1 Amanyanapụ Sịkị Mịẹaye Ma 28 - Kịrịkẹnị Baịbụl

Devid Ḅe Tọnkoromaye Ma Oputẹkẹwarị Mị Ḅụ

¹ Amanyanaḅọ Devid ḅe tọnmẹ na Izrẹl ḅie fịrịtịḅịdapụ mamgba ḅo Jerusalẹm ḅie koḅiria. Anịgose sẹma ḅie sime fịrịtịḅịdapụ ma na, sẹma tịḅịnịma na, sẹ mị ḅie fịrịma ḍikiḍikiarị fịrịnwẹngịapụma na, sime amanyanaḅọ ḅe pịrị ngọma na, namama na, pịkị oria awọma na—ḍikiḍikiarịapụ ma na jokoma amanyana odo ḍikiḍikiarị fịrịnwẹngịapụma na, owuni tịḅịnịma na pịkịna yela opuapụ ma na—Jerusalẹm ḅie ḅo koḅiriamẹ.

² Devid ḅe inia tọrọkọ chịẹ se ọkwẹịn ini pịrịmẹ, “Ị̀ya ama apụ ómine ị̀ poki, à ḅimẹ sime ḅọlọsịkị laḅịa kụrọ warị à nwọ nama Ọḅọkụ Igbe mị pịrị anị Nyanaḅọ mịna Tamụnọ Ḅe oria ḅụọgbanaye mị. Osi se ọ̀ pịrị ḅụ anị Oputẹkẹwarị nama ọ̀ pịrịḅịa ẹrẹchị à ye karakaramasam.

³ Ọkụma ori ị̀ kikimẹ anị nama mị ḅụ, na ị̀rị̀ owuniḅọ-ẹ, à pịkị ḅakama pulo ọsụnsam.

⁴ Nyanaḅọ, Izrẹl Tamụnọ Ḅe, ị̀rị̀ na ị̀ furoḅie pakaḅoḅịa apụma na sẹlẹmẹ, wa ḅẹrẹtọn Izrẹl mị pịrị gbasoḅịa. Ọ̀ Juda sẹ mị sẹlẹmẹ na ini ma Izrẹl mị se-tọrọkọ-ịsụnḅịapụ pakụmaḅo, anị ọ̀ pịkịna Juda sẹ mị ḅie ị̀ ḍa furo mị sẹlẹ ọkụ-ẹ. Arịa furoma ḅiemgba anị ọ̀ ḅụḅẹlẹye sọmẹ, ị̀ ọkị se ị̀ se Izrẹl mị mgba ḅe amanyanaḅọ mịẹmẹ.

⁵ Ọ̀ tọn-a owuapụ awọ se ị̀ pịrịmẹ, se inimgba ḅie ọ̀ Sọlọmọn ḅe sẹlẹmẹ ò ḅo Izrẹl mị da, Nyanaḅọ Ḅe sẹ mị.

⁶ “Nyanaḅọ Ḅe ị̀ ḅẹmẹ na, ‘Ị́ya tọkụ Sọlọmọn ḅe anị ị̀ya Oputẹkẹwarị mị namaḅịaye-ẹ. Àrị ọ̀ sẹlẹ se ị̀ya tọkụ mịẹsam, ị̀rị̀ pịkị ḍawu sọḅịa.

⁷ Àrị oria amanyanakiri mị mịẹse anị ḅọlọsịkị laḅịa, ò nemikase tọrụkweinma ị̀ya olokoma na à tọnye mamgba na à ḍukoaye ma na mịẹ ma mun ọkụma, anị mịọkụ ọ̀ mịẹarị ḅara mị.’

⁸ “Anịgose mịọkụ, ị̀ya tomoni, mịna Tamụnọ Ḅe tọrụkuḅu na, mị Izrẹl mgba koḅiria mị ḅie na, anị Nyanaḅọ Ḅe oria tomonima à kụrọma ḍuko ọ́ pịrịaḅẹ na ọ́ tọrụkweinma Nyanaḅọ mịna Tamụnọ Ḅe ḅịpịpoki se ọ̀ tọn wa pịrịye goyegoye nwọ mịẹ, mịẹso sịkị ọ́ mị iḅi ama mị nyana anga ma munḅịa ọkụ, se mịẹso sịkị ọ́ pịkị anị ḅọrọma ọ́mịna ọḅụju ḅoarị ḅụọma pịrị gbasoḅịa ọkụ.”

⁹ Se ọ̀ nwọse Sọlọmọn ḅe ḅẹmẹ, “Ị̀ya tọkụ, à ḍuko kụrọma ị́ pịrịaḅẹ ị́ ḍaḅe Tamụnọ ḅe nemi, se ị́ kuḅie mgba pịkị kuḅie maịn-maịn tọnka na pịkị kuḅie chịẹ-chịẹ-chịẹ ḅara na nwọse fịrịnwẹngị ọ̀ pịrị. Mịna koroma mamgba na, wa ḅiarịaye ma na, ò nemimẹ. Ị́ nemikase ọ̀ damamun ọkụma, ori ị́ ọkịḅịa; ọkụma ị́ nemikase ọ̀ ḅụ ḅụ pịkịso ọkụma, ori ị́ se gbin koroma gbasoḅịa.

¹⁰ Anị ị́ ḅụ okoroḅịa na, Nyanaḅọ Ḅe, ori ị́ sẹlẹsam na ị́ ḅo oria fịafịa Oputẹkẹwarị mị nama. Mịọkụ anị nama—se pịkị kuḅie kụrọma anị nama.”

¹¹ Devid ḅe, Sọlọmọn ḅe ò se warị mị namaḅịa ọkụmgba ọ̀ tọn ọ̀ pịrịmẹ, ngọ koko ḅie ma na jịn-a ḅie na, pịkịna Opuma Fịafịatẹịn Nyọ mị na, anị si-wẹrịso mị simesimenyọ mị.

¹² Ọ̀ pịkị ò kuḅie sime se ò se ḅara-wẹrịma nyọ mị wẹrịḅịa ọkụ, tọn ọ̀ pịrịmẹ ḅẹrẹkọn odo mị na, anị kelema ḅie ma na, pịkịna Oputẹkẹwarị ḅirimaye ma na, sime Nyanaḅọ Ḅe pịrị ḍiepịrịaye koko ḅie ma na.

¹³ Devid ḅe pịkị tọn ọ̀ pịrịaye anị, ọ̀ mịẹse agbamịẹapụma na Livaị apụma na inia Oputẹkẹwarị fịrị mị nwẹngị, pịkị kpaịnma arịa fịrịnwẹngịaye ma koko.

¹⁴ Ò ḍuko pakụmamẹ seleḅa na goli na ḅara wẹrịma fịrị ḅụ sọḅịa ọkụ, anị àrị se fịrịnwẹngịaye tẹmẹ ḅụ,

¹⁵ anị gbọrị tọnjie na tọnjie gbana aye na ḅụ sọḅịaye,

¹⁶ seleḅa dẹbụl ma na, gbọrị goli-goli dẹbụl goyegoye na, anị ini se Tamụnọ Ḅe pịrị fịturu okpokpo gbana ayema.

¹⁷ Ọ̀ pịkị ḍukopakụma ini pịrịmẹ, ini se ye-gbọ-fịfị-aye na bọlị na ojongo na ḅụ sọḅịa jokoma goli pịkị se yefị ẹfẹrẹ ḅụ sọḅịa seleḅa na goli na,

¹⁸ pịkịna ini se insẹnsị dọkịma dọkịma ẹbẹ mị ọkịḅịa jokoma goli, Ọḅọkụ Igbe mị na pụra ḅịa kporokporo mịẹḅịa goli na,

¹⁹ Amanyanaḅọ Devid ḅe, nwọ ḅẹmẹ, “Ma mamgba Nyanaḅọ Ḅe na mịnaḅụ na, tọn ị̀ pịrị na à deki nwẹngị-ẹ nwọḅẹ dagbụkụkụma ḍiri ma ḅie gịẹịn waraḅẹ.”

²⁰ “Kụrọma chịẹ pịkị ị́ kuḅie mịẹkụrọma. Fịrị mị sakị, se ḅerenima gbọrịye sọ ị́ dachịẹma. Tamụnọ Nyanaḅọ Ḅe, à fịrịnwẹngị pịrịarịḅọ ḅe ori ị́rị́ na simeḅịa. Ori ị́ sarakoroma ẹkẹ ọkụma ori ị́rị́ na sime nweni oria Oputẹkẹwarị mị ḅụ ị́ nwẹngịarị fịrị mị faḅịa.

²¹ Agbamịẹapụma na Livaị apụma na Oputẹkẹwarị ḅie ini nwẹngịḅịa fịrịma ini àrị tọn wẹrịsam. Fịrịnwẹngịapụ inia kịrịkịrị aka ma ḅụ tọrụ se ị́ ḍikisam ḅarachụa ị́ pịrịḅịa ẹrẹchị, pịkị tomonima na inia tịḅịnịma na ị́ya chịnḅịpị mị korumẹ.”