Biblia Todo Logo
Bìoball air-loidhne

- Sanasan -

Yohana 8 - Nyamwezi New Testament 1951

1 Na haho vajaga, kila umo ku numba yakwe; alisi Yesu wajaga ku Lugulu lwa Maguta.

2 Na handiyu muno wingilaga hangi mwisengelo na vanhu vose vizaga kuwakwe, nawe wikalaga na wavahembekaga.

3 Na vamanicha fitabu na Vafarisayo vamuletaga mukima adimilwe vusihya, vamutulaga

4 hagati, na valimuwila, Muhembeki, mukima mwenuyu wadimagwa vusihya itungo lyenilo wasihaja.

5 Mu ngʼhama Mose watulagilaga kuvatulagula mawe va mutindo gwenugu, naʼho uliyomba kinahe?

6 Genaya vayombaga kumugema, kigele vaguvone muhayo gwa kumuvula. Alisi Yesu winamaga na watonaga na lyala hasi.

7 Alisi aho valambaga kumuvuzya wasanukaga na wavawilaga, Homwene ali vuduhu vukenaguzi mugati ninwe, mwenuyu avukizye kumutula iwe.

8 Hangi winamaga na watonaga hasi.

9 Alisi aho venava vayigagwa yeniyi vafumaga hanze, umo na umo, hambele vanamhala kusika va mhelo, na Yesu walekagwa inene na mukima imile hagati.

10 Aho Yesu wasanukaga wamuwilaga, Mayu, valikuhe? kuduhu umo wakuyangulaga? Nawe wayombaga, Haduhu ninga umo Guku.

11 Yesu wayombaga, Nane mwene kukuyangula ngʼo, uje na ukakenagule ngʼo hangi.

12 Haho Yesu wayombaga hangi navo, uhaya, Nene ndi lumole lwa liwelelo; homwene alindonda, uyu kusimiza ngʼo mu giti alisi akuvi nago mwanga gwa vuzuvuku.

13 Haho Vafarisayo vamuwilaga, Veve ulisangilwaho kunguno yako mwenekili, alisi vusangilwaho wako vukavile wa lole.

14 Yesu witavukaga, uvawila, Nulu ndisangilwa kunguno yane mwenekili vusangilwaho wane vuli wa lole, kunguno ndimanicha uko nafumile na uko ndija, alisi inwe mukamanikizye uko nafumile na uko ndija.

15 Inwe muliyangula na kipimo cha

16 hanze, nene nkavile kumuyangula umo. Alisi ulu ndiyangula, vuvangu wane vuli wa lole; kwisi nkavile ninene sumbwa ndi hamo na Vava uyo wantumizizye.

17 Na mu ngʼhama yinwe yitonilwe ati vusangilwa wa vanhu vavili vuli wa lole.

18 Nene ndi uyu alisangilwa kunguno yane mwenekili, na Vava homwene wantumizizye alisangilwa kunguno yane.

19 Haho vamuwila, Nso ali kuhe? Yesu witavukaga, Inwe mukanimanikizye nene ninga ngʼo Vava; ulu mbe mwanimanikaja nene mbe mwamumanikaja Vava savasava.

20 Mihayo yeniyi Yesu wayombaga hʼitulilo lya nsavo aho wahembekaga mwisengelo; na kuduhu umo wamudimaga, kunguno itungo lyakwe litali kufikaho.

21 Haho Yesu wavawilaga hangi, Nene ndija, ninwe mukunkova, na mukufwa mugati na vukenaguzi winwe, na uko njile mukakovolile kufikako.

22 Haho Vayahudi vayombaga, Kinahe, akwivulaga mwenekili? kunguno

23 aliyomba, Uko njile mukakovolile kufikako. Uyu wavawila, Inwe muli va hasi, nene ndi wa higulya; inwe muli va liwelelo lyenili, nene nkavile wa liwelelo lyenili.

24 Kunguno yeniyi namuwilaga inwe ati mukufwa mugati na mavukenaguzi ginwe, kwisi ulu inwe mukavile kusanizya ati ndi mwenuyu, inwe mukufwamo mu mavukenaguzi ginwe.

25 Haho vamuwilaga, Veve uli nani? Yesu wavawila, Muhayo gwenugu gwene namuwilaga inwe kufuma mbuki.

26 Ndi nayo mihayo mingi kuyomba ninwe na kuyangula. Homwene wantumizizye ali wa lole, na nene mwene ndiyomba genaya mu liwelelo hogene nigagwa hawakwe.

27 Alisi avo vavagi vakamanikizye ati wayombaga kuwavo kunguno yamwa Vava.

28 Kunguno yeniyi Yesu wayombaga, Ulu mulave mwamala kumusunga Mwana wa Munhu, haho mulamaniche ati ndi mwenuyu na nkavile kuvezya kinhu nene mwenekili, sumbwa kitisi Vava

29 wanhembekaga, syenisyo ndiyomba. Na uyo wantumizizye ali hamohene nane, nawe akandekile ninene, kunguno nene hanahana ndigavezya genaya galimutogezya.

30 Aho wayombaga genaya vingi vamusanizaja.

31 Haho Yesu wavawilaga Vayahudi hovene vamusanizaja, Ulu inwe mukudilamo mu mihayo yane, inwe

32 mukuvi loleyene vahemba vane, na mukuyimanicha hanayene, na hanayene yikumukomola inwe.

33 Vamwitavukaga, Iswe tuli va vuvyalwa wamwa Abrahamu, na tutali kumutumamila umo milimo ya vusese, lumehoki uliyomba ati,

34 Mukuvi vanamiko? Yesu wavitavukaga, Homwene aliwita vukenaguzi ali musese wa vukenaguzi.

35 Na musese akadilaga mu numba hanahana, sumbwa mwana akudilaga hanahana.

36 Ulu haho Mwana akumukomola inwe mukuvi vanamiko loleyene.

37 Nene ndimanicha ati inwe muli va vuvyalwa. wamwa Abrahamu, alisi inwe mulikova kumbulaga, kunguno muhayo gwane gukavile na hakwikala muwinwe.

38 Hogene nagawine hamwa Vava genaya ndiyomba na sisyo inwe vene mulita genaya mwigagwa hamwa vava winwe.

39 Navo vitavukaga na vamuwilaga, Vava wiswe ali Abrahamu. Yesu wavawila, Ulu mbe muli vana vamwa Abrahamu, mbe mulitumama milimo yamwa Abrahamu.

40 Alisi lelo mulikova kumbulaga nene, munhu homwene wamuwilaga inwe hanayene, hoyene nigilwe hamwa Mulungu; genaya Abrahamu akavezizye. Inwe mulitumama milimo ya vava winwe.

41 Na vamuwilaga, Iswe tukavyalilwe mu vuyanzi, tuli nawe vava

42 umo, homwene Mulungu. Yesu wavawilaga, Ulu mbe Mulungu ali vava winwe mbe mwantogagwa. Kwisi nene nafumile kumwa Mulungu na nizagaho; ninga nkiletile nene mwenekili, sumbwa uyo wantumizaja.

43 Kungunoki mukavile kumanicha mihayo yane? Kunguno mukakovolile kugwigwa muhayo gwane.

44 Inwe mwafumile kumwa nsinwe Shetani, na mulikova kukimazya kikowa chamwa nsinwe. Mwenuyo wavagi muvulagi wa vanhu kufuma mbuki na akajamilemo mu hanayene, kunguno hanayene yili muduhu muwakwe. Ulu aliyomba vulamba aliyomba genaya gakwe mwenekili, kwisi ali mulamba na vava wa vulamba.

45 Alisi nene kunguno ndiyomba hanayene mukavile kunsanizya.

46 Nani mugati ninwe alikovola kumbula kunguno ya vukenaguzi vumo? Ulu ndiyomba hanayene, kuki

47 mukavile kunsanizya? Homwene ali munhu wa Mulungu akugwigwa muhayo gwa Mulungu; kunguno yeniyi mukavile kwigwa, kwisi mukavile va Mulungu.

48 Vayahudi vitavukaga na vamuwila, Kinahe, tukayombile lole ati uli Musamaria na uli nago mugavo?

49 Yesu witavukaga, Nene nkavile na mugavo, sumbwa ndimukuzya Vava na inwe mulimbengelezya nene.

50 Nene nkavile kulukova lukumo lwane, alisi aliho umo homwene alilukova na aliyangula.

51 Yalole, yalole ndi muwila inwe, Ulu umo aligulindila muhayo gwane, mwenuyu kululavuzya ngʼo lufu ninga hado ngʼo kusika myaka de.

52 Vayahudi vamuwilaga, Lelo tulimanicha vuliko ati uli nago mugavo. Abrahamu wafwaga, na vafumbuzi vene, naʼho uliyomba, Ulu umo aligulindila muhayo gwane mwenuyu kululavuzya ngʼo lufu ninga hado kusika myaka de.

53 Veve uli muhanya kukila vava wiswe Abrahamu homwene wafwile? Na vafumbuzi vene vafwile. Veve uliwitunda kuvi nani?

54 Yesu witavukaga, Ulu ndiwikumucha nene mwenekili lukumo lwane luli lwa gele; ali Vava homwene alinkumucha, homwene muliyomba ati, ali Mulungu wiswe.

55 Na inwe mukavile kumumanicha, alisi nene ndimumanicha. Na ulu ndiyomba ati, nkamumanikizye, nkuvi mulamba savasava kitisi inwe; alisi ndimumanicha na ndigulindila muhayo gwakwe.

56 Abrahamu, vava winwe, wihalalage ati alaluvone lusiku lwane, na waluvonaga na wadehaga.

57 Haho Vayahudi vamuwilaga, Veve utali kukula myaka makumi atano na wamuvonaga Abrahamu?

58 Yesu wavawilaga, Yalole, yalole ndimuwila inwe, aho Abrahamu atali kuvyalwa sanga nene ndiho.

59 Haho vagasolaga mawe vamutulagule nago; alisi Yesu wivisaga na wafumaga kwisengelo.

Nyamwezi New Testament © Bible Society of Tanzania, 1951.

Bible Society of Tanzania
Lean sinn:



Sanasan