1 Amanyanapụ Sịkị Mịẹaye Ma 29 - Kịrịkẹnị Baịbụl

Sime Oputẹkẹwarị Nama Pịrị Ḍiepịrịaye

¹ Amanyanaḅọ Devid ḅe ḅelema ḍuko nweni ogbo mị pịrịmẹ: “Ị̀ya tọkụ Sọlọmọn ḅe anị Tamụnọ Ḅe sẹlẹsaye-ẹ, ọkụma ma ọ̀ pa bokẹ, ma ọ̀ pịkị yekaịnḅo nyanakẹ. Nwẹngịḅịa fịrị mị ikumẹ, anịatịḅị mị sime tomoni pịrị amanyanaḅọ odo fịrịkẹ, ọkụma sime Tamụnọ Nyanaḅọ Ḅe pịrị Oputẹkẹwarị fịrị-ẹ.

² Àrị iḅiọkụmaye koḅirisam se Oputẹkẹwarị mị nama gose, goli, seleḅa, alapẹlẹka, ikulele, chịn, yela ḍụparị na iḅi kụrọ yela ḍụparị na, gẹnịgẹnịaye tẹmẹḅịa yela ḍụparị na.

³ Mamgba nẹngịye, àrị ị̀ya ngọma ḅie, goli na seleḅa na sinpakụmaḅo mị fịrị ḅụ chusam, anịatịḅị àrị opu ḅẹlẹma nyana Tamụnọ Oputẹkẹwarị mị pịrịmẹ.

⁴ À jokoma goli opu okpokpo na jokoma seleḅa ḅụ okpokpo-a sọnọfa-oyi-tẹrẹ-a chịn-oyi fịnjị na nwọ pịrịsam ini se warị agbagba ma ḅirimaḅịaye

⁵ pịkịna ḅara fịrịnwẹngị-ḍin-apụ ma se chụaḅịaye na. Mịọkụ tụḅọ ineda kuḅie chịẹ-chịẹ-chịẹ ḅaraḅụ ye se Nyanaḅọ Ḅe pịrị ḅe?”

⁶ Anịsịkị anị sẹ tịḅịnịma na, fịrịnwẹngịapụ tịḅịnịma na, ọmụkụlọdapụ ma na, amanyanaḅọ ngọma ḅụ ḅẹrẹtọn apụma na, kuḅie lokoloko ḅaraḅụ,

⁷ iniaye ma pịrị pakụmaye-ẹ Oputẹkẹwarị fịrị mị gose: goli, okpokpo-a eseniasi-oyi fịnjị; seleḅa, si okpokpo ofori ẹndẹ; alapẹlẹka, si sọnọ-a okpokpo fa ẹndẹ jie asi fịnjị; pịkịna ikulele, esenie-a ẹndẹ sọnọmasi oyi fịnjị.

⁸ Inia ḅie yela ḍụparị nyanapụ àrị se Oputẹkẹwarị igbiki koko nyọ mị ḅie chumẹ, anị Jihaịẹl, Gashọnḅọ Livaị sẹ ḅieḅọ ḅe ḍikiḍikiarị nyọ mị.

⁹ Tomonima kuḅie chịẹ-chịẹ-chịẹ ḅaraḅụ ye seni Nyanaḅọ Ḅe pịrịsam, anị pịkị inia ḅieḅẹlẹmamẹ na ini tọn aye pịrịsam. Amanyanaḅọ Devid ḅe sọ opuma ò ḅieḅẹlẹmamẹ.

Devid Ḅe Tamụnọ Ḅe Bomamẹ

¹⁰ Anịnyọ ḅụ, koḅiria ogbo mị tọrọkọ anị Amanyanaḅọ Devid ḅe, Nyanaḅọ Ḅe boma se nwọḅẹye-ẹ, “Nyanaḅọ, mịna ḅieju ḍaḅọ Jekọb Tamụnọ, boma sime ị́ pịrị ḅene-ḅene la!

¹¹ Ị́ ḍụḅamẹ, ị́ pịkị kụrọmẹ, ị́ boma nyanamẹ, ị́ iḅimẹ pịkị amada opu nyanamẹ. Soḅie na kiri ọgọnọ ḅụ simeye goyegoye ị́yaye-ẹ, ị́rị́ pịkị amanyanaḅọ-ẹ, yemamgba ḅụ Geletẹịn Ḅẹrẹtọnḅọ-ẹ.

¹² Ala mamgba na pẹrẹ na ị́ ḅara ḅomẹ; ị́ ị́ya ịnyọ na kụrọ na nwọse ḅẹrẹtọn yegoyegoye pịrịmẹ, ị́ pịkị ineda ḅẹḅọ ḅẹḅọ mịẹ ḍụḅama pịkị mịẹkụrọmaḅịa.

¹³ Mịọkụ, mịna Tamụnọ wa mịẹḅaka se ị́ ḅẹmẹ, wa pịkị ị́ya boma nyana ẹrẹ mị tokonimẹ.

¹⁴ “Anịsọ ị̀ya tomonima na ị̀rị̀ na, wa ineda ye se ị́ pịrị ẹkẹ, anịatịḅị yegoyegoye ị́ ḅara ḅo ḍiepịrịaye-ẹ, wa papa ị́yaye nwọ pịkịma se ị́ pịrịmẹ.

¹⁵ Ị́ nemimẹ, Yei Nyanaḅọ, wa ḍumo kọn àrị ọkụ, anị jịn ama ḅie fa apụ pịkị igoniapụ ḅara, mịna ḅieju-aḍapụma mịẹ ḅara mị. Mịna enema, ḅọrọarị tẹmẹ kịkẹmẹ, fị pịkị wa gbarị-ẹkẹ.

¹⁶ Yei Nyanaḅọ, mịna Tamụnọ, wa ma ngọma ọkị gboloma se ḅo Oputẹkẹwarị nama ị́ pịrị-ẹḅomẹ, se ị́ya fịafịa ẹrẹ mị soma, ọkụma arịmgba ị́ ḅara ḅomẹ pịkị ị́yaye-ẹ.

¹⁷ À nemimẹ na ị́rị́, ị́ tomoniḅọ goyegoye kuḅie ḍaḍikiḍikimẹ, se karakaraye mịẹapụ ma ini ị́ ḅụḅẹlẹḅẹlẹmẹ. Karakaramịẹye ḅụ na, jokoma ḅereni mị ḅụ na, à kuḅie lokoloko ḅaraḅụ maye mamgba seni ị́ pịrịmẹ.

¹⁸ Mịna ḅieju-aḍapụ Ebraham ḅe na Aịzịk ḅe na Jekọb ḅe na Nyana Tamụnọ, gbun kụrọ ḅẹlẹma seni ị́ya tomonima kuḅie chụa gbaso pịkị mịẹ ini sịkịmamgba ị́ ḅereni.

¹⁹ Ị̀ya tọkụ Sọlọmọn ḅe mịẹse ò kuḅie mgba ọ̀ nwọse ị́ ḅịpịpoki se ị́ tọn ḅara goyegoye nwọse Oputẹkẹwarị mị nama, anị à yekarakarama wẹrị pịrịsaye mị.”

²⁰ Anị Devid ḅe tomonima ḅẹye-ẹ, “Ọ́ Nyanaḅọ Ḅe boma, ọ́mịna Tamụnọ Ḅe!” Se tomoni ogbo mị mgba Nyanaḅọ Ḅe bomamẹ, inia ḅieju-aḍapụma Tamụnọ Ḅe; se ini tịḅịtu pịkị osi se Nyanaḅọ Ḅe na amanyanaḅọ ḅe na pịrịmẹ.

²¹ Anị kanakoro ene mị ḅụ ini nama-ḅaa-agbamịẹ se Nyanaḅọ Ḅe pịrịmẹ, anị mịẹfịafịama so se tomonima pịrị ini pẹịmẹ. Ini pịkịna nambulo mẹndẹ oyiasi fịnjị, ajirima mẹndẹ oyiasi fịnjị na, ayamburama anana, mẹndẹ oyiasi fịnjị na nwọse agbamịẹ ẹbẹ mị ọgọnọ dọkịma agbamịẹmẹ. Ini pịkị ḍiepịrịaye agbamịẹḅịa iru nwọse ḅomẹ.

²² Anị ene ḅụ ini opu ḅieḅẹlẹ nyanamẹ ini nwọ Nyanaḅọ Ḅe tọrụkuḅu yefị pịkị ḅuye gose. Mịn maịn karama sịkị-ẹ ini Sọlọmọn ḅe ḍukopakụmamẹ amanyanaḅọ ḅaraḅụ. Nyanaḅọ Ḅe ẹrẹ ḅụ ini pulo-se-ọ̀-tịḅị-saramẹ, inia ḅẹrẹtọnḅọ ḅaraḅụ, pịkịna Zadọk ḅe inia agbamịẹḅọ ḅaraḅụ.

²³ Anịḅụ Sọlọmọn ḅe ḍawu Devid amanyanakiri mị ọkịmẹ, Nyanaḅọ Ḅe mịẹpakụmasa kiri mị. Ori anị mịẹye ḅarasọ amanyanaḅọ-ẹ, Izrẹl sẹ mị mgba pịkị ọ̀ ḅịpịpokimẹ.

²⁴ Fịrịnwẹngịapụ mamgba na owunima na, pịkịna ísí Devid awọma na, inimgba ḅerenimẹ na ini nyana ḅereni Sọlọmọn ḅe pịrịḅịa amanyanaḅọ ḅaraḅụ.

²⁵ Nyanaḅọ Ḅe bebe Izrẹl sẹ mị mịẹmẹ ini osi na ḅalafa na nwọ nyana Sọlọmọn ḅe pịrịmẹ. Ọ̀ pịkị ọ̀ mịẹmẹ ò boma nyanatẹịn Izrẹl daḅọrọsapụ mamgba nẹngịmẹ.

Kpụlụma Devid Amada Mị Ḍiki

²⁶ Devid, Jẹsi owu tọkụ ḅe, kụra mesi ọ̀ nwọse ḅẹrẹtọn Izrẹl mị mgba pịrịmẹ.

²⁷ Hibrọn ḅie sọnọma kụra, Jerusalẹm ḅie kụra soi tẹrẹ-a kụra fịnjị ọ̀ nwọse sime sẹ mị damẹ.

²⁸ Ori olomu, kpọ, se ò ḅo fịmẹ. Ọ̀ pẹrẹmẹ, ọ̀ pịkị osi nyanamẹ, se Sọlọmọn oria owu tọkụ ḅe ḅo oria kiri ọkịmẹ amanyanaḅọ ḅaraḅụ.

²⁹ Amanyanaḅọ Devid ḅe ḅẹrẹ, chuku ḅụ sakị mun kuluma la, tẹrẹ-a ịkịankoro apụ, Samụẹl ḅe na, Netan ḅe na, pịkị Gadị ḅe na inia ḍiri ma ḅie gịẹịn waraḅẹ.

³⁰ Gịẹịn ayema ḍukoarịye anị, ọ̀ ḅara-wẹrịma sẹ mị ḍikiḍiki ọkụ, oria kụrọ la-ọkụ, pịkịna paka ọ̀ pịrịaye mamgba na, Izrẹl ḅie na pịkịna ini kelema sẹma ḅie na.