịkị wa kụrọ kuḅie nyanapụ sọ, se ḅụgerere gose tọrụ ḅọị apụ sọ ẹka ọkụ.

²⁹ Ó nemimẹ na Kraịst Ḅe karakara ḅọ-ẹ, anịẹrẹchị ó nemi na karakaraye mị mịẹ ḅọ goyegoye anị Tamụnọ tọkụ-ẹ.