1 Amanyanapụ Sịkị Mịẹaye Ma 11 - Kịrịkẹnị Baịbụl

Devid Ḅe Ḅo Izrẹl Na Juda Na Amanyanaḅọ Sọmẹ

¹ Bebe Izrẹlapụ mamgba so Devid ḅe damamunmẹ Hibrọn mị ḅie, se nwọse ọ̀ ḅẹmẹ, “Mine anị ị́ya mịnapụ owuapụma na eremeni ma na-ẹ.

² Ḅọrọsa sịkịḅụ, Sọl ḅe amanyanaḅọ sọ wa pịrịarị sịkị sọnị, ị́ ọmụkụlọda Izrẹl mị pịrịsam, pịkị Nyanaḅọ ị́ Tamụnọ Ḅe ò yese ị́ karịmẹ na ị́ kụlọda oria tomonima pịrị pịkị inia ḅẹrẹtọnḅọ nwọ sọḅịa.”

³ Anịẹrẹchị bebe Izrẹl mị ḅie, tịḅịnị mamgba Amanyanaḅọ Devid ḅe ḍọkịma ḅomẹ Hibrọn mị ḅie. Ori ini na osi nyana gbọrịḅụ sime ḅịpị ogbosọ nyanamẹ, ini pulo se ọ̀ tịḅị saramẹ se ò ḅo Izrẹl amanyanaḅọ sọmẹ, anị Nyanaḅọ Ḅe Samụẹl ḅe ḅụ ḅọrọ ye ḅerenisa ḅaraḅụ.

⁴ Anịeso Amanyanaḅọ Devid ḅe na bebe Izrẹlapụ mamgba na mun owu seni Jerusalẹm opuama mị pakamẹ. Anịsịkị ḅụ ini se anị nemi ẹrẹ anị Jebus. Jebus apụma, anị dada ama mị nyana apụma anịju ḅụ ini pa anga waraḅẹ.

⁵ Jebus apụma nwọse Devid ḅe ḅẹmẹ na, ngịsị ori ineda opuama mị ḅie sọ ẹkẹ. Ọkụma Devid ḅe ini nama kụrọ ama Zaịyọn mị ọkịmẹ, se mịọkụ ini nwọse anị chịnmẹ “Devid Opuama.”

⁶ Ọkụma Devid ḅe nwọ ḅẹ ḅọrọsam na, “Tatarị Jebusḅọ ḅaaḅịaḅọ ḅe anị ọmụogbo mị ḅụ kụlọdaḅọ sọḅịaye-ẹ!” Joab, Zẹruaya ma yaḅe tọrọkọda owu mị pakamẹ se ò ḅo kụlọdaḅọ sọmẹ.

⁷ Devid ḅe ò mun kụrọ ama mị ḅie anga ẹrẹchị, iniḅo nwọse anị chịnmẹ “Devid Opuama.”

⁸ Ò kpoto opuama mị namamẹ, ini kiri mị pịrịpakụma, chịngị mị ḅụ ịrụapakapaka nyọ da nyọ mị ḅụ ọ̀ sakịmẹ, se Joab ḅe opuama mị ḅụ kirikọn nyọ mamgba tẹlịma karamamẹ.

⁹ Devid ḅe oria kụrọ ḅụ, ye sọma mun mẹ anịatịḅị Kụrọmamgba Nyanaḅọ Ḅe ori na omi-ẹ.

Devid Ẹrẹso Owuni Ma

¹⁰ Mị anị Devid owunima ḅie ẹrẹ ḍiri ḅie sime ẹrẹso apụ ma-ẹ. Pịkị ísí kirikọn Izrẹlapụma na, ini ḅarachụa ọ̀ pịrị se ò ḅo amanyanaḅọ sọmẹ anị Nyanaḅọ Ḅe yeḅerenisa ḅaraḅụ, ini pịkị oria amanyanakiri mị mịẹ kụrọmamẹ.

¹¹ Tatarịḅọ anị Jashobiam, Hakmọn sẹ mị ḅie ḅọḅe anị “Tẹrẹ-a Apụ” ma ḅie tịḅịnịḅọ ḅe-ẹ. Oria sụḅa mị ò nwọse kịnị-a jieasi na owusọ se inimgba ḅaamẹ gbọrị ọmụ ḅieḅụ.

¹² Jịn ẹrẹsoḅọ “Tẹrẹ-a Apụ” ma ḅie anị Ẹleaza, Dodo ya ḅe-ẹ, Aho sẹ mị ḅie ḅọḅe.

¹³ Ò Devid ḅe pẹkẹrẹ ḅụ sime Filistia apụma na owusọmẹ Pas Damim ọmụ mị ḅieḅụ. Iru mịẹ ịpịamgba ozuma ḅie ò simearịogbo anị Izrẹlapụma sakị mangị soye-ẹ,

¹⁴ anị ori na oria owuapụma na mun ele mị ḅie ogboku chịẹ se Filistia apụma na owusọye-ẹ. Nyanaḅọ Ḅe opu ọmụḅaraiḅi nwọse ọ̀ pịrịmẹ.

¹⁵ Gbọrị ene tịḅịda owuni soi ma ḅie tẹrẹ apụ so Devid ḅe sime anga ọ̀ damamunmẹ ḍụparị mị sime nyọ ḅụ Adulam Pokolo mị na kpeki nyọ ḅụ, anịsịkị mị ḅụ Filistia apụma ḅie gbọrị kpo ikowarị pike sime waraḅẹ Rifeim Pẹsịkiri mị ḅie.

¹⁶ Anịsịkị mị ḅụ Devid ḅe ọmụaye sime kụrọ gbọrị chịngị ọgọnọ ḅụ ò sime waraḅẹ, se Filistia apụma ḅie gbọrị kpo Bẹtlihẹm mị ọkị simesam.

¹⁷ Devid ḅe ama mun ọ̀ tarị so ọkụma, ọ̀ nwọ ḅẹmẹ, “Mgbọkụ gbọrịḅọ pa Bẹtlihẹm onu ḅọkọ mị anga ḅụ sime tiḅe mị ḅie mengi ḍuḅo ị̀ pịrị se à ḅuḅịaka!”

¹⁸ Ẹrẹso tẹrẹ-a owunima Filistia apụma pike sime ikowarị mị ogboku tolu ḅọrọ mun tiḅe mị ḅie mengi ḍuḅo Devid ḅe pịrịmẹ. Ọkụma ò ḅu ḍụkụkẹ; anịnakaraka ò seni sara agbamịẹ Nyanaḅọ Ḅe pịrịmẹ

¹⁹ se nwọ ḅẹmẹ, “Mịn mị àrị ineda ḅu ẹkẹ! Mịna apụma oju pulo mị à nwọ ḅuaḅẹ nwọḅẹ ḅara anị nwọ kịkẹḅịa anị inia ḍumo ma abalaka apụma!” Anịẹrẹchị ò ḅu ḍụkụkẹ. Ini ẹrẹso tẹrẹ-a owunima mị kụrọkuḅie mị nyana fịrịma nwẹngịmẹ.

²⁰ Joab numbireowu Abishaị ḅe anị “Ẹrẹso Kịnị Soi” ma tịḅịnịḅọ-ẹ. Oria sụḅa mị ọ̀ nwọse kịnị-a jieasi na owusọ se ini ḅaamẹ se ò ḅo nweni soi ma ḅie ẹrẹsoḅọ sọmẹ.

²¹ Ori ẹrẹso tẹịnmẹ kịnị soi ma ḅie ḅụ, se ḅo inia tịḅịnịḅọ nwọ sọmẹ, ọkụma ori ẹrẹso “Tẹrẹ Apụ” ma na gbasịkẹ.

²² Bẹnaya, Jẹhoịada ya Kabziẹlḅọ ḅe ẹrẹso owuniḅọ-ẹ; ọ̀ ḅakama kụrọkuḅie nyana fịrịnwẹngịmẹ, ọ̀ pịkị Moab apụ mama opu owuni nwọ ḅaamẹ. Gbọrị sịkị ene okpokpo koro ene ḅụ, ori olulu ḅie koro mun gbọrị chịrịḅa nwọ ḅaamẹ.

²³ Ọ̀ pịkị gbọrị Ijiptḅọ ḅaamẹ, kpokoro pịkị nangwọ sọnọma ḅụọ na ikiḅa laḅọ, anị ngẹrị ngẹrịka opu sụḅa ọlọ gbọrịḅọ. Bẹnaya ḅe tịḅị iku imgbele nwọse owu seni ọ̀ paka se ori Ijiptḅọ ḅe ḅara sime sụḅa mị pọkọ ọkị, se anị seni ọ̀ ḅaamẹ.

²⁴ Mà anị Bẹnaya ḅe mịẹ kụrọkuḅie nyana fịrị ma-ẹ, anị “Kịnị Soi” ma ḅie gbọrịḅọ ḅe.

²⁵ Ori anị gbọkọlọma ẹrẹ paka ḅọ-ẹ “Kịnị Soi” ma ḅie, ọkụma “Tẹrẹ Apụ” ma ẹrẹso ọkụ ọ̀ nwọse ẹrẹsokẹ. Devid ḅe ò seni tịḅịnịḅọ mịẹmẹ ò se ọ̀ ḅụ koruapụma ḅie.

^26-47 Mịna apụma anị ísí gbọkọlọma ẹrẹ paka owuni ma-ẹ: Asahẹl, Joab numbireowu ḅe Ẹlhanan Dodo ya Bẹtlihẹmḅọ ḅe Shamọt Herọdḅọ ḅe Hilẹz Pilẹtḅọ ḅe Ịra Ikẹsh ya Tẹkoaḅọ ḅe Abaịeza Anatọtḅọ ḅe Sibekaị Hushaḅọ ḅe Ilaị Ahoḅọ ḅe Maharaị Nẹtofaḅọ ḅe Hilẹd Beana ya Nẹtofaḅọ ḅe Ịtaị Ribaị ya Gibiaḅọ ḅe Bẹnjamin mị ḅieḅọ Bẹnaya Paịratọnḅọ ḅe Huraị Geash pẹsịkiri ma na kpeki nyọḅọ ḅe Ebiẹl Abaḅọ ḅe Azmavẹt Bahurụmḅọ ḅe Ẹlaịaba Shealbọnḅọ ḅe Heshẹm Gaịzọnḅọ ḅe Jonatan Shegi ya Haraḅọ ḅe Ahayam Saka ya Haraḅọ ḅe Ẹlaịfal Ụr yaḅe Hifa Mẹkeraḅọ ḅe Ahaịja Pẹlọnḅọ ḅe Hẹzrọ Kamẹlḅọ ḅe Nearaị Ẹzbaị yaḅe Joẹl Netan numbireowu ḅe Mibha Hagraị yaḅe Zilẹk Amọnḅọ ḅe Naharaị Joab ọmụaye pụra ḅọ Berọtḅọ ḅe Ịra ḅe na Gerẹb ḅe na Jata apụma Yuraya Hitaịḅọ ḅe Zebad Alaị yaḅe Adina Shiza ya (Rubẹnị sẹ ḅie tịḅịnị owunima ḅie gbọrịḅọ na oria kịnị soi owuni kpo mị na) Hanan Meaka yaḅe Joshafat Mitanḅọ ḅe Ọzaya Ashtẹraḅọ ḅe Shama ḅe na Jeaịẹl ḅe na Hotam owuapụ awọma, Aroa apụma Jẹdaịẹl ḅe na Joha ḅe na, Shimraị owuapụ awọma, Taịz apụma Ilaịẹl Mehavaḅọ ḅe Jeribaị ḅe na Joshavaya ḅe na, Ẹlneam owuapụ awọma Itma Moabḅọ ḅe Ilaịẹl ḅe na, Obẹd ḅe na, pịkị Jeasịẹl ḅe na, Zobaḅọ ḅe.