1 Amanyanapụ Sịkị Mịẹaye Ma 20 - Kịrịkẹnị Baịbụl

Devid Ḅe Raba Mị Ọkịmẹ

¹ Jịn ịwọ ịnyanya pakaḅoarị sịkị ḅụ, anị amanyanapụma ọmụ munmun sịkị mị ḅụ, Joab ḅe oria ọmụogbo mị na paka mun owu se Amọn mị pakamẹ; Amanyanaḅọ Devid ḅe, anịsịkị mị ḅụ Jerusalẹm ḅieḅụ ò simemẹ. Ini Raba opuama mị gbẹịnmachịẹ se owu seni anị pakamẹ pịkị anị kanmẹ.

² Amọn apụ oru Mọlẹk mị goli okpokpo soi inein okpokpo fịnjị ini nwọse amanyanaḅọchu mịẹ anị pịrịmẹ, anịa ḅieḅụ opuma yela ḍụparị simemẹ se Devid ḅe anị sin seni oria amanyanaḅọchu mị ḅie chụamẹ. Opuama mị ḅieḅụ tọn aye ọ̀ nwọ ọfọịn somẹ.

³ Ori opuama mị ḅie tomonima kunso, se ini fịkịfịkị na, ikulele ọgụ na, pịkị apala na nwọse fịrịnwẹngịmẹ. Ọ̀ pịkị anị gbọrị ḅara mị seni ísí Amọn amama ḅie sime apụ mamgba nwọ mịẹmẹ. Anịsịkị ori na oria owuapụma na vinpịkị so Jerusalẹm mun mẹ.

Ini Filistia Godoro Apụ Ma Na Sọ Owu Ma

⁴ Ọḅụkọ, ọmụ koromẹ Filistia apụma na ini na, Gaza mị ḅieḅụ. Mịn sịkị mị ḅụ anị Sibekaị, Hushaḅọ ḅe gbọrị godoroḅọ nwọ ḅaaye-ẹ oria ẹrẹ anị Sịpaị, se Filistia apụma ọmụ inia ḅara simẹ.

⁵ Ini Filistia apụma na pịkị jịn ọmụgbinmẹ, se Ẹlhanan, Jea yaḅe Lamaị ḅe ḅaamẹ anị Gat ḅie ḅo godoroḅọ ḅe numbireowu ḅe, oria angwa-chịn mị ḅịtẹ-ḍori mgbẹsẹchịn mị kpokoro ọkụ kpokoromẹ.

⁶ Gat mị ḅie ini pịkị jịn ọmụgbinmẹ, anịju gbọrị godoroḅọ sonio-a ḅaratụmgbalị gbọrị ḅara gbọrị ḅara pịkị sonio-a ḅụọtụmgbalị gbọrị ḅụọ gbọrị ḅụọ ọ̀ nwọ nyanamẹ. Olomu sịkị ḅie godoro apụma furo ḅieḅọ-ẹ.

⁷ Ori Izrẹlapụma seni papaye mịẹmẹ, se Jonatan, Devid numbireowu Shama yaḅe ọ̀ ḅaamẹ.

⁸ Devid ḅe na oria owuapụma na ḅaa mịna tẹrẹ-a apụma, inimgba Gat mị ḅie godoro apụma furo ḅie apụ-ẹ.