1 Amanyanapụ Sịkị Mịẹaye Ma 15 - Kịrịkẹnị Baịbụl

Ọḅọkụ Igbe Ọkịsoḅịa Ḅe Ḅụkarakarama

¹ Devid ḅe ọ̀ tọn-a warị nama ọ̀ ḅụ pịrịmẹ Jerusalẹm oria opuama mị ḅie. Ọ̀ pịkị nyọ tẹlịma Tamụnọ Ḅe Ọḅọkụ Igbe mị pịrịmẹ se ikowarị pike chịẹma anị pịrịmẹ.

² Anịsịkị ọ̀ nwọ ḅẹmẹ, “Livaị apụma kẹngẹ anị Ọḅọkụ Igbe mị dekiḅịaye-ẹ, anịatịḅị ini anị Nyanaḅọ Ḅe sẹlẹọkị na anị deki pịkị fịrịnwẹngị ọ̀ pịrị gbaso nwọḅẹ apụ ma-ẹ.”

³ Anị Devid ḅe bebe Izrẹlapụ mamgba chịn ḅo Jerusalẹm ḅieḅụ koḅirimaye-ẹ Ọḅọkụ Igbe mị ọkịḅo ọ̀ tẹlịma koroma anị wẹrịma nyọ mị ḅie koromaḅịa ẹrẹchị.

⁴ Anịḅe jịnye Erọn furo ḅie apụma na Livaị apụma na ọ̀ nwọ chịnmẹ.

⁵ Livaị apụma ḅie Kohat sẹ mị ḅie anị Yurịẹl ḅe pakaḅoye-ẹ, ori ọ̀ tịḅịda oria sẹ apụma ḅụ kịnị-a sonioasi nwọ pịrịmẹ;

⁶ Mẹreraị sẹ mị ḅie, Asaịya ḅe tịḅịda kịnị oyigbọrị chịn fịnjị nwọ pịrịmẹ;

⁷ Gashọn sẹ mị ḅie Joẹl ḅe tịḅịda kịnị-a sonioasi oyi fịnjị nwọ pịrịmẹ;

⁸ Ẹlizafan sẹ mị ḅie Shẹmaịya ḅe tịḅịda kịnị oyiasi nwọ pịrịmẹ;

⁹ Hibrọn sẹ mị ḅie Ilaịẹl ḅe tịḅịda kịnị iniasi nwọ pịrịmẹ;

¹⁰ se Ọzaịẹl sẹ mị ḅie Aminadab ḅe tịḅịda kịnị-a sọnọasi oyi fịnjị na mama apụ pịrịmẹ.

¹¹ Devid ḅe agbamịẹapụ ḅụ Zadọk ḅe na Abaịata ḅe na chịn ḅo chumẹ pịkị sonio-a Livaị apụ na, Yurịẹl ḅe na, Asaịya ḅe na, Joẹl ḅe na, Shẹmaịya ḅe na, Ilaịẹl ḅe na, pịkị Aminadab ḅe na.

¹² Ọ̀ nwọse Livaị apụma ḅẹmẹ, “Ómine anị Livaị apụ sẹma ḅie ḅụ tịḅịnị ma-ẹ. Ómine ọ́mịna ḅụ ma mịẹfịafịama pịkị oju-a Livaị apụma na, mịẹse ómine ineda Nyanaḅọ Izrẹl Tamụnọ Ḅe Ọḅọkụ Igbe mị ọkịḅo à tẹlịma koroma anị wẹrịma nyọ mị ḅie koromaḅịa ọkụ.

¹³ Tatarị sịkị mị ḅụ ó sime anị dekikaye ẹrẹchị, Nyanaḅọ mịna Tamụnọ Ḅe ò fomuḅara seni wa pịrịmẹ wa seni ọ̀ tẹkẹ na iḅi ḅara wa nwọse ọ̀ tẹkẹkaye ẹrẹchị.”

¹⁴ Anịsịkị agbamịẹapụma na Livaị apụma na inia ḅụ ma mịẹfịafịamamẹ mịẹse Nyanaḅọ Izrẹl Tamụnọ Ḅe Ọḅọkụ Igbe mị ọkịsoḅịa ẹrẹchị.

¹⁵ Livaị apụma nangwọ chịn seni inia aba ma ọgọnọ gbana anị pụra mẹ anị Nyanaḅọ Ḅe Moziz ḅe ḅụ ḅọrọ tọnsa ḅaraḅụ.

¹⁶ Devid ḅe tọn Livaị apụma na inia tịḅịnịma na pịrịmẹ na ini Livaị apụ kịrịkịrị ogbo nwọ tọn se ini ḅieḅẹlẹ nime nwọ chu, pịkị ọbọ ma na ḅarafarịaye ma na nwọ se ti kọn.

^17-21 Nime chu apụ sẹma ḅie ini mịna apụma sẹlẹọkịmẹ ḅịaḅịa jaịn ḅarafarịaye ma farịḅịa ẹrẹchị: Heman, Joẹl yaḅe na, oria mịnapụ Esaf Bẹrẹkaya yaḅe na, pịkị Itan Kushaya yaḅe na, Mẹreraị sẹḅọ ḅe, seni ḅarachụa ini pịrị ḅụ gele pụkọ nyana ọbọ farịḅịa ẹrẹchị ini mịna Livaị apụma ọkịmẹ: Zẹkaraya ḅe na, Jeazịẹl ḅe na, Shẹmiramọt ḅe na, Jihaịẹl ḅe na, Ọnaị ḅe na, Ẹlaịab ḅe na, Measaya ḅe na, pịkị Bẹnaya ḅe na. Iderima pụkọ nyana ọbọ ma farịḅịa ẹrẹchị ini mịna Livaị apụma sẹlẹọkịmẹ, Matitaya ḅe na, Ẹlifẹlẹhu ḅe na, Mikneya ḅe na, Azazaịya ḅe na, pịkị Oputẹkẹwarị koruapụ, Obẹd Idọm ḅe na Jeaịẹl ḅe na.

²² Ò nime mịẹmịẹye nemi la ḅara gose, Kịnenaịya ḅe ini ò seni Livaị opu nime chu apụma ḅie tịḅịnịḅọ mịẹmẹ.

^23-24 Bẹrẹkaya ḅe na Ẹlkena ḅe na, pịkị Obẹd Idọm ḅe na Jihaịya ḅe na, ini nwọ sẹlẹọkị seni Ọḅọkụ Igbe mị koruapụ mịẹmẹ. Agbamịẹapụ Shẹbanaya ḅe na, Joshafat ḅe na, Netanẹl ḅe na, Amasaị ḅe na, Zẹkaraya ḅe na, Bẹnaya ḅe na, pịkị Ẹleaza ḅe na ini nwọ sẹlẹọkịmẹ Ọḅọkụ Igbe mị tọrọkọ ḅụ oḍu ma ofuroḅịa ẹrẹchị.

Ọḅọkụ Igbe Mị Saḅama Jerusalẹm Mun Mị

²⁵ Anịẹrẹchị Amanyanaḅọ Devid ḅe na, Izrẹl tịḅịnịma na, ọmụtịḅịda apụma na so Obẹd Idọm ḅe warị mun mẹ Ọḅọkụ Igbe mị ọkịsoḅịa ẹrẹchị, ini pịkị opu alalị fịmẹ.

²⁶ Sọnọma owoi nambulo na sọnọma anana na ini nwọse agbamịẹmẹ, mịẹso sịkị anị iniaḅụ okoroḅịa na Tamụnọ Ḅe ọ̀ ḅarachụa Ọḅọkụ Igbe mị pụra àrị Livaị apụma pịrịḅịa.

²⁷ Devid ḅe na, Kịnenaịya nimeni tịḅịnịḅọ ḅe na, pịkị Igbe mị pụra Livaị apụma na, iḅitẹịn lọkọ-ḅịtẹ se gbin koroḅụchụaye ini nwọ chụamẹ. Devid ḅe, Gele agbamịẹḅọ ḅe fịrịnwẹngịḅịa sịkị ḅụ, se ḅụchụaye ọgọnọ gbana chụachụa abagbanaye mị, Devid ḅe lọkọ-ḅịtẹ ọ̀ nwọse anị gbin chụamẹ.

²⁸ Izrẹlapụ mamgba Ọḅọkụ Igbe mị ḅọrọma mun Jerusalẹm ḅie koromamẹ, ḅieḅẹlẹ oloku kọn ḅụ na oḍu ma na namatịḅị ịvalị ofuro ofuro ayema na ḅarafarị ayema na pịkị ọbọ mamgba na fie gbolomamẹ.

²⁹ Ini Igbe mị seni opuama mị ḅie soḅoarị sịkị, Maịkal, Sọl ḅe ḅarọ ma, pẹlẹ ḅọkọ mị ḅụ toluma ḍiki se Amanyanaḅọ Devid ḅe sẹkịarị ọkụ na ọ̀ pịkị pekele ḅieḅẹlẹarị ọkụ na nwọ ọrị sịkị árị ò ḍikisimamẹ.