1 Amanyanapụ Sịkị Mịẹaye Ma 5 - Kịrịkẹnị Baịbụl

Rubẹnị Furo Ḅie Apụ Ma

¹ Mịna apụma anị Rubẹnị furo ḅie apụ ma-ẹ, Jekọb owuapụ awọma ḅie tatarị tọkụ ḅe-ẹ. (Ọ̀ ḍawu ḅe oria gbọrị ịgwa eremeniḅọ na gbolomamẹ nwọḅẹ ye gose, sime ọ̀ pịrị tatarị owutọkụ kiri mị ḅụ ọ̀ laḅịaye ma ori àrị famamẹ se sime ọ̀ pịrị ayema ini àrị seni Josẹf ḅe pịrịmẹ.

² Juda sẹ mị ḅo kụrọtẹịnye nwọ sọmẹ pịkị ḅẹrẹtọnḅọ pakụmaḅo bebe sẹ mamgba pịrịmẹ.)

³ Rubẹnị, Jekọb owuapụ awọma ḅie tatarị tọkụ ḅe, inein-a owuapụ awọ ọ̀ nwọ yimẹ: Henọk ḅe na, Palu ḅe na, Hẹzrọn ḅe na, pịkị Kamaị ḅe na.

^4-6 Mịna apụma anị Joẹl furo ḅie apụ ma-ẹ ḅụọ ọkịmun ḅụọ la: Shẹmaịya ḅe na, Gọg ḅe na, Shimẹaị ḅe na, Maịka ḅe na, Reaya ḅe na, Beal ḅe na, pịkị Bira ḅe na. Asiria sẹdaḅọ Tiglat Pilẹsa ḅe sẹ mị tịḅịda gbọrịḅọ Bira ḅe kun somẹ ọmụ ḅie.

⁷ Furo mị ḅie ẹrẹ ma gịẹịn koroma ḍiri mị ḅie, Rubẹnị sẹ mị tịḅịdapụ ẹrẹ ma gịẹịn waraḅẹ, mà inia ẹrẹ ma-ẹ: Jeaịẹl ḅe na, Zẹkaraya ḅe na,

⁸ Bela, Ezaz yaḅe, anịsịkị oria tọkụ ḅe yi tọkụ anị Shima, Joẹl sẹ mị ḅieḅọ ḅe. Mịn sẹ mị Aroa ḅie na, pịkị ọkịmun Nebo na Beal Meọn mị na ḅụ ọgọnọju da eke mị ḅụ ini anga simemẹ.

⁹ Ini ḅakama Giledị ama mị ḅie nama nyanamẹ anịẹrẹchị ama mị ḅụ ịrụapakapaka nyọ daọrụ ḅụ sakị mun onwun ele mị la, wasama mun Yufretis Tọrụ mị la nyọ mị ḅụ ini angamẹ.

¹⁰ Amanyanaḅọ Sọl ḅe sịkị mị ḅụ, Rubẹnị sẹ mị owu se Hagraị apụma pakamẹ, ini ḅaa se inia amama ọkị angamẹ anị Giledị mị ḅụ ịrụapakapaka nyọ daọrụ mị ḅụ.

Gadị Furo Ḅie Apụ Ma

¹¹ Gadị sẹ mị, Rubẹnị ḅụ ọgọnọ daọrụ ḅụ Bashan ama mị ḅie ini angamẹ, ọkịmun Saleka ḅụ ịrụapakapaka nyọ daọrụ mị la.

¹² Joẹl ḅe anị sẹma ḅụ tịḅịda sẹ mị pakụmaye-ẹ, se Shefam ḅe pịkị maịn-karama yelatẹịn sẹ mị pakụmamẹ. Jenaị ḅe na Shafat ḅe na pịkị jịn sẹ pakụmamẹ Bashan mị ḅie ḅụ.

¹³ Ísí sẹma ḅie apụma ini sime mịna sọnọma sẹma pịrịmẹ: Maịkịẹl ḅe na, Mẹshụlam ḅe na, Shiba ḅe na, Joraị ḅe na, Jekan ḅe na, Ziya ḅe na pịkị Eba ḅe na.

¹⁴ Ini anị Abihel Huraị yaḅe furo ḅie apụ ma-ẹ, inia olomu-aḍapụma paka ḅara ini nwọ ḍukopakụmamẹ: Abihel ḅe na, Huraị ḅe na, Jaroa ḅe na, Giledị ḅe na, Maịkịẹl ḅe na, Jeshishaị ḅe na, Jado ḅe na, Bọz ḅe na.

¹⁵ Ehaị, Abdịẹl yaḅe, oria tọkụ ḅe tọkụ Gunaị ḅe anị mịna sẹma ḅụ tịḅịdaḅọ ḅe-ẹ.

¹⁶ Bashan na Giledị na eke mị ḅụ ini angamẹ, anịju sime amama ḅie na pịkị Sharọn mị nyana bebe nama fịfị osuein sime ama mamgba ḅie na.

¹⁷ (Amanyanaḅọ Jotam Judaḅọ ḅe ḅụọ ḅụ anị ini mịnaye mamgba seni ḍiri ḅie gịẹịnye-ẹ pịkị Amanyanaḅọ maịn-karama Jeroboam Izrẹlḅọ ḅe ḅụọ ḅụ na.)

Ịrụapakapaka Nyọ Daọrụ Furo Ma Ọmụogbo Ma

¹⁸ Rubẹnị na, Gadị na, pịkị Ịrụapakapaka nyọ da Manasẹ sẹma na ḅie owuni sọnọ-a poku, kịnị-a mesi ofori oyimaịn ẹndẹ fịnjị na simemẹ, ini iḅiọkụma yese telimasa apụ, agbọ na, okola-agiji na, pịkị lubu na se owusọ ḍin apụ.

¹⁹ Ini mun Hagraị, Jẹtu furo ḅie apụma na, Nefish apụma na pịkị Nodab apụma na ọmụ gbinmẹ.

²⁰ Ini kuḅie seni Tamụnọ Ḅe ḅụgbana se ọ̀ tẹkẹmẹ na ọ̀ ḅarachụa ini pịrị. Tamụnọ Ḅe pịkị inia tẹkẹma pẹkẹrẹmẹ, se ọmụḅaraiḅi seni ini pịrịmẹ, Hagraị apụma na pịkị ḅarachụa ini pịrị sẹma na ḅụ.

²¹ Ini na tarakapụma ḅara ike-nambuloma ḅụ sonio-a poku na sọnọ ẹndẹ, ananama ḅụ soi gbọrị poku fịnjị na sọnọ-a ẹndẹ na, yepụra asụnma ḅụ sọnọ-a ẹndẹ na pịkị owuni ikoli apụ ḅụ oyimaịn poku fịnjị na kịnị oyi ẹndẹ na ini nwọ kun somẹ.

²² Tarakapụ ma ḅụ tọn-a apụ ini nwọ ḅaamẹ, anịatịḅị ọmụ mị anị Tamụnọ Ḅe ḅereni ḅaraḅụ-ẹ. Se ini somun anị eke mị ḅụ anga nweni ini ini desin sịkị mị lamẹ.

Ịrụapakapaka Nyọ Da Manasẹ Apụ Ma

²³ Ịrụapakapaka nyọ da Manasẹ apụma Bashan eke mị ḅụ ọkịmun Beal Hamọn na, Sina na, pịkị Hamọn Tụndụ mị pẹkẹrẹma ḅụ ini angamẹ. Inia kịẹnḅịpị pịkị opuma sumẹ.

²⁴ Mịna apụma anị inia sẹma ḅie tịḅịdapụ ma-ẹ: Ifẹ ḅe na, Ishaị ḅe na, Ilaịẹl ḅe na, Azriẹl ḅe na, Jerimaya ḅe na, Họdavaya ḅe na, pịkị Jadịẹl ḅe na. Inimgba ẹrẹ sosa owuni-ẹ, tomoni iḅiọkụma nemi tịḅịdapụ-ẹ inia sẹma ḅie ḅụ.

Ịrụapakapaka Nyọ Da Furo Ma Ini Ini Desin Mẹ

²⁵ Ọkụma tomonima inia olomu-aḍapụma Tamụnọ Ḅe ḅụ ini ḅereni nyanakẹ se ini ọ̀ wẹrịso se mun Tamụnọ Ḅe ama mị ḅie depakụma sẹma oru ma tẹkẹmẹ.

²⁶ Anịẹrẹchị Tamụnọ Ḅe Asiria sẹdaḅọ Pul ḅe (ini pịkị nwọse ọ̀ chịnmẹ Tiglat Pilẹsa) mịẹse ori inia sẹ mị gbẹịnmachịẹmẹ, Rubẹnị mị na, Gadị sẹ mị na, pịkị Ịrụapakapaka nyọ da Manasẹ na. Ori àrị sẹịn mun Hela ḅie na, Habọ ḅie na, pịkị Hera ḅie na, pịkị Gozan Tọrụ mị aka ḅụ ini se gbọtụma koromamẹ.