1 Amanyanapụ Sịkị Mịẹaye Ma 19 - Kịrịkẹnị Baịbụl

Devid Ḅe Ori Amọn Apụ Ma Na Siria Apụ Ma Na Nẹngịmamẹ

¹ Sịkị ḅọrọ sịkị Amọn Amanyanaḅọ Nahash ḅe ọ̀ fịmẹ, se yayo Hanọn ḅe ḅo amanyanaḅọ sọmẹ.

² Amanyanaḅọ Devid ḅe nwọ ḅẹmẹ, “Gbun ḅereni nyana ikia à nwọ ḍiepakụma Hanọn ḅe pịrịḅịa, anị ḍawu Nahash ḅe ị̀ ḅụ mịẹ ọkụ mị.” Anịẹrẹchị Devid ḅe okumun-apụ fịrịma mun ọ̀ nyana ḍikitịḅịfoin mị nwọ ḍukopakụma ọ̀ pịrị-ẹmunmẹ ḍawu ḅe fị ḅụ. Ini mun Amọn la se Amanyanaḅọ Hanọn ḅe agba sịkị,

³ Amọn apụ tịḅịnịma nwọse amanyanaḅọ ḅe ḅẹmẹ, “Osi se ị́ ḍa ḅe pịrị gose Devid ḅe mịna apụma fịrịmaḅo oria tịḅịfoin mị ḍiepakụma ị́ pịrị-ẹḅomẹ ị́ nwọ chịn? Ngịsị! Ori ini seni mịnyọ fịrịmamẹ na ini ḅo ama mị ẹnyẹ, se ama mị nwẹngị kelema mịẹse ori anị kanḅịa ọkụ!”

⁴ Hanọn ḅe ò Devid okumun-apụ ma kun, inia ḅapuko ọgụrẹ ma sẹịn sin, inia tumo pẹkẹrẹ ma ḅụ wẹrị inia ḅụchụayema kịrị, se ini desinmẹ.

⁵ Vinpịkị ama mun mị opuma inia ḅụgereremamẹ. Devid ḅe pakaye mị naa sịkị ọ̀ ḅịpị seni ini fịrịmamẹ na ini Jẹriko ḅie sime ọkịmun inia ḅapuko ọgụrẹ ma sẹnị sịkị ini ḅo.

⁶ Amanyanaḅọ Hanọn ḅe na Amọn apụma na ḅo nemisam na ini Devid ḅe seni inina-tarakaḅọ mịẹsam, anịgose ini seleḅa okpokpo inein-a poku na sọnọ ẹndẹ fịnjị nwọse ọgọnọju Mẹsopotemịa ḅie na pịkị Siria sẹma ḅie, Meaka na Zoba na ḅie ḅụ, owuni kporokporo na pịkị àrị dọkụ ḍin apụ na nwọ ọkọmẹ.

⁷ Ini ọkọ kporokporo ọmụarụ inein-a poku ma na pịkị Meaka amanyanaḅọ ḅe ọmụogbo mị na ḅo Mẹdiba mị na kpekima ikowarịma pike simemẹ. Amọn apụma sọnị inia opuamama ḅie pakaḅo owusọḅịa ẹrẹchị, ḅụkarakarama simemẹ.

⁸ Devid ḅe pakarịye mị naa sịkị, Joab ḅe na bebe oria kụrọ ọmụogbo mị mgba na ọ̀ nwọ fịrịma pakụmamẹ.

⁹ Amọn apụma ini nwẹngị pakaḅo se ḅọrọ mun Raba mị laḅịa ọrụ mị ḅụ kiri-ọkịmẹ, anị inia tịḅịda opuama mị, anịsịkị ḅo ḅarachụa-ẹḅo amanyanapụma sẹ mị ḅụ ḅele nyọ ḅụ kiri-ọkịmẹ.

¹⁰ Joab ḅe ọḅụ-na-kuḅu-na ḅụ tarakapụma owu se ọ̀ pakaḅịa ọkụ mị nwọ ọrị sịkị, ori Izrẹl mị ḅie owusọtẹịn owunima sẹlẹ ọkịmẹ se ini seni Siria apụma daọrụ ḅụ koromamẹ.

¹¹ Ísí kirikọn oria owuni kpo ma ọ̀ nwọse numbireowu Abishaị ḅe ọmụkụlọ mị chuku ḅie koromamẹ, anịsịkị ori Abishaị ḅe ọkị seni Amọn apụma na damadama nyọ ḅụ koromamẹ.

¹² Joab ḅe nwọse ọ̀ ḅẹmẹ, “Nemikase Siria apụma ị̀ nẹngịmaḅẹ ị́ nwọ ọrịmẹ ḅẹḅẹ ḅo ḅarachụa ị̀ pịrị, se nemikase Amọn apụma ị́ nẹngịmaḅẹ à nwọ ọrịmẹ ḅẹḅẹ ị̀rị̀ pịkị ḅo ḅarachụa ị́ pịrịḅịa.

¹³ Ịnyọ chụa pịkị kụrọkuḅie nyana! Ye wa gagama owusọ mịna tomonima na pịkị mịna Tamụnọ Ḅe opuamama na pịrị, se ye Nyanaḅọ Ḅe ḅereniye mị mịẹ.”

¹⁴ Joab ḅe na oria owuapụma na tọrọkọ mun se owu mị paka-ẹmunmẹ, se Siria apụma mangịsomẹ.

¹⁵ Amọn apụma, Siria apụma mangịsoarị ọkụ nwọ ọrị sịkị, ini sọnị Abishaị ḅe ḅụ mangị se vinpịkịso opuama mị ḅie mun mẹ. Anịsịkị Joab ḅe vinpịkịso Jerusalẹm mun mẹ.

¹⁶ Siria apụma ini nemimẹ na, Izrẹlapụma ini nẹngịmasam nwọḅẹ sịkị, ini okunwẹngịapụ se Yufretis Tọrụ mị ḅụ ísí pẹkẹrẹ sime Siria apụma fịrịmamẹ se ini ọkịḅo inia ḅụ chụamẹ; se ini seni Shobak ḅe ọmụkụlọ mị chuku ḅie koromaye-ẹ, ori anị Amanyanaḅọ Hadadiza Zobaḅọ ḅe oria ọmụtịḅịdaḅọ ḅe-ẹ.

¹⁷ Ini mịn mị ḍuko Devid ḅe pịrị sịkị, ori Izrẹl owuni kpo ma koḅiri, Jọdan mị saḅa, se ini seni tọrụ se Siria apụma da nyọ koromamẹ. Owu mị sakịmẹ.

¹⁸ Ọmụ mị sakị sịkị Siria ọmụogbo mị Izrẹlapụ ọmụogbo mị ḅụ pịkị mangịsomẹ. Devid ḅe na oria owuapụma na Siria apụ kporokporo ọmụarụ dọkụarịapụ ma ḅụ kịnị-a mẹndẹ oyiasi fịnjị ofori kịnị poku ini nwọ ḅaamẹ se ḅụọ seni nwẹngị owunima ḅụ sọnọ-a poku na. Siria apụ ọmụtịḅịdaḅọ Shobak ḅe sọnị ini ọ̀ ḅaamẹ.

¹⁹ Nyana ḅereni Hadadiza ḅe pịrị amanyanapụma, Izrẹlapụma ini nẹngịmasa ọkụ nwọ ọrị sịkị, ini Devid ḅe na deinma mịẹmẹ se ḅo nyana ḅereni ọ̀ pịrị apụ sọmẹ. Siria apụma ini ḅarị ḅarachụa Amọn apụma pịrị ḍọkịkẹ.