1 Amanyanapụ Sịkị Mịẹaye Ma 14 - Kịrịkẹnị Baịbụl

Devid Ḅe Jerusalẹm Mị Ḅieḅụ Mịẹaye Ma

¹ Amanyanaḅọ Hiram Tayaḅọ ḅe tomoni seni Devid ḅe fịrịmamẹ tuḅo gboloma ḅịpịogbosọ nyanaḅịa ẹrẹchị; ori awụ-a chịn na ḍụparị-se-warị nama nama apụ na pịkị akanị apụ na seni ọ̀ sẹịnmamẹ, ò seni amanyanaḅọ warị namaḅịa ẹrẹchị.

² Anị Devid ḅe ḅụokoromẹ na Nyanaḅọ Ḅe ori ọ̀ mịẹkụrọmasam Izrẹl amanyanaḅọ ḅaraḅụ pịkị oria amanyanakiri mị mịẹse anị lọkọlọkọye sọaḅẹ oria tomonima tịḅị gose.

³ Jerusalẹm mị ḅieḅụ Devid ḅe pịkị jịn-a eresimemẹ pịkị jịn-a owuapụ awọ na eremeni awọ na nwọ yimẹ.

⁴ Mịna awọma Jerusalẹm mị ḅieḅụ ini ini yi ọ̀ pịrịmẹ: Shamua ḅe na, Shobab ḅe na, Netan ḅe na, Sọlọmọn ḅe na,

⁵ Ibha ḅe na, Ẹlishua ḅe na, Ẹlpẹlẹt ḅe na,

⁶ Noga ḅe na, Nefẹg ḅe na, Jafaịya ḅe na,

⁷ Ilaịshama ḅe na, Bieliada ḅe na, pịkị Ẹlifẹlẹt ḅe na.

Devid Ḅe Filistia Apụ Ma Nẹngịma Mẹ

⁸ Filistia apụma Devid ḅe ḅo mịọkụ bebe Izrẹl sẹ mị mgba amanyanaḅọ sọsam nwọḅẹye mị naa sịkị, inia ọmụogbo mị pakamunmẹ owuse ọ̀ pakaḅịa ẹrẹchị. Ọkụma Devid ḅe mịn mị naamẹ, se ori ọ̀ ḅụ karakarama ini pịrịmẹ.

⁹ Filistia apụma ḅo Rifeim Pẹsịkiri mị la se sakị kụrọḅara seni ye ọfọịnmẹ.

¹⁰ Anịeso Devid ḅe nwọse Tamụnọ Ḅe gbelamẹ, “Àrị owuse Filistia apụma paka? Ị́ ọmụḅaraiḅi seni ị̀ pịrịḅe?” Nyanaḅọ Ḅe nwọse ọ̀ pẹkẹrẹmẹ, “Iin, owuse ini paka! Àrị ọmụḅaraiḅi seni ị́ pịrịḅịa!”

¹¹ Anịẹrẹchị Devid ḅe owuse ini pakamẹ Beal Pẹrazim mị ḅụ se ini nẹngịmamẹ. Ọ̀ nwọ ḅẹmẹ, “Tamụnọ Ḅe ị̀ seni tarakapụ ọmụogbo mị kantoluḅọrọsam opu mengi yesima ḅara mị.” Anịẹrẹchị ini nwọse anị nyọ mị chịnmẹ Beal Pẹrazim.

¹² Filistia apụma mangị so sịkị inia oru ma ini seni sara koromamẹ, se Devid ḅe kụrọ pịrịmẹ na ini àrị dọkịma.

¹³ Ḅọlọka sịkị ḅụ Filistia apụma vinpịkị pẹsịkiri mị mun se sakị pịkịna kụrọḅara seni ye ọfọịnmẹ.

¹⁴ Devid ḅe pịkịna Tamụnọ Ḅe ḅịpị gbelamẹ, se Tamụnọ nwọse ọ̀ pẹkẹrẹmẹ, “Inia tọrọkọ ḅụ wẹrị owu se ini pakama, ọkụma kana ḅọrọ se inia ọḅụju ḅụ, balsam ejema tọrọkọ wẹrị owu se ini paka.

¹⁵ Balsam ejema ọgọnọ ḅụ ị́ nwẹngịarị ḅụọ naasam nwọ ḅẹḅẹ, anịsịkị owu se ini paka, anịatịḅị àrị ọ́mịna tọrọkọda mun Filistia apụ ọmụogbo mị nẹngịmaḅịa.”

¹⁶ Devid ḅe Tamụnọ Ḅe dada tọnye mị mịẹmẹ, anịẹrẹchị ò Filistia apụma nẹngịmamẹ Gibiọn mị ḅụ ọkị sakị mun Gaza mị la.

¹⁷ Devid ḅe oria ẹrẹso mị wasama mun nyọ mamgba nwọ lamẹ, se Nyanaḅọ Ḅe mịẹse sẹ layelaye Devid ḅe ḍikiḅalafamẹ.